28 Disemba–3 Jenuware

Doktrin mo Ol Kavenan 1

“Lisin Gud, O Yufala Ol Pipol”

Tingting long Doktrin mo Ol Kavenan 1 olsem fas toktok blong Lod long buk ia blong ol revelesen blong Hem long ol las dei ia. ?Wanem nao Hem i wantem yu blong save long saed blong Doktrin mo Ol Kavenan? Tingting hevi long kwestin ia, mo raetemdaon eni filing we yu kasem taem yu ridim seksen 1.

Raetemdaon Ol Filing mo Tingting blong Yu

Long Novemba 1831, Jos Ia blong Jisas Kraes we i bin kambak, i jes stanap blong wan yia haf nomo. Nomata se i stap gro yet, hem i bin stap olsem wan grup blong olgeta we oli biliv we man i no save tumas long hem mo oli stap laef long wan open ples folem rod, we wan profet we i gat samples twante yia olsem i stap lidim. Be God i tekem olgeta ia we oli biliv ia blong oli stap olsem ol wokman mo ol mesenja blong Hem. Mo Hem i wantem se ol revelesen we Hem i bin givim long olgeta, se oli mas printim blong i go aot long wol.

Ol Doktrin mo Ol Kavenan seksen 1 hem i fas tok blong Lod we oli putum tugeta ol revelesen ia, mo i soem klia se nomata ol membasip blong Jos i bin smol, i nogat wan samting we i smol abaot mesej we God i bin wantem Ol Sent blong Hem oli serem. Hem i wan “voes blong woning” blong evri “man we oli stap laef long wol,” we i stap tijim olgeta blong sakem sin mo blong stanemap “kavenan blong God we i no gat en” (ol ves 4, 8, 22). Ol wokman we oli stap karem mesej ia oli “no strong mo oli simpol,” be ol wokman we tingting blong olgeta i stap daon i wanem we God i nidim—bifo mo naoia—blong tekemaot Jos blong Hem “long ples we i haed mo aot long tudak” (ol ves 23, 30).

Blong kasem moa long histri biaen long Doktrin mo Ol Kavenan 1, luk long Saints, 1:140–43.

Sam Aedia blong Skripja Stadi blong Yuwan

Doktrin mo Ol Kavenan 1

Lod i invaetem mi blong “luklukgud long ol komanmen ia.”

Wan fas toktok insaed long wan buk, i presentem buk ia. Hem i talemaot ol stamba toktok mo stamba tingting blong buk ia mo hem i helpem olgeta we bae oli rid blong oli rere blong rid. Taem yu ridim seksen 1—“fas tok” blong Lod blong Doktrin mo Ol Kavenan (ves 6)—lukaotem ol stamba toktok mo ol stamba tingting we Lod i i bin givim blong ol revelesen blong Hem. ?Wanem nao yu lanem aot long seksen 1 we bae i helpem yu kasem moa aot long stadi blong yu insaed Doktrin mo Ol Kavenan? Eksampol. Maet yu save tingting hevi se i minim wanem ia blong “harem voes blong Lod” long ol revelesen ia (ves 14) o blong “luklukgud long ol komanmen ia” (ves 37).

Luk tu long Fas Toktok long Doktrin mo Ol Kavenan.

Doktrin mo Ol Kavenan 1:1–6, 23–24, 37–39

God i toktok tru long ol wokman blong Hem, mo ol toktok blong Hem bae oli kamtru.

Seksen 1 i stat mo i en wetem toktok blong God we Hem i mekem tru ol wokman blong Hem, we Hem i bin jusum (luk long ol ves ia 4–6, 23–24, 38). Raetemdaon wanem yu lanem long revelesen ia abaot Lod mo voes blong Hem. ?Wanem nao yu lanem abaot ol wokman blong Lod? ?Wetaem nao yu bin harem voes blong Lod tru long voes blong ol wokman blong Hem? (luk long ves 38).

Ol profet mo ol aposol oli tijim yumi abaot ol komanmen blong God.

Doktrin mo Ol Kavenan 1:3, 24–28, 31–33

Sapos mi gat tingting we i stap daon, fasin blong Lod blong panisim mi i save lidim mi blong sakemaot sin.

Tekem not se long ves 3 mo ol ves ia 24–28, Lod i talem se ol sin mo mistek blong ol pipol, bae Hem i talemaot. Long wan situesen, hemia i soa, mo wan sore eksperiens, be long nara situesen, hem i olsem wan lesen. ?From wanem ol situesen ia oli defdefren? ?Tingting se aksen blong yu i olsem wanem taem yu kam blong luksave ol sin mo ol wiknes blong yu? ?Wanem kwaliti nao yu faenem long ol ves ia 24–28 we i save helpem yu blong fesem samting long raet wei? ?Wanem nao ol ves ia, wetem ol ves ia 31–33, i tijim yu abaot wei we Lod i lukluk long ol wiknes mo ol sin blong yu?

Luk tu long Ol Proveb 3:11–12; Ita 12:27; Moronae 6:8.

Doktrin mo Ol Kavenan 1:12–30, 35–36

Lod i bin putumbak gospel blong Hem blong helpem mi fesem ol jalenj blong ol lata dei ia.

Nomata se seksen 1 i givim woning abaot ol rabis dei we bae i kam yet, be insaed i gat tu wan mesej blong leftemap tingting: “Mi Lod, we mi save bigfala trabol we bae i kam long ol man we oli stap laef long wol, mi bin singaotem wokman blong mi, Josef Smit Junia, mo mi stap long heven mo toktok long hem, mo givim ol komanmen long hem” (ves 17).

Tekem not long ol bigfala trabol we Lod i givim woning from (eksampol, luk long ol ves ia, 13–16, 35). ?Wanem sam long ol bigfala trabol we yu luksave long wol tedei—o insaed long laef blong yu? Ol ves 17–30 oli tokbaot wanem Lod i bin mekem blong yu rere from ol bigfala trabol ia. Tingting blong mekem wan lis blong olgeta samting we yu faenem.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 1:1–6, 37–39.Blong statem wan toktok raon abaot ol woning we oli kam long Lod, yu save tokbaot ol woning we yumi kasem long ol narafala man abaot ol denja we yumi no save luk—olsem wan floa we i glis, wan strong win, o wan trak we i stap kam kolosap. ?Wanem nao ol eksampol ia oli stap tijim yumi long saed blong ol woning blong Lod? Folem wanem we i stap insaed long Doktrin mo Ol Kavenan 1:1–6, 37–39, ?olsem wanem nao Lod i wonem yumi? ?Wanem nao Hem i bin wonem yumi long hem i no longtaem i pas? Ating yu save luk o ridim sam pat blong jeneral konfrens mesej mo lukaotem ol eksampol blong “voes blong woning” blong God.

Doktrin mo Ol Kavenan 1:16.?Wanem nao i minim blong “stanemap stret mo gud fasin blong Lod”? ?Olsem wanem nao bae yumi meksua se yumi stap mekem hemia, be yumi no stap “wokbaot folem rod blong [yumiwan]?

Doktrin mo Ol Kavenan 1:30.?Hem i minim wanem blong talem se Jos i “tru mo i laef”? Blong mekem famli blong yu i tingting long kwestin ia, maet yu save soem long olgeta ol pikja blong ol samting we oli stap laef, mo ol samting we oli no stap laef. Yu save toktokraon tu abaot wanem yu save mekem olsem wan famli blong help blong “tekemaot long ples we i haed mo aot long tudak.”

Doktrin mo Ol Kavenan 1:37.Olsem wan famli, tingting blong mekem plan long wei we bae yufala i “luklukgud ol komanmen ia” insaed long Doktrin mo Ol Kavenan, long yia ia. ?Olsem wanem nao bae yu mekem skripja stadi i kam wan samting we i pat blong famli laef? ?Wanem stadi aedia nao i save helpem yu blong lanem samting aot long ol skripja ia? (Luk long “Sam Aedia blong Kam Antap long Famli Skripja Stadi” we i stap long stat blong buk ia.)

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Follow the Prophet,” Children’s Songbook, 110–11, speseli las ves.

Stap Kam Antap long Stadi blong Yuwan

Lukaotem Jisas Kraes. Stamba tingting blong ol skripja ia, hem i blong yumi testifae abaot Sevya mo gospel blong Hem. Taem yu stap rid long Doktrin mo Ol Kavenan 1, tingting blong makem, o tekem not long ol ves we oli stap tijim yu wan samting abaot Jisas Kraes.

Ol fas revelesen blong Jos ia we i kambak, oli bin putum olgeta tugeta i kam Buk blong Olgeta Komanmen.