“1–7 Novemba. Doktrin mo Ol Kavenan 125–128: ‘Wan Voes blong Stap Glad blong Olgeta we Oli Laef Mo Olgeta we Oli Ded,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“1–7 Novemba. Doktrin mo Ol Kavenan 125–128” Kam Folem Mi—Blong Wanwan Man, Woman mo Famli: 2021
Yumi wetem Olgeta mo Olgeta wetem Yumi, i kam long Caitlin Connolly
1–7 Novemba
Doktrin mo Ol Kavenan 125–128
“Wan Voes blong Stap Glad blong Olgeta we Oli Laef Mo Olgeta we Oli Ded”
Tingbaot blong raetemdaon ol filing blong yu taem yu stap stadi long Doktrin mo Ol Kavenan 125–28, blong mekem se yu save tingtingbak long olgeta mo serem olgeta wetem ol nara man.
Raetemdaon Ol Filing mo Tingting blong Yu
Long Ogis 1840, wan woman, Jane Neyman i bin stap lisin long Profet Josef i stap toktok long fenerol blong fren blong hem, Seymour Brunson. Yang boe blong Jane, Cyrus, hem tu i bin ded finis. Be Hem i harem nogud moa from se Cyrus i neva bin baptaes, mo Jane i wari se bae hemia i minim wanem long sol we i no save finis blong boe blong hem. Josef i bin save filing blong hem; hem i bin askem hemwan semfala samting abaot brata blong hem we hem i lavem tumas, Alvin, we i bin ded bifo hem i bin baptaes. Mekem se Profet i bin disaed blong serem, wetem Jane, mo evriwan we i bin stap long fenerol, wanem we Lod i bin talemaot long hem abaot olgeta we oli bin ded, be oli no kasem ol odinens blong gospel—mo wanem yumi save mekem blong helpem olgeta.
Doktrin blong baptaes long bihaf blong ol dedman, i mekem Ol Sent oli glad tumas; tingting blong olgeta i go kwiktaem long ol papa mo mama we oli bin ded, ol bubu mo ol nara memba blong famli tu. !Naoia, i gat hop blong olgeta! Josef tu i bin glad, mo hem i yusum lanwis we i gat glad blong talemaot wanem we Lod i bin tijim hem abaot fasin blong sevem ol dedman: “!Bae ol bigfala hil oli mas singaot from oli glad, mo yufala evriwan ol vale, yufala i mas singaot strong; mo yufala evriwan ol solwota mo ol drae graon, yufala i mas talemaot ol samting blong sapraes we i blong King blong yufala we I No Save Finis!” (Doktrin mo Ol Kavenan 128:23).
Luk long Saints, 1:415–27; “Letters on Baptism for the Dead,” Revelations in Context, 272–76.
Sam Aedia blong Skripja Stadi blong Yuwan
Lod i wantem mi blong mi kea long famli blong mi.
Afta long las misin aot long plante misin we Brigham Yang i bin go mekem long Inglan, hem i gobak hom, mo hem i bin kasem wan nara impoten koling we i kam long Lod—“blong lukaotem gud famli blong hem” (ves 3), we i bin safa taem hem i bin stap longwe. Taem yu stap tingting hevi long wei we kaonsel ia, mo ol nara kaonsel insaed long seken 126 i blong yu tu, tingting long ol toktok we oli kam long Presiden Bonnie L. Oscarson, we i foma Yang Woman Jeneral Presiden.
“Tingbaot se sam long ol nid we oli moa bigwan, oli olgeta we oli stap long fored blong yu. Statem seves blong yu, insaed long stret hom blong yu, mo insaed long stret famli blong yu. Ol rilesensip ia, oli save stap blong taem we i no save finis. Iven sapos—mo mebi speseli sapos—famli situesen blong yu i no stret evriwan, bae yu save faenem ol wei blong givim seves, blong leftemap man, mo mekem man i kam strong moa. Stat long weaples yu stap long hem; lavem olgeta olsem we oli stap, mo mekem famli blong yu i rere blong i stap famli ia we yu wantem gat long fiuja” (“Ol Nid long Fored blong Yumi,” https://www.churchofjesuschrist.org/general-conference/2017/10?lang=bis, Okt 2017).
Luk tu long “Take Special Care of Your Family,” Revelations in Context, 242–49.
Lod i save tu ol glad blong mi mo ol harem nogud blong mi.
Ol giaman toktok mo rabis toktok blong oli arestem hem i fosem Josef Smit blong haed long Ogis 1842. Be yet, ol toktok we hem i bin raetem i go long Ol Sent long tetaem ia (naoia i Doktrin mo Ol Kavenan 127) oli fulap long hop mo glad. ?Wanem nao ol ves 2–4 oli tijim yu abaot God? ?Abaot hao yu fesem ol tes blong yuwan?
Tingting blong raetemdaon olsem wanem Lod i stap sapotem yu long “dip wota” blong laef blong yu.
Doktrin mo Ol Kavenan 127:5–8; 128:1–8
“Wanem we bae yufala i raetemdaon long wol, bae oli raetemdaon long heven.”
Taem yu stap ridim Doktrin mo Ol Kavenan 127:5–8; 128:1–8, lukaotem ol risen from wanem Lod i givim long Josef Smit ol spesifik instraksen long saed blong fasin blong raetemdaon ol baptaes blong ol dedman. ?Wanem nao hemia i stap tijim yu abaot Lod mo wok blong Hem?
Blong mekem tempol seves blong ol bubu blong yumi i joenem hat blong yumi long hemia blong olgeta.
Doktrin mo Ol Kavenan 128:5–25
Wok blong sevem ol bubu blong mi i wan mas long wok blong fasin we Kraes bae i sevem mi.
Hem i klia long wanem we God i bin soemaot tru long Josef Smit, se, from wanem nao ol bubu blong yumi we oli no bin baptaes long laef ia, oli nidim help blong yumi blong sevem laef blong olgeta. Be yu ting se ?from wanem nao blong sevem ol bubu blong yumi, i wan wok we “i wan nid mo i wan mas long fasin blong sevem yumi”? (Luk long Doktrin mo Ol Kavenan 128:15–18; oli ademap italik).
Ves 5 i stap tijim se odinens blong ol baptaes blong ol dedman, “i bin rere bifo long stat blong wol.” ?Wanem nao trutok ia i tijim yu abaot God mo plan blong Hem? ?Wanem nao mesej blong Presiden Henry B. Eyring “Karem i Kam Tugeta Famli blong God,” i ademap long save blong yu? ( https://www.churchofjesuschrist.org/general-conference/2017/04?lang=bis, Epril 2017).
Josef Smit i bin yusum ol sentens olsem, “paoa we i joenem man,” “ring we i joenem man,” mo “yunion we i stret evriwan” taem hem i stap tij abaot ol prishud odinens mo baptaes blong ol dedman. Lukaotem ol sentens ia mo ol semmak sentens taem yu stap ridim Doktrin mo Ol Kavenan 128:5–25. ?Wanem sam long ol samting we, tru long Jisas Kraes, oli save joenem man tugeta from ol prishud odinens blong olgeta dedman? ?From wanem “defren” i wan gudfala toktok blong tokbaot doktrin blong sevem ol dedman? (luk long ol ves 9–11).
?Wanem nao i tajem yu long ol toktok blong Josef Smit insaed long ol ves 19–25? ?Olsem wanem nao ol ves ia oli jenisim wei we yu stap filim abaot tempol seves blong ol bubu blong yu? ?Wanem nao yu filim insperesen blong go mekem? (luk long FamilySearch.org/discovery blong kasem sam tingting).
Luk tu long 1 Korin 15:29; Dale G. Renlund, “Famli Histri mo Tempol Wok: Siling mo Hiling,” Liahona, Mei 2018, 46–49; ol vidio: “A Sacrifice of Time” mo “Their Hearts Are Bound to You,” ChurchofJesusChrist.org.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 126.Sapos yu ridim kaonsel ia blong Brigham Yang, maet bae i givim insperesen long famli blong yu blong tokbaot olsem wanem yu save spendem moa taem blong “lukaot gud”ves 3long wanwan long yufala.
-
Doktrin mo Ol Kavenan 128:15–18.?Wanem nao oli samfala blesing blong famli histri wok we oli stap sevem mo mekem man i kam stret moa. Bae yu save faenem sam moa aedia insaed long vidio ia: “The Promised Blessings of Family History” (ChurchofJesusChrist.org) o insaed long wan singsing abaot famli histri olsem: “Family History—I Am Doing It” (Children’s Songbook, 94).
-
Doktrin mo Ol Kavenan 128:18.Tingting blong mekem wan pepa jen wetem ol nem blong ol memba blong famli, mo ol nem blong ol bubu long wanwan ring blong jen; hemia i blong soem olsem wanem famli histri mo tempol wok oli krietem wan “ring blong joenem man,” we i joenem yumi wetem ol bubu blong yumi. Maet bae yu save lukaotem sam samting long FamilySearch.org blong faenem sam moa memba blong famli mo luk se jen ia bae i go longfala olsem wanem.
-
Doktrin mo Ol Kavenan 128:19-23.Maet ol memba blong famli oli save luklukgud insaed long ol ves ia blong faenem ol toktok we oli soem se Josef Smit i bin glad tumas abaot gospel blong Jisas Kraes, mo abaot fasin blong sevem ol dedman. Ol memba blong famli oli save serem ol eksperiens blong olgeta we i bin mekem olgeta oli laekem tumas wok ia—o yu save lukaotem blong gat ol eksperiens ia tugeta long FamilySearch.org/discovery.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Family History—I Am Doing It,” Children’s Songbook, 94.
Ol Voes blong Restoresen
Ol Baptaes blong Olgeta Dedman, “Wan Topik we I Niu mo I Gat Glori”
Dro long pensel ia, i soem ples blong baptaes insaed long Nauvu Tempol we i sidaon antap long bak blong twelef buluk.
Fibi mo Wilfod Wudrof
Fibi Wudrof i bin stap laef kolosap long Nauvu taem we Josef Smit i bin stat blong tij abaot baptaes blong ol dedman. Hem i bin raet abaot hemia i go long hasban blong hem, we i bin stap long misin long Inglan:
“Brata Josef, … i bin lanem, tru long revelesen, se olgeta long jos ia oli save kasem baptaes long bihaf blong eni famli we i ded finis mo i no bin gat janis ia blong harem gospel ia, iven oli save mekem long bihaf blong ol pikinini, ol papa mo mama, ol brata, ol sista, ol bubu, ol anggel, mo ol anti blong olgeta. … Taem oli mekem baptaes long bihaf blong ol fren blong olgeta, ol fren ia oli kam fri, oli aot long kalabus, mo oli save klemem olgeta long laef bakegen long ded, mo tekem olgeta long selestial kingdom—doktrin ia, jos i akseptem mo naoia, plante oli stap go; sam oli stap go baptaes we i kasem 16 taem … long wan dei.”1
Afta long hemia, Wilfod Wudrof i tokbaot prinsipol ia olsem ia: “Long stret taem we mi harem hemia, sol blong mi i jiam i glad tumas. … Mi go, mo mi kasem baptaes long bihaf blong evri ded famli blong mi we mi save tingting long olgeta. … Mi filim blong talem aleluia taem revelesen ia i kamaot, we i talemaot long yumi abaot baptaes long bihaf blong ol dedman. Mi filim se yumi bin gat raet blong stap glad tumas from ol blesing blong Heven.”2
Vilate Kimball
Olsem Sista Wudrof, Vilate Kimball i bin harem abaot baptaes blong ol dedman long semtaem we hasban blong hem, Hiba, i bin stap longwe, i stap prijim gospel. Vilate i raet i go long hem:
“Presiden Smit i bin openem wan niu topik wetem bigfala glori … we i mekem se jos i muvmuv plante. Hem i, blong kasem baptaes long bihaf blong ol dedman. Pol i tokbaot hemia insaed long Fas Korin, namba 15 japta, mo namba 29 ves. Josef i bin kasem moa, mo i bin eksplenem tru long wan Revelesen. Hem i wan spesel janis, blong jos ia, blong oli save kasem baptaes blong evri famli we oli bin ded bifo Gospel ia i kamaot; iven, i save gobak i go kasem ol bigbigfala Bubuman mo Bubuwoman. … Taem yumi mekem olsem, yumi stap mekem wok long bihaf blong olgeta; mo givim olgeta spesel janis blong kam fored long fasfala laef bakegen long ded. Hem i talem se bae oli prijim Gospel long olgeta … be spirit i no save kasem baptaes. … Stat long taem we oli stap prijim oda ia long ples ia, ol wota ia oli stap muvmuv evri dei. Long taem blong konfrens, samtaem i gat eit kasem ten Elda insaed long reva long semtaem, we oli stap mekem baptaes. … Mi wantem mekem baptaes blong Mama blong mi. Mi kaontem se bae mi wet kasem taem yu kambak hom, be las taem we Josef i tokbaot topik ia, hem i talem long evriwan se oli mas girap mo go mekem, mo oli mas mekem ol fren blong olgeta oli kam fri long fasin blong stap slef; oli mas mekem hemia kwiktaem. Mo mi ting se bae mi go long wik ia, wetem wan namba blong ol neba ia we olgeta tu oli stap go. Sam oli mekem baptaes blong olgeta plante taem. … Olsem ia nao yu luk se i gat wan janis blong evriwan. ?Yu no ting se hemia i wan doktrin blong glori.”3
Phebe Chase
Taem we oli bin finisim blong mekem ples blong baptaes insaed long Nauvu Tempol, nao oli bin mekem baptaes blong ol dedman insaed long hem, mo oli nomo mekem long reva. Phebe Chase, wan we i bin stap laef long Nauvu, i bin raet i go long mama blong hem abaot tempol, i tokbaot ples blong baptaes olsem ples we “mifala i save kasem baptaes long bihaf blong ol dedman blong yumi, mo kam ol sevya long Hil ia Saeon.” Hem i gohed blong eksplenem se, insaed long ples blong baptaes ia: “mi bin kasem baptaes long bihaf blong dia papa blong mi, mo evriwan long ol ded fren blong mi. … Naoia, mi wantem save nem blong papa mo mama blong yu, blong mekem se mi save mekem tufala i kam fri, from we mi wantem helpem ol Dedman. Lod i bin toktok bakegen mo i bin putumbak oda we i bin stap longtaem bifo.”4
Sally Randall
Taem hem i bin stap raet i go long ol fren mo famli blong hem abaot baptaes blong ol dedman, Sally Randall i tingbaot we boe blong hem, George, i bin ded.
“O, i bin wan taem blong tes long mi, mo i luk se yet, mi no save stretem tingting blong mi long hemia, be, papa blong hem i bin kasem baptaes long bihaf blong hem, mo hemia wan bigfala samting we yumi stap biliv mo kasem gospel ia we i fulwan, olsem we oli stap prijim naoia, mo tu, yumi save kasem baptaes long bihaf blong evri ded fren blong yumi, mo yumi save sevem olgeta; olgeta ia oli olgeta we yumi save tingbaot olgeta we i gobak we i gobak.
“Mi wantem se yu mas raetem i kam, nem blong evriwan long ol famli mo fren blong yu we oli ded finis, i gobak i go kasem ol bigbigfala bubuman mo bubuwoman blong yu. Mi wantem mekem evri samting we mi save mekem blong sevem ol fren blong mi, mo bae mi glad sapos sam long yufala i save kam mo helpem mi from se hem i wan bigfala wok blong mi mekem miwan. … Mi ting se bae yu tingting se hemia i wan defren doktrin, be bae yu faenem se hem i tru.”5
Ples blong baptaes insaed long Ogden Yuta Tempol i slip antap long bak blong twelef buluk.