Upon You My Fellow Servants [Diha Kaninyo nga Akong Kauban nga mga Sulugoon], ni Linda Curley Christensen ug Michael T. Malm

Pebrero 14

Unsa ang Pagkapari?

Doktrina ug mga Pakigsaad 12–13; Joseph Smith—Kasaysayan 1:66–75

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang bag-ohay lang nato nga mga kalihokan? Malampuson ba kini? Unsa ang maayong nabuhat, ug sa unsa nga paagi kita makapanindot niini?

• Ang atong mga katungdanan o mga responsibilidad. Kinsa ang nagkinahanglan sa atong tabang? Unsaon nato pagtabang kanila?

• Ang atong mga kinabuhi. Unsa nga mga tumong ang atong gibuhat sa indibidwal nga paagi? Unsa nga mga kasinatian ang atong mapaambit? Unsa nga mga panalangin ang atong nadawat?

Sa katapusan sa leksyon, kon angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Samtang magbasa ka mahitungod sa pagpahiuli sa Aaronic nga Pagkapari diha sa Doktrina ug mga Pakigsaad 13, paningkamuti sa pagbasa pinaagi sa paghunahuna kon unsa kaha ang masabtan niadtong imong gitudloan. Nasabtan ba nila ang gahum sa pagkapari diha sa ilang mga kinabuhi? Sa unsang paagi nga ang mga ordinansa sa pagkapari sama sa bunyag ug sa sakramento nakatabang kanimo nga madawat ang gahum sa Manluluwas? Paghunahuna og mga kasinatian nga imong ikapaambit. Aron maandam ang imong kaugalingon sa pagtudlo mahitungod sa pagkapari, ikonsiderar ang pagtuon sa mga kasulatan nga gisugyot diha sa outline niini nga semana sa Dali, Sunod Kanako—Alang sa mga Indibidwal ug mga Pamilya ug “Pagkapari” diha sa Giya ngadto sa mga Kasulatan (scriptures.ChurchofJesusChrist.org).

Ang mga kasulatan makatabang kanato nga masabtan kon sa unsang paagi nga ang pagkapari makapanalangin sa atong mga kinabuhi.

Pagkat-on og Dungan

Sa pagsugod og panaghisgutan mahitungod sa pagkapari, mahimo nimong dapiton ang mga sakop sa korum o klase nga mopaambit sa unsay ilang nahibaloan mahitungod sa pagpahiuli sa Aaronic nga Pagkapari, lakip na sa unsay ilang nabasahan niini nga semana diha sa Doktrina ug mga Pakigsaad 13 ug Joseph Smith—Kasaysayan 1:66–75. Mahimo usab nimong ipakita ang usa ka hulagway nga nagpakita sa pagpahiuli sa Aaronic nga Pagkapari (sama sa Libro sa mga Hulagway sa Ebanghelyo [2009], nu. 93), ug dapita ang mga sakop sa korum o klase nga mopaambit sa unsay ilang nahibaloan mahitungod niini nga panghitabo. Nganong mapasalamaton man kita nga napahiuli ang pagkapari? Ang mosunod nga mga kalihokan makatabang niadtong imong gitudloan nga mas masabtan kon unsa ang pagkapari ug sa unsang paagi kita napanalanginan niini.

• Unsaon sa mga sakop sa korum o klase sa pagpasabut kon unsa ang pagkapari ngadto sa usa ka tawo kinsa wala pa gayud makadungog niini sukad? Aron matabangan sila, mahimo nimong ilista diha sa pisara ang pipila ka pangutana nga tingali aduna ang mga tawo mahitungod sa pagkapari, sama sa Unsa ang pagkapari? Unsaon sa usa ka tawo pagkadawat sa pagkapari? Unsaon paglihok sa usa ka naghupot sa pagkapari? Unsay buhaton sa mga naghupot sa pagkapari? Dapita kadtong imong gitudloan sa pagpangita og mga tubag gamit ang mga kasulatan ug ubang mga kapanguhaan nga makita diha sa “Suporta nga mga Kapanguhaan” ug isulat ang ilang mga tubag diha sa pisara. Mahimo nimo silang hangyuon sa pagpaambit sa mga panalangin nga miabut sa ilang mga kinabuhi tungod sa pagkapari. Tan-awa usab sa Dale G. Renlund, “(Ang Priesthood ug ang Matubsanong Gahum sa Manluluwas,” Liahona, Nob. 2017, 64–67).

• Kon nagtudlo ka og mga naghupot sa Aaronic nga Pagkapari, makabenepisyo sila sa pagribyu sa mensahe ni Brother Douglas D. Holmes nga “Unsay Kinahanglang Masabtan sa Matag Naghupot sa Aaronic Priesthood” (Liahona, Mayo 2018, 50–53). Mahimo nimong sangunan ang matag sakop sa korum sa pagribyu sa unang pipila ka parapo [paragraph] sa mensahe o usa sa laing upat ka seksyon. Dapita ang matag tawo nga mangita og butang nga iyang gibati nga kinahanglang masabtan sa matag naghupot sa Aaronic nga Pagkapari. Hatagi siya og kahigayunan nga ipaambit kon unsay iyang nakat-unan ug ipasabut nganong iyang gipili kana nga pagtulun-an.

• Kon nagtudlo ka og mga batan-ong babaye, mahimo nimong ipaambit ang mensahe ni Presidente Russell M. Nelson nga “Espirituhanon nga mga Bahandi,” nga gipamulong ngadto kanila (Liahona, Nob. 2019, 76–79). Mahimo nimong hangyuon ang mga sakop sa klase sa pagpangita sa iyang mensahe nga mangita og butang nga ilang mabuhat aron mas hingpit nga “[maka]gamit sa gahum sa Manluluwas” sa ilang mga kinabuhi (pahina 77). Unsa ang gitudlo ni Presidente Nelson kon sa unsang paagi nato magamit ang gahum sa pagkapari? Sa unsang paagi nga ang gahum sa pagkapari makapanalangin kanato? Awhaga ang mga batan-ong babaye sa pagkonsiderar kon unsaon nila paglihok niining pagdapit gikan ni Presidente Nelson: “Ako moawhag ninyo nga mainampuong magtuon sa tanang mga kamatuoran nga inyong mahibaloan mahitungod sa gahum sa pagkapari” (pahina 79).

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Doktrina ug mga Pakigsaad 84:17–22; 107:1–5 (Ang pagkapari mao ang gahum ug awtoridad sa Dios)

• Mga Hebreohanon 5:4; Mga Artikulo sa Hugot nga Pagtuo 1:5 (Ang mga naghupot sa pagkapari gitawag sa Dios ug gi-orden pinaagi sa usa ka tawo nga adunay awtoridad)

• Doktrina ug mga Pakigsaad 121:34–46 (Ang gahum ug awtoridad sa pagkapari madumala lamang diha sa mga baruganan sa pagkamatarung)

• Mateo 3:1–6; 28:16–19; Juan 15:16; Doktrina ug mga Pakigsaad 12:3–4 (Takus nga kalalakin-an ug kababayen-an nagsangyaw sa ebanghelyo)

• Mga Buhat 3:1–8; Santiago 5:14–15 (Ang mga naghupot sa pagkapari naghatag og mga panalangin aron mamaayo ang mga masakiton ug nag-antus)

• 3 Nephi 11:21–22; 18:1–5; Doktrina ug mga Pakigsaad 107:20 (Ang mga naghupot sa pagkapari nagdumala sa mga ordinansa)

• Doktrina ug mga Pakigsaad 65:2; 107:18–21 (Ang mga naghupot sa pagkapari nagtabang sa pagdumala sa Simbahan)

• “Aaronic Priesthood,” “Melchizedek Priesthood,” “Priesthood,” sa Matinud-anon sa Tinuhoan (2004), 3–4, 108–10, 201–207

Pagtudlo sumala sa Pamaagi sa Manluluwas

Ang Manluluwas nagtudlo sa Iyang mga disipulo nga modangup sa mga kasulatan alang sa mga tubag sa mga pangutana ug aron makadawat og espiritwal nga kalig-on. Unsaon nimo pag-awhag kadtong imong gitudloan nga modangup ngadto sa mga kasulatan sa pagpangita og mga tubag sa ilang mga pangutana ug mga hagit? (Tan-awa sa Pagtudlo sumala sa Pamaagi sa Manluluwas [2016], 30.)