Si Jesukristo nga naghugas sa mga tiil sa mga Apostoles

Si Jesus nga Naghugas sa mga Tiil sa mga Apostoles, ni Del Parson

Abril 25

Unsaon Nako aron Mas Mahisama ni Kristo sa Akong Pagserbisyo sa Uban?

Doktrina ug mga Pakigsaad 41–44

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang bag-o sa atong ward, ug unsaon nato pagtabang kanila nga mobati og pag-abiabi? Unsa ang atong buhaton aron sa paghimo sa panahon sa atong mga miting sa korum o klase nga makahuluganon?

• Ang atong mga katungdanan o mga responsibilidad. Unsa ang pipila sa atong mga katungdanan ug mga responsibilidad isip mga batan-ong lalaki o mga batan-ong babaye? Sa unsa nga paagi kita mas makatuman niini?

• Ang atong mga kinabuhi. Unsa ang atong buhaton aron mahimong mas mahisama ni Jesukristo ug madawat ang Iyang gahum diha sa atong mga kinabuhi? Unsa ang atong buhaton aron sa pagtabang sa atong mga pamilya nga moduol ngadto Kaniya?

Sa katapusan sa leksyon, kon angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sa dihang gisugo sa Ginoo ang mga Santos nga magpundok sa Kirtland, Ohio, daghang tawo ang matinud-anong mibiya sa ilang mga panimalay ug mibiyahe didto. Apan kini nga pagbalhin dili lamang mahitungod sa pagpuyo sa usa ka bag-ong dapit—mahitungod usab kini sa pagpuyo sa usa ka bag-ong paagi. Tingali natun-an na sa mga sakop sa korum o klase ang Doktrina ug mga Pakigsaad 41–44 niini nga semana ug nakakat-on mahitungod sa pagbalhin sa mga Santos ngadto sa Kirtland ug sa balaod nga gipadayag sa Ginoo kanila didto. Lakip sa uban pang mga butang, gilauman sa Ginoo nga ang mga Santos magkahiusa samtang sila naghigugma ug nagserbisyo sa usag usa (tan-awa sa Doktrina ug mga Pakigsaad 42:30–31, 38–39, 45; 44:6). Unsa nga mga kasinatian ang imong mapaambit nga makatabang sa imong korum o klase nga mobati sa kaimportante sa Kristohanong pagserbisyo?

Aron matabangan ka nga maandam sa pagtudlo mahitungod sa Kristohanong pagserbisyo, mahimo nimong ribyuhon ang “Serbisyo” diha sa Alang sa Kalig-on sa mga Kabatan-onan ([2011], 32–33) ug ang mensahe ni Presidente Russell M. Nelson nga “Ang Daku ug Ikaduhang Sugo” (Liahona, Nob 2019, 96–100).

batan-ong lalaki ug edaran nga babaye nga nagkinataw-anay

Makaserbisyo kita sa uban sama sa gibuhat sa Manluluwas.

Pagkat-on og Dungan

Sa pagsugod og panaghisgutan mahitungod sa Kristohanong pagserbisyo, mahimo nimong isulat diha sa pisara ang “Mag-ubang magpuyo diha sa gugma” (Doktrina ug mga Pakigsaad 42:45). Dapita ang imong korum o klase sa pagbasa sa Doktrina ug mga Pakigsaad 42:30–31, 38–39, 45; 44:6 ug ilista ang mga paagi nga gusto sa Ginoo nga buhaton sa mga Santos sa pagserbisyo sa usag usa. Unsa ang atong mga oportunidad, diha sa sulod sa atong mga panimalay ug sa gawas niini, aron sa pagserbisyo niadtong nanginahanglan sa pisikal, emosyonal, o sa espiritwal nga paagi? Pagpili gikan sa mga ideya nga anaa sa ubos nga makapadasig sa imong korum o klase sa paghatag og Kristohanong pagserbisyo ngadto sa uban.

• Aron matabangan ang mga sakop sa korum o klase nga makakat-on sa ehemplo sa Manluluwas bahin sa pagserbisyo, mahimo nimong sangunan ang matag tawo sa pagbasa og usa ka tudling sa kasulatan mahitungod sa Manluluwas nga nagserbisyo sa usa ka tawo (tan-awa sa “Suporta nga mga Kapanguhaan”). Ang matag tawo mahimong mo-summarize sa tudling sa kasulatan ug mopasabut kon unsay gibuhat sa Manluluwas sa pagserbisyo sa uban. Unsay gitudlo niining mga ehemplo kon unsay gipasabut sa pagserbisyo sama sa gibuhat sa Manluluwas? Unsa ang kalainan tali sa pagserbisyo diha sa paagi sa Manluluwas ug sa ubang mga paagi sa pagserbisyo? Ang mga sakop sa korum o klase mahimong mopaambit og mga kasinatian sa dihang misulay sila sa pagserbisyo sama sa gibuhat sa Manluluwas o sa dihang ang uban miserbisyo kanila niini nga paagi.

• Tingali makatabang alang sa imong korum o klase ang pagribyu kon unsay gitudlo sa Manluluwas ug sa Iyang mga propeta mahitungod sa pagserbisyo. Ania ang pipila ka tudling sa kasulatan nga ilang mabasa og dungan: Mateo 25:31–46; Lucas 10:25–37; Juan 13:34–35; Santiago 1:27; Mosiah 2:17; 18:8–10. Awhaga sila sa pagsulat sa unsay ilang makat-unan mahitungod sa pagserbisyo sa uban ug sa pagpaambit og mga hunahuna ug mga kasinatian nga may kalabutan sa unsay ilang nakat-unan. Dayon mahimo silang magplano og mga paagi sa paghatag og Kristohanong pagserbisyo.

• Aron matabangan ang mga sakop sa korum o klase sa ilang mga paningkamot sa pagpangalagad sa uban, ikonsiderar ang pagribyu og dungan sa mensahe ni Presidente Bonnie H. Cordon nga “Pagkahimong usa ka Magbalantay” (Liahona, Nob. 2018, 74–76). Mahimo nimong sugdan pinaagi sa pagpakita og pipila ka hulagway sa Manluluwas nga nagserbisyo (si Presidente Cordon mipakita og pipila niini atol sa iyang mensahe). Unsa ang gitudlo niining mga hulagway kon unsaon nato pagpangalagad sa Kristohanong mga paagi? Dayon ikonsiderar ang pagdapit sa mga sakop sa korum o klase sa pagbasa nga magpares sa usa sa mga seksyon sa mensahe ug ipaambit kon unsay ilang nakat-unan kon unsaon sa pagserbisyo sama sa Manluluwas. Mahimo usab nilang ipaambit kon unsa ang ilang nakat-unan mahitungod sa Kristohanong pagserbisyo samtang mangalagad sila sa uban.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Mateo 14:13–21; Juan 9:1–11; 13:4–5, 12–17; 1 Nephi 11:31; 3 Nephi 17:5–10 (Mga ehemplo ni Jesukristo nga nagserbisyo sa uban)

• Joy D. Jones, “Alang Kaniya,” Liahona, Nob. 2018, 50–52

Pagtudlo sumala sa Pamaagi sa Manluluwas

Atol sa Iyang yutan-ong pagpangalagad, si Jesukristo migahin sa Iyang panahon sa pagserbisyo ug pagtabang niadtong naglibut Kaniya. Ang tinuod nga mga disipulo ni Kristo mobuhat sa samang butang (tan-awa sa Juan 13:35). Pangita og mga oportunidad sa pagdapit sa mga sakop sa korum o klase sa pagpaambit kon giunsa nila pagserbisyo sa uban ug unsay nakapadasig kanila sa paghatag og serbisyo. (Tan-awa sa Pagtudlo sumala sa Pamaagi sa Manluluwas [2016], 4–5.)