Josef Smit i stap prij

4–10 Oktoba

Doktrin mo Ol Kavenan 111–114

“Bae Mi Givim Oda long Evri Samting blong Gud blong Yufala”

Sista Cheryl A. Esplin, foma kaonsel long Praemeri Jeneral Presidensi, i bin tijim se yumi mas “helpem ol pikinini blong yumi blong putum doktrin insaed long hat blong olgeta long wan wei we doktrin ia, bae oli soemaot tru long ol fasin mo ol aksen blong olgeta truaot long laef blong olgeta” (“Teaching Our Children to Understand,” Ensign o Liahona, May 2012, 10).

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Blong leftemap tingting blong ol pikinini blong oli serem samting, tekem sam samting we i go wetem wan samting long wan lesen we i pas finis. Letem olgeta oli tokbaot samting ia, se i mekem olgeta oli tingbaot wanem.

tijing pikja bokis

Tijim Doktrin: Ol Smol Pikinini

Doktrin mo Ol Kavenan 111:2, 10–11

Ol samting blong God, oli ol rij samting long mi.

Taem ol pikinini oli tingting long toktok ia, rij samting oli gat pikja blong ol samting we oli defren long ol rij samting we oli traem tokbaot insaed long Doktrin mo Ol Kavenan 111:2, 10. ?Olsem wanem nao yu save helpem olgeta blong oli lanem blong holemtaet gud ol samting we oli blong Lod.

Samfala Aktiviti we Yu Save Mekem

• Invaetem ol pikinini blong dro wanem i kam long maen blong olgeta taem oli harem toktok ia rij samting. Komperem ol samting we wol ia i luk olsem ol rij samting wetem ol samting we Lod i putum olsem rij samting (luk long Doktrin mo Ol Kavenan 111:2, 10–11), olsem ol pipol blong Hem, waes mo stret mo gud fasin blong Hem, mo stap mekem ol gudfala joes.

• Helpem ol pikinini blong finisim aktiviti pej blong wik ia. ?Wanem nao yumi lanem abaot Jisas aot long ol samting we Hem Hemwan i holemtaet o i tekem se i wan rij samting? ?Olsem wanem nao yumi save kam moa olsem Hem?

Doktrin mo Ol Kavenan 112:10

Lod bae i tekem han blong mi mo bae i lidim mi, mo bambae i ansa long prea blong mi.

Doktrin mo Ol Kavenan 112: 10 i save helpem ol pikinini we yu stap tijim blong oli bildimap fet ia se Jisas Kraes bae i lidim mo gaedem olgeta truaot long laef blong olgeta.

Samfala Aktiviti we Yu Save Mekem

• Helpem ol pikinini blong oli tingting long sam situesen we hem i impoten blong holem han blong wan memba blong famli, olsem long taem blong krosem rod o long taem blong givim kamfot. Maet bae oli glad blong aktemaot sam long ol eksampol ia we oli serem. Ridim Doktrin mo Ol Kavenan 112:10. ?From wanem yumi wantem Lod blong i “tekem han mo lidim yumi?”

• Fasem ae blong wan long ol pikinini, mo askem hem blong wokbaot i go krosem rum wetem wan nara pikinini we i stap holem han blong hem mo lidim hem. Tokbaot wan eksperiens blong wan taem we yu bin filim Lod i stap holem han blong yu mo lidim yu.

  Jisas wetem wan boe mo mama blong hem.

  Girap mo Wokbaot, i kam long Simon Dewey

Doktrin mo Ol Kavenan 112:11

Jisas i wantem mi blong mi lavem evriwan.

Helpem ol pikinini blong oli save se Sevya i wantem yumi blong lavem evriwan, iven olgeta we oli no tritim yumi wetem kaen fasin.

Samfala Aktiviti we Yu Save Mekem

• Taem yu stap serem “Japta 41: Trabol long Ketlan” (Ol Doktrin mo Kavenan Stori 158–60), askem ol pikinini blong mekem sep blong hat wetem ol han blong olgeta taem oli harem abaot wan we i stap mekem raet samting. Helpem olgeta blong andastanem se Lod i wantem yumi blong lavem evriwan, iven olgeta we maet oli stap mekem ol rong joes.

• Droem wan fes we i no hapi antap long bod, mo askem ol pikinini olsem wanem yumi save soem lav long ol narawan we oli no hapi (luk long Doktrin mo Ol Kavenan 112:11). Taem ol pikinini oli serem ol aedia, droem bakegen wan fes we i no hapi blong i kam wan hapi fes. Serem testemoni blong yu abaot paoa we i kam taem yumi lavem ol narawan. Sing tugeta wan singsing abaot lav, olsem “Jesus Said Love Everyone” (Children’s Songbook, 61).

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 112:10

Mi save gat tingting i stap daon mo lukaotem blong God i soem rod long mi.

Papa long Heven i wantem yumi blong stap gat tingting i stap daon blong mekem se Hem i save soem rod long yumi. Helpem ol pikinini blong oli andastanem se oli save soem fasin blong gat tingting i stap daon long fored blong God taem oli mekem ol samting olsem blong prea long Hem mo akseptem kaonsel blong Hem.

Samfala Aktiviti we Yu Save Mekem

• Askem ol pikinini se i minim wanem blong gat tingting i stap daon. (Oli save ridim “Humility” insaed long True to the Faith [ol pej 86–87] sapos i nid). Helpem olgeta blong tingting long sam toktok o sentens we i go wetem “gat tingting i stap daon” mo invaetem olgeta blong ridim Doktrin mo Ol Kavenan 112:10, mo riplesem wan long ol toktok ia o sentens ia wetem “gat tingting i stap daon” long ves ia. ?From wanem nao Papa long Heven i wantem yumi blong gat tingting i stap daon? Blong lanem moa, ol pikinini oli save ridim sam moa skripja we oli putum long lis anda long “Tingting I Stap Daon, Fasin blong Gat Tingting I Stap Daon” insaed long Gaed long Ol Skripja (olskripja.ChurchofJesusChrist.org).

• Raetem ol toktok we oli stap long Doktrin mo Ol Kavenan 112:10 long bod, mo askem ol pikinini blong ridim olgeta laod. Invaetem wan pikinini blong raetem laen andanit long ol blesing blong olgeta we oli gat tingting i stap daon, we oli tokbaot insaed long ves ia. Leftemap tingting blong ol pikinini blong serem sam taem we oli bin gat tingting i stap daon mo oli askem help blong Lod mo Hem i bin lidim olgeta; ol taem ia oli ol taem we Lod i bin ansarem prea blong olgeta.

Doktrin mo Ol Kavenan 112:11

Jisas i wantem mi blong mi lavem evriwan.

Jisas Kraes i stret eksampol ia blong fasin blong stap lavem evriwan, iven olgeta we oli no bin mekem gud long Hem. Josef Smit tu, i mas gotru long fasin blong agens; olgeta we oli agens oli olgeta we oli bin ol fren blong Hem. Helpem ol pikinini blong oli lanem se yumi save lavem ol narawan, jes olsem Sevya mo Josef Smit i bin mekem.

Samfala Aktiviti we Yu Save Mekem

• Invaetem ol pikinini blong oli kam, wan afta wan, mo ridim “Japta 41: Trabol long Ketlan” (Ol Doktrin mo Kavenan Stori, 158–60). ?Huia insaed long stori i bin mekem ol problem insaed long Ketlan oli go mowas? ?Huia i bin traem blong mekem samting i kam gud moa? Invaetem ol pikinini blong oli ridim Doktrin mo Ol Kavenan 112:11 mo tokbaot from wanem hem i impoten blong lavem evriwan.

• ?From wanem hem i impoten blong lavem ol pipol we oli defren long yumi? ?From wanem bae Papa long Heven i givim yumi ol samting w oli defren? ?Olsem wanem yumi letem lav i fulap we i fulap long evriwan, iven olgeta we oli defren long yumi? Singsing wan singsing wetem ol pikinini abaot fasin blong lavem ol narafala man, olsem “I’ll Walk with You” (Children’s Songbook, 140–41).

• Helpem ol pikinini blong oli tingting abaot samfala eksampol blong taem we Sevya i bin lavem olgeta we oli no stap mekem gud long Hem (eksampol, luk long Luk 23:64).

Doktrin mo Ol Kavenan 112:12–15, 26

Olgeta we oli rili jenisim laef blong olgeta, oli kam blong save Jisas Kraes.

Blong kam blong jenisim laef blong yu long Jisas Kraes, i wan rod we i tekem ful laef. Mo i minim moa bitim blong “stap talemaot nomo se yu save nem blong [Hem]” (Doktrin mo Ol Kavenan 112:26). Helpem ol pikinini blong andastanem gud moa wanem i minim blong rili save Sevya.

Samfala Aktiviti we Yu Save Mekem

• Serem, wetem ol pikinini, se long 1837, sam long Ol Aposol oli bin tanem olgeta agensem Profet Josef Smit. ?From wanem hem i impoten blong folem profet? (luk long ves 15). Helpem ol pikinini blong mekem wan lis blong ol samting we Lod i bin talem long Tomas B. Mars, Presiden blong Kworom blong Olgeta Twelef Aposol blong mekem (luk long Doktrin mo Ol Kavenan 112:12–15). Yusum lis ia blong toktok raon long wei we yumi save jenisim laef blong yumi moa long Jisas Kraes.

• Askem ol pikinini se oli ting se i minim wanem blong stap taltalem se yumi save Jisas Kraes, be yumi no rili save Hem (luk long Doktrin mo Ol Kavenan 112:26). ?Wanem nao ves 14 i stap tijim yumi abaot wanem yumi save mekem blong kam blong save Hem gud moa? Helpem ol pikinini blong oli andastanem wanem i minim blong tekem kros blong yumi (Josef Smit Translesen, Matiu 16:25–26 [insaed long the Bible appendix]) o wanem i minim blong fidim ol sipsip blong Hem.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong talemsot wanem we oli bin lanem long klas tedei. Helpem olgeta blong raetem wan not, o blong oli droem wan pikja we bae i rimaenem olgeta abaot wanem oli lanem blong mekem se oli save serem wetem famli blong olgeta.

Stap Kam Antap long Fasin blong Yumi blong Stap Tij

Ol pikinini oli wantem save evri samting mo oli lan long plante wei. Ol pikinini oli stap glad blong lanem samting tru long ol niu mo defren eksperiens. Yusum ol aktiviti we bae i helpem olgeta blong muv olbaot, yusum evri sens blong olgeta, mo traem ol niufala samting. (Luk long Teaching in the Savior’s Way, 25–26

aktiviti pej: Mi save holemtaet gud ol samting blong Lod