Fasfala Hol long Graon, i kam long James Taylor Harwood

17–23 Mei.

Doktrin mo Ol Kavenan 51–57

“Wan Wokman we I Fetful, I Stret, mo I Waes”

Antap long ol aedia we oli givim long ples ia, Spirit bae i save pusum yu blong lukluk nomo long wan nara samting we i stap long Doktrin mo Ol Kavenan 51–57 we i impoten long ol pikinini ia we yu stap tijim.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Letem ol pikinini we oli wantem serem samting we oli stap lanem, oli tekem wan namba long wan kontena blong faenemaot oda we oli folem blong serem tingting blong olgeta.

Stap Tijim Doktrin: Ol Smol Pikinini

Doktrin mo Ol Kavenan 51:9

Mi save stap ones.

Plante smol pikinini oli stap lanem yet se i minim wanem blong talem trutok. Tingbaot olsem wanem nao yu save talem strong bakegen hamas i impoten blong stap ones long toktok mo long aksen.

Samfala Aktiviti we Yu Save Mekem

• Aot long Doktrin mo Ol Kavenan 51:9, ridim long ol pikinini: “Mo evri man i mas mekem samting wetem ones fasin” (luk tu long Ol Toktok blong Bilif 1:13). Askem ol pikinini sapos oli save se i minim wanem blong stap ones. Blong helpem olgeta blong andastanem samting gud moa, givim olgeta ol eksampol blong aksen we oli ones.

• Serem sam simpol stori abaot ol pikinini we oli fesem ol desisen abaot fasin blong stap ones, olsem desisen blong admitim se oli bin mekem wan rong samting. Yusum ol pikja, ol stoking papet, o ol pepa doli blong mekem ol stori ia oli moa intresting. Askem long ol pikinini sapos ol pipol ia oli stap ones, o oli no ones.

• Singsing wan singsing abaot fasin blong stap ones, olsem “Stand for the Right” (Children’s Songbook,159). Talem testemoni blong yu abaot from wanem nao hem i impoten blong stap ones.

Doktrin mo Ol Kavenan 52:10; 53:3; 55:1

Presen ia we i Tabu Spirit, yumi kasem tru long fasin blong man i putum han antap long hed blong yumi.

Blong stap kasem Tabu Spirit tru long fasin blong man i putum han antap long hed, oli tokbaot plante taem insaed long Doktrin mo Ol Kavenan 51–57. Maet hemia i wan gudfala janis blong tijim ol pikinini abaot odinens ia.

Samfala Aktiviti we Yu Save Mekem

• Soem wan pikja blong wan pikinini we i kasem baptaes (luk long Gospel Art Buk, namba 105). Askem ol pikinini blong talem long yu wanem nao i stap hapen long wanwan pikja. Askem olgeta blong klapem han blong olgeta taem oli harem “fasin blong putum han antap long hed”, o “fasin blong putum han antap long hed blong man” taem yu stap ridim wan o moa long olgeta ves ia: Doktrin mo Ol Kavenan 52:10; 53:3; 55:1.

• Talem ol pikinini abaot taem we yu bin kasem presen ia we i Tabu Spirit, taem we oli bin putum han antap long hed blong yu blong mekem hemia afta we yu bin baptaes. Helpem ol pikinini blong luk se ol presen ia oli stap yet tedei. I gat plante wei we yu save invaetem Spirit i kam insaed long klas blong yu.

• Singsing“The Holy Ghost” (Children’s Songbook,105) o wan singsing we i kolosap semmak. Poenemaot ol toktok mo sentens we i stap tij abaot presen ia we i Tabu Spirit.

  

  Pikja blong wan boe we i kasem konfemesen, i kam long Dan Burr

Doktrin mo Ol Kavenan 54:4–6

Mi mas oltaem kipim ol promes blong mi.

Liman Kopli i bin mekem kavenan blong letem Ol Sent blong Kolesvil, Niu Yok, blong oli stap laef long graon blong hem long Ohaeo. Be, afta we oli kasem longwe, hem i brekem kavenan blong hem, mo i bin mekem olgeta oli aot.

Samfala Aktiviti we Yu Save Mekem

• Serem long ol pikinini wanem i bin hapen long Ol Sent we oli bin kam blong stap laef long graon blong Liman Kopli, (luk long seksen heding blong Doktrin mo Ol Kavenan 54; luk tu long “Japta 21: Wan Revelesen blong Stap long Misuri,” Ol Doktrin mo Kavenan Stori, 81–83). Helpem olgeta blong tingting long hao nao Ol Sent oli bin filim taem we Liman i bin brekem promes blong hem.

• Katem wan pepa hat long haf, mo givim wanwan haf long 2 defren pikinini. Askem olgeta blong holemap tu haf tugeta blong mekem wan ful hat. Letem ol nara pikinini oli gat taem blong holemap wan pat blong hat ia. Helpem ol pikinini blong oli komperem hemia wetem ol promes o ol kavenan we yumi stap mekem wetem God. Oltaem nomo bae God i holem pat blong Hem insaed long kavenan ia sapos yumi holem pat blong yumi.

• Mekem ol pikinini oli tingbaot se, taem oli baptaes, bae oli kavenan, o promes, blong stap obei long ol komanmen blong God. Ridim Doktrin mo Ol Kavenan 54:6 long ol pikinini blong oli save olsem wanem nao Lod i stap blesem ol pipol we oli stap kipim ol kavenan blong olgeta.

Stap Tijim Doktrin: Ol Bigfala Pikinini

Doktrin mo Ol Kavenan 51:19; 55

Mi save yusum ol blesing we God i bin givim long mi blong blesem ol nara pipol.

Lod i bin givim, wetem tras, long wanwan long yumi, ol presen mo ol blesing we yumi save yusum blong bildimap kingdom blong Hem.

Samfala Aktiviti we Yu Save Mekem

• Haedem ol toktok ia, “fetful,” “stret,” mo “waes” raon long rum. Invaetem ol pikinini blong faenem ol toktok insaed long rum, mo afta, faenem olgeta toktok ia insaed long Doktrin mo Ol Kavenan 51:19. Ridim ves ia tugeta, mo tokbaot se i minim wanem blong stap olsem wan we i stap lukaot long wan samting. Sapos i nid, tugeta, ridim fasfala paragraf blong “Lukaot long Ol Samting, Man blong, Wok blong” insaed long Gaed blong Ol Skripja (olskripja.churchofjesuschrist.org).

• Talem long ol pikinini long saed blong Wiliam W. Fels, we i bin wan man blong pablisim niuspepa, bifo hem i harem gospel mo i stap muv i go long Ketlan. Invaetem ol pikinini blong ridim Doktrin mo Ol Kavenan 55: 1–4 mo lukaotem wanem nao God i bin wantem Wiliam blong mekem. ?Wijwan long ol samting ia nao i blong yumi evriwan, mo wijwan nao oli spesifik long Wiliam from ol talen blong hem? Askem ol pikinini blong faenemaot ol talen we oli luk long wanwan long olgeta, mo toktok raon long olsem wanem nao oli save yusum ol talen ia blong wok blong God mo ol pikinini blong Hem.

Doktrin mo Ol Kavenan 52:14–19

God i gat wan paten blong helpem mi blong oli no trikim mi.

Long ol ves ia, Lod i givim wan paten blong “mekem se [ol giaman tija mo mesej] oli no trikim yufala” (Doktrin mo Ol Kavenan 52:14).

Samfala Aktiviti we Yu Save Mekem

• Soem wan eksampol blong paten ia long ol pikinini (olsem wan paten blong folem blong somap klos, o mekem wan samting), mo tokbaot from wanem ol paten ia oli save help. Blong helpem ol pikinini blong oli lanem wan paten we i kam long Lod, raetem ol sentens olsem long bod: Hem we i, , hem, hem i , Hem we i,  bambae hem i , mo Hem we i, hem i no . Invaetem ol pikinini blong ridim Doktrin mo Ol Kavenan 52: 15–18 mo oli komplitim ol emti spes. From wanem paten ia i save helpem yumi (luk long ol ves 14, 19).

• Dro wan simpol samting, mo invaetem ol pikinini blong folem paten blong yu blong mekem semfala droing ia. Afta, wetem olgeta, luklukgud long paten blong Lod we i stap long Doktrin mo Ol Kavenan 52:14–19.

Doktrin mo Ol Kavenan 54

Mi mas oltaem kipim ol kavenan blong mi.

I nomata we ol kavenan blong yumi oli blong yumiwan, hamas yumi fetful blong kipim olgeta i save tajem laef blong ol narawan. Stori blong Liman Kopli mo Ol Sent blong Kolesvil, Niu Yok, i wan gudfala eksampol blong trutok ia.

Samfala Aktiviti we Yu Save Mekem

• Serem long ol pikinini wanem i bin hapen long Ol Sent we oli bin aot long Kolesvil, Niu Yok, blong stap laef long graon blong Liman Kopli, (luk long seksen heding blong Doktrin mo Ol Kavenan 54; luk tu long “Japta 21: Wan Revelesen blong Stap long Misuri,” Ol Doktrin mo Kavenan Stori, 81-82). ?Bae yu filim olsem wanem sapos yu yu wan long olgeta Sent ia mo faenemaot se Liman i brekem kavenan blong hem blong serem graon blong hem? ?Wanem nao stori ia i stap tijim yumi long saed blong fasin blong yumi stap kipim ol kavenan blong yumi? Ridim Doktrin mo Ol Kavenan 54:6 tugeta blong lanem abaot ol blesing we Lod i stap givim long olgeta we oli stap kipim ol kavenan blong yumi.

• Mekem ol pikinini oli tingbaot ol kavenan we oli bin mekem taem oli bin kasem baptaes (luk long Mosaea 18:8–10). Helpem olgeta blong tingting long sam wei we oli stap kipim ol kavenan ia, mo helpem olgeta blong luk olsem wanem hemia bae i mekem olgeta oli rere blong mekem sam moa kavenan long fiuja.

Stap Leftemap Tingting blong Lanem Samting long Hom

Sapos i luk se ol pikinini oli bin laekem wan long ol aktiviti ia, givim tingting long olgeta blong oli mekembak aktiviti ia long hom wetem famli blong olgeta.

Stap Kam Antap long Fasin blong Yumi blong Stap Tij

Laef folem wanem yu stap tijim. Tijing blong yu bae i gat moa paoa sapos yu save testifae, aot long eksperiens blong yuwan, abaot ol blesing blong stap laef folem gospel. Taem yu stap jusum olgeta prinsipol we bae yu tijim long ol pikinini, tingting hevi long wei we yu save laef folem olgeta prinsipol ia moa fulwan. (Luk long Teaching in the Savior’s Way, 13–14.)