“8–14 Maj. Doktrin mo Ol Kavenan 23–26: ‘Mekem Jos I Kam Strong Moa,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“8–14 Maj. Doktrin mo Ol Kavenan 23–26,” Kam Folem Mi—Blong Wanwan Man, Woman mo Famli: 2021
8–14 Maj
Doktrin mo Ol Kavenan 23–26
“Mekem Jos I Kam Strong Moa”
Taem yu stap rid long Doktrin mo Ol Kavenan 23–26, raetemdaon ol tingting mo filing we oli kam long Tabu Spirit. ?Olsem wanem nao yu save praktisim advaes ia we oli kam long ol revelesen ia blong mekem wok blong yu olsem disaepol i kam strong moa, mo tu, blong mekem Jos i kam strong moa?
Raetemdaon Ol Filing mo Tingting blong Yu
Afta we Jos i bin oganaes, Ol Sent oli bin fesem wan niu jalenj—blong taltalemaot gospel mo mekem olgeta we oli bin joen finis long Jos oli kam strong moa, mo evri samting ia, long wan taem we fasin blong agens i bin stap kam strong moa tu. Ema Smit i bin witnesem kaen fasin blong agens ia. Long Jun 1830, Ema mo ol memba blong Naet famli oli bin wantem blong kasem baptaes. Be ol enemi blong Jos oli traem blong spolem taem ia we i sapos blong stap olsem wan tabu eksperiens. Faswan, oli bin prapa spolem smol dam long wota, we oli bin bildim blong mekem se wota bae i dip inaf blong mekem ol baptaes. Iven afta we oli fiksim wota dam ia, ol man blong agens oli kam tugeta blong singaot mo talem ol toktok blong fraet mo jikim olgeta we oli stap kasem baptaes. Mo afta, jes taem Josef i stap rere blong konfemem ol niu memba ia, oli bin arestem hem from se oli talem se hem i mekem komuniti i harem nogud taem hem i bin gohed blong prij abaot Buk blong Momon. I luk olsem se i no wan gudfala stat blong niu Jos ia we God i jes putumbak. Be long medel blong defren kaen taem ia, Lod i bin givim ol gudfala toktok blong advaes mo blong leftemap tingting, we i ripresentem “voes blong [hem] we i go long evriwan” (Doktrin mo Ol Kavenan 25:16).
Luk tu long Saints, 1:89–90, 94–97.
Sam Aedia blong Skripja Stadi blong Yuwan
Mi save help blong mekem Jos ia blong Lod i kam strong moa.
Tedei, kolosap 200 yia afta we Jos ia we i kambak, i bin oganaes, nid ia, blong “mekem jos i kam strong moa,” i gohed nomo blong stap (Doktrin mo Ol Kavenan 23:3–5). Mo wok ia i no jes blong Josef Smit, Oliva Kaodri, o ol lida blong Jos blong yumi tedei—hem i blong yumi evriwan. Truaot long stadi blong yu long Doktrin mo Ol Kavenan 23–26, tingting hevi long advaes we Lod i bin givim long ol fasfala memba blong Jos blong helpem olgeta blong mekem Jos i kam strong moa. ?Wanem nao yu filim se Lod i wantem yu blong mekem blong yu tekpat long hadwok ia?
Sevya i save leftemap mi “blong tekemaot [mi] long ol hadtaem blong [mi].”
Blong stap lidim Jos long wan taem blong bigbigfala taem blong agens, i mas stap olsem wan hevi wok long Josef Smit. Lukaot ol toktok blong Lod we oli leftemap tingting blong hem insaed long Doktrin mo Ol Kavenan 24.
?Ol skripja ia we oli kam afta, oli talem wanem long yu abaot wei we Sevya i save leftemap yu blong yu kamaot long ol hadtaem blong yu?
?Olsem wanem nao Jisas Kraes i leftemap yu blong yu aot long ol hadtaem blong yu? ?Wanem nao yu save mekem blong gohed blong lukaotem help blong Hem long ol taem we oli had?
Hem i Hilim Plante Kaen Sik, i kam long J.Kirk Richards
Ema Smit i “wan woman we Lod i jusum.”
Taem we Ema Hel i bin maredem Josef Smit, hem i bin save finis se bae hem i mekem sam sakrifaes. Hem i stap go agensem ol tingting blong papa blong hem, mo i stap lego wan gudfala isi laef blong go fesem wan laef we ol samting oli no klia i stap. Maet bae hem i tingting plante long wanem Lod i wantem hem blong mekem long wok ia blong putumbak Jos ia. Lukaotem ol ansa we Lod i givim long Doktrin mo Ol Kavenan 25. Luk gud long ol toktok blong Lod long ves 16—?Yu yu faenem eni samting long seksen ia we yu filim se hem i “voes blong [Hem] long yu”?
Luk tu long “An Elect Lady” (vidio, ChurchofJesusChrist.org); “Thou Art an Elect Lady,” Revelations in Context, 33–39; Joy D. Jones, “An Wan Spesel Hae Koling,” Liahona, Mei 2020, 15–18.
?Wanem hem i ful sapot?
Taem we ol memba oli kasem ol koling, o ol prishud odinesen insaed long Jos, yumi gat janis ia blong sastenem olgeta long wan ofisol fasin taem yumi leftemap han blong yumi blong soem sapot. Prinsipol ia blong soem sapot mo agrimen long pablik, oli singaotem ful sapot. Olsem we Presiden Gordon B. Hinckley i bin tijim: “Rod ia, blong stap sastenem man, i moa bitim wan seremoni blong leftemap han. Hem i wan komitmen blong difendem, blong sapotem, mo blong helpem olgeta we oli bin jusum olgeta” (“This Work Is Concerned with People,” Ensign, May 1995, 51).
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 23:6.?From wanem Lod i wantem yumi blong prea “insaed long famli [blong yumi], mo long medel blong ol fren [blong yumi], mo long evri ples”? Wanem nao singsing ia, “Love Is Spoken Here” (Children’s Songbook, 190)—o wan nara singsing abaot prea—i stap tijim yumi abaot paoa blong prea?
Luk tu long 2 Nifae 32:8–9; 3 Nifae 18:18–23.
-
Doktrin mo Ol Kavenan 24:8.?Bae i save helpem famli blong yu blong tokbaot se i minim wanem blong “gat fasin blong save wet longtaem long ol hadtaem”? Sapos yu gat ol yangfala pikinini, bae i wan gud hapi samting blong mekembak wanem we Presiden Dieter F. Uchtdorf i bin tokbaot long “Continue in Patience” (Ensign o Liahona, May 2010, 56; luk tu long vidio long ChurchofJesusChrist.org). ?Wanem nao Doktrin mo Ol Kavenan 24:8 i stap tijim yumi abaot fasin blong save wet longtaem? ?Olsem wanem Lod i stap helpem yumi blong save wet longtaem taem yumi stap gotru long ol hadtaem blong yumi?
-
Doktrin mo Ol Kavenan 25:11–12.Maet yu save singsing fevret hym o singsing blong wanwan memba blong famli, o yufala i save tokbaot from wanem hem i “singsing [blong hem] we i kam long hat blong hem.” ?Olsem wanem nao ol singsing ia oli olsem “wan prea long [God]”?
-
Doktrin mo Ol Kavenan 26:2.Maet bae i help blong lukluk long toktok ia “Ful Sapot” insaed long Gaed blong Ol Skripja (olskripja.churchofjesuschrist.org). ?Olsem wanem nao bae yumi soemaot sapot long ol lida blong yumi?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Lift Up Your Voice and Sing,” Children’s Songbook, 252 (luk long “Sam Aedia blong Kam Antap long Famli Skripja Stadi”).
Ol Voes blong Restoresen
Ema Hel Smit
Ol toktok blong Lod i go long Ema, we oli raetemdaon long Doktrin mo Ol Kavenan 25, oli soem olsem wanem Hem i bin filim abaot hem mo ol kontribusen we bae hem i mekem long wok ia blong Hem. ?Be Ema i olsem wanem? ?Wanem nao yumi save abaot fasin blong hem, rilesensip blong yumi, mo ol samting we hem i strong blong mekem? Wan wei blong kam blong save “woman we [hem i] jusum” (Doktrin mo Ol Kavenan 25:3) i blong ridim ol toktok blong ol pipol we oli bin save hem.
Ema Smit, i kam long Lee Greene Richards
Josef Smit Junia, hasban blong hem
“Mi gat wan bigfala glad we mi no save tokbaot, mo wan bigbigfala glad we i fulap long hat blong mi taem mi bin tekem, long naet ia, han blong Ema blong mi we mi lavem hem tumas—hem we i waef blong mi, iven we i waef blong yangfala taem blong mi, mo i joes blong hat blong mi. Maen blong mi i laef bakegen taem mi stap tingtingbak, blong smol taem, ol plante taem we oli singaotem yumi blong gotru long olgeta. Ol taem we yumi harem yumi taed, mo ol wok we oli had, ol bigfala harem nogud, mo ol safaring, mo ol glad mo ol taem blong kamfot we oli kam wanwan taem long rod blong yumi, mo oli blesem laef blong yumi. !O! Ol gud mo nogud samting oli fulumap maen blong mi blong smol taem ia. Bakegen, Ema i stap ia, nomata wanem trabol i stap, i no givap, i stap strong, mo i no muvmuv, i no jenis, i gat kaen fasin.”1
Lusi Mak Smit, mama blong man blong hem
“Long tetaem ia, hem i yangfala, mo from se hem i gat fasin ia blong wantem samting i hapen, ful hat blong hem i bin stap long wok blong Lod, mo hem i no bin gat intres long nara samting, be i intres long jos nomo mo stamba wok ia we i trutok. Wanem we han blong hem i mekem, hem i mekem wetem ful paoa blong hem, mo hem i no bin askem selfis kwestin ia: ‘?Bae mi karem moa blesing bitim wan narawan?’ Sapos oli sendem ol elda blong go prij, bae hem i faswan blong volontia blong givim seves blong hem blong help wetem ol klos blong wokbaot blong olgeta, mo nomata wanem hadtaem hem i stap gotru long hem.”2
“Mi neva luk wan woman long laef blong mi, we bae i gotru long evri kaen blong taet mo hadtaem long bodi, manis afta manis, mo yia afta yia, wetem wan fasin ia we i no bin stop, blong gat strong paoa long tingting, gud fasin mo fasin blong save wet longtaem, we hem i bin holem oltaem; from mi mi save wanem hem i mas gotru long hem; we hem i go tru long bigfala solwota ia blong gat tu tingting; we hem i fesem hariken blong fasin blong agens, mo i fesem bigfala kros blong ol man mo ol devel, kasem taem we hem i draon long wan solwota blong trabol, we, sapos i wan nara woman, bae i mekem hem i foldaon nomo.”3
Josef Smit Senia, palika blong hem
Petriakel blesing blong Ema, we Josef Smit Senia, we i stap olsem petriak blong Jos, i bin talem olsem:
“Ema, aeneli blong mi, Lod i blesem yu from yu yu fetful mo yu yu gat tru fasin: Bae yu mo hasban blong yu i gat blesing, mo bae yutufala i glad long glori ia we bae i kam long hem: Bae sol blong yu i kasem hadtaem from ol fasin nogud blong ol man we oli wantem blong lukaot blong prapa spolem gud hasban blong yu, mo sol blong yu i bin prea strong blong hem i kam fri: stap glad, from se Lod, God blong yu i bin harem strong prea blong yu.
“Yu yu bin stap krae from strong hat blong papa blong haos blong yu, mo yu yu wantem tumas se oli akseptem fasin blong sevem man. Lod bae i gat respek long ol krae blong yu, mo tru long ol jajmen blong hem, bae hem i mekem se oli luk ol krangke tingting blong olgeta mo bae oli sakem sin blong olgeta; be tru long hadtaem nomo bae Lod i sevem olgeta. Bambae yu yu luk plante dei; yes, Lod bae i protektem laef blong yu kasem taem we yu yu glad, from se bae yu yu luk Ridima blong yu. Hat blong yu bae i glad long bigfala wok ia blong Lod, mo i no gat wan bae i tekemaot bigfala glad ia long yu.
“Oltaem we oltaem, bambae yu tingbaot se God blong yu i kam daon evriwan blong mekem se yu yu save stap long saed blong boe blong mi taem enjel i bin givim ol histri blong Ol Man blong Nifae long gud han blong hem. Yu yu bin gotru plante harem nogud from se Lod i bin tekemaot tri long ol pikinini blong yu: Yu yu no gat rong long ples ia, from se Hem i save ol klin tingting blong hat blong yu blong lukaotem wan famli, blong mekem se i blesem nem blong boe blong mi. Mo naoia, luk, mi talem long yu, se olsem ia nao Lod i talem, se sapos bae yu yu biliv, bae Hem i blesem yu long samting ia mo bambae yu karem sam nara pikinini i kam long wol ia, blong sol blong yu i glad mo i harem se i stret, mo blong yu yu stap glad wetem ol fren blong yu.
“Bambae yu gat blesing ia blong gat andastaning, mo gat paoa blong tijim ol nara woman. Tijim famli blong yu long stret mo gud fasin, mo tijim ol smolwan blong yu long fasin blong laef, mo bae ol tabu enjel oli lukaot long yu: mo bambae Lod i sevem yu insaed long kingdom blong God; bae i olsem. Amen.”4
Ema Smit wetem ol pikinini blong hem. Taem blong Laf, i kam long Liz Lemon Swindle
Ol Hym blong Ema i kam long Liz Lemon Swindle