mga batan-ong babaye ug batan-ong lalaki sa atubangan sa templo

Enero 24

Unsaon Nako Pag-andam sa Akong Kaugalingon aron Makaapil sa “Kahibulongan nga Buhat” sa Dios?

Doktrina ug mga Pakigsaad 3–5

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang atong mahimo aron sa pag-ugmad og panaghiusa diha sa korum o mga sakop sa klase? Unsa nga mga tumong ang atong gustong buhaton og dungan?

• Ang atong mga katungdanan o mga responsibilidad. Unsa ang atong gibuhat sa pagpaambit sa ebanghelyo? Unsa ang atong mga kasinatian sa paghimo sa buhat sa templo ug family history?

• Ang atong mga kinabuhi. Giunsa nato pagsinati ang kamot sa Ginoo diha sa atong mga kinabuhi? Unsa ang nakapadasig kanato sa atong pagtuon sa kasulatan niini nga semana?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sa dihang ang unang mga Santos unang nakadungog sa mensahe sa gipahiuli nga ebanghelyo, daghan ang gustong masayud kon unsay ilang mahimo aron makatabang sa buhat. Ang amahan ni Propeta Joseph Smith, si Joseph Smith Sr., mao ang usa niadtong nangutana aron masayud sa kabubut-on sa Ginoo alang kaniya. Ang tubag sa Ginoo, nga makita diha sa Doktrina ug mga Pakigsaad 4, sukad niana nakapadasig og mga henerasyon sa katawhan nga moserbisyo sa tibuok nilang “kasingkasing, gahum, hunahuna ug kusog” (bersikulo 2). Nagserbisyo man og misyon o nagserbisyo sa bisan unsa nga calling o responsibilidad diha sa Simbahan, ang mga kwalipikasyon alang sa pagserbisyo susama ra: usa ka tinguha nga moserbisyo sa Dios inubanan sa hugot nga pagtuo, paglaum, gugma nga putli, ug pagmahal (tan-awa sa Doktrina ug mga Pakigsaad 4:2–6). Unsaon man nimo sa pagtabang ang mga sakop sa korum o klase nga mapalig-on ang ilang tinguha nga moserbisyo sa Ginoo ug mangandam alang sa umaabut nga mga oportunidad sa pagserbisyo?

Aron maandam ang imong kaugalingon nga pangulohan ang mga sakop sa korum ug klase niini nga pagtuon, mahimo nimong basahon ug pamalandungan ang usa o dugang pa nga mga mensahe nga makita diha sa “Suporta nga mga Kapanguhaan.”

mga batan-ong lalaki nga nagbisita sa mas magulang nga lalaki

Ang pag-atiman niadtong nanginahanglan usa ka bahin sa buhat sa kaluwasan.

Pagkat-on og Dungan

Ang mga sakop sa korum o klase mahimong nadasig nga mas makugihong moserbisyo sa Ginoo pinaagi sa pagbasa sa Doktrina ug mga Pakigsaad 3–5 niini nga semana. Aron maawhag sila nga mopaambit sa ilang mga hunahuna, mahimo nimo silang dapiton sa paghunahuna nga nangaplay sila og trabaho. Unsa nga mga kwalipikasyon ang ilang ibutang sa resume o hisgutan sa interbyu alang sa trabaho? Mahimo nilang ribyuhon ang Doktrina ug mga Pakigsaad 4 ug tinuon ang mga kwalipikasyon nga gikinahanglan sa Ginoo alang niadtong kinsa gustong moapil sa Iyang buhat. Pagpili og usa o dugang pa nga mga kalihokan nga anaa sa ubos aron matabangan kadtong imong gitudloan nga makonsiderar kon unsay ilang mahimo aron mas hingpit nga makaapil sa “kahibulongan nga buhat” sa Dios (Doktrina ug mga Pakigsaad 4:1).

• Aron matabangan kadtong imong gitudloan nga makakat-on unsaon pag-apil sa pagpadali sa buhat sa kaluwasan, isulat diha sa pisara ang mosunod nga kahulugan sa buhat sa kaluwasan: Ang Dios midapit sa tanan nga moduol ngadto kang Kristo ug moabag sa Iyang buhat pinaagi sa pagsunod sa ebanghelyo ni Jesukristo, pag-atiman niadtong nanginahanglan, pagdapit sa tanan nga modawat sa ebanghelyo, ug paghiusa sa mga pamilya alang sa kahangturan. Dapita ang mga sakop sa korum o klase nga maghisgot kon sa unsang paagi nga ang mga hiyas nga gilista diha sa Doktrina ug mga Pakigsaad 4 makatabang kanila sa paghimo sa matag bahin sa buhat sa kaluwasan. Bahina ang mga batan-on ngadto sa mga grupo, ug pahisguti sa matag grupo ang mga paagi nga ilang mapalambo kining mga hiyas. Unsay atong mahimo aron ang buhat sa kaluwasan mahimong mas importante nga bahin sa atong mga kinabuhi?

• Dapita ang mga sakop sa korum o klase nga ribyuhon ang usa sa mga mensahe nga makita diha sa “Suporta nga mga Kapanguhaan,” nga mangita sa usa ka kinutlo nga ilang mapaambit kon unsaon pagserbisyo sa Ginoo sa matinud-anong paagi diha sa mga calling sa Simbahan, mga buluhaton, o uban pang mga responsibilidad. Hangyoa sila sa pagpaambit sa kinutlo nga ilang gipili ug nganong makahuluganon kini ngadto kanila. Unsaon nila paggamit sa ilang nakat-unan karon ug sa umaabut?

• Ang ubang mga sakop sa korum o klase tingali nangandam nga moserbisyo isip mga misyonaryo. Mahimo nimo silang mahangyo sa pagpaambit kon giunsa nila pagpangandam nga moserbisyo. Sa pag-awhag kanila diha sa ilang mga paningkamot, mahimo nimong mapaambit ang pangutana nga giingon ni Elder David A. Bednar nga kanunay niyang madawat: “Unsay akong mabuhat aron maandam sa labing epektibong paagi nga moserbisyo isip usa ka full-time nga misyonaryo?” (“Pagkahimong usa ka Misyonaryo,” Liahona, Nob. 2005, 45). Unsaon sa mga sakop sa korum o klase pagtubag kini nga pangutana? Unsa nga mga ideya ang gihatag ni Elder Bednar? Mahimo nimong dapiton ang usa o dugang pa nga mipauli na nga mga misyonaryo sa pagpaambit kon unsay ilang gibuhat aron maandam alang sa usa ka misyon ug unsay ilang gipanghinaut nga ila untang gibuhat.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Mateo 28:19–20; Doktrina ug mga Pakigsaad 18:9–16; 50:13–14; 88:81 (Kita adunay katungdanan sa pagpaambit sa ebanghelyo)

• Dieter F. Uchtdorf, “Ang Labing Dako Kaninyo,” Liahona, Mayo 2017, 78–81

• Carl B. Cook, “Pagserbisyo,” Liahona, Nob. 2016, 110–12

Pagtudlo sumala sa Pamaagi sa Manluluwas

Ang Manluluwas midapit sa Iyang mga disipulo sa pagpamatuod, ug samtang sila mihimo, ang Espiritu mitandog sa ilang mga kasingkasing. Samtang magtudlo ka mahitungod sa pagkamasulundon, pananglit, dapita ang mga sakop sa korum o klase sa pagpaambit sa ilang mga pagpamatuod sa kaimportante sa pagtuman sa mga sugo. (Tan-awa sa Pagtudlo sumala sa Pamaagi sa Manluluwas [2016], 11, 32.)