Tabu Bus, i kam long Greg K. Olsen

4–10 Jenuware

Josef Smit—Histri 1:1–26

“Mi Bin Luk Wan Laet, I Saen Antap I Kamdaon”

Taem yu stap stadi long ol skripja, tingting long ol pikinini we yu stap tijim. Tabu Spirit bae i givim insperesen long yu, tru long ol tingting we bae yu kasem, blong save wanem blong lukluk moa long hem long klas.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem sam pikinini blong serem wanem oli save abaot Josef Smit mo prea blong hem long Tabu Bus (blong soem wan pikja blong Fas Visen bae i help). Askem long olgeta olsem wanem oli filim taem oli harem se Papa long Heven mo Jisas Kraes i bin visitim Josef Smit. Sapos Josef Smit bae i visitim klas blong yumi, ?wanem nao bae yumi askem hem abaot eksperiens blong hem?

Stap Tijim Doktrin: Ol Smol Pikinini

Josef Smit—Histri 1:3–20

Josef Smit i bin rere blong kam long wan profet blong God.

Sapos ol pikinini oli stap lan abaot yangfala taem blong Josef Smit, i save helpem olgeta blong oli komperem olgeta long Josef Smit, mo lan aot long ol eksperiens blong hem. Maet yu save helpem olgeta blong luk olsem wanem, eksperiens blong Josef, olsem wan boe, i bin mekem hem i rere blong kam wan profet blong God.

Samfala Aktiviti we Yu Save Mekem

• Askem wan pikinini blong holem wan pikja blong Josef Smit (luk long Gospel Art Buk, namba 87) taem yu stap serem sam tru samting abaot Josef, we yu faenem insaed long Josef Smit—Histri 1:3–14 (luk tu long “Japta 1: Josef Smit mo Famli blong Hem,” Ol Doktrin mo Kavenan Stori, 6–8, o vidio we i go wetem long ChurchofJesusChrist.org). Helpem olgeta blong komperem ol ditel abaot famli mo laef blong hem mo hemia blong olgetawan. Serem testemoni blong yu se God i bin jusum Josef, mo i bin mekem hem i rere blong stap wan profet (luk long “Ol Voes blong Restoresen: Famli blong Josef Smit,” insaed long Kam Folem Mi—Blong Wanwan Man, Woman mo Famli). Sapos i nid, tijim ol pikinini se, wan profet, i wan we i toktok long bihaf blong God.

• Invaetem wan yang man long wod blong kam visitim klas blong yu mo i priten se hem i Josef Smit. Rere long samfala kwestin blong ol pikinini oli askem hem, we ansa blong ol i stap insaed long Josef Smit—Histri 1:3–20 (yu save serem ol kwestin ia wetem yang man ia, longtaem bifo hem i kam long klas). Afta, invaetem yang man ia blong hem i ridim samfala stret toktok blong Josef Smit abaot Fas Visen (eksampol: Josef Smit—Histri 1:25).

Josef Smit—Histri 1:10–17

Papa long Heven i harem mo ansarem ol prea blong mi.

Eksperiens blong Josef Smit i save givim insperesen long ol pikinini blong oli prea wetem fet se bae God i harem olgeta.

Samfala Aktiviti we Yu Save Mekem

• Talem long ol pikinini abaot ol kwestin we Josef Smit i bin gat (luk long Josef Smit—Histri 1:10). ?Wanem nao yumi save mekem taem yumi gat ol kwestin abaot God? Soem wan kopi blong Baebol long ol pikinini, mo eksplenem se taem Josef i ridim Baebol, hem i bin lanem se hem i save “askem long God” (Jemes 1:5; luk tu long Gospel Art Buk, namba 89). Serem testemoni blong yu se yumi save askem ol kwestin long God tru long prea.

• Tokbaot wan eksperiens long wan taem we yu bin konfius, askem God blong help, mo kasem wan ansa. Helpem ol pikinini blong tingbaot ol taem we oli bin kasem ansa long ol prea blong olgeta. Yu save serem tu stori we i kam long ol magasin blong Jos abaot wan pikinini we i bin kasem ansa long prea blong hem.

Josef Smit—Histri 1:17–19

Josef Smit i bin luk Papa long Heven mo pikinini blong Hem, Jisas Kraes.

Yu save helpem ol pikinini blong statem wan fandesen blong wan strong testemoni long Fas Visen blong Josef Smit. Serem wetem olgeta olsem wanem nao yu bin kasem testemoni blong yu tru long impoten taem ia.

Samfala Aktiviti we Yu Save Mekem

• Soem pikja blong Fas Visen long aotlaen blong wik ia insaed long Kam Folem Mi—Blong Wanwan Man, Woman mo Famli, mo serem long ol toktok blong yuwan wanem i bin hapen taem Josef i prea. Invaetem ol pikinini blong dro ol pikja blong stori ia olgetawan.

• Invaetem ol pikinini blong kalarem aktiviti pej blong wik ia mo yusum blong tokbaot stori blong Fas Visen (luk tu long “Japta 2: Fas Visen blong Josef Smit,” Ol Stori long Doktrin mo Ol Kavenan, 9–12, o vidio we go wetem long ChurchofJesusChrist.org).

• Ridim Josef Smit—Histri 1:17, mo poenemaot long ol pikinini ol toktok we Papa God long Heven i bin talem long Josef Smit.

Stap Tijim Doktrin: Ol Bigfala Pikinini

Josef Smit—Histri 1:10–13

God i save ansarem ol kwestin blong mi tru long ol skripja.

Josef Smit i bin kasem insperesen tru long sam ves we hem i ridim long Baebol, mo hemia i lid i go long Fas Visen mo Restoresen blong Jos blong Kraes. Helpem ol pikinini blong luk hao blong stap stadi ol skripja i save helpem olgeta blong faenem ol ansa long ol kwestin blong olgeta long saed blong spirit.

Samfala Aktiviti we Yu Save Mekem

• Soem long ol pikinini ol defren buk (olsem wan ensiklopedia o buk blong kuk), mo helpem olgeta blong tingting long ol kwestin we ol buk ia i save ansarem. Afta soem long olgeta wan kopi blong ol skripja. ?Wanem ol kwestin we ol buk ia i save ansarem? Yu save givim wan eksampol blong wan kwestin we oli bin ansarem insaed long ol skripja. Ridim tugeta Josef Smit—Histri 1:10–11 blong faenem aot ol kwestin we Josef Smit i bin gat mo wanem ol ansa Hem i bin faenem long ol skripja.

• Helpem ol pikinini blong faenem ol toktok long ves 12 we i tokbaot gud olsem wanem taem Josef Smit i ridim Jemes 1:5 i bin gat paoa long hem. Serem wan eksperiens we yu bin gat wetem ol skripja—eksampol, taem yu bin faenem wan ansa long wan long ol kwestin blong yu taem yu stap rid tru long ol skripja. Singsing tugeta “Search, Ponder, and Pray” (Children’s Songbook, 109).

Josef Smit—Histri 1:10–19

Papa long Heven i harem mo ansarem ol prea blong mi.

God i bin save Josef Smit, mo taem Josef i bin prea, God i bin harem hem. Nomata ol eksperiens blong ol pikinini we yu stap tijim maet i defren long hemia blong Josef, yu save helpem olgeta blong filim se God i save olgeta mo i stap harem olgeta taem oli prea.

Samfala Aktiviti we Yu Save Mekem

• Invaetem wan papa o mama blong wan long ol pikinini blong stanap aotsaed long klasrum mo ansarem ol kwestin we i kam long ol pikinini folem ol defren wei olsem blong sendem wan teks mesej, ring long fon, raetem wan not, o sendem wan mesenja. ?Wanem sam long ol wei we Papa long Heven i stap toktok wetem yumi? (luk long “Revelesen,” Gaed long Ol Skripja, olskripja.ChurchofJesusChrist.org). Folem wanem we i stap long Josef Smit—Histri 1:16–19, ?hao nao Papa long Heven i ansarem prea blong Josef Smit? ?Olsem wanem Hem i bin ansarem ol prea blong yumi?

• Singsing tugeta “A Child’s Prayer” (Children’s Songbook, 12–13).

  

  God i stap harem mo ansarem ol prea blong yumi.

Josef Smit—Histri 1:14–19, 25

Papa long Heven mo Jisas Kraes i bin kamkamaot long Josef Smit.

Wanwan long ol pikinini we yu stap tijim i nidim wan testemoni long eksperiens Josef Smit long Tabu Bus. ?Olsem wanem nao yu save helpem ol pikinini blong kasem mo mekem testemoni blong olgeta i kam moa strong?

Samfala Aktiviti we Yu Save Mekem

• Blong lukluk bak long stori blong Fas Visen, raetem ol sot sot ves we i kam long Josef Smit—Histri 1:14–19 long wan nara pis blong pepa. Putum ol pepa long wan kontena, mo invaetem ol pikinini blong jusum wan afta narawan mo putum olgeta long bod long stret oda.

• Invaetem ol pikinini blong sarem ol ae blong olgeta mo pikjarem olsem wanem i fil blong stap olsem Josef taem yu stap ridim samfala pat long Josef Smit—Histri 1:14–17. Askem olgeta blong serem ol tingting mo filing blong olgeta abaot eksperiens blong Josef.

• Soem vidio ia, “Ask of God: Joseph Smith’s First Vision” (ChurchofJesusChrist.org) mo askem ol pikinini blong serem wan samting oli lanem abaot visen blong Josef Smit we hem i luk Papa long Heven mo Jisas Kraes.

• Ridim tugeta testemoni blong Josef long Josef Smit—Histri 1:25. Askem ol pikinini blong lukaotem ol toktok mo sot sot sentens we i soem fet blong Josef. ?Olsem wanem nao yumi save stap fetful long God mo long ol testemoni blong yumi taem ol nara man oli no agri wetem yumi?

Stap Leftemap Tingting blong Lanem Samting long Hom

Invaetem ol pikinini blong serem stori blong Fas Visen blong Josef Smit wetem wan man—mo sapos i posibol, wetem wan man we i neva bin harem bifo. Oli save yusum aktiviti pej blong wik ia blong helpem olgeta blong talem stori.

Stap Kam Antap long Fasin blong Yumi blong Stap Tij

Leftemap tingting blong gat fasin blong stap kwaet. Blong rimaenem ol pikinini blong stap revren, maet yu wantem singsing o ham long wan singsing, soem wan pikja blong Jisas Kraes, o yusum wan saen long han we ol pikinini oli luksave.