ol pipol oli stap wok long garen

Taem blong Pikimap Kaekae long Franis, i kam long James Taylor Harwood

18–24 Jenuware

Doktrin mo Ol Kavenan 3–5

“Wok blong Mi I Mas Gohed”

Taem yu stap stadi long Doktrin mo Ol Kavenan 3–5, bae ol tingting mo filing oli kam long yu abaot wanem ol pikinini we yu stap tijim olgeta i nidim. Ol aktiviti long aotlaen ia i save help blong givim sam aedia long yu.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Soem pikja blong Josef Smit long aotlaen blong wik ia long Kam Folem Mi—Blong Wanwan Man, Woman mo Famli, mo helpem ol pikinini blong serem wanem oli save abaot wanem stori pikja ia i stap tokbaot. Helpem olgeta blong tingbaot stori blong Martin Haris we i lusum ol fas pej blong translesen blong Buk blong Momon (luk long“Japta 4: Martin Haris mo Ol Pej we Oli Bin Lus,” Ol Doktrin mo Kavenan Stori, 18–21; o Saints, 1:51–56).

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 3:7–10

Mi save jusum raet taem ol narawan oli traem blong mekem mi mekem rong samting.

Helpem ol pikinini blong lanem wanem Josef Smit i bin lanem: sapos oli trastem Papa long Heven, Hem bae i stap “wetem [olgeta] long evri taem blong trabol” (Doktrin mo Ol Kavenan 3:–8).

Samfala Aktiviti we Yu Save Mekem

• Luklukbak long stori blong Martin Haris mo ol pej blong skripja we oli bin lus (luk long Ol Doktrin mo Kavenan Stori, 18–21, o vidio we i go wetem long ChurchofJesusChrist.org). Serem wetem ol pikinini sam long situesen we i save hapen taem we maet oli wantem blong mekem wan samting we oli save se i no stret. ?Olsem wanem nao Papa long Heven i helpem yumi blong jusum raet? (luk long Doktrin mo Ol Kavenan 3:8).

  Martin Haris

  Martin Haris, i kam long Lewis A. Ramsey

• Ridim ol toktok ia long Doktrin mo Ol Kavenan 3:8: “Bae God i save stretem han blong Hem i kam long yu mo sapotem yu.” Invaetem ol pikinini blong stanap mo openem ol han blong olgeta taem yu ridim sot sentens ia bakegen. Serem wetem olgeta sam wei we Lod i save openem han blong Hem blong helpem olgeta taem ol narawan oli stap traem blong mekem olgeta blong mekem ol samting we oli no stret. Mekem olgeta i openem han blong olgeta wan afta wan, taem oli stap talemaot ol nara wei blong Lod i pusum han blong Hem i helpem yumi.

Doktrin mo Ol Kavenan 4

Lod i nidim mi blong mekem wok blong Hem.

Ol pikinini oli save “stat blong mekem wok blong God” (Doktrin mo Ol Kavenan 4:2) long fulap wei mo oli save rere naoia from sam moa janis long fiuja.

Samfala Aktiviti we Yu Save Mekem

• Ridim Doktrin mo Ol Kavenan 4:1 long ol pikinini. Karem sam pikja we i soemaot wok blong God long ol las dei ia we “i gud tumas” (olsem ol pikja blong ol misinari, ol tempol, mo Buk blong Momon). Mekem ol pikinini oli gat janis blong jusum wan pikja mo tokbaot. Serem from wanem nao wok blong Lod i gud tumas long yu.

• Helpem ol pikinini blong tingting long ol aksen o droem ol pikja we oli soemaot aksen we i stap long sot sentens ia “wok blong hem wetem ful hat, ful paoa blong tingting, ful maen mo paoa blong yufala” (Doktrin mo Ol Kavenan 4:2). Serem wan eksampol blong wan man we yu save we i stap wok blong God long wei ia.

• Singsing tugeta wan singsing abaot misinari wok, olsem “I Want to Be a Missionary Now” (Children’s Songbook, 168). Toktok raon long wanem nao singsing ia i tijim abaot wei we yumi save helpem God blong mekem wok blong Hem.

Doktrin mo Ol Kavenan 5:10

Yumi bin kasem toktok blong God tru long Josef Smit.

?Olsem wanem nao yumi save helpem ol pikinini blong mekem testemoni blong olgeta i kam moa strong se Josef Smit mo ol nara profet oli stap tijim tok blong God?

Samfala Aktiviti we Yu Save Mekem

• Haedem wan pikja blong Josef Smit samples long rum (luk long Gospel Art Buk, namba 87). Ridim Doktrin mo Ol Kavenan 5:10, mo invaetem ol pikinini blong lukaotem pikja ia blong faenemaot huia toktok ia “yu” i stap tokbaot. Serem testemoni blong yu se yumi bin kasem tok blong God tru long Josef Smit.

• Soem long ol pikinini ol kopi blong Buk blong Momon mo Doktrin mo Ol Kavenan. Eksplenem se God i bin givim ol skripja ia tru long Josef Smit. Serem sam long ol ves we yu laekem tumas aot long ol buk ia, mo talem from wanem yu glad from olgeta.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 3:5–10; 5:21–22

Mi mas kea moa blong mekem God i glad long mi bitim blong mekem ol narawan i glad long mi.

Taem ol pikinini oli stap lanem abaot eksperiens blong Josef Smit wetem ol pej Buk blong Momon we oli bin transletem mo oli bin lus, oli save kasem insperesen blong gohed blong stap fetful taem ol narawan oli traem blong temtem olgeta blong no obei.

Samfala Aktiviti we Yu Save Mekem

• Sam dei bifo klas, invaetem wan long ol pikinini blong kam long klas mo rere blong serem wan stori blong Josef Smit mo Martin Haris we oli bin lusum ol fas pej blong translesen blong Buk blong Momon (luk long Ol Doktrin mo Kavenan Stori, 18–21; o Saints, 1:51–56). Ridim tugeta Doktrin mo Ol Kavenan 3:5–8; 5:21–22, mo lukaotem ol blesing we oli kam taem yumi gohed blong stap tru long God.

• Givim taem long ol pikinini blong tingting long wan taem we maet wan fren i wantem blong mekem olgeta blong mekem wan samting we i rong. Invaetem olgeta blong faenem wan sam stori ves long Doktrin mo Ol Kavenan 3:5–8; 5:21–22 we i save helpem olgeta long ol situesen olsem ia. Mekem wan rol plei blong soem sam eksampol.

Doktrin mo Ol Kavenan 4

Lod i nidim mi blong mekem wok blong Hem.

Doktrin mo Ol Kavenan 4 i save givim insperesen long ol pikinini blong stap olsem wan pat blong wok blong Lod we “i gud tumas” (ves 1).

Samfala Aktiviti we Yu Save Mekem

• Raetem long bod Wok blong God. Invaetem ol pikinini blong lukaotem Doktrin mo Ol Kavenan 4 mo mekem wan lis blong ol samting we oli lanem abaot wanem i minim blong wok blong God. Askem olgeta blong ademap long lis ia ol samting we oli lanem long singsing ia “I Will Be Valiant” (Children’s Songbook, 162) o wan nara singsing abaot blong stap wok blong God.

• Karem ol tul (o pikja blong tul) we wan man bae i yusum blong wok long garen. ?Olsem wanem nao ol tul ia oli helpem yumi? Helpem ol pikinini blong faenem ol samting long Doktrin mo Ol Kavenan 4:5–6 we i save stap olsem ol tul blong mekem wok blong God.

• Invaetem ol fultaem o wod misinari blong serem wan samting long Doktrin mo Ol Kavenan 4 we i bin givim insperesen long olgeta blong mekem wok blong God. ?Wanem nao yumi save mekem blong help wetem wok blong God?

Doktrin mo Ol Kavenan 5: 1–-7, 11, 16, 23–24

Mi save stap olsem wan witnes se Buk blong Momon i tru.

Martin Haris i bin kasem promes se hem i save wan long ol witnes blong ol buk we oli wokem long gol sapos hem i fetful. Bae yumi no luk ol buk ia olsem we Marin i bin luk, be yumi save kasem witnes long saed blong spirit abaot Buk blong Momon. ?Olsem wanem nao yu save helpem ol pikinini blong kam antap mo serem witnes blong olgetawan abaot Buk blong Momon?

Samfala Aktiviti we Yu Save Mekem

• Raetem ol kwestin we oli stap long bod, mo helpem ol pikinini blong faenem ol ansa long Doktrin mo Ol Kavenan 5:1–3, 7, 11: ?Wanem nao Martin Haris i bin wantem blong save? ?Huia nao Josef Smit i bin save soem ol buk we oli wokem long gol? ?From wanem bae i no inaf blong winim tingting blong wan man se Buk blong Momon i tru sapos Hem i luk ol buk we oli wokem long gol?

• Askem ol pikinini wanem ia wan witnes, mo from wanem wan witnes i impoten. ?Wanem nao Martin Haris i nid blong mekem blong kam wan witnes blong ol buk ia we oli wokem long gol? (luk long Doktrin mo Ol Kavenan 5:23–24). Nomata yumi no bin luk ol buk we oli wokem long gol, ?wanem nao yumi save mekem blong kam ol witnes blong Buk blong Momon? (luk long Doktrin mo Ol Kavenan 5:16; Moronae 10:3–5).

stap lanem pikja bokis

Stap Leftemap Tingting blong Lanem Samting long Hom

Leftemap tingting blong ol pikinini blong raetem ol testemoni blong olgeta abaot Buk blong Momon mo serem wetem wan man we oli save.

Stap Kam Antap long Fasin blong Yumi blong Stap Tij

Jenisim ol aktiviti blong mitim nid blong ol pikinini wetem disabiliti. Ol smosmol jenis long ol aktiviti i save mekemsua se evri pikinini i save lan aot long olgeta. Eksampol: Sapos i gat wan aktiviti we insaed, oli mas soem wan pikja, yu save singsing wan singsing nomo blong mekem se pikinini we i no save luk samting, bae i save tekpat tu.

aktiviti pej: Mi save help blong mekem wok blong Lod