25–31 Jenuware

Doktrin mo Ol Kavenan 6–9

“Hemia I Spirit blong Revelesen”

Blong stat blong rere blong tij, ridim Doktrin mo Ol Kavenan 6–9. Kam Folem Mi—Blong Wanwan Man, Woman mo Famli mo aotlaen ia i save givim sam tingting abaot olsem wanem blong tijim ol pikinini long klas blong yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

?Ol pikinini oli save stori blong Oliva Kaodri we i bin kasem wan ansa long prea? (luk long Saints, 1:58–60). Maet olgeta tu i bin gat wan eksperiens wetem prea we oli save serem.

Tijim Doktrin: Ol Smol Pikinini

Doktrin mo Ol Kavenan 6:5; 8:2; 9:7–9

Papa long Heven i save toktok long yumi tru long Tabu Spirit.

Helpem ol pikinini blong andastanem se oli gat wan Papa long Heven we i gat lav, we i stap lisin long ol prea mo stap ansarem olgeta tru long Spirit blong Hem.

Samfala Aktiviti we Yu Save Mekem

• Yusum “Japta 5: Josef Smit mo Oliva Kaodri” (Ol Doktrin mo Kavenan Stori, 22–25, o vidio we i go wetem long ChurchofJesusChrist.org) blong talem long ol pikinini abaot Oliva Kaodri mo wanem Hem i bin lanem abaot olsem wanem Papa long Heven i stap toktok long yumi. Askem ol pikinini blong talem ol pat blong stori we oli laekem tumas, mo mekem olgeta oli stori long yu abaot Oliva Kaodri, wan afta narawan.

• Talem long ol pikinini se Oliva Kaodri i bin traem blong transletem Buk blong Momon be i no save, mekem Josef i bin askem long Lod from wanem. Ridim long ol pikinini ansa blong Lod: “Yu mas stadi gud long hem insaed long maen blong yu; afta; yu mas askem long mi sapos hem i raet” (Doktrin mo Ol Kavenan 9:8). Invaetem olgeta blong priten blong stadi mo prea. Helpem ol pikinini blong andastanem se, hemia tu, i olsem wanem yumi save kasem ol ansa long Lod—taem yumi stap stadi mo stap askem help blong Hem.

  

  Oliva Kaodri i kam long Lewis A. Ramsey

• Invaetem ol pikinini blong tajem hed blong olgeta mo jes blong olgeta taem yu ridim ol toktok ia “maen” mo “hat” Doktrin mo Ol Kavenan 8:2. Helpem olgeta blong andastanem se Papa long Heven i stap toktok long yumi tru long Tabu Spirit, we i givim ol tingting mo filing long yumi. Singsing tugeta wan singsing abaot Tabu Spirit, olsem “The Holy Ghost” (Children’s Songbook, 105). ?Wanem nao singsing ia i tijim abaot olsem wanem Spirit i stap toktok long yumi? Serem wan eksperiens blong wan taem we yu bin filim Tabu Spirit long maen mo hat blong yu.

Doktrin mo Ol Kavenan 6:33–36

Wetem help blong Sevya, mi no nid blong fraet.

Josef Smit mo Oliva Kaodri i gat fulap risen blong fraet—fasin blong givim hadtaem mo nogat samting i sam long ol jalenj nomo we oli bin fesem. Mesej blong Lod i go long Josef mo Oliva i save leftemap tingting blong ol pikinini tu taem oli filim fraet.

Samfala Aktiviti we Yu Save Mekem

• Askem ol pikinini blong ripitim sot sentens ia “smol grup, no fraet” (Doktrin mo Ol Kavenan 6:34) fulap taem. Eksplenem se wan “smol grup,” i wan grup blong ol animol, olsem sipsip. Soem wan pikja blong Sevya we i olsem wan man blong lukaot sipsip (luk long Gospel Art Buk, namba 64), mo testifae se Hem i stap lukaot long yumi olsem wan man blong lukaot sipsip i stap lukaot long ol sipsip blong Hem. From se Hem i lavem yumi, yumi no nid blong fraet.

• Mekem ol pikinini oli priten blong stap olsem wan grup blong sipsip we oli fraet. ?Wanem nao sipsip i stap fraet long hem samtaem? Mekem wan pikinini i priten blong stap olsem wan man blong lukaot sipsip we i stap lukaotgud blong ol sipsip oli sef. ?Wanem nao yumi stap fraet long hem samtaem? Talem testemoni blong yu se Jisas i olsem man blong lukaot long sipsip blong yumi mo Hem i save mekem ol fraet blong yumi i go daon. Singsing tugeta wan singsing abaot Sevya, olsem “Little Lambs So White and Fair” (Children’s Songbook, 58).

• Ridim Doktrin mo Ol Kavenan 6:36 i go long ol pikinini, mo invaetem olgeta blong ripitim sot sentens ia “no gat tu tingting, no fraet.” Helpem ol pikinini blong tingting long ol wei we oli save mekem blong “luk long,” o tingbaot, Sevya truaot long wik we i stap kam (luk tu long aktiviti pej blong wik ia).

Stap Tijim Doktrin: Ol Bigfala Pikinini

Doktrin mo Ol kavenan 6:5, 15–16, 22–23; 8:2; 9:7–9

Tabu Spirit i stap toktok long maen mo hat blong mi.

Maet ol pikinini we yu tijim i bin kasem presen ia we Tabu Spirit finis. ?Ol pikinini oli andastanem olsem wanem blong luksave revelesen blong yuwan we i kam long Tabu Spirit?

Samfala Aktiviti we Yu Save Mekem

• Droem long bod wan hed mo hat. Helpem ol pikinini blong ridim ol ves ia, mo talem stret wijwan nao i tokbaot gud Tabu Spirit we i stap toktok long maen blong yumi, long hat blong yumi, o long tugeta: Doktrin mo Ol Kavenan 6:15, 23; 8:2; 9:8; 9:9. Talem long ol pikinini, aot long ol eksperiens blong yu, se i olsem wanem taem Tabu Spirit i stap toktok long maen mo hat blong yu.

• Ridim tugeta Doktrin mo Ol Kavenan 6:5, mo invaetem ol pikinini blong serem ol eksperiens we oli bin gat taem oli bin stap prea mo kasem ol ansa. Helpem olgeta blong tingting long ol eksampol blong wan man insaed long ol skripja, we i bin prea mo kasem wan ansa long wan kwestin (luk long 1 Nifae 2:16; Inos 1:1–6; Ita 2:18–3:6).

• Raetem long bod ?Olsem wanem nao Tabu Spirit i toktok long yumi? Invaetem ol pikinini blong luklukgud insaed long Doktrin mo Ol Kavenan 6:15–16, 22–23; 8:2; 9:7–9 mo kasem ol ansa long kwestin ia. Serem wan eksperiens blong wan taem we yu bin filim Tabu Spirit i toktok long yu.

Doktrin mo Ol Kavenan 6:33–37

“No fraet blong mekem gud.”

Maet ol pikinini we yu tijim bae i filim fraet blong stanap from samting we i raet. Doktrin mo Ol Kavenan 6:33–37 i save givim insperesen long olgeta blong no fraet, o gat strong paoa long tingting, iven long ol had situesen.

Samfala Aktiviti we Yu Save Mekem

• Ridim tugeta Doktrin mo Ol Kavenan 6:33, mo toktok raon long from wanem wan man i save fraet blong mekem gud samting (luk tu long ol ves 28–29). Helpem ol pikinini blong faenem ol toktok mo sot sentens long ol ves 33–37 we i save help blong leftemap tingting blong olgeta blong mekem gud.

• Helpem ol pikinini blong mekem ol droing we oli save putum long ol hom blong olgeta blong rimaenem olgeta blong “lukluk long [Jisas Kraes] long evri tingting” (ves 36). Taem oli stap mekem ol droing blong olgeta, toktok raon long wanem i minim blong lukluk long Sevya mo olsem wanem i save kipim olgeta i sef.

• Singsing tugeta wan singsing abaot strong paoa long tingting, olsem “Gud Wok Oltaem, Stret Laef Oltaem” (Singsing Tabu mo Singsing blong Ol Pikinini, pej 64) o “Yumi Mas Gohed” (Singsing Tabu mo Singsing blong Ol Pikinini, pej 10). Askem ol pikinini blong faenem, insaed long singsing ia, sam risen from wanem yumi “no [mas] fraet” (ves 36).

Doktrin mo Ol Kavenan 8:10

Mi save askem long fet.

Truaot long ol skripja, Lod i rimaenem yumi blong gat fet long Hem. ?Olsem wanem nao yu save helpem ol pikinini we yu stap tijim, blong oli gat wan fet long Jisas Kraes, we i bigwan moa?

Samfala Aktiviti we Yu Save Mekem

• Raetem long bod Tingbaot se sapos yu no gat yu no save mekem wan samting; taswe askem wetem . Invaetem ol pikinini blong traem blong tingting long wan toktok we i stret blong go insaed long tugeta spes we i no gat samting long hem. Afta ridim tugeta Doktrin mo Ol kavenan 8:10 blong faenem ansa. ?Wanem sam samting yumi save mekem sapos yumi gat fet?

• Ridim tugeta Doktrin mo Ol Kavenan 8:10, mo afta, helpem ol pikinini blong tingting long sam samting we oli save askem help blong Lod wetem. Invaetem olgeta blong droem wan pikja we i ripresentem samting we oli wantem askem. Taem oli stap soem ol pikja blong olgeta long klas, mekem evri pikinini i traem blong faenem se, wanem nao pikja ia i stap ripresentem.

Stap Leftemap Tingting blong Lanem Samting long Hom

Helpem ol pikinini blong jusum wan sot sentens long Doktrin mo Ol Kavenan 6–9 we bae oli laekem blong serem wetem wan man long haos, olsem “no fraet blong mekem gud” (6:33), “no gat tu tingting, no fraet” (6:36), o “tingbaot se sapos yu no gat fet, yu no save mekem wan samting” (8:10).

Stap Kam Antap long Fasin blong Yumi blong Stap Tij

Yusum ol stori. Ol stori oli helpem ol pikinini blong andastanem ol prinsipol blong gospel from se oli soemaot olsem wanem ol narafala man oli laef folem ol prinsipol ia. Taem yu stap tij, faenem ol wei blong yusum tu long stori—we i kam long skripja, we i kam long Jos Histri, o we i kam long laef blong yuwan—we i soem eksampol blong ol prinsipol long ol skripja.