Ang Basahon ni Enos

1 Tan-awa, nahitabo nga ako, si Enos, nakaila sa akong amahan nga siya makiangayon nga tawo—kay siya mitudlo kanako sa iyang pinulongan, ug usab sumala sa pag-amuma ug sa pagpahimatngon sa Ginoo—ug bulahan ang ngalan sa akong Dios tungod niini—

2 Ug sultihan ko kamo sa akong pagpakigbisog sa atubangan sa Dios, sa wala pa ako makadawat og kapasayloan sa akong mga sala.

3 Tan-awa, miadto ako sa kalasangan aron mangayam og mga mananap; ug ang mga pulong nga kanunay nakong madunggan gikan sa akong amahan mahitungod sa kinabuhing dayon, ug sa kamaya sa mga santos, mituhop pag-ayo sa akong kasingkasing.

4 Ug ang akong kalag gigutom; ug miluhod ako sa atubangan sa akong Magbubuhat, ug nangamuyo ako kaniya sa hilabihan nga pag-ampo ug pangaliya alang sa akong kaugalingon nga kalag; ug sa tibuok adlaw nangamuyo ako kaniya; oo, ug sa dihang miabot ang kagabhion sa gihapon akong gipataas pag-ayo ang akong tingog nga kini miabot sa kalangitan.

5 Ug dihay miabot nga usa ka tingog ngari kanako, nga nag-ingon: Enos, ang imong mga sala gipasaylo na, ug mapanalanginan ka.

6 Ug ako, si Enos, nasayod nga ang Dios dili mamakak; busa, ang akong kahasol nawala sa hingpit.

7 Ug ako miingon: Ginoo, giunsa kini pagkahitabo?

8 Ug miingon siya kanako: Tungod sa imong pagtuo kang Kristo, kinsa wala pa nimo madungog o makita sukad. Ug daghang katuigan ang molabay unà pa siya mopakita sa iyang kaugalingon sa unod; busa, lakaw, ang imong pagtuo mao ang nag-ayo kanimo.

9 Karon, nahitabo, nga dihang nakadungog ako niining mga pulonga misugod ko sa pagbati og tinguha alang sa kaayohan sa akong kaigsoonan, nga mga Nephita; busa, akong gibu-bo ang akong tibuok nga kalag ngadto sa Dios alang kanila.

10 Ug samtang nakigbisog ako sa espiritu, tan-awa, ang tingog sa Ginoo miabot na usab sa akong hunahuna, nga nag-ingon: Akong duawon ang imong kaigsoonan sumala sa ilang kakugi sa pagtuman sa akong mga sugo. Akong gihatag kini nga yuta ngadto kanila, ug balaan kini nga yuta; ug dili Ako motunglo niini gawas kon tungod sa kadaotan; busa, akong duawon ang imong kaigsoonan sumala sa Akong giingon; ug ang ilang mga kalapasan Akong pahamtangan og kasub-anan diha sa kaugalingon nilang mga ulo.

11 Ug human nga ako, si Enos, nakadungog niining mga pulonga, ang akong pagtuo sa Ginoo nagsugod sa pagkadili matarog; ug nag-ampo ako kaniya inubanan sa daghang pakigbisog alang sa akong kaigsoonan, ang mga Lamanita.

12 Ug nahitabo nga human ako nag-ampo ug naghago sa tanang kakugi, ang Ginoo miingon kanako: Hatagan ko ikaw sumala sa imong mga tinguha, tungod sa imong pagtuo.

13 Ug karon tan-awa, mao kini ang tinguha nga akong gitinguha kaniya—nga kon mahitabo man, nga ang akong katawhan, ang mga Nephita, makahimo og kalapasan, ug malaglag sa bisan unsa nga paagi, ug kon ang mga Lamanita dili malaglag, nga ang Ginoong Dios magtipig og talaan bahin sa akong katawhan, nga mga Nephita; kon mahitabo man nga pinaagi sa gahom sa iyang balaan nga bukton, nga kini sa umaabot nga mga adlaw madala ngadto sa mga Lamanita, aron, sila, madala ngadto sa kaluwasan—

14 Kay sa pagkakaron nakawang ang among mga pakigbisog sa pagpabalik nila ngadto sa tinuod nga pagtuo. Ug nanumpa sila sa ilang kapungot nga, kon mahimo, laglagon nila ang among mga talaan ug kami, ug usab ang tanang tradisyon sa among mga amahan.

15 Busa, tungod kay nasayod ako nga makahimo ang Ginoong Dios sa pagtipig sa among mga talaan, nangamuyo ako kaniya sa walay hunong, kay miingon siya kanako: Bisan unsang butanga ang imong pangayoon pinaagi sa pagtuo, nagatuo nga ikaw makadawat niini pinaagi sa ngalan ni Kristo, ikaw makadawat niini.

16 Ug ako adunay pagtuo, ug nangamuyo ako sa Dios nga tipigan niya ang mga talaan; ug nakigsaad siya kanako nga kini iyang dad-on ngadto sa mga Lamanita sa kaugalingon niyang tukmang panahon.

17 Ug ako, si Enos, nasayod nga matuman kini sumala sa pakigsaad nga iyang gihimo; busa nakapahulay ang akong kalag.

18 Ug ang Ginoo miingon kanako: Ang imong mga amahan mihangyo usab niining butanga kanako; ug mahitabo kini kanila sumala sa ilang pagtuo; kay ang ilang pagtuo sama sa imoha.

19 Ug karon nahitabo nga ako, si Enos, miadto sa taliwala sa katawhan ni Nephi, nanagna sa mga butang nga moabot, ug nagpamatuod sa mga butang nga akong nadungog ug nakita.

20 Ug mopamatuod ko nga ang katawhan ni Nephi makugihong nagtinguha nga mapahiuli ang mga Lamanita sa tinuod nga pagtuo sa Dios. Apan ang among mga kahago walay kapuslanan; ang ilang pagdumot dili matarog, ug nadala sila sa ilang daotang kinaiya nga nahimo silang luog, ug bangis, ug katawhan nga uhaw sa dugo, puno sa pagsimba og mga dios-dios ug kahugawan; nabuhi pinaagi sa pagkaon sa mga mananap nga manunubad; nagpuyo sa mga tolda, naglaag-laag sa kamingawan nga nagbahag og panit sa mananap nga gibakos sa ilang mga bat-ang ug kinagisan ang ilang mga ulo; ug hanas sila sa paggamit sa gapasan, ug sa sundang, ug sa atsa. Ug ang kadaghanan kanila walay laing kaonon gawas lang sa hilaw nga karne; ug padayon silang nagtinguha sa pagpatay kanamo.

21 Ug nahitabo nga ang katawhan ni Nephi miugmad sa yuta, ug mipasanay sa tanang matang sa lugas, ug sa mga prutas, ug mga panon sa kahayopan, ug mga panon sa tanang matang sa baka, mga kanding, ug mga ihalas nga kanding, ug usab daghang kabayo.

22 Ug dihay daghan kaayong mga propeta taliwala kanamo. Ug ang katawhan mga tikig og liog nga katawhan, ug lisod pasabton.

23 Ug walay lain gawas sa hilabihang kapintas, pagsangyaw ug pagpanagna bahin sa mga gubat, ug mga panagbingkil, ug mga panglaglag, ug kanunay nga pagpahinumdom kanila bahin sa kamatayon, ug sa gidugayon sa kahangtoran, ug sa mga paghukom ug gahom sa Dios, ug sa tanan niini nga mga butang—pagpahigmata kanila sa kanunay aron padayon silang may kahadlok sa Ginoo. Moingon ko nga walay lain gawas lang niining mga butanga, ug hilabihan ka yanong pinulongan, ang makapugong kanila gikan sa diha-diha nga kalaglagan. Ug sa ingon niini nga paagi nagsulat ko mahitungod kanila.

24 Ug nakasaksi ko og mga gubat tali sa mga Nephita ug sa mga Lamanita sa tibuok nakong kinabuhi.

25 Ug nahitabo nga nagsugod ko sa pagkatigulang, ug usa ka gatos ug kapitoan ug siyam ka tuig ang milabay sukad sa panahon nga ang among amahan nga si Lehi mibiya sa Jerusalem.

26 Ug akong nakita nga sa dili madugay ako manaog na sa akong lubnganan, kay dugay nang gidasig sa gahom sa Dios nga kinahanglan akong magsangyaw ug managna niini nga katawhan, ug mopahayag sa pulong sumala sa kamatuoran nga anaa kang Kristo. Ug namahayag ako niini sa tanan kong mga adlaw, ug nagmalipayon niini labaw pa kay sa kalibotan.

27 Ug sa dili madugay moadto na ako sa dapit nga akong kapahulayan, nga kauban sa akong Manunubos; kay nasayod ako nga kaniya ako makapahulay. Ug ikalipay unya nako ang adlaw kon ang akong pagkamortal mausab na sa pagka-imortal, ug mobarog sa iyang atubangan; ug unya akong makita ang iyang panagway sa kahinangop, ug moingon siya kanako: Duol kanako, ikaw nga bulahan, may dapit nga giandam alang kanimo sa mga mansyon sa akong Amahan. Amen.