Pebrero 28

Unsay Gipasabut sa Maghinulsol?

Doktrina ug mga Pakigsaad 18–19

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang bag-o sa atong ward, ug unsaon nato pagtabang kanila nga mobati og pag-abiabi? Unsa ang atong buhaton aron sa paghimo sa oras sa atong mga miting sa korum o klase nga makahuluganon?

• Ang atong mga katungdanan o mga responsibilidad. Unsa ang pipila sa atong mga katungdanan ug mga responsibilidad isip mga batan-ong lalaki o mga batan-ong babaye? Sa unsa nga paagi kita mas makatuman niini?

• Ang atong mga kinabuhi. Unsa ang atong buhaton aron mahimong mas mahisama ni Jesukristo ug madawat ang Iyang gahum diha sa atong mga kinabuhi? Unsa ang atong buhaton aron matabangan ang atong mga pamilya nga moduol ngadto Kaniya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Lisud ang pagbasa sa Doktrina ug mga Pakigsaad 19:16–19 nga dili mobati sa gugma sa Manluluwas alang kanato. Niining mga bersikulo, Iyang gihulagway ang pag-antus nga Iyang nasinati samtang Siya miula alang sa atong mga sala ug mipadayag ngano nga andam Siya nga mag-antus sa hilabihan gayud—“nga [kita] unta dili mag-antus kon [kita] maghinulsol.” Ang paghinulsol usa ka panalangin nga nahimong posible pinaagi sa Manluluwas. Usa kini ka makanunayon, inadlaw-adlaw nga paningkamot nga mopalayo gikan sa sala ug modangup ngadto sa Dios. Usa kini ka bahin sa plano sa Langitnong Amahan sa pagtabang kanato nga makabalik ngadto Kaniya. Ang pagsabut kon unsaon paghinulsol makatabang kanato aron malimpyuhan sa atong mga sala, mausab ang atong mga kasingkasing ug mga hunahuna, ug mas mapaduol ngadto sa Dios.

Sa unsang paagi nga ang paghinulsol nakatabang kanimo nga mas mapaduol ngadto sa Langitnong Amahan? Unsaon nimo pagtabang kadtong imong gitudloan nga magtinguha sa paghinulsol? Unsaon nimo pagtabang kanila nga makakita nga ang paghinulsol usa ka inadlaw-adlaw nga paningkamot ug wala lamang gitagana alang sa bug-at nga mga sala? Samtang mangandam ka sa pagtudlo, ikonsiderar ang pagtuon sa mensahe ni Presidente Russell M. Nelson nga “Kita Makabuhat og Mas Maayo pa ug Mahimong mas Maayo” (Liahona, Mayo 2019, 67–69).

Si Kristo diha sa Getsemani, ni Harry Anderson

Pagkat-on og Dungan

Tanang propeta sukad sa sinugdanan nanawagan sa katawhan nga maghinulsol. Hinoon, tingali walay pagdapit sa paghinulsol nga sama ka gamhanan sa pagdapit sa Manluluwas nga makita diha sa Doktrina ug mga Pakigsaad 19:15–19, nga tingali nabasahan na sa mga batan-on niini nga semana. Mahimo nimo silang pangutan-on kon unsay ilang nakat-unan mahitungod sa Manluluwas gikan niining mga bersikulo. Unsa ang gisulti niining mga bersikulo mahitungod sa kaimportante sa paghinulsol diha sa mga mata sa Ginoo? Ang mosunod nga mga ideya makatabang niadtong imong gitudloan nga makakita sa paghinulsol isip inadlaw-adlaw nga panalangin diha sa ilang mga kinabuhi.

• Aron matabangan ang mga sakop sa korum o klase nga makasabut kon sa unsang paagi nga ang paghinulsol nakapanalangin sa ilang kinabuhi, mahimo nimong sugdan pinaagi sa pagpangutana niini: Unsaon nako pagkahibalo nga ang akong mga paningkamot nga maghinulsol misalir? Sa unsang paagi nga matabangan ko sa Manluluwas nga mag-usab? Agi og dugang sa kapasayloan sa sala, unsa ang laing mga panalangin nga nagagikan sa paghinulsol? Dapita ang mga sakop sa klase sa pagbasa og usa o dugang pa nga mga kasulatan diha sa “Suporta nga mga Kapanguhaan,” nga mangita og mga tubag sa mga pangutana. Unsa ang ilang nakit-an?

• Daghan sa mga batan-on ang nasayop pagsabut kon unsay kahulugan sa paghinulsol. Tingali gikahadlukan nila ang paghinulsol o naghunahuna nga magamit lamang kini sa bug-at nga mga sala. Aron matabangan nga makorihian kining sayop nga pagsabut, mahimo nimong dapiton ang mga sakop sa korum o klase nga magtuon sa bahin sa mensahe ni Presidente Russell M. Nelson nga “Kita Makabuhat og Mas Maayo pa ug Mahimong mas Maayo” (Liahona, Mayo 2019, 67–69), nga mangita og mga hugpong sa mga pulong nga makatabang kanila nga masabtan kon unsay gipasabut sa paghinulsol. Unsay ilang nakit-an nga nakatabang kanila nga maghunahuna mahitungod sa paghinulsol sa bag-ong paagi? Unsa nga mga panalangin ang gisaad ni Presidente Nelson niadtong kinsa maghinulsol?

• Unsaon nimo pagtabang niadtong imong gitudloan nga makasabut kon ngano ug unsaon sa paghinulsol? Ang mensahe ni Presidente Dallin H. Oaks nga “Malimpyo Pinaagi sa Paghinulsol” (Liahona, Mayo 2019, 91–94) mahimong makatabang. Mahimo nimong bahinon ang korum o klase ngadto sa upat ka grupo ug i-assign ang matag grupo sa pagbasa sa usa sa upat ka seksyon sa pakigpulong ni Presidente Oaks. Ang matag grupo mahimong mopresentar dayon og usa ka summary sa unsay ilang nabasahan ngadto sa laing mga grupo, uban sa bisan unsang mga kasulatan gikan sa mensahe nga nagsuporta sa unsay ilang nakat-unan. Mahimo nimong tapuson pinaagi sa paghangyo sa mga sakop sa korum o klase sa pagpaambit sa ilang mga pagpamatuod sa kaimportante sa paghinulsol diha sa plano sa Dios.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• 2 Nephi 31:13; Enos 1:5–9; Mosiah 4:9–12; 27:23–26, 35; Alma 19:33; 36:18–21, 24; 37:9; Helaman 15:7–8; Moroni 6:8; Doktrina ug mga Pakigsaad 58:42–43; 64:9–10 (Mga kasulatan mahitungod sa paghinulsol)

• Doktrina ug mga Pakigsaad 18:10–16 (Ang paghinulsol nagdala og hingpit nga kalipay)

• “Paghinulsol,” diha sa Alang sa Kalig-on sa mga Kabatan-onan (2011), 28–29

• “Paghinulsol pinaagi sa Pag-ula ni Jesukristo,” diha sa kapitulo 3 sa Isangyaw ang Akong Ebanghelyo (2019), 72–73

Pagtudlo sumala sa Pamaagi sa Manluluwas

Ang Manluluwas midapit sa uban sa pagbuhat diha sa hugot nga pagtuo ug sa pagtuman sa mga kamatuoran nga Iyang gitudlo. Unsay imong mabuhat aron matabangan kadtong imong gitudloan nga makakita sa gahum sa inadlaw nga paghinulsol? (Tan-awa sa Pagtudlo sumala sa Pamaagi sa Manluluwas [2016], 31, 35.)