Ol pipol oli kam tugeta long saed blong pul blong wota

Kamp Miting, i kam long Worthington Whittredge

3–9 Mei

Doktrin mo Ol Kavenan 46–48

“Lukaotem Wetem Strong Tingting, Ol Presen Ia we Oli Moa Gud Bitim Ol Narawan”

Tingting abaot ol pikinini taem yu stap ridim Doktrin mo Ol Kavenan 46–48. Lukluk i gobak long “Lukluk long Ol Nid blong Ol Yangfala Pikinini” we i stap long stat blong buk ia blong gat sam moa aedia blong tingting long olgeta.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong droem wan pikja blong wan samting we oli lanem long lesen blong las wik, o long hom long las wik. Givim sam rimaenda long olgeta sapos oli nidim. Afta, mekem ol pikinini oli tokbaot ol pikja blong olgeta.

tijing pikja bokis

Tijim Doktrin: Ol Smol Pikinini

Doktrin mo Ol Kavenan 46:2–6

Mi save mekem ol nara man oli filim welkam long jos.

Yumi evriwan, wetem ol pikinini,yumi wantem se yumi filim welkam mo oli akseptem yumi. ?Olsem wanem yu save yusum ol ves ia blong helpem ol pikinini blong oli mekem ol narawan oli filim se oli welkam long jos?

Samfala Aktiviti we Yu Save Mekem

• Ridim Doktrin mo Ol Kavenan 46:5 laod, mo talem long ol pikinini, long toktok blong yuwan, se ves ia i minim wanem. Soem ol pikja blong ol pipol we oli kam raon long wol. Askem ol pikinini se wijwan nao long ol pipol ia, Papa long Heven bae i wantem yumi blong invaetem i kam long ol miting blong Jos. Helpem ol pikinini blong oli praktis blong invaetem yu o wanwan long olgeta blong kam long wan miting blong Jos, o long wan aktiviti.

• Askem ol pikinini blong traem tingting se wan fren i stap kam long jos blong fas taem. Helpem olgeta blong tingting long wan sam wei we oli save helpem fren blong olgeta blong filim welkam. Letem olgeta oli praktisim wanem bae oli talem, o mekem, sapos oli luk wan fren i wokbaot i go long japel, o long klasrum blong fasfala taem.

Doktrin mo Ol Kavenan 46:13–26

Papa long Heven i blesem mi wetem ol presen blong Hem.

Wanwan long ol pikinini we yu stap tijim i wan boe o gel blong Papa long Heven, mo Hem i bin blesem olgeta wetem ol presen long saed blong spirit.

Samfala Aktiviti we Yu Save Mekem

• Yusum Doktrin mo Ol Kavenan 46:13–26 o “Japta 20: Ol Presen we Oli Kam long Spirit” (Ol Doktrin mo Kavenan Stori, 77–80) blong eksplenem long ol pikinini sam long ol presen ia we Papa long Heven i stap givim yumi tru long Spirit mo from wanem Hem i stap givim olgeta. Sapos i posibol, soem ol samting o ol pikja we oli ripresentem wanwan presen ia. Stop wanwan taem blong askem ol pikinini olsem wanem ol presen ia oli save blesem wan.

• Givim wan samting long wan pikinini, we oli save serem, olsem wan pis bred, o tu pleiplei. Askem pikinini ia blong i serem wanem yu bin givim long hem wetem ol nara memba blong klas. Eksplenem se Papa long Heven i bin givim ol presen long yumi, mo Hem i wantem yumi blong yusum olgeta blong helpem ol narawan. Talem long ol pikinini abaot wan taem we yu bin kasem blesing from wan i bin serem ol presen blong hem long saed blong spirit.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 46:8–26

Papa long Heven i givim ol presen long saed blong spirit long mi, blong mi blesem ol narawan.

Ol presen we oli tokbaot insaed long Doktrin mo Ol Kavenan 46—mo plante long ol nara presen long saed blong spirit—oli kam long God tru long Tabu Spirit. Yu save helpem ol pikinini blong faenemaot ol presen we God i bin givim long olgeta—mo tu long ol narawan we oli save lukaot blong kasem—taem yufala i stap stadi tugeta long Doktrin mo Ol Kavenan 46.

Samfala Aktiviti we Yu Save Mekem

• Raetem long ol defdefren pis pepa, sam long ol presen long saed blong spirit we oli faenem insaed long Doktrin mo Ol Kavenan 46:13–26, mo Ol Toktok blong Bilif 1:7, mo haedem olgeta insaed long rum. Invaetem wanwan pikinini blong faenem wan long ol pepa ia mo luklukgud insaed long ol ves blong faenem weaples oli tokbaot presen ia insaed long ol skripja. Afta, ridim tugeta Doktrin mo Ol Kavenan 46:8–9, 12. ?From wanem nao Papa long Heven i givim ol presen long saed blong spirit, long yumi?

• Helpem ol pikinini blong oli raetem long bod ol presen ia we i kam long Spirit, we oli tokbaot insaed long Doktrin mo Ol Kavenan 46. Taem oli stap raetem wanwan presen antap long lis, tokbaot olsem wanem nao oli save yusum presen ia blong blesem ol narawan. Wanem i stap long “Japta 20: Ol Presen we Oli Kam long Spirit” (Ol Doktrin mo Kavenan Stori, 77-80) i save help. Talem long ol pikinini se wanwan long olgeta oli gat ol presen long saed blong spirit. Leftemap tingting blong olgeta blong askem Papa long Heven blong helpem olgeta blong luksave ol presen we oli gat, mo olsem wanem nao oli save yusum ol presen ia blong helpem ol narawan.

Doktrin mo Ol Kavenan 47:1, 3

Mi save raetem histri blong mi.

Lod i bin singaotem Jon Witma blong hem i raetem wan histri blong Jos. Tedei, yumi gat fulap blesing from ol histri blong Jos we oli bin raetem i stap ova long ol yia we oli pas.

Samfala Aktiviti we Yu Save Mekem

• Ridim tugeta Doktrin mo Ol Kavenan 47:1, 3, mo askem ol pikinini blong luksave wanem we Lod i bin wantem Jon Witma blong mekem. ?Wanem nao toktok ia, “oltaem” i minim long ves 3? ?Olsem wanem nao yumi gat blesing taem yumi save abaot histri blong Jos?

• Sapos ol pikinini we yu stap tijim, oli stap raet mo kipim wan jenol, askem olgeta blong tokbaot ol kaen samting we oli stap raetem long jenol blong olgeta. Maet bae ol pikinini oli laekem blong harem wan stori we i kamaot long jenol blong yu taem yu smol, o i kamaot long jenol blong wan bubu.

• Soem ol pikinini sam eksampol blong ol wei we oli save kipim histri, oltaem, abaot laef blong olgeta. Eksampol, oli save raet insaed long wan buk, putum ol pikja insaed long wan pikja buk, taep insaed long kompiuta, o mekem ol odio mo vidio rekoding. Helpem ol pikinini blong mekem wan lis blong ol samting we bae oli gud tumas blong putum insaed long histri blong olgetawan, olsem testemoni blong olgeta abaot Jisas Kraes. Invaetem ol pikinini blong mekem wan saen o wan posta blong oli tekem i gohom wetem sam long ol aedia ia blong rimaenem olgeta blong raetem ol histri blong olgetawan bakegen.

  gel we i stap stadi

  Ol jenol oli wan wei we yumi save kipim wan histri.

Doktrin mo Ol Kavenan 48:1–4

Mi save helpem ol narawan taem mi serem wanem oli bin givim long mi.

Lod i leftemap tingting blong Ol Sent long Ohaeo blong helpem ol nara Sent taem oli serem ol graon mo mane blong olgeta. ?Olsem wanem nao yu save yusum ol ves ia blong helpem ol pikinini blong faenem ol wei blong serem wetem ol narawan wanem we God i givim long olgeta?

Samfala Aktiviti we Yu Save Mekem

• Soem long ol pikinini wan map blong Niu Yok mo Ohaeo (luk long aotlaen blong 12–18 Jenuware insaed long Kam Folem Mi—Blong Wanwan Man, Woman mo Famli). Eksplenem se Lod i bin askem Ol Sent long Niu Yok mo ol nara eria blong oli kam tugeta long Ohaeo, be plante long olgeta oli no bin gat inaf mane blong bildimap wan haos taem oli kasem longwe. Helpem ol pikinini blong faenem, insaed long Doktrin mo Ol Kavenan 48: 1-4 wanem we Lod i bin askem long Ol Sent long Ohaeo blong mekem blong help. Askem ol pikinini wanem we oli wantem blong mekem blong help sapos oli bin stap laef long Ohaeo long tetaem ia. ?Wanem nao oli bin givim long yumi tedei we yumi save yusum blong helpem ol narawan? Eksampol, luk long “The Coat” (video, ChurchofJesusChrist.org).

• Ridim Doktrin mo Ol Kavenan 48:4 tugeta, mo invaetem ol pikinini blong lukaotem wan samting we Lod i bin askem Ol Sent blong mekem blong helpem wok blong Hem. Eksplenem se, blong sevem mane, bae i mekem se oli save pem wan graon mo bildim wan tempol wan dei. ?Wanem nao yumi save sevem mane from, blong yumi save help blong mekem wok blong Lod? Soem vidio “First Things First” (ChurchofJesusChrist.org), mo toktok raon long wei we ol pikinini, insaed long vidio ia, oli mekem komanmen ia blong Lod, blong sevem mane.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong askem ol memba blong famli abaot wan presen long saed blong spirit we oli filim se Lod nao i bin givim long olgeta. Mo tu, leftemap tingting blong ol pikinini blong prea mo lukaotem wan presen we i kam long Spirit, we oli wantem developem.

Stap Kam Antap long Fasin blong Yumi blong Stap Tij

Helpem ol pikinini blong lanem samting aot long skripja. Ol smol pikinini, maet oli no save rid tumas, be yu stil save help blong oli lanem samting aot long ol skripja. Eksampol, yu save ridim wan smol pat long skripja mo invaetem olgeta blong stanap o leftemap han blong olgeta taem oli harem wan semmak toktok o sentens.

aktiviti pej: God i givim mi ol presen long saed blong spirit