28 Disemba–3 Jenuware

Doktrin mo Ol Kavenan 1

“Lisin Gud, O Yufala Ol Pipol”

Ol fas step blong stap rere blong tij hem i blong stadi wetem prea Doktrin mo Ol Kavenan 1. Taem yu stap mekem hemia, lisin long wanem Tabu Spirit i talem abaot ol nid blong ol pikinini, mo lukaotem ol prinsipol we bae i gat mining long olgeta. Ol filing ia bae i helpem yu blong mekem plan blong ol aktiviti we i gat mining blong tijim ol prinsipol ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Holem buk blong Doktrin mo Ol Kavenan antap, mo askem ol pikinini blong oli serem wanem we oli save abaot buk ia. ?Huia i raetem? ?Wanem i stap insaed long hem? ?From wanem i impoten? Blong help, yu save luk long “Japta 23: Doktrin mo Ol Kavenan” (Ol Doktrin mo Kavenan Stori, 90–92). Serem hamas yu lavem Doktrin mo Ol Kavenan mo hamas yu wantem tumas blong lan long hem long yia ia.

Stap Tijim Doktrin: Ol Smol Pikinini

Doktrin mo Ol Kavenan 1:4.

Tru long ol profet blong Hem, Lod i wonem yumi abaot ol denja long saed blong spirit.

Lod i talemaot se voes blong Hem i wan “voes blong woning.” ?Olsem wanem nao bae yu givim insperesen long ol pikinini blong oli save harem mo obei long ol woning we Hem i stap givim?

Samfala Aktiviti we Yu Save Mekem

• Mekem ol pikinini oli holem ol pikja blong ol saen blong woning—olsem ol rod sefti saen, hemia blong nogud weta, o posen—mo tokbaot olsem wanem oli stap wonem yumi abaot denja. O, talem wan stori abaot wan taem we yu bin obei long wan woning. Komperem ol woning ya long ol woning we Lod i stap givim long yumi tru long ol profet blong Hem. Testifae se Hem i stap wonem yumi from Hem i lavem yumi mo Hem i wantem yumi blong stap sef (luk tu long aktiviti pej blong wik ia.)

• Ridim long ol pikinini long Doktrin mo Ol Kavenan 1:4: “Mo voes blong woning ia bae i stap go aot long evri pipol.” Serem wan samting we profet i bin tijim i no longtaem we i save kipim yumi sef. Soem ol pikja we oli go wetem, sapos i posibol. Tokbaot olsem wanem nao yu stap folem kaonsel blong profet.

Doktrin mo Ol Kavenan 1:17, 29

Josef Smit i fas profet blong God.

Taem yu wetem ol pikinini i stat blong stap stadi Doktrin mo Ol Kavenan, helpem olgeta blong bildim ol testemoni blong olgeta long saed blong tabu koling blong Josef Smit.

Samfala Aktiviti we Yu Save Mekem

• Soem wan pikja blong Profet Josef Smit (luk long Kam Folem Mi—Blong Wanwan Man, Woman mo Famli; luk tu long Gospel Art Buk, namba 87). Askem ol pikinini blong stanap narasaed long pikja mo serem wanem oli save abaot Josef Smit.

• Mekem ol pikinini oli holem antap, wan pikja blong Sevya mo wan pikja blong Josef Smit. Toktok long olgeta abaot wanem Sevya i givim long yumi tru long Josef Smit, olsem ol komanmen (luk long ves 17) mo Buk blong Momon (luk long ves 29). Talem long ol pikinini se insaed long Doktrin mo Ol Kavenan bae oli lanem abaot ol komanmen we Lod i bin givim long Jos tru long Josef Smit.

• Serem ol filing blong yu abaot Josef Smit, mo testifae se God i “bin singaotem wokman blong mi, Josef Smit Junia, mo mi stap long heven mo toktok long hem” (ves 17).

Doktrin mo Ol Kavenan 1:38

Ol toktok blong profet oli ol toktok blong God.

Maet ol pikinini we yu stap tijim i bin harem Presiden blong Jos i toktok, be maet bae oli no luksave se ol toktok blong hem i kam long God. Helpem olgeta blong lan blong luksave ol toktok blong profet olsem ol toktok blong God.

Samfala Aktiviti we Yu Save Mekem

• Pleplei wan simpol gem mo givim ol instraksen long wan pikinini mo askem hem blong ripitim ol instraksen ia long ol nara pikinini. Helpem olgeta blong luksave se, blong folem ol instraksen blong pikinini ia, i semmak olsem blong folem ol instraksen blong yu, mo, blong stap folem profet i semmak olsem blong stap folem Lod. Ridim long olgeta las laen blong Doktrin mo Ol Kavenan 1:38: “Nomata oli kamaot tru long voes blong miwan o tru long voes blong ol wokman blong mi, i semmak.”

• Sing tugeta wan singsing abaot ol profet, olsem las ves blong “Follow the Prophet” (Children’s Songbook, 110–11). Serem testemoni blong yu se profet i stap talem ol toktok blong God.

• Serem wan pikja, rekoding, vidio blong profet we i stap laef. Talem testemoni blong yu se profet i stap talem long yumi wanem God i wantem yumi blong save. Invaetem ol pikinini blong serem olsem wanem nao oli stap filim abaot profet.

  

  Profet i tijim yumi wanem God i wantem yumi blong save.

Stap Tijim Doktrin: Ol Bigfala Pikinini

Doktrin mo Ol Kavenan 1:15–17, 29–30

Lod i bin save ol jalenj we bae yumi fesem, mekem Hem i putumbak gospel blong Hem i kambak long wol bakegen tru long Josef Smit.

Yu save helpem ol pikinini blong oli rere blong fesem ol jalenj long fiuja taem yu stap tijim olgeta olsem wanem Restoresen blong gospel i givim proteksen long saed blong spirit.

Samfala Aktiviti we Yu Save Mekem

• Helpem ol pikinini blong tingting long sam long ol problem long wol tedei. Luklukbak long Doktrin mo Ol Kavenan 1:15–16 wetem olgeta, mo helpem olgeta blong luksave sam long ol problem we Lod i bin profesae se bae i hapen. Invaetem olgeta blong faenemaot long ol ves 17 mo 29–30 wanem Lod i bin mekem blong helpem yumi fesem ol jalenj blong taem blong yumi.

• Askem ol pikinini blong pikjarem long maen blong olgeta se oli stap rere blong wan trip. ?Wanem nao bae oli fulumap? ?Olsem wanem nao bae i helpem olgeta blong save se bae i ren long taem blong trip blong olgeta, o se bae wil blong trak blong olgeta bae i flat? Ridim tugeta ves 17, mo tokbaot raon wanem Lod i bin save wanem bae i hapen long yumi mo olsem wanem Hem i bin rere from. (Sapos i nid, eksplenem se “bigfala trabol” i wan disasta o wan samting we i nogud tumas.) ?Olsem wanem nao ol komanmen blong God i helpem yumi blong fesem ol jalenj blong taem blong yumi?

Doktrin mo Ol Kavenan 1:30

Jos Ia blong Jisas Kraes blong Ol Lata-dei Sent i “jos ia [blong Lod], we i tru mo i stap laef.”

?Olsem wanem nao yu save helpem ol pikinini blong stap talem tangkyu long ol bigfala blesing from se yu pat blong “jos we i tru mo i stap laef”?

Samfala Aktiviti we Yu Save Mekem

• Invaetem ol pikinini blong listim sam samting we oli stap laef mo sam samting we oli no laef (sapos i posibol, karem sam pikja o eksampol). ?Wanem i defren bitwin wan samting we i laef mo wan samting we i no laef? Ridim tugeta ves 30. ?I minim wanem se Jos i “tru”? Mo ?i minim wanem se i “stap laef”?

• Soem wan pikja blong tempol, olsem wan peinting blong Sevya, mo askem ol pikinini blong tokbaot gud peinting ia taem oli ofem ol laet long rum ia. Yusum aktiviti blong helpem ol pikinini blong luksave se fulap man oli luk se, tru Jos Ia blong Sevya i stap long “tudak” mo ol man oli “no save”. ?Olsem wanem nao yumi save helpem ol nara man blong lanem abaot Jos?

Doktrin mo Ol Kavenan 1:37–38

Toktok blong Lod i stap mo i no gat en.

Yu save helpem ol pikinini blong bildim fet blong olgeta long Jisas Kraes taem yu stap tijim olgeta se toktok blong Hem i tru mo yu save dipen long hem.

Samfala Aktiviti we Yu Save Mekem

• Helpem ol pikinini blong komperem ol samting we i blong naoia nomo, olsem wan ea balong, o wan asis blong aes, wetem ol samting we oli blong oltaem, olsem wan maonten o san. Askem olgeta blong faenem long ol ves 37–38 wan samting we Lod i bin talem se i blong oltaem. ?From wanem i wan blesing blong save se toktok blong God “i no save lus”?

• Helpem ol pikinini blong andastanem se “voes blong ol wokman blong mi” i ol voes blong ol aposol mo profet blong yumi tu. Helpem ol pikinini blong faenem “ol profesi mo ol promes” long wan toktok we i kamaot long wan long ol wokman blong Lod long wan jeneral konfrens we i bin hapen i no longtaem i pas. Talem testemoni blong yu se ol toktok ia oli kam tru long insperesen tru long Lod mo “bambae evriwan oli kamtru.”

Stap Leftemap Tingting blong Lanem Samting long Hom

Luklukbak wetem ol pikinini wanem oli bin lanem tedei, mo invaetem olgeta blong jusum wan samting we oli filim se evriwan i mas save long hem. Leftemap tingting blong olgeta blong serem wetem wan fren o memba blong famli.

Stap Kam Antap long Fasin blong Yumi blong Stap Tij

Ol pikinini oli stap lanem samting long plante fasin. “Evri pikinini i no semmak, mo wanwan pikinini i stap kam antap hariap. Ol traehad blong yu blong tijim ol pikinini bae i gat moa paoa taem yu yusum ol defren wei blong tij,” wetem ol stori, ol pikja, mo miusik (Teaching in the Savior’s Way, 25).