8–14 Maj

Doktrin mo Ol Kavenan 23–26

“Mekem Jos I Kam Strong Moa”

Taem yu stap rere blong tij, tingting hevi long ol aedia blong aktiviti long tugeta seksen blong “Ol Smol Pikinini” mo “Ol Bigfala Pikinini.”

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong Ema Smit (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Invaetem ol pikinini blong serem wanem oli save abaot hem, mo tu, ol samting we maet oli bin lanem taem oli stap stadi Doktrin mo Ol Kavenan 25 long wik we i jes pas. “Japta13: Josef mo Ema” (Ol Doktrin mo Kavenan Stori, 51–55) i save help.

Stap Tijim Doktrin: Ol Smol Pikinini

Doktrin mo Ol Kavenan 23:6; 26:1

God i wantem mi blong prea mo lan aot long ol skripja evri dei.

Lod i bin kaonselem ol lida mo ol fren blong Jos blong bifo blong prea (luk long Doktrin mo Ol Kavenan 23:6) mo stadi ol skripja (luk long Doktrin mo Ol Kavenan 26:1). ?Olsem wanem nao yu save helpem ol pikinini blong mekem prea mo ol skripja oli kam pat blong laef blong olgeta?

Samfala Aktiviti we Yu Save Mekem

• Ridim wan pat blong Doktrin mo Ol Kavenan 23:6, long ol pikinini, stat long “yu mas prea.” Helpem olgeta blong faenem ol defren wei mo ples we Lod i talem se yumi mas prea. Invaetem olgeta blong droem ol pikja blong olgetawan we oli stap prea long wan long ol wei ia, o wan long ol ples ia.

• Sapos i nid, eksplenem long ol pikinini olsem wanem blong prea. Wan singsing abaot prea, olsem “I Pray in Faith” (Children’s Songbook, 14), i save help.

• Ridim long ol pikinini: “Yufala i mas givim taem blong yufala blong stap stadi long ol skripja” (Doktrin mo Ol Kavenan 26:1). Talem long olgeta from wanem yu stadi ol skripja. Helpem olgeta blong tingbaot ol wei we oli save lan aot long ol skripja, nomata sapos oli no save rid yet.

• Singsing tugeta “Search, Ponder, and Pray” (Children’s Songbook, 109) o wan nara singsing abaot prea mo skripja stadi. Helpem ol pikinini blong faenem ol blesing we oli bin promesem long singsing ia. Talem long olgeta abaot ol filing long saed blong spirit we yu bin gat taem yu stap prea mo stap ridim ol skripja.

Doktrin mo Ol Kavenan 25:11–12

Jisas i lavem “singsing we i kam long hat.”

Lod i bin talem se, tabu miusik, mi “mi glad long hem.” Helpem ol pikinini blong lukluk singsing olsem wan wei blong wosipim Hem, be i no blong glad glad nomo.

Samfala Aktiviti we Yu Save Mekem

• Invaetem wanwan pikinini blong serem wan hym o singsing blong Jos we hem i laekem tumas, mo singsing sam long olgeta tugeta. Ridim Doktrin mo Ol Kavenan 25:12 long ol pikinini, mo invaetem olgeta blong pikjarem long maen blong olgeta olsem wanem Papa long Heven mo Jisas i filim taem Tufala i harem yumi stap singsing ol singsing ia.

• Tijim ol pikinini wan singsing abaot fasin blong stap singsing, olsem “Lift Up Your Voice and Sing” (Children’s Songbook, 252), o wan singsing abaot Jisas Kraes, olsem “He Sent His Son” (Children’s Songbook, 34–35). Invaetem olgeta blong singsing wan singsing wetem ol famli blong olgeta long wik ia.

  

  Singsing i wan wei we yumi save soem lav blong yumi long God.

Doktrin mo Ol Kavenan 25:13, 15

Mi save rere blong mekem ol tabu kavenan.

Ol pikinini we yu stap tijim oli stap rere blong mekem fas kavenan blong olgeta wetem Papa long Heven taem bae oli kasem baptaes. ?Olsem wanem yu save helpem olgeta blong luksave hamas ol kavenan ia blong yumi, oli hevi mo impoten tumas?

Samfala Aktiviti we Yu Save Mekem

• Ridim Doktrin mo Ol Kavenan 25:13 long ol pikinini. Eksplenem se toktok ia “holemtaet” long ves ia i minim blong hang strong long wan samting. Blong helpem olgeta blong andastanem, pasem wan samting we yu save holem, olsem wan ston (o iven wan aean stik), raon long rum, mo invaetem ol pikinini blong holem samting ia wetem evri paoa blong olgeta. Eksplenem se, blong stap holemtaet ol kavenan blong yumi i minim blong stap holem (o kipim) ol promes we yumi mekem wetem Papa long Heven mo neva lego (o neva givap).

• Yusum aktiviti pej blong wik ia blong tijim ol pikinini abaot ol taem we yumi mekem ol kavenan wetem Papa long Heven. Ridim Doktrin mo Ol Kavenan 25:15, mo eksplenem se “hat blong king blong stret mo gud fasin” i ripresentem ol blesing blong stap gobak laef wetem God, King blong yumi long Heven.

Stap Tijim Doktrin: Ol Bigfala Pikinini

Doktrin mo Ol Kavenan 23:3–7; 25:7

Jisas i wantem mi blong mekem olgeta raon long mi oli kam strong moa.

Taem we oli jes oganaesem Jos, i no bin gat fulap memba. Lod i bin askem Ol Sent blong bildimap Jos taem oli stap serem gospel mo mekem olgetawan oli kam strong moa. Yumi save mekem semmak tedei.

Samfala Aktiviti we Yu Save Mekem

• Askem ol pikinini blong faenem evri taem we oli yusum toktok ia, “askem strong,” insaed long Doktrin mo Ol Kavenan 23:3–7; 25:7. Helpem olgeta blong faenem mining blong ol toktok ia. ?Olsem wanem we, blong maet askem strong long wan blong mekem samting, i save mekem olgeta oli kam strong moa? Invaetem ol pikinini blong mekem wan rolplei blong “askem strong” long wan, be blong mekem wetem lav.

• ?Olsem wanem yumi save mekem gud moa long wok blong mekem ol memba blong Jos oli kam moa strong? Blong soemaot prinsipol ia, givim wan wok long wan pikinini we i nidim blong fulap man i helpem hem. Afta askem ol nara pikinini blong help, mo toktok raon olsem wanem wok we oli givim i kam moa isi. Serem wan eksperiens blong wan taem we yu bin kam moa strong from seves blong wan memba blong Jos i bin givim long yu.

Doktrin mo Ol Kavenan 24:1, 8

Sevya i save leftemap mi “blong tekemaot [mi] long ol hadtaem blong [mi].”

Josef Smit i bin safa long fulap hadtaem, be hem i save gat “fasin blong save wet longtaem long ol hadtaem” from we Lod i bin promesem se bae Hem i stap oltaem wetem hem.

Samfala Aktiviti we Yu Save Mekem

• Helpem ol pikinini blong mekem wan lis blong ol hadtaem o jalenj we Josef Smit o sam Sent bifo oli bin stap fesem (luk long “Japta 11: Moa Pipol i Joenem Jos,” Ol Doktrin mo Kavenan Stori, 46–47, o vidio we i go wetem long ChurchofJesusChrist.org). Afta invaetem olgeta blong faenem wanem Lod i bin talem long Josef abaot ol hadtaem blong hem long Doktrin mo Ol Kavenan 24:1, 8. ?Olsem wanem yumi save lukaotem help blong Sevya taem yumi stap gat wan hadtaem?

• Blong tijim ol pikinini se samtaem yumi nid blong gat “fasin blong save wet longtaem long ol hadtaem [blong yumi],” yu save soem vidio “Continue in Patience” (ChurchofJesusChrist.org). Askem ol pikinini blong tingting long wan samting we bae oli wantem tumas, be oli mas wet long hem. ?From wanem sam taem Lod i nidim yumi blong gat fasin blong wet longtaem long ol hadtaem blong yumi long laef? ?Olsem wanem Hem i stap letem yumi save se Hem i stap “wetem [yumi]” long ol hadtaem blong yumi?

Doktrin mo Ol Kavenan 25:13

Mi save “holemtaet ol kavenan” we mi bin mekem.

I no longtaem afta we Ema Smit i bin baptaes, Lod i bin talem long hem, “Holemtaet ol kavenan we yu bin mekem.” Tingbaot olsem wanem kaonsel ia i save blesem ol pikinini we yu stap tijim.

Samfala Aktiviti we Yu Save Mekem

• Ridim tugeta Doktrin mo Ol Kavenan 25:13, mo askem ol pikinini wanem i minim long ves ia blong “holemtaet ol kavenan” we yumi mekem. Blong soemaot hemia, pasem sam samting raon we oli fasem strong tugeta, mo mekem ol pikinini blong oli traem pulumaot olgeta i wanwan. ?From wanem toktok ia “holemtaet” i wan gudfala toktok blong tokbaot gud olsem wanem yumi mas filim abaot ol kavenan blong yumi?

• Sapos i nid, luklukbak wetem ol pikinini ol kavenan we yumi mekem taem yumi kasem baptaes (luk long Mosaea18:8–10; Doktrin mo Ol Kavenan 20:37). ?Wanem i minim blong “holemtaet” ol kavenan ia?

• Luklukbak tugeta sam samting we yu save abaot laef blong Ema Smit (luk long “Japta 13: Josef mo Ema” [Ol Doktrin mo Kavenan Stori, 51–55], o vidio we i go wetem long ChurchofJesusChrist.org). Givim wan o tu ves long wanwan pikinini aot long seksen 25, mo invaetem olgeta blong serem olsem wanem kaonsel mo asaenmen blong Lod i bin save helpem Ema blong “holemtaet ol kavenan” we hem i bin mekem. ?Olsem wanem yumi save folem eksampol blong hem?

Stap Leftemap Tingting blong Lanem Samting long Hom

Invaetem ol pikinini blong jusum wan ves we yufala i bin toktok raon long hem we hem i laekem tumas, raetemdaon skripja ves ia, mo serem wetem wan memba blong famli o wan fren.

Stap Kam Antap long Fasin blong Yumi blong Stap Tij

Leftemap tingting blong gat fasin blong stap kwaet. Helpem ol pikinini blong andastanem se wan impoten pat blong stap kwaet, hem i blong stap tingting long Papa long Heven mo Jisas Kraes. Maet bae yu rimaenem olgeta blong stap kwaet taem oli singsing wan singsing kwaet kwaet nomo, o oli mekem tiun blong singsing ia nomo, o soem wan pikja blong Jisas Kraes.