Ang Paggamit sa Dali, Sunod Kanako—Alang sa mga Korum sa Aaronic Priesthood ug mga Klase sa Young Women

Unsa ang mga katuyoan sa atong mga miting sa korum ug sa klase?

Kamo gihatagan sa Ginoo og sagradong pagsalig: Kamo iyang gitawag nga moserbisyo sa kapangulohan sa korum sa Aaronic nga Pagkapari o kapangulohan sa klase sa Young Women. Ang usa ka bahin sa inyong responsibilidad mao ang paggiya ug pagpahigayon sa mga miting sa inyong korum o klase sa Dominggo. Sa paghimo niini, makatabang ang pagsabut nganong aduna kita niini nga mga miting.

Ang mga korum sa Aaronic nga Pagkapari ug mga miting sa klase sa Young Women lahi sa ubang mga klase sa Simbahan sama sa Sunday School o seminary. Diha sa mga miting sa korum o sa klase, mas daghan ang atong buhaton kay sa pagtuon sa usa ka hilisgutan sa ebanghelyo. Magkat-on kita mahitungod sa trabahuon nga gihatag sa Dios kanato, ug atong iorganisar ang mga sakop sa atong korum o klase aron buhaton kana nga trabahuon diha sa atong mga panimalay, sa Simbahan, ug sa atong komunidad. Magplano kita, sama pananglit, unsaon nato sa pagtuman ang atong mga tahas isip kabahin sa mga batan-ong batalyon sa Ginoo nga motabang sa pagpundok sa Israel. Niini nga mga miting, dili lang kay maghisgot kita mahitungod sa mga trabahuon—magplano kita aron sa paghimo niini.

Apan kini nga paghatag og gibug-aton sa trabahuon wala magpasabut nga sa Sunday School ra nato isalig ang doktrinal nga mga panaghisgutan. Gani sa pagkatinuod, ang pagkat-on sa doktrina diha sa mga miting sa korum ug sa Young Women mahinungdanon—makatabang kini kanato nga makasabut sa mga rason nganong mibuhat kita niini. Kon magkauban kitang magtuon sa ebanghelyo, ang mga kamatuoran nga atong makat-unan makausab sa atong mga kasingkasing. Makadawat kita og mga pag-aghat mahitungod sa mga paagi sa pagpalambo “sa kaalam ug sa gidak-on, ug sa kahimuot kaniya sa Dios ug sa tawo” (Lucas 2:52). Samtang mahimo kitang mas makabig kang Jesukristo ug sa Iyang ebanghelyo, mobati kita og mga tinguha sa pagtabang sa uban subay sa dalan sa pakigsaad, lakip sa atong mga pamilya, atong mga higala, ug sa atong isig ka sakop sa korum ug sa klase.

Kinsa ang mangulo niini nga mga miting?

Ang Dios mitawag kaninyo isip mga kapangulohan sa korum ug sa klase ug mihatag kaninyo og awtoridad sa pagpangulo. Mao nga ang matag miting sa inyong korum o klase kinahanglan nga ipahigayon sa usa ka sakop sa inyong korum o kapangulohan sa klase. Ang hamtong nga mga lider kinahanglang motanyag og giya ug suporta, apan dili sila mopuli kaninyo. Tan-awa ang seksyon nga giulohan og “Magtinambagay” dapit sa may sinugdanan sa matag outline niini nga kapanguhaan alang sa mga ideya aron matabangan kamo nga mahibalo unsaon sa pagpangulo sa usa ka miting ug pagtuman sa tinuod nga mga katuyoan niini. Gamita ang mga miting sa kapangulohan aron sa pagplano unsaon ninyo sa pagpahigayon niini nga mga miting sa Dominggo.

Kinsa ang angay motudlo sa leksyon?

Ang hamtong nga mga lider , sakop sa kapangulohan sa korum o klase, o si bisan kinsa nga sakop sa korum o klase mahimong makatudlo sa mga leksyon. Isip kapangulohan sa korum o klase, pakigkonsulta sa inyong hamtong nga mga lider kon si kinsa ang sangunan nga motudlo sa mga leksyon. Hinumdumi nga ang inyong hamtong nga mga lider adunay daghang ikatanyag. Tinguhaa ang pagkat-on gikan sa ilang kasinatian ug mga pagpamatuod. Anaa usab ang bintaha sa paghangyo nga motudlo ang mga batan-on—ang pagtudlo makatabang sa pagpalambo sa ilang pagkakabig ug sa pag-ugmad og mas lig-ong mga relasyon kauban sa mga sakop sa korum o klase. Mao nga ihatag kanila ang tukmang mga oportunidad sa pagtudlo sa tanan o sa usa ka bahin sa leksyon, apan hinumdumi ang mga panginahanglan ug mga katakus sa mga tawo diha sa inyong korum o klase. Sama pananglit, ang hamtong nga mga lider pweding mas kanunay nga motudlo sa mga korum o mga klase kauban sa mas manghud nga mga batan-on o kauban sa mga batan-on kinsa minos ang kasinatian sa pagtudlo sa ebanghelyo. Kon ang mga batan-on dapiton sa pagtudlo, usa ka ginikanan o hamtong nga adviser kinahanglang motabang nila sa pagpangandam kon gikinahanglan.

Kadtong mga gisangunan sa pagtudlo makagamit sa seksyon nga giulohan og “Itudlo ang Doktrina” diha sa matag outline niini nga kapanguhaan aron matabangan sila sa pagpangandam. Kini nga seksyon naglangkob sa mga sugyot alang sa pagtudlo ug paghisgot sa doktrina alang niana nga semana, apan ang mga magtutudlo kinahanglang dili mobati nga kutob ra sila niining mga gisugyot. Sigun sa itudlo sa Espiritu, ang mga magtutudlo makapahiangay niining mga ideya o mogamit sa ilang kaugalingong nakamaohan sa pagtudlo sa paagi nga pinakamaayo aron matubag ang mga panginahanglan sa mga sakop sa korum o klase ug makatabang nga ilang masabtan ang doktrina.

Unsa nga mga hilisgutan nga doktrinal ang atong hisgutan sa atong mga miting?

Ang hilisgutan sa outline sa matag semana usa ka doktrinal nga baruganan nga gipili nga mahitukma sa girekomendar nga basahon diha sa Doktrina ug mga Pakigsaad alang niana nga semana, nga makita diha sa Dali, Sunod Kanako—Alang sa mga Indibidwal ug mga Pamilya. Niining paagiha, ang doktrinal nga mga hilisgutan sa mga miting sa korum ug klase magsuporta sa unsay gikat-unan sa mga batan-on diha sa panimalay.

Bisan kon ang mga outline kinahanglang itudlo sa piho nga mga Dominggo, sa gihapon kamo adunay opsyon sa paghisgot og ubang doktrinal nga mga hilisgutan base sa mga panginahanglan sa inyong korum o klase.

Kini nga kapanguhaan naglakip sa mga outline alang sa matag semana kon ang mga miting sa Aaronic nga Pagkapari ug mga klase sa Young Women ipahigayon. Panagsa, tingali kinahanglan nga molaktaw kamo og usa ka leksyon tungod sa mga komperensya sa stake o ubang mga rason.

Unsa ang tahas sa atong hamtong nga mga lider?

Ang inyong hamtong nga mga lider nagdala og importante nga tahas sa mga korum sa Aaronic nga Pagkapari ug sa mga klase sa Young Women. Mogiya ug motambag sila kaninyo sa inyong mga calling sa pagkalider. Mosuporta ug moawhag sila kaninyo samtang magbuhat kamo sa trabahuon sa inyong korum o klase. Motudlo sila kaninyo sa doktrina, ug mopanalangin sila kaninyo pinaagi sa ilang ehemplo, kasinatian, ug pagpamatuod.