Taem blong Pikimap Kaekae long Franis, i kam long James Taylor Harwood

18–24 Jenuware

Doktrin mo Ol Kavenan 3–5

“Wok blong Mi I Mas Gohed”

Raetemdaon wanem yu stap lanem mo filim taem yu stap stadi long ol skripja. Bambae hemia i helpem yu tu blong tingbaot ol filing mo tingting we yu bin kasem, mo serem olgeta wetem ol narawan.

Raetemdaon Ol Filing mo Tingting blong Yu

Long ol fasfala yia blong hem olsem profet blong Lod, Josef Smit i no bin save yet evri samting abaot “gudfala wok” ia we God i bin singaotem hem blong mekem. Be wan samting we ol fasfala eksperiens blong hem i bin tijim hem, hem i we, blong kwalifae from wok ia blong God, ae blong hem i rili mas “lukluk nomo long glori blong God” (Doktrin mo Ol Kavenan 4:1, 5). Eksampol. Sapos Lod i bin givim hem kaonsel ia we i go agensem ol stret tingting blong hem, bae Josef i mas folem nomo kaonsel blong Lod. Mo iven we sapos hem i bin “kasem plante revelesen, mo i gat paoa blong mekem plante bigfala wok,” long ae blong hem, sapos tingting blong hem i kam moa impoten bitim tingting blong God, bae “hem i mas foldaon” (Doktrin mo Ol Kavenan 3:4). Be Josef i bin lanem wan nara samting we i bin impoten i semmak nomo, abaot wok ia blong God: “God i gat fulap sore,” mo sapos Josef i sakem sin wetem tru hat, bae “God i jusum [hem] yet” (ves 10). Long en, wok blong God i wan wok blong fasin blong pemaot man. Mo wok ia, “i no gat samting o man i save spolem” (ves 1).

Sam Aedia blong Skripja Stadi blong Yuwan

Doktrin mo Ol Kavenan 3:1–15

Mi mas trastem God be i no blong stap fraet long man.

Eli long seves long Josef Smit, i no gat fulap gud fren i stap—speseli ol fren olsem Martin Haris, we i bin wan man we oli respektem hem, we i gat samting, mo i stap long wan ples we bae hem i save givim fulap impoten sapot. Mo Martin i gat hat blong sapotem Josef, iven we i mekem se hem i lusum respek blong ol fren blong hem, mo i bin mekem se hem i mas sakrifaes long saed blong mane.

Mekem se hem i isi blong luk from wanem Josef i bin wantem blong agri long rikwes blong Martin, blong hem i tekem ol fas pat blong translesen blong Buk blong Momon, blong soem i go long waef blong hem, from waef blong hem i bin gat tu tingting, se Buk blong Momon i tru o nogat. Josef i bin gohed blong askem Lod long saed ia, iven we Lod i bin blokem hem, kasem taem we, long en, afta we Josef i bin askem wan nambatri taem, Lod i bin talem yes. Sore tumas, buk ia we oli bin raetem, i bin lus long taem we Martin i bin holem i stap, mo Lod i panisim gud Josef mo Martin from (luk long Saints, 1:51–53).

Taem yu stap rid long Doktrin mo Ol Kavenan 3:1–15, tingting hevi long wei we ol tingting blong ol narawan oli save lidim tingting blong yu. Bae yu luk tu se, antap long strong tok we Hem i bin givim long Josef Smit, Lod i bin talem tu ol toktok blong sore. ?Wanem nao yu lanem abaot wei we Lod i bin mekem tugeta samting ia, hem i stretem mo i leftemap tingting blong Josef? ?Wanem kaonsel nao yu lanem we i save helpem yu taem yu gat temtesen blong stap fraet long ol nara man bitim we bae yu fraet long God?

Luk tu long “The Contributions of Martin Harris,” Revelations in Context, 1–9, history.ChurchofJesusChrist.org.

Doktrin mo Ol Kavenan 4

Lod i stap askem mi blong givim seves long Hem wetem ful hat blong mi.

Seksen 4, plante taem oli yusum wetem ol fultaem misinari. Be, hem i gud tumas blong luk se revelesen ia, Lod i bin givim faswan long Josef Smit Senia, we Lod i no bin singaotem hem i go long wan misin, be i bin gat hat blong “wantem wok blong God” (ves 3).

Wan wei blong ridim seksen ia i blong traem tingting long hem olsem wan lis blong wok blong wan we i wantem mekem wok blong Lod. ?Wanem ol kwaliti we hem i mas gat? ?From wanem i nid blong wan i mas gat ol skil ia o ol fasin ia? Maet yu save prea mo jusum wan samting we yu save mekem blong yu “naf long wok ia” (ves 5).

Doktrin mo Ol Kavenan 5

Mi save kasem wan witnes blong miwan abaot Buk blong Momon.

Martin Haris, i kam long Lewis A. Ramsey

Sapos bae oli singaotem yu i go long Kot blong yu testifae se Buk blong Momon i tru, ?wanem pruf nao bae yu karem i go? Semmak kwestin olsem i bin stap long maen blong Martin Haris taem we, Lusi, waef blong hem, i putum wan klem se Josef Smit i stap giaman long ol pipol taem hem i stap priten se hem i stap transletem ol buk we oli wokem long gol (luk long Saints, 1:56–58). Mekem se, Martin i bin askem long Josef blong gat moa pruf se ol buk ia we oli wokem long gol, oli bin ol rilwan. Doktrin mo Ol Kavenan 5 i wan revelesen we i ansarem rikwes blong Martin.

?Wanem nao yu save lanem aot long Doktrin mo Ol Kavenan 5 abaot olgeta samting ia:

• ?Olsem wanem Lod i stap filim abaot olgeta ia we oli no save biliv long ol trutok long saed blong spirit sapos oli no gat pruf long ol? (Luk long ol ves 5–8; luk tu long Jon 20:24–29).

• Rol blong ol witnes insaed long wok blong Lod (luk long ol ves 11–15; luk tu long 2 Korin 13:1).

• Wei blong kasem wan testemoni blong yuwan abaot Buk blong Momon (luk long ves 16; luk tu long Moronae 10:3–5).

Doktrin mo Ol Kavenan 5:1–10

Jeneresen ia bae i kasem toktok blong God tru long Josef Smit.

?Wanem nao Doktrin mo Ol Kavenan 5:1–10 i stap tijim yu abaot impoten rol blong Josef Smit insaed long dispensesen blong yumi—mo insaed long laef blong yu? Tingting hevi long wei we yu bin kasem toktok blong God tru long Profet Josef Smit. Tingting blong raetemdaon, insaed long wan jenol, o blong yu serem wetem wan, bigfala tangkyu ia we yu gat from ol trutok we oli bin kambak, o oli bin kam klia tru long hem.

Luk tu long 2 Nifae 3:6–24.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 3:1–4.Askem wan memba blong famli blong wokbaot long wan “kruked” laen, mo afta, long wan “stret” laen. ?Hem i minim wanem long famli blong yu blong save se “ol rod blong God oli stret”?

Doktrin mo Ol Kavenan 3:7–10.Taem wan i stap fosem yumi blong no stap obei long God, ?wanem trutok nao long ol ves ia i save helpem yumi blong stap fetful? Maet ol memba blong famli oli save rolplei long wan situesen we wan i gohed blong stap fetful i nomata wan i fosem yu blong no stap obei long God.

Doktrin mo Ol Kavenan 4.Taem famli blong yu i stap toktokraon long wanem nao i minim blong wok long yad blong God, oli save go mekem sam wok insaed long wan garen (o priten se oli stap wok long wan garen.) ?Wanem tul nao i nid blong yusum blong mekem wok insaed long wan garen? ?Wanem nao God i stap tokbaot insaed long seksen 4 we yumi save tekem se oli ol tul we yumi nidim blong mekem wok blong Hem? Famli blong yu i save toktokraon long risen from wanem wanwan tul i impoten blong mekem wok blong God.

Doktrin mo Kavenan 5:7.?Wanem nao sam eksampol blong ol trutok we yumi stap biliv long ol, be yumi no save luk? ?Olsem wanem yumi ansa long wan fren we i wantem pruf se Buk blong Momon i tru?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “I Will Be Valiant,” Children’s Songbook, 162.

Stap Kam Antap long Stadi blong Yuwan

Lanem wan ves baehat. “Blong lanem wan skripja baehat, hem i blong bildimap wan niu frensip. Hem i olsem blong faenemaot wan niu man o woman we i save help long taem blong nid, we i save givim insperesen mo kamfot, mo i stap olsem wan we i save pusum yu blong mekem wan jenis we i nid (Richard G. Scott, “The Power of Scripture,” Ensign o Liahona, Nov. 2011, 6).

Hevi Trabol blong 116 Pej, i kam long Kwani Povi Winder