Moronae i kamkamaot long Josef Smit

Hem i Bin Singaotem Mi long Nem blong Mi, i kam long Michael Malm

11–17 Jenuware

Doktrin mo Ol Kavenan 2; Josef Smit—Histri 1:27–65

“Hat blong Ol Pikinini Bae I Tanem I Go long Ol Papa blong Olgeta”

Blong yu stat blong rere, ridim Doktrin mo Ol Kavenan 2 mo Josef Smit—Histri 1:27–65. Ol aedia insaed long aotlaen ia i save helpem yu blong tijim ol trutok long ol sot ves ia.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Yu save statem klas mo askem ol pikinini blong serem wanem we oli save abaot visit blong enjel Moronae i go long Josef Smit.

tijing pikja bokis

Stap Tijim Doktrin: Ol Smol Pikinini

Josef Smit—Histri 1:27–54

Papa long Heven i bin singaotem Josef Smit blong helpem Hem blong mekem wok blong Hem.

Fasin blong ol pikinini blong gat bigfala tangkyu from Profet Josef Smit i save kam moa dip taem oli lanem abaot wok blong hem we God i singaotem hem blong mekem.

Samfala Aktiviti we Yu Save Mekem

• Soem wan pikja blong Moronae we i stap visitim Josef Smit (luk long Gospel Art Buk, namba 91). Askem ol pikinini blong poenemaot ol samting we oli luksave long pikja ia. Talemsot stori blong visit blong Moronae i go long Josef. Taem i nid, luk long Josef Smit—Histri 1:27–54 mo “Japta 3: Enjel Moronae mo Ol Buk we Oli Wokem long Gol” (Ol Doktrin mo Kavenan Stori, 13–17). Invaetem ol pikinini blong priten se oli Josef Smit long ol defren poen blong stori taem oli foldem ol han blong olgeta olsem se oli stap prea, mo priten se oli stap klaem Hil Kumora, mo i go.

• Ridim laod Josef Smit—Histri 1:33 mo askem ol pikinini blong stanap taem oli harem sot sentens ia “God i bin gat wan wok blong mi mekem.” ?Wanem nao God i wantem Josef blong mekem? ?Wanem nao Hem i askem blong yumi mekem? Letem ol pikinini oli droem ol pikja blong ol samting we God i wantem olgeta blong mekem, olsem prea, givim seves, o ridim ol skripja.

Doktrin mo Ol Kavenan 2

Elaeja i bin givim paoa long Josef Smit blong silim ol famli tugeta .

Blong stap lanem abaot paoa blong sil we i kambak bakegen long wol tru long Josef Smit i save helpem ol pikinini blong talem tangkyu from ol blesing blong ol famli we i no save finis.

Samfala Aktiviti we Yu Save Mekem

• Helpem ol pikinini blong talem nem ia “Elaeja” fulap taem smol. Askem olgeta blong lisin long nem ia taem yu stap rid Doktrin mo Ol Kavenan 2:1. Eksplenem se hemia ol toktok blong Moronae i go long Josef Smit, mo oli tijim se Elaeja bae i kam blong putumbak prishud atoriti. Afta we Elaeja i no bin kamkamaot long Josef long Ketlan Tempol mo givim long Profet paoa blong silim ol famli tugeta.

• Askem ol pikinini blong talem long yu wan samting we oli lavem abaot famli blong olgeta. Soem wan pikja blong wan famli narasaed long wan tempol—famli blong yuwan, sapos i posibol (o luk tu long Gospel Art Buk, namba 120). Testifae se, Papa long Heven i wantem yumi blong stap wetem ol famli blong yumi blong oltaem, mo from hemia nao, Hem i givim ol tempol long yumi.

• Tugeta, singsing long “Famli I Stap Tugeta Foreva” (Liahona, Epril 2013, 65). ? Wanem nao singsing ia i talem wanem yumi save mekem blong stap wetem famli blong yumi blong oltaem?

Doktrin mo Ol Kavenan 2

Blong stap lanem abaot ol bubu blong mi blong bifo i karem glad i kam long mi.

Iven ol smosmol pikinini i save stap glad abaot mo filim glad blong famli histri.

Samfala Aktiviti we Yu Save Mekem

• Invaetem wan mama o papa blong wan long ol pikinini blong kam long klas mo serem wan stori abaot wan bubu (mo soem wan pikja sapos i gat). Tokbaot glad ia we yu filim taem yu lanem abaot famli histri blong yu.

• Givim wan pepa hat long wanwan pikinini. Helpem olgeta blong raetem nem mo “Mi promes blong tingbaot ol bubu blong mi” long hem. Ridim Doktrin mo Ol Kavenan 2:2, mo eksplenem se Elaeja i kam blong tanem hat blong yumi i go long ol bubu blong yumi.

tijing pikja bokis

Stap Tijim Doktrin: Ol Bigfala Pikinini

Josef Smit—Histri 1:28–29

Mi save prea blong kasem fogivnes.

Ol pikinini we yu stap tijim, maet samtaem oli filim “se God i panisim [olgeta] from ol samting we [oli] no bin strong long olgeta, mo ol samting we [oli] no stret evriwan long olgeta,” (Josef Smit—Histri 1:29) olsem we Josef Smit i bin filim. Helpem olgeta blong lanem se oli save tanem olgeta i go long Papa long Heven blong kasem fogivnes.

Samfala Aktiviti we Yu Save Mekem

• Rid wetem ol pikinini Josef Smit—Histri 1:29. ?Olsem wanem nao Josef Smit i filim abaot ol mistek blong hem? ?Wanem nao hem i mekem abaot ol mistek blong hem? ?Wanem nao yumi save lanem aot long eksampol blong Josef we i save helpem yumi taem yumi mekem ol mistek? Askem ol pikinini se oli filim olsem wanem blong save se God i bin singaotem Josef nomata se hem i no stret evriwan.

• ?From wanem hem i impoten blong tingbaot “weaples nao mi stanap long fored blong [God]”? (Josef Smit—Histri 1:29). Talem long ol pikinini wanem bae yu mekem taem yu stap tingbaot weaples nao yu stanap long fored blong God.

Luk long Josef Smit—Histri 1:30–54

God i bin singaotem Josef Smit blong mekem wan impoten wok.

Blong stap stadi long mesej blong Moronae i go long Josef Smit i save helpem ol pikinini blong mekem testemoni blong olgeta i kam strong moa abaot tabu koling blong Josef.

Samfala Aktiviti we Yu Save Mekem

• Invaetem ol pikinini blong aktemaot o droem ol pikja blong ol samting we oli bin hapen mo oli tokbaot insaed long Josef Smit—Histri 1:30–54, olsem taem we Moronae i bin kamkamaot long Josef (ol ves 30–47), taem Josef i stap toktok long papa blong hem (ol ves 48–50), mo taem Josef i faenem ol buk we oli wokem long gol (ol ves 51–54). ?Wanem nao yumi lanem aot long stori ia abaot wok ia we oli bin singaotem Josef blong mekem?

• Rid wetem ol pikinini Josef Smit—Histri 1:33–35, mo askem olgeta blong lisin long wanem Moronae i bin wantem Josef blong save abaot wok ia we oli bin singaotem Josef blong mekem. ?Olsem wanem yumi bin kasem blesing from Josef Smit i bin mekem wok blong hem blong transletem Buk blong Momon? Invaetem ol pikinini blong ridim Buk blong Momon oltaem.

Doktrin mo Ol Kavenan 2

Papa long Heven i wantem ol famli blong sil long tempol.

Moronae i bin talem long Josef Smit se Elaeja bae i kam blong “soemaot… Prishud” (ves 1). Hemia i stap tokbaot paoa blong prishud blong silim man, we i mekem ol famli oli save kam wan blong taem we i no save finis, mo i mekem yumi save kasem ol odinens long bihaf blong ol bubu blong yumi long tempol.

Samfala Aktiviti we Yu Save Mekem

• Askem ol pikinini blong ridim profesi ia long Doktrin mo Ol Kavenan 2: 1. Askem olgeta blong lukaotem huia Lod bae i sendem long ol las dei, mo wanem nao bae man ia bae i soemaot o talemaot. Soem wan pikja blong Elaeja long Ketlan Tempol (luk long Gospel Art Buk, namba 95), mo tokbaot olsem wanem nao profesi ia i bin kam tru 13 yia afta long visit blong Moronae (luk long Doktrin mo Ol Kavenan 110:13–15).

• Eksplenem se Elaeja i bin putumbak long wol bakegen ol ki blong prishud we i mekem se ol famli oli save sil tugeta blong taem we i no save finis. Soem sam samting we i save helpem ol pikinini blong andastanem wanem i minim blong silim wan samting, olsem wan tin blong kakae o wan plastik bag blong storem ol samting we i gat wan sipa blong lokem. ?Olsem wanem nao ol samting ia oli save helpem yumi blong andastanem wanem i minim blong wan famli i sil?

• Soem wan pikja blong tempol, mo helpem ol pikinini blong talem sam samting we yumi stap mekem insaed long ol tempol. Eksplenem se baptaes blong ol dedman, mared we i no save finis, mo siling blong ol famli long tempol oli save hapen from ol ki blong prishud we Elaeja i bin putumbak long wol ia.

• Invaetem wan yang woman o man long wod blong serem wan eksperiens we hem i gat taem hem i bin faenem nem blong wan bubu blong hem mo i bin baptaes long tempol long bihaf blong bubu ia.

  Palmaera Niu Yok Tempol

  Ol famli oli bin sil long tempol tru long paoa ia we i bin kambak long wol ia tru long Elaeja.

stap lanem samting pikja bokis

Stap Leftemap Tingting blong Lanem Samting long Hom

Leftemap tingting blong ol pikinini blong askem long ol papa mo mama blong olgeta blong talem long olgeta wan stori abaot wan long ol bubu blong olgeta o helpem olgeta blong rere long wan kaekae we bubu ia i laekem tumas mo kakae tugeta.

Stap Kam Antap long Fasin blong Yumi blong stap Tij

Helpem ol smol pikinini blong lanem samting aot long skripja. Blong helpem ol smol pikinini blong lanem samting aot long skripja, lukluk long wan ves blong skripja nomo fastaem, o iven, wan impoten sot toktok nomo fastaem. Maet yu wantem invaetem wan pikinini blong stanap, o leftemap han taem oli harem toktok ia. (Luk long Teaching in the Savior’s Way,21

aktiviti pej: Mi save mekem famli histri blong mi