“22–28 Novemba. Doktrin mo Ol Kavenan 135–136: ‘Hem I Bin Silim Misin blong Hem Mo Ol Wok blong Hem Wetem Blad blong Hemwan’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“22–28 Novemba. Doktrin mo Ol Kavenan 135–136” Kam Folem Mi—Blong Wanwan Man, Woman mo Famli: 2021
Katej Kalabus
22–28 Novemba
Doktrin mo Ol Kavenan 135–136
“Hem I Bin Silim Misin blong Hem Mo Ol Wok blong Hem Wetem Blad blong Hemwan”
Taem yu stap stadi long Doktrin mo Ol Kavenan 135–36, Lod bae i save givim yu ol niu tingting blong helpem yu blong praktisim wanem we yu stap ridim. Taem hemia i hapen, raetemdaon wanem Hem i stap tijim yu.
Raetemdaon Ol Filing mo Tingting blong Yu
Long aftenun blong namba 27 Jun 1844, Josef mo Haeram Smit, tufala i go long kalabus bakegen, mo wetem tufala i gat Jon Teila mo Wilad Rijads. Oli bin biliv se oli no gat rong, se oli no mekem wan kraem, be oli sarenda mo letem oli arestem olgeta, mo oli bin hop se hemia bae i stopem vaelens agensem Ol Sent long Nauvu. Hemia i no bin fas taem we ol enemi blong Jos oli bin putum Profet Josef long kalabus, be long tetaem ia, i luk se hem i bin save se bae hem i no kamaot we hem i laef. Hem mo ol fren blong hem oli traem blong lefleftemap tingting blong wanwan long olgeta taem oli bin rid aot long Buk blong Momon, mo stap singsing long ol hym. Afta, oli harem masket i faerap, mo sam minit afta, laef blong Josef Smit, mo brata blong hem, Haeram, i finis.
Be yet, i no en blong tabu wok ia we oli bin akseptem. Mo i no bin en blong Restoresen blong Gospel blong Jisas Kraes. I bin gat moa wok blong mekem, mo i bin gat moa revelesen blong kam we bae i soem rod blong Jos i muv fored. Blong kilimded Profet, i no bin naf blong kilimdaon wok blong God.
Luk long Saints, 1:521–52.
Sam Aedia blong Skripja Stadi blong Yuwan
Doktrin mo Ol Kavenan 135; 136:37–39
Josef mo Haeram Smit, tufala i bin silim testemoni blong tufala wetem blad blong tufala.
Traem tingting, long maen blong yu, se bae yu filim olsem wanem sapos yu bin stap laef long Nauvu taem we oli kilimded Josef mo Haeram Smit (luk long Saints, 1:554–55). ?Olsem wanem bae yu faenem wan mining long nogud taem ia? Doktrin mo Ol Kavenan 135, we faswan oli bin pablisim tri manis afta long ded blong olgeta ia, maet bae i help. Yu save makem ol toktok mo ol sentens we bae oli givim yu wan andastaning mo wan stret save. Bae yu talem wanem long wan we i askem: “?From wanem bae God i letem blong oli kilimded Profet blong Hem?”
Luk tu long Doktrin mo Ol Kavenan 5:21–22; 6:29–30; “Remembering the Martyrdom,” Revelations in Context, 299–306; Teachings of Presidents of the Church: Joseph Smith, 522–23, 529–40; M. Russell Ballard, “?Bae Yumi No Gohed long Wan Bigfala Wok Olsem?” Liahona, Mei 2020, 8–11.
Josef Smit i bin mekem moa blong sevem yumi bitim eni narawan, be i no bitim Jisas Kraes.
Tingting abaot ol blesing we oli kam long yu olsem wan memba blong Jos Ia blong Jisas Kraes. ?Hamas long olgeta oli kam from risal blong misin ia we Profet Josef Smit i bin komplitim? Doktrin mo Ol Kavenan 135:3 i givim nem blong samfala bigfala samting we Josef Smit i bin mekem i hapen long 24 yia afta long Fas Visen. ?Olsem wanem ol samting ia oli bin tajem yu mo rilesensip blong yu wetem Papa long Heven mo Jisas Kraes? Tingting blong raetemdaon testemoni blong yu abaot Profet Josef Smit. ?Hu nao bae i nidim blong harem testemoni blong yu?
Lod i givim kaonsel long mi from ol wokbaot blong mi long laef.
Afta we oli bin ronemaot olgeta oli aot long Nauvu, Ol Sent oli fesem wan longfala wokbaot i go long Sol Lek Vale, mo ol fasfala handred mael ia oli bin slo mo oli bin had tumas. Brigham Yang nao i bin lidim Jos olsem Presiden blong Kworom blong Olgeta Twelef Aposol, mo hem i bin wari abaot Ol Sent we bae oli laef tru long haf wokbaot ia. Hem i setemap wan ples blong sot taem, we oli bin singaotem Winta Kwota, mo hem i bin prea blong kasem help. Olsem ansa, Lod i bin givim hem wan revelesen, we naoia hem i seksen 136. Wetem sam narafala samting moa, revelesen ia i mekem Ol Sent oli tingbaot se fasin blong olgeta long wokbaot ia bae i impoten i semmak long ples ia we oli stap go from, mo hemia i bin help blong tanem wokbaot i go long Wes, we i no wan gudfala situesen, i kam wan eksperiens long saed blong spirit we i kam impoten. (“This Shall Be Our Covenant,” Revelations in Context, 308).
Kipim situesen ia long maen taem yu stap stadi long seksen 136. ?Wanem kaonsel nao yu faenem we i save help blong tanem wan tes we i had long laef, i kam blong eksperiens long saed blong spirit, we i impoten? Maet bae yu wantem tingting hevi long wei we kaonsel ia i save helpem yu blong mekem tingting blong Lod insaed long stret laef blong yu, semmak olsem i bin helpem ol fasfala Sent blong mekem strong wokbaot ia i go long Wes.
Luk tu long “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.
Winta Kwota, i kam long Greg Olsen
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 135:1, 3.Blong helpem ol memba blong famli blong oli andastanem se i minim wanem se Josef Smit “i bin silim misin mo ol wok blong hem wetem blad blong hem,” famli blong yu i save wajem vidio ia: “Testimony of the Book of Mormon” (ChurchofJesusChrist.org; luk tu long Jeffrey R. Holland, “Safety for the Soul,” Ensign o Liahona, Nov. 2009, 88–90). ?Wanem i tajem tingting blong yu long ol ves ia? ?Long wanem wei nao yumi save kam blong stap moa fetful long ol testemoni blong yumi, iven sapos oli no askem yumi blong givim laef blong yumi from ol testemoni ia?
-
Doktrin mo Ol Kavenan 135:3.Blong toktok raon long wanem nao i mining blong toktok ia, se, Josef Smit i bin mekem “moa bitim eni nara man, be i no bitim Jisas, blong sevem ol man long wol ia,” tingting blong luklukbak long wanem famli blong yu i bin lanem abaot Josef Smit long yia ia. Yu save yusum ol pikja aot long risos ia blong helpem olgeta blong tingbaot wanem we oli bin lanem, mo invaetem olgeta blong serem ol fevret stori o tijing. ?From wanem yu talem tangkyu tumas from Profet Josef Smit, mo from ol samting we Lod i bin mekem i kamtru tru long hem? Mo tu, yu save vidio ia: “Joseph Smith: The Prophet of the Restoration” (ChurchofJesusChrist.org).
-
Doktrin mo Ol Kavenan 136.Taem we Lod, tru long revelesen, i bin talemaot seksen 136, Ol Sent oli bin gat wan longfala mo had wokbaot i stap long fored blong olgeta, anda long daereksen blong Brigham Yang (luk long ol japta 58, 60, mo 62 long Ol Doktrin mo Kavenan Stori, 206–8, 211–16, 222–24). Taem yu stap ridim seksen 136 tugeta, tingting long ol had samting we famli blong yu i mas fesem. ?Wanem kaonsel nao yumi faenem insaed long revelesen ia we i save helpem yumi blong kasem help mo paoa blong Lod?
-
Doktrin mo Ol Kavenan 136:4.?Hem i minim wanem blong “wokbaot folem evri odinens blong Lod”? ?Olsem wanem ol odinens ia we yumi bin kasem oli jenisim ol evri dei laef blong yumi?
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Presem Man Ya,” STSP, pej 50
Stap Kam Antap long Stadi blong Yuwan
Faenem lav blong God. Presiden M. Russell Ballard i tijim: “Gospel i wan gospel blong lav—lav long God mo lav long wanwan long yumi” (“God’s Love for His Children,” Ensign, May 1988, 59). Taem yu stap ridim olgeta skripja, tingting blong raetemdaon o makem ol pruf blong lav we God i gat long yu.
I No Gat Man I Gat Moa Bigfala Lav, i kam long Casey Childs