mga batan-ong lalaki nga nagtan-aw og cellphone

Abril 11

Unsaon Nako Pagdapit ang Tanan nga Moduol ngadto ni Kristo?

Doktrina ug mga Pakigsaad 30–36

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon, agi og dugang ngadto sa pagtinambagay mahitungod sa piho nga mga panginahanglan sa korum o klase, tingali gusto nimong hisgutan ang mga pag-aghat ug mga tema gikan sa kinatibuk-ang komperensya. Ang mosunod nga mga pangutana mahimong makatabang.

• Unsa nga mga tema o mga mensahe ang mahinungdanon ngari kanato?

• Unsa nga pag-aghat ang atong gibati nga buhaton tungod sa unsay atong nakat-unan o gibati?

• Unsay kinahanglan natong buhaton isip usa ka korum o klase sa paglihok sa tambag nga atong nadungog sa kinatibuk-ang komperensya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Pipila lang ka bulan human naorganisar ang gipahiuli nga Simbahan niadtong Abril 6, 1830, sa Fayette, New York, ang Ginoo nagsugod sa pagtawag og mga misyonaryo aron sa pagpundok sa “mga pinili gikan sa upat ka mga suok sa yuta” (Doktrina ug mga Pakigsaad 33:6). Unsay nasugdan isip mga paningkamot sa pipila lang ka bag-ong mga kinabig sa usa ka limitadong heyograpikanhong dapit mitubo ngadto sa usa ka kasundalohan sa mga misyonaryo nga nagsangyaw sa ebanghelyo sa tibuok kalibutan. Apan ang misyonaryo nga buhat dili lamang limitado niadtong nagserbisyo og full-time nga mga misyon. Gusto sa Ginoo nga ang matag usa kanato modapit niadtong naglibut kanato sa pagduol ngadto Kaniya.

Unsa ang imong mga kasinatian sa pagdapit sa uban nga makakat-on mahitungod sa ebanghelyo sa Manluluwas? Unsay imong mabuhat aron sa pag-awhag sa mga sakop sa korum o klase sa pagtuman sa ilang katungdanan sa pagdala og mga kalag ngadto ni Jesukristo? Samtang mangandam ka sa pagtudlo, ikonsiderar ang pagribyu sa “Unsa May Akong Katuyoan isip usa ka Misyonaryo?” diha sa Isangyaw ang Akong Ebanghelyo ([2019] 1–17) ug sa mensahe ni Elder Dieter F. Uchtdorf nga “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15–18).

mga batan-ong babaye nga nangatawa

Pinaagi sa pagdapit sa atong mga higala nga motambong sa mga miting o mga kalihokan sa Simbahan, ato silang matabangan nga makakat-on bahin ni Kristo.

Pagkat-on og Dungan

Ang Doktrina ug mga Pakigsaad 30–36 naghisgot sa mga ngalan sa pipila ka tawo nga gitawag sa pagmisyon sa unang mga adlaw sa Simbahan. Pipila ka adlaw sa wala pa ang inyong miting, mahimo nimong hatagan ang matag sakop sa korum o klase og usa niining mga ngalan (tan-awa sa mga ulohan sa mga seksyon 30–36) ug dapita siya nga magkat-on kon unsa nga tambag ang gihatag sa Ginoo aron matabangan kana nga tawo sa pagpaambit sa ebanghelyo. Unsaon nato paggamit niana nga tambag sa atong mga kaugalingon? Ang mga ideya nga anaa sa ubos mas makapadasig pa niadtong imong gitudloan sa pagdapit niadtong naglibut kanila nga moduol ngadto kang Kristo.

• Kadto bang imong gitudloan nakasabut kon unsay kahulugan sa moduol ngadto ni Kristo? Mahimo nimo silang hangyuon sa pagpaambit sa ilang mga hunahuna. Kon makatabang kini, mahimo nimong ipaambit kining pagpasabut: “Sa pagduol ngadto sa Manluluwas, ang mga tawo kinahanglan gayud nga magbaton og hugot nga pagtuo diha Kaniya ngadto sa paghinulsol–– maghimo sa gikinahanglan nga mga kausaban sa ilang kinabuhi nga mahiuyon sa Iyang pagtulun-an” (Isangyaw ang Akong Ebanghelyo, 2). Ang mga sakop sa korum o klase mahimo usab nga mobasa sa mga kasulatan nga naglakip sa mga hugpong sa mga pulong sama sa “umari kanako” o “duol ngadto kang Kristo” aron makatabang sa pagtubag niining pangutana—sama pananglit, Mateo 11:28–30; Omni 1:26; Moroni 10:32; Doktrina ug mga Pakigsaad 20:59. Nganong gusto man nato nga ang mga tawo moduol ngadto kang Kristo? Unsa ang pipila ka yano nga mga butang nga mahimo natong buhaton aron sa pagtabang kanila? Ang mga sakop sa korum o klase mahimong magbuhat og mga plano sa pagdapit sa usa ka tawo nga ilang nailhan nga mas mahiduol ngadto kang Kristo.

• Ang pagkat-on kon giunsa sa uban pagpaambit sa ebanghelyo usa ka mahinungdanong paagi sa pagdasig niadtong imong gitudloan. Mahimo nimong dapiton ang mga sakop sa korum o klase sa pagbasa sa tambag ug mga ehemplo nga makita diha sa mensahe ni Sister Cristina B. Franco nga “Pagkaplag og Hingpit nga Kalipay sa Pagpaambit sa Ebanghelyo” (Liahona, Nob. 2019, 83–86). Unsa ang atong makat-unan gikan niini nga mga ehemplo? Hisguti og dungan kon unsay mabuhat sa imong korum o klase sa pagdapit sa uban nga moduol ngadto kang Kristo.

• Kon kabahin na sa pagpaambit sa ebanghelyo, si Elder Dieter F. Uchtdorf miingon nga ang uban kanato tingali “wala kasiguro unsaon sa pagbuhat niini. O basin nahadlok ta nga mogawas gikan sa atong naandan nga komportable nga dapit” (“Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 16). Kon ang mga sakop sa korum o klase mobati niini nga paagi, ang lima ka yanong mga sugyot nga gihatag ni Elder Uchtdorf diha sa iyang mensahe mahimong makatabang kanila. Mahimo nimong dapiton ang matag sakop sa klase sa pagbasa mahitungod sa usa sa iyang mga sugyot ug ipaambit kon unsay ilang nakat-unan.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• 1 Timoteo 4:12 (Alang sa mga magtotoo, pagkinabuhi ingon nga panig-ingnan)

• Alma 17:2–4 (Ang mga anak nga lalaki ni Mosiah miandam sa ilang kaugalingon sa pagpaambit sa ebanghelyo)

• Doktrina ug mga Pakigsaad 42:6–7 (Isangyaw ang ebanghelyo pinaagi sa gahum sa Espiritu)

• Russell M. Nelson ug Wendy Nelson, “Paglaum sa Israel” (tibuok kalibutan nga debosyonal sa mga kabatan-onan, Hunyo 3, 2018), dugang ngadto sa New Era ug Ensign, HopeofIsrael.ChurchofJesusChrist.org

Pagtudlo sumala sa Pamaagi sa Manluluwas

Gidapit sa Manluluwas ang uban sa pagpamatuod bahin sa mga kamatuoran aron ang Espiritu makatandog sa ilang mga kasingkasing. “Unsa may inyong sulti, kinsa man Ako?” Siya nangutana. Samtang mitubag si Pedro, ang iyang pagpamatuod nalig-on: “Ikaw mao ang Kristo, ang Anak sa Dios nga buhi” (Mateo 16:15–16). Sa unsang paagi nga ang pagpaambit sa ebanghelyo makapalig-on sa mga pagpamatuod sa mga sakop sa korum o klase?