“4–10 Oktoba. Doktrin mo Ol Kavenan 111–114: ‘Bae Mi Givim Oda long Evri Samting blong Gud blong Yufala,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“4–10 Oktoba. Doktrin mo Ol Kavenan 111–114” Kam Folem Mi—Blong Wanwan Man, Woman mo Famli: 2021
4–10 Oktoba
Doktrin mo Ol Kavenan 111–114
“Bae Mi Givim Oda long Evri Samting blong Gud blong Yufala”
Wetem prea askem blong Spirit i soem rod taem yu stap ridim Doktrin mo Ol Kavenan 111–114, mo raetemdaon ol filing mo tingting blong yu. Afta, tingting long sam wei we yu save tekem aksen folem ol tingting mo filing ia.
Raetemdaon Ol Filing mo Tingting blong Yu
?Yu yu eva gat wan eksperiens we i mekem se yu filim se yu gat tras long yuwan, mo yu filim se yu stap sef long fet blong yu—be afta, ol hadtaem blong laef oli traem fet blong yu, mo yu faenem se yu stap hadwok blong faenembak pis ia we yu bin filim bifo? Wan semmak samting olsem i bin hapen long Ol Sent long Ketlan. I no wan yia yet afta long ol taem we Ol Sent oli bin filim plante samting long saed blong spirit, we i hapen wetem dedikesen blong Ketlan Tempol, nao sam trabol oli kam antap. I gat problem blong mane, raorao long medel blong Kworom blong Olgeta Twelef Aposol, mo ol nara tes we oli mekem se sam oli no stap strong long fet blong olgeta.
Yumi no save stap longwe long ol tes; ?so hao nao yumi save stopem olgeta blong oli kam spolem fet mo testemoni blong yumi? Mebi, pat blong ansa ia i stap long kaonsel blong Lod, we i stap long Doktrin mo Ol Kavenan 112, we Lod i bin givim long taem we fasin blong agens, long Ketlan, i bin stap kam bigwan. Lod i bin talem: “Be yufala i mas mekem hat blong yufala i kam klin evriwan long fored blong mi” (ves 28), “yufala i no mas agens” (ves 15), “yu mas mekem yu rere from wok ia” (ves 7), mo “Putum tingting blong yu i stap daon” (ves 10). Taem yumi stap folem kaonsel ia, Lod bae “bae i tekem han blong [yumi] mo lidim [yumi]” tru long wanem i save kam agens, mo bae i hilim mo givim pis long yumi (luk long ol ves 10, 13).
Sam Aedia blong Skripja Stadi blong Yuwan
Lod i save “givim oda long evri samting blong gud blong” mi.
Taem we oli kasem yia 1836: Jos i bin gat ol bigfala kaon blong mekem wok blong Lod. Taem we Josef Smit mo ol narawan oli bin wari abaot ol kaon ia, mo oli tingting blong sam rod blong pemaot ol kaon ia, oli bin travel i go long Salem, Masajusets; maet oli mekem hemia from se i gat toktok i stap go raon se oli bin fogetem wan mane i stap long wan haos longwe (luk long seksen heding blong Doktrin mo Ol Kavenan 111). Afta we oli kasem Salem, Lod i talem: “I gat moa bitim wan rij samting blong yufala insaed long siti ia” (ves 10)—ol rij samting ia, oli tekem tu ol pipol “we bae [Lod i] mekem oli kam wanples long stret taem, blong gud blong Saeon” (ves 2; luk tu long Eksodas 19:5). I nomata we oli no faenem eni mane long Salem, ol konvet we oli bin kam afta, from misinari wok we i bin tekem ples, oli pat blong promes ia blong Lod we i bin kamtru.
Taem yu stap ridim seksen 111, tingting abaot ol samting we yu stap wari long ol. Tingting long olsem wanem nao, ol toktok blong Lod long Josef, oli blong yu tu. ?Olsem wanem nao Lod i bin helpem yu blong faenem “ ol rij samting” we yu neva ting long ol? (ves 10). Tingting long wanem Hem i bin mekem blong “i givim oda long evri samting blong gud blong [yu]”? (ves 11). Sentens ia: “kwik olsem we yufala i save kasem olgeta,” ?hem i tijim yu wanem abaot Papa long Heven?
Luk tu long Matiu 6:19–21, 33; “More Treasures Than One,” Revelations in Context, 229–34.
Doktrin mo Ol Kavenan 112:3–15
Lod bae i lidim olgeta we oli gat tingting we i stap daon mo stap lukaotem wanem Hem i wantem.
Yuniti insaed long Kworom blong Olgeta Twelef i bin stap go daon long sama blong yia 1837. Oli no bin agri long saed blong ol responsabiliti, mo samfala memba oli bin stap toktok agensem Profet Josef Smit. Tomas B. Mars, we long tetaem ia i bin Presiden blong Kworom blong Olgeta Twelef, i bin wari, mo hem i bin aot long Misuri i go long Ohaeo, blong i askem kaonsel blong Profet. Brata Mars i kasem kaonsel ia tru long revelesen we i stap long seksen 112. ?Olsem wanem nao kaonsel blong Lod i bin helpem hem mo kworom blong hem? ?Wanem lesen nao i stap insaed, we oli blong yu, taem yu stap lukaotem blong winim ol raorao mo ol nogud strong filing?
Speseli, yu save tingting hevi long ves 10. ?Hem i minim wanem blong Lod i “tekem han blong yu” mo i lidim yu? ?From wanem nao yu nidim blong gat tingting i stap daon blong akseptem man blong i lidim yu olsem?
Luk tu long Ulisses Soares, “Be Meek and Lowly of Heart,” Ensign o Liahona, Nov. 2013, 9–11; “The Faith and Fall of Thomas Marsh,” Revelations in Context, 54–60.
Sapos yumi gat tingting i stap daon, bae Lod i lidim yumi mo i ansarem ol prea blong yumi.
Josef Smit i bin “wan wokman we i stap long han blong Kraes.”
Aesea i bin talem se wan ol laen blong Jese i “laen” mo i “rus” (Aesea 11:1, 10). Long seksen 113, Lod i eksplenem se laen ia, wan wokman blong Kraes, bae i wan tul insaed long wok ia blong pulum ol pipol blong Lod oli kam tugeta wanples long ol las dei ia (luk long Doktrin mo Ol Kavenan 113:4, 6)—we i wan profesi we i tokbaot gud Profet Josef Smit. ?Olsem wanem nao trutok ia, wetem ol nara trutok insaed long seksen 113 oli bin leftemap tingting blong Ol Sent long taem blong hadtaem ia we oli bin stap gotru long hem long Ketlan? ?Wanem nao yu faenem, insaed long revelesen ia, we i givim insperesen long yu blong tekpat long wok blong Lod tedei?
Luk tu long Gaed long Ol Skripja, “Jesse,” olskripja.ChurchofJesusChrist.org; 2 Nifae 21:10–12; Josef Smit—Histri 1:40.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 111:2, 9–11.Olgeta ves ia, oli save pusum tingting blong famli i save toktok raon abaot wanem famli valiu oli ol “rij samting” we oli no save finis. Yu save krietem wan tresa resis taem yu haedem ol samting raon long haos; ol samting ia oli ripresentem ol samting we Lod i tekem se oli impoten tumas. Taem we famli blong yu i stap traem blong faenem wanwan samting ia, toktok raon long wanem yu save mekem blong soem se yu tekem ol samting ia tu oli impoten.
-
Doktrin mo Ol Kavenan 112:10.Elda Ulisses Soares i tokbaot ol pipol we oli gat tingting i stap daon, long wei ia” “Olgeta we oli gat tingting i stap daon, oli save tijim olgeta, oli save luksave hamas oli mas dipen long God, mo oli wantem blong stap folem tingting blong Hem. Olgeta we oli gat tingting i stap daon, oli no stap flas, mo oli gat paoa blong lidim tingting blong ol narawan blong oli kam olsem (“Be Meek and Lowly of Heart,” Ensign o Liahona, Nov. 2013, 10). Tingting long ol wei blong helpem famli blong yu blong andastanem se i minim wanem blong gat tingting i stap daon. Yufala i save singsing wan singsing abaot fasin blong putum o gat tingting i stap daon, olsem “Be Thou Humble” (Hymns, namba130), mo long semtaem, wan memba blong famli i tekem han blong ol narawan mo i lidim olgeta raon long hom. O, serem wan eksperiens blong wan taem we Lod i bin tekem han blong ol memba blong famli blong yu mo lidim olgeta mo givim ansa long prea blong olgeta.
-
Doktrin mo Ol Kavenan 112:11–14, 26.?Wanem i defren bitwin blong save nem blong wan mo blong save olgeta? ?Wanem nao yumi lanem aot long ol ves 11–14 abaot mining blong save Lod?
-
Doktrin mo Ol Kavenan 112:15.?Wanem i minim blong “go agensem” profet? ?Wanem nao yumi faenem insaed long ves ia we bae i helpem yumi blong sapotem profet?
-
Doktrin mo Ol Kavenan 113:7–8.?Wanem nao yumi save lanem aot long ol ves 8 we bae i help blong “tekem Saeon i kam bakegen” mo pemaot Isrel?
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Be Thou Humble,” Hymns, no. 130.
Stap Kam Antap long Fasin blong Yumi blong Stap Tij
Laef folem testemoni blong yu. “Yu stap tijim huia yu,” Elda Neal A. Maxwell i tijim. ‘Bae man i tingbaot moa ol fasin blong yu bitim wan trutok insaed long wan spesel lesen’” (Teaching in the Savior’s Way, 13).
Tomas B. Mars i raetemdaon revelesen we i kam long hem tru long Josef Smit. Be Thou Humble, i kam long Julie Rogers.