Man we Bae I Mared I Stap Kam, i kam long Elizabeth Gibbons

15–21 Novemba

Doktrin mo Ol Kavenan 133–134

“Yufala I Mas Rere From Taem Ia we Man we Bae I Mared I Kam”

Presiden Henry B. Eyring i bin tijim: “Restoresen blong gospel i bin stat wetem wan smol kwestin we oli tingting hevi long hem insaed long wan hambol hom, mo i gohed insaed long wanwan long ol hom blong yumi” (“Wan Hom we Spirit I Stastap long Hem,”   Liahona, Mei 2019, 22).

Raetemdaon Ol Filing mo Tingting blong Yu

Taem we Jos i no kasem 19 manis yet, Profet Josef Smit mo ol nara lida blong Jos oli bin putum ol bigfala plan blong putum tugeta ol lata-dei revelesen we i kam long God i go long wan buk, mo blong oli printim 10,000 kopi—hemia dabol namba blong fas print blong Buk blong Momon. Sore tumas, mane blong hem we i bigwan tumas i stopem ol plan ia, mo ol grup blong ol rabis man oli atakem stoa blong Jos blong printim buk taem we oli bin stap printim hemia. Oli sakem ol pej we oli no putum tugeta yet olsem wan buk, mo nomata plante Sent we oli gat strong tingting oli bin holemtaet samfala pej ia, i no bin gat wan ful kopi blong Buk blong Olgeta Komanmen we i bin save kamaot.

Wanem we yumi save olsem seksen 133 blong Doktrin mo Ol Kavenan, i sapos blong stap long apendiks blong Buk blong Olgeta Komanmen, olsem wan bigfala haelaet we i stap long en blong ol revelesen blong Lod we oli pablisim. Hem i stap givim woning abaot wan dei blong jajmen we bae i kam, mo i talemaot bakegen singaot we i stap truaot long revelesen blong tedei: ronwe long ol samting blong wol, we simbol blong hem i Babilon; bildimap Saeon; rere from Seken Kaming; mo taltalemaot mesej ia “long evri kantri, mo famli, mo lanwis, mo pipol” (ves 37). I nomata we ol fasfala plan blong Buk blong Olgeta Komanmen i no bin kamtru, revelesen ia i stap blong mekem yumi tingbaot, mo i stap olsem wan witnes se wok blong Lod bae oli no save stopem, “from we bae Lod i soemaot tabu han blong hem … , mo evri en blong wol bae oli luk fasin blong sevem man we i kam long God blong olgeta” (ves 3).

Sam Aedia blong Skripja Stadi blong Yuwan

Doktrin mo Ol Kavenan 133

Ol trutok we oli stap insaed long Doktrin mo Ol Kavenan ia, oli save mekem mi mi rere blong mekem wok blong God.

Samtaem ol buk oli en wetem wan las toktok we i tokbaot bakegen o i talemsot ol stamba poen insaed long buk. Seksen 133 long fas ples, seksen ia i stap olsem las toktok blong Buk blong Olgeta Komanmen, mo bae i gud blong ridim seksen ia wetem tingting ia long maen. ?Wanem poen nao Lod i tokbaot bigwan abaot wok ia blong Hem? ?Wanem nao ol ves 57–62 oli stap tijim abaot rol we Lod i wantem yu blong plei insaed long wok ia blong Hem?

Doktrin mo Ol Kavenan 133:1–19

Lod i wantem mi blong mi rere long Seken Kaming.

Tugeta, seksen 1, fas toktok blong Lod long Doktrin mo Ol Kavenan, mo seksen 133, orijinol apendiks blong buk ia, oli stat wetem semfala strong toktok ia we i kam long Lod: “Lisin gud, O yufala ol pipol blong jos blong mi,” (Doktrin mo Ol Kavenan 1:1; 133:1). ?Hem i minim wanem blong lisin gud? (Luk long Gaed long Ol Skripja, “Lisin,” olskripja.ChurchofJesusChrist.org). ?Wanem invitesen o oda nao Lod i wantem yu blong yu lisin long hem long Doktrin mo Ol Kavenan 133:1–19? ?Wanem insperesen nao yu kasem blong yu rere gud moa from taem we bae Hem i kam? ?Olsem wanem bae yu helpem olgeta raon long yu blong oli rere?

Luk tu long Matiu 25:1–13; D. Todd Christofferson, “Stap Rere from Kambak blong Lod,”   Liahona, Mei 2019, 81–84.

Doktrin mo Ol Kavenan 133:19–56

Seken Kaming, bae i wan dei blong glad blong olgeta we oli stret mo gud.

Taem yu stap rid insaed long Doktrin mo Ol Kavenan 133:19–32 abaot ol samting we bae oli hapen, we bae oli kam long taem blong Seken Kaming blong Sevya, bae yu save tingting hevi long wanem ol samting ia oli talem long yu abaot Sevya mo wok blong Hem. ?Wanem moa praktis long saed blong spirit yu save faenem insaed long ol toktok ia?

Taem yu stap ridim wanem oli tokbaot abaot kambak blong Sevya long ol ves 32–56, ?wanem nao i mekem yu yu luk fored from bigfala dei ia? ?Wanem toktok o sentens ia i tokbaot lav we Lod i gat long ol pipol blong Hem? Tingting blong raetemdaon ol eksperiens blong yuwan wetem “kaen fasin blong Lod blong [yu], mo evri samting we hem i bin givim long [yu], folem gud fasin blong hem” (ves 52).

Doktrin mo Ol Kavenan 134

“God i stanemap ol gavman blong gud blong ol man.”

Rilesensip blong ol fasfala Sent wetem gavman i wan hadwan lelebet. Taem we oli fosem Ol Sent blong oli mas aot long Jakson Kaonti, Misuri, long yia 1833, oli no bin kasem eni sapot o kompensesen we i kam long lokol o nasonal gavman, i nomata we oli bin askem help. Long semtaem, sam pipol aotsaed long Jos oli ting se ol tijing abaot Saeon i minim se Ol Sent oli sakemaot atoriti blong ol gavman blong wol ia.. Doktrin mo Ol Kavenan 134 oli bin raetem, long wan wei, blong kliarem ples we Jos i stanap long hem long saed blong gavman.

?Olsem wanem ol memba blong Jos oli sapos blong fil abaot ol gavman? Taem yu stap stadi long seksen 134, tingting blong mekem tufala lis: wan lis blong ol prinsipol we yu lanem abaot gavman, mo wan narawan abaot ol responsabiliti blong ol sitisen. ?Olsem wanem ol aedia ia oli bin helpem ol fasfala Sent? ?Olsem wanem yu save yusum olgeta long ples we yu stap laef long hem?

Luk long long Ol Toktok blong Bilif 1:11–12; Gospel Topics, “Religious Freedom,” topics.ChurchofJesusChrist.org.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 133:4–14.Narasaed blong Saeon, long saed blong spirit, hem i Babilon—wan siti blong bifo we, truaot long ol skripja, i simbol blong nogud fasin mo fasin blong stap slef long saed blong spirit (luk long D. Todd Christofferson, “Come to Zion,” Ensign o Liahona, Nov. 2008, 37; Gaed long Ol Skripja, “Babel, Babilon,” olskripja.ChurchofJesusChrist.org). ?I gat eni samting we yu nidim blong mekem olsem wan famli, blong mekem se, long saed blong spirit, yu “aot long Babilon” (ves 5) mo “go long graon blong Saeon”? (ves 9).

Doktrin mo Ol Kavenan 133:20–33.Taem yu stap ridim ol ves ia tugeta, famli blong yu i save droem sam pikja blong wanem we, long tingting blong olgeta, bae hem i Seken Kaming. Mo tu, yufala i save pleiplei o singsing wan singsing abaot Seken Kaming, olsem “When He Comes Again” (Children’s Songbook, 82–83), mo toktok raon long wanem famli blong yu i save mekem blong rere from taem ia we bae Hem i kam.

Doktrin mo Ol Kavenan 133:37–39.?Bae famli blong yu i glad blong ridim ol ves ia “long wan laod voes”? (ves 38). ?Hem i minim wanem blong serem gospel long wan laod voes? ?Wanem trutok nao yumi save serem?

Doktrin mo Ol Kavenan 134:1–2.Blong helpem famli blong yumi blong andastanem hamas gavman i impoten, yufala i save toktok raon long ol kwestin olsem: ?Long wanem wei nao famli blong yumi i gat blesing from i gat ol rul? ?Olsem wanem kantri blong yumi i gat blesing from se i gat ol loa? Yu save mekem o kalarem wan pikja blong flag blong kantri blong yu, o yufala i save lanem nambaleven mo nambatwelef toktok blong bilif.

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Kam Pikinini blong God,” STSP, pej 4.

Stap Kam Antap long Stadi blong Yuwan

Tijim klia mo simpol doktrin. Lod i tokbaot gospel blong Hem wetem ol toktok ia olsem “i klia” mo “i simpol” (Doktrin mo Ol Kavenan 133:57). ?Ol toktok ia oli talem wanem long yu abaot wei blong stap tijim gospel long famli blong yu?

Kraes I Wetem Red Longfala Klos blong Hem, i kam long Minerva Teichert