Nakakita Ako og Kahayag, ni Jon McNaughton

Enero 10

Nganong Importante ang Unang Panan-awon?

Pasiuna sa Doktrina ug mga Pakigsaad; Joseph Smith—Kasaysayan 1:1–26

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang nagkinahanglan sa atong tabang ug mga pag-ampo? Unsay atong mahimo sa pagtabang kanila? Kinsa ang atong dapiton ngadto sa umaabut nga kalihokan?

• Ang atong mga katungdanan o mga responsibilidad. Unsa nga mga buluhaton ang ato nang natuman? Unsa nga mga buluhaton ang kinahanglan natong buhaton? Giunsa nato pagdapit ang uban sa pagduol ngadto kang Kristo, ug unsaon nato pagdapit ang uban karon?

• Ang atong mga kinabuhi. Unsa nga bag-ong mga kasinatian ang nakapalig-on sa atong mga pagpamatuod? Unsa ang nanghitabo sa atong mga kinabuhi, ug unsaon nato sa pagsuporta ang usag usa?

Sa katapusan sa leksyon, kon angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Bisan kon sobra na sa 200 ka tuig sukad si Joseph Smith unang miluhod aron mag-ampo sa Sagradong Kakahoyan, ang tubag nga iyang nadawat nakaapekto sa talagsaong paagi sa atong mga kinabuhi karon. Pamalandungi ang mga panalangin nga miabut sa imong kinabuhi tungod kay ang Amahan ug ang Anak mipakita kang Joseph. Nganong importante man alang niadtong imong tudloan nga makaangkon sa ilang kaugalingong pagsaksi sa Unang Panan-awon gikan sa Espiritu Santo? Unsaon nimo sila sa pagtabang aron mabuhat kini? Mahimong makatabang nimo ang pagribyu sa mga mensahe gikan sa Abril 2020 nga kinatibuk-ang komperensya, nga naghandum sa ika-200 nga anibersaryo niining mahimayaong panan-awon.

Ang matag batan-on makadawat og personal nga pagpamatuod sa Unang Panan-awon.

Pagkat-on og Dungan

Tungod kay si Joseph Smith anaa sa iyang kabatan-on sa panahon sa Unang Panan-awon, kadtong imong tudloan mahimong makasabut sa iyang pagpangita sa kamatuoran. Hatagi og pipila ka gutlo ang mga sakop sa korum ug klase sa pagpaambit sa ilang mga hunahuna ug mga impresyon mahitungod sa Joseph Smith—Kasaysayan 1:1–26. Ang mga kalihokan nga anaa sa ubos makatabang kanila nga mapalig-on ang ilang mga pagpamatuod nga ang Dios Amahan ug si Jesukristo mipakita ngadto ni Joseph Smith.

• Unsa nga mga kamatuoran sa ebanghelyo ang atong makat-unan gikan sa kasinatian ni Joseph Smith didto sa Sagradong Kakahoyan? Ang mga sakop sa korum o klase mahimong mobasa sa asoy ni Joseph diha sa Joseph Smith—Kasaysayan 1:7–20 ug mopaambit sa mga kamatuoran nga ilang makit-an. (Sama pananglit, ang Dios modungog ug motubag sa mga pag-ampo; si Satanas ug ang iyang gahum tinuod, apan ang gahum sa Dios mas labaw pa; ang pagpadayag wala mohunong.) Sa unsang paagi nga kining mga kamatuoran nakapanalangin sa atong mga kinabuhi?

• Mahimo usab nimong hangyuon ang mga sakop sa korum o klase sa pagribyu sa mga mensahe mahitungod sa Unang Panan-awon gikan sa Abril 2020 nga kinatibuk-ang komperensya (tan-awa sa Liahona, Mayo 2020). Sama pananglit, mahimo nilang ribyuhon ang mensahe ni Presidente Russell M. Nelson nga “Paminaw Kaniya” (Liahona, Mayo 2020, 88–92). Dapita sila sa pagpaambit kon unsay ilang makit-an ug sa ilang mga pagbati mahitungod sa Unang Panan-awon.

• Ang matag usa sa mga Presidente sa Simbahan mipamatuod bahin sa balaang misyon ni Propeta Joseph Smith. Ang mga sakop sa korum o klase mahimong makabenepisyo gikan sa pagbasa sa ilang mga pagpamatuod sa usa sa Mga Pagtulun-an sa mga Presidente sa Simbahan nga mga manwal. (Kadaghanan niining mga manwal naglangkob og usa ka kapitulo mahitungod ni Propeta Joseph Smith. Alang sa usa ka lista niining mga kapitulo, tan-awa ang Gospel Topics, “First Vision,” topics.ChurchofJesusChrist.org.) Pipila ka adlaw sa wala pa ang klase, mahimo nimong dapiton ang mga sakop sa imong korum o klase nga magpili og usa niining mga Presidente ug mopaambit og pamahayag nga iyang gihimo nga ilang magamit sa pagtudlo og usa ka tawo mahitungod sa Unang Panan-awon.

• Ikonsiderar ang pagdapit sa mga sakop sa korum o klase nga tun-an ang “Ang Pagpahiuli sa Ebanghelyo ni Jesukristo pinaagi ni Joseph Smith” sa kapitulo 3 sa Isangyaw ang Akong Ebanghelyo ([2019], 42–44) ug sa pagpraktis sa pagtudlo sa usag usa mahitungod sa Unang Panan-awon. Mahimo nimong hagiton sila sa pagpaambit sa kasinatian ni Joseph Smith gamit ang pipila sa iyang kaugalingong mga pulong, nga makita diha sa Joseph Smith—Kasaysayan 1:16–17.

• Kadto bang imong gitudloan nahibalo nga adunay pipila ka asoy bahin sa Unang Panan-awon? Ang matag usa niining mga asoy naghatag og talagsaong mga detalye nga naghatag og hingpit nga panabut bahin sa unsay nahitabo didto sa Sagradong Kakahoyan. Nganong maayo man nga adunay pipila ka asoy bahin sa Unang Panan-awon? Sa unsang paagi nga kining mga asoy makatabang kanato aron mas makasabut sa atong Langitnong Amahan ug ni Jesukristo?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Mateo 3:13–17; Mga Buhat 7:54–60; 3 Nephi 11:3–10 (Ang Dios nga Amahan ug si Jesukristo mipakita sa Ilang Kaugalingon sa mga tawo sa yuta)

Pagtudlo sumala sa Pamaagi sa Manluluwas

Ang Manluluwas midapit sa Iyang mga sumusunod sa pagpamatuod bahin sa katinuod sa Iyang mga pagtulun-an. Sa pagbuhat nila sa ingon, ang Espiritu mitandog sa ilang mga kasingkasing. Unsaon nimo sa pag-awhag niadtong imong gitudloan nga mohatag sa ilang mga pagpamatuod? (Tan-awa sa Pagtudlo sumala sa Pamaagi sa Manluluwas [2016], 11.)