Si Kristo nag-ampo

Si Kristo diha sa Getsemani, ni Harry Anderson

Marso 28

Nganong Gikinahanglan Nako ang Pag-ula ni Jesukristo?

Doktrina ug mga Pakigsaad 29

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang atong mahimo aron sa pag-ugmad og panaghiusa diha sa korum o mga sakop sa klase? Unsa nga mga tumong ang atong gustong buhaton og dungan?

• Ang atong mga katungdanan o mga responsibilidad. Unsa ang atong gibuhat sa pagpaambit sa ebanghelyo? Unsa ang atong mga kasinatian sa paghimo sa buhat sa templo ug family history?

• Ang atong mga kinabuhi. Giunsa nato pagsinati ang kamot sa Ginoo diha sa atong mga kinabuhi? Unsa ang nakapadasig kanato sa atong pagtuon sa kasulatan niini nga semana?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Si Presidente Ezra Taft Benson nagtudlo, “Ingon nga ang usa ka tawo dili gayud magtinguha og pagkaon hangtud nga siya gutumon, busa siya dili magtinguha sa kaluwasan ni Kristo hangtud nga siya mahibalo nganong nagkinahanglan siya ni Kristo. Walay usa ang igo ug tukma nga nasayud nganong gikinahanglan niya si Kristo hangtud nga iyang masabtan ug madawat ang doktrina sa Pagkapukan ug ang epekto niini nganha sa tanang katawhan” (“The Book of Mormon and the Doctrine and Covenants,” Ensign, Mayo 1987, 85). Samtang magtuon ka sa Doktrina ug mga Pakigsaad 29 niini nga semana, nabantayan siguro nimo ang paghulagway sa Ginoo sa Pagkapukan ug sa unsang paagi kita natubos gikan niini. Giunsa nimo pagkaangkon og pagpamatuod bahin ni Jesukristo ug sa Iyang tahas isip imong Manluluwas ug Manunubos? Hunahunaa kon sa unsang paagi nga ang paglig-on sa mga pagpamatuod sa mga sakop sa korum o klase bahin Kaniya makapausab kanila. Samtang mangandam ka, ikonsiderar ang pagtuon sa “Kabubut-on [Agency] ug ang Pagkapukan [Fall] ni Adan ug Eva,” “Ang Pag-ula ni Jesukristo,” ug “Ang Balaan nga Misyon ni Jesukristo” diha sa kapitulo 3 sa Isangyaw ang Akong Ebanghelyo ([2019], 58–61, 71–72).

mga batan-ong babaye diha sa klase

Tungod kay ang Manluluwas mitubos kanato gikan sa Pagkapukan, makakita kita og hingpit nga kalipay.

Pagkat-on og Dungan

Sa pagpaila sa panaghisgutan karong adlawa, mahimo nimong dapiton kadtong imong gitudloan sa paglista diha sa pisara sa bisan unsang butang nga ilang nahibaloan mahitungod sa Pagkapukan ni Adan ug Eva. Sama pananglit, unsa ang ilang nakat-unan mahitungod sa Pagkapukan gikan sa Doktrina ug mga Pakigsaad 29:36–50? Unsa nga ebidensya sa Pagkapukan ang atong makita sa atong palibut? Ang mga kalihokan nga anaa sa ubos makatabang sa imong korum o klase nga madiskubrihan kon sa unsang paagi nga ang Pag-ula ni Jesukristo makatabang kanato sa pagbuntog sa mga epekto sa Pagkapukan.

• Aron mas masabtan ang Pagkapukan ni Adan ug Eva, ang mga sakop sa korum o klase mahimong mobasa sa “Pagkapukan” diha sa Matinud-anon sa Tinuohan (145–149) o “Kabubut-on [Agency] ug ang Pagkapukan [Fall] ni Adan ug Eva” diha sa kapitulo 3 sa Isangyaw ang Akong Ebanghelyo (58–59). Dapita sila sa paghunahuna nga usa ka higala nangutana kanila, “Nganong nagkinahanglan man ko ni Jesukristo?” Dapita sila sa pagtudlo sa usag usa nga managpares kon unsaon nila pagtubag kana nga pangutana base sa unsay ilang nakat-unan gikan sa ilang gibasa.

• Unsaon nimo pagtabang ang mga sakop sa korum o klase nga makakat-on gikan sa mga kasulatan kon nganong magkinahanglan sila sa Pag-ula ni Jesukristo? Usa ka paagi mao ang pagsulat sa pipila ka pakisayran sa kasulatan gikan sa “Suporta nga mga Kapanguhaan” diha sa pisara ug dayon mosulat sa mga summary nga pamahayag alang niadtong mga pakisayran diha sa mga ginunting nga papel. Hatagi ang matag sakop sa korum o klase og usa sa mga ginunting nga papel. Dapita sila sa pagbasa sa mga pakisayran sa kasulatan nga gisulat diha sa pisara ug sa pagpangita og usa nga mohaum sa ilang summary nga pamahayag. (Ang uban sa mga pamahayag nagpasabut og sobra sa usa ka kasulatan.) Dapita ang matag sakop sa korum o klase sa pagbasa og kusog sa tudling sa kasulatan nga mohaum sa ilang pamahayag ug ipaambit kon unsay ilang nakat-unan kon nganong nagkinahanglan kita sa Pag-ula sa Manluluwas.

• Dapita ang mga sakop sa korum o klase sa pagtubag sa pribadong paagi sa mga pangutana sama sa mosunod: Sa unsang paagi ko napanalanginan pinaagi sa Pag-ula ni Jesukristo? Unsay gustong ipausab sa Manluluwas kanako aron mas hingpit ko nga makasinati sa mga panalangin sa Iyang Pag-ula? Dayon hangyoa sila sa paghisgot og dungan sa unang pangutana. Mahimo silang moribyu sa “Ang Pag-ula ni Jesukristo” ug “Ang Balaan nga Misyon ni Jesukristo” diha sa kapitulo 3 sa Isangyaw ang Akong Ebanghelyo (60–61, 71–72). Dapita sila sa pagpaambit kon unsay ilang nakat-unan.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Doktrina ug mga Pakigsaad 19:16–19 (Si Jesukristo mibayad sa bugti alang sa atong mga sala aron dili kita mag-antus kon maghinulsol kita)

• 2 Nephi 9:6–16; Alma 42:6–9 (Si Jesukristo miluwas kanato gikan sa kamatayon ug impyerno)

• 2 Nephi 2:5–10; Helaman 14:15–17 (Pinaagi lamang ni Jesukristo nga makabalik kita ngadto sa Dios)

• Mosiah 3:7; Alma 7:11–13 (Tungod kay gidala ni Kristo sa Iyang kaugalingon ang atong mga kalisdanan ug mga sala, nasayud Siya kon unsaon pagtabang kanato)

• Moises 5:10–12 (Tungod kay ang Manluluwas mitubos kanato gikan sa Pagkapukan, makasinati kita og hingpit nga kalipay)

• Walter F. González, “Ang Hikap sa Manluluwas,” Liahona, Nob. 2019, 90–92

Pagtudlo sumala sa Pamaagi sa Manluluwas

Ang Manluluwas nag-ampo alang sa Iyang mga disipulo ug padayon nga mialagad kanila. Nakakita Siya og mga oportunidad nga makig-uban kanila ug mopadayag sa Iyang gugma. Unsa ang imong mga oportunidad sa paghimo sa samang butang niadtong imong gitudloan? (Tan-awa sa Pagtudlo sumala sa Pamaagi sa Manluluwas [2016], 6.)