pamilya nga nagtuon sa mga kasulatan

Marso 14

Sa Unsang Paagi nga ang Balaanong mga Tahas sa Kalalakin-an ug Kababayen-an Mokomplementar sa Usag Usa?

Doktrina ug mga Pakigsaad 23–26

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang nagkinahanglan sa atong tabang ug mga pag-ampo? Unsay atong mahimo sa pagtabang kanila? Kinsa ang atong dapiton ngadto sa umaabut nga kalihokan?

• Ang atong mga katungdanan o mga responsibilidad. Unsa nga mga buluhaton ang ato nang natuman? Unsa nga mga buluhaton ang kinahanglan natong buhaton? Giunsa nato pagdapit ang uban sa pagduol ngadto kang Kristo, ug unsaon nato pagdapit ang uban karon?

• Ang atong mga kinabuhi. Unsa nga bag-ong mga kasinatian ang nakapalig-on sa atong mga pagpamatuod? Unsa ang nanghitabo sa atong mga kinabuhi, ug unsaon nato sa pagsuporta ang usag usa?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang Langitnong Amahan mihatag sa kalalakin-an ug kababayen-an og patas nga mahinungdanong mga tahas aron sa pagtuman sa Iyang plano. Kining mga tahas mokomplementar sa usag usa. Aron matabangan ang kalalakin-an ug kababayen-an sa pagtuman niining mga tahas, Siya mihatag kanila og talagsaong mga gasa ug mga abilidad. Ang mga sakop sa korum o klase mahimong nakatuon na sa Doktrina ug mga Pakigsaad 25 niini nga semana. Niini nga pagpadayag, ang Ginoo mihatag og tambag kang Emma Smith mahitungod sa iyang importante nga buhat diha sa Pagpahiuli sa ebanghelyo ug mipasabut kon sa unsang paagi nga si Joseph ug Emma makasuporta sa usag usa. Unsa nga mga ehemplo ang imong nakita sa kalalakin-an ug kababayen-an nga nagtambayayong sa komplementaryo nga mga paagi sa paghimo sa buhat sa Ginoo? Unsaon nimo pagdasig ang mga batan-ong lalaki ug mga batan-ong babaye nga imong gitudloan aron masabtan ang ilang balaanong mga tahas ug magtambayayong sa pagtukod sa gingharian sa Dios?

Samtang mangandam ka sa pagtudlo, ikonsiderar ang pagribyu sa “Ang Pamilya: Usa ka Pamahayag ngadto sa Kalibutan”” (ChurchofJesusChrist.org) ug ang mensahe ni Sister Linda K. Burton nga “Magdungan Kita’g Saka” (Liahona, Mayo 2015, 29–32).

batan-ong babaye ug batan-ong lalaki nga nag-adorno og cake

Ang mga batan-ong lalaki ug mga batan-ong babaye makakat-on sa pagtambayayong sa pagtukod sa gingharian sa Dios.

Pagkat-on og Dungan

Sa pagsugod og panaghisgutan unsaon pagtambayayong sa kalalakin-an ug kababayen-an diha sa gingharian sa Dios, ikonsiderar ang pagdapit sa mga sakop sa korum o klase nga ribyuhon ang Doktrina ug mga Pakigsaad 25. Unsay gisulti sa Ginoo mahitungod sa mga responsibilidad nga aduna sila si Emma ug Joseph sa usag usa? Unsay atong makat-unan gikan sa seksyon 25 kon unsaon pagtambayayong sa mga bana ug mga asawa? Mahimo nimong hatagan kadtong imong gitudloan og pipila ka papel nga kasulatan sa unsay ilang makit-an ug ipaambit nila ang ilang mga hunahuna. Dayon pagpili gikan sa mosunod nga mga kalihokan aron matabangan sila nga mas masabtan kon unsay gilauman sa Dios sa Iyang mga anak nga lalaki ug mga anak nga babaye nga magtambayayong.

• Makahunahuna ka ba og usa ka ehemplo aron matabangan ang mga sakop sa korum o klase nga makasabut kon unsay kahulugan sa “komplementaryo”? Sama pananglit, mahimo silang maghisgot mahitungod sa komplementaryo nga mga kolor o maghisgot kon sa unsang paagi nga ang lain-laing mga tingog sa usa ka choir makahimo sa musika nga mas maanindot. Sa unsang paagi nga ang balaanong mga tahas sa kalalakin-an ug kababayen-an mokomplemento sa usag usa? Isip usa ka korum o klase, basaha og dungan ang unang duha ka parapo [paragraph] sa seksyon nga giulohan og “Pagbayaw ug Pagtinabangay sa atong Magkauyon nga mga Tahas” gikan sa mensahe ni Sister Linda K. Burton nga “Magdungan Kita’g Saka” (Liahona, Mayo 2015, 30). O mahimo nimong dapiton ang usa ka managtiayon nga mobisita sa imong korum o klase ug maghisgot kon giunsa nila pagtabang sa usag usa nga matuman ang ilang mga tahas ug giunsa sa Ginoo pagtabang kanila. Unsay atong nakat-unan, gikan sa mensahe ni Sister Burton o sa managtiayon, kon giunsa pagsuporta sa kalalakin-an ug kababayen-an sa usag usa diha sa mga pamilya?

• Ang mga kasulatan nga gilista diha sa “Suporta nga mga Kapanguhaan” makatabang sa mga sakop sa korum o klase nga makakat-on og dugang pa mahitungod sa mga responsibilidad sa kalalakin-an ug kababayen-an diha sa mga pamilya. Mahimo nimong sangunan ang matag sakop sa korum o klase sa pagbasa sa usa niining mga tudling sa kasulatan. Dapita sila sa pagpaambit sa ilang mga bersikulo ug sa paghisgot mahitungod sa mga responsibilidad nga gihulagway. Unsa man ang gitudlo niining mga kasulatan mahitungod sa mga responsibilidad sa mga ginikanan? Sa unsang paagi nga ang mga bana ug mga asawa makatabang sa usag usa sa pagtuman niining balaanong mga responsibilidad? Sa unsang paagi nga ang Manluluwas makatabang kanila nga magmalampuson? Unsaon sa mga anak pagtabang kanila?

• Aron matabangan ang imong korum o klase nga makasabut kon unsaon sa kalalakin-an ug kababayen-an nga mokomplementar sa usag usa isip magkatimbang nga magkauban, isulat ang mosunod nga mga ulohan diha sa pisara: Mga Responsibilidad sa mga Amahan ug Mga Responsibilidad sa mga Inahan. Hangyoa ang mga sakop sa korum o klase sa pagpangita sa ikapito nga parapo [paragraph] sa “Ang Pamilya: Usa ka Pamahayag ngadto sa Kalibutan” ug isulat ang unsay ilang makit-an ubos sa tukma nga ulohan. Unsay atong makat-unan mahitungod sa balaanong mga tahas sa mga amahan ug mga inahan? Unsay gipasabut niini nga ang mga amahan ug mga inahan kinahanglang magtinabangay sa usag usa isip “magkatimbang nga magkauban” sa pagtuman niining mga responsibilidad? Unsa nga mga ehemplo ang atong mapaambit gikan sa atong mga kinabuhi nga nagpakita sa mga amahan ug mga inahan nga nagtuman sa ilang mga tahas ug nagtabang sa usag usa isip magkatimbang nga magkauban? Tingali mahimo usab nimong hisgutan ang mga paagi nga ang mga batan-on makaandam karon alang niining umaabut nga mga tahas.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Mga Proverbio 22:6; Doktrina ug mga Pakigsaad 68:25–28; 121:41–43 (Mga responsibilidad sa mga ginikanan)

• Mga Taga-Efeso 5:25; Moises 3:21–24; 5:1–12 (Mga bana ug mga asawa nagtambayayong isip magkatimbang nga magkauban)

Pagtudlo sumala sa Pamaagi sa Manluluwas

Ang Manluluwas miandam niadtong Iyang gitudloan ug mihatag kanila og importante nga mga responsibilidad. Unsaon kaha nimo pag-andam niadtong imong gitudloan nga magtambayayong isip mga anak nga lalaki ug mga anak nga babaye sa Dios? (Tan-awa sa Pagtudlo sumala sa Pamaagi sa Manluluwas [2016], 27–28.)