Mayo 9

Sa Unsang Paagi nga ang Espiritu Santo Makapanalangin Kanako Kada Adlaw?

Doktrina ug mga Pakigsaad 46–48

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang nagkinahanglan sa atong tabang ug mga pag-ampo? Unsay atong mahimo sa pagtabang kanila? Kinsa ang atong dapiton ngadto sa umaabut nga kalihokan?

• Ang atong mga katungdanan o mga responsibilidad. Unsa nga mga buluhaton ang ato nang natuman? Unsa nga mga buluhaton ang kinahanglan natong buhaton? Giunsa nato pagdapit ang uban sa pagduol ngadto kang Kristo, ug unsaon nato pagdapit ang uban karon?

• Ang atong mga kinabuhi. Unsa nga bag-ong mga kasinatian ang nakapalig-on sa atong mga pagpamatuod? Unsa ang nanghitabo sa atong mga kinabuhi, ug unsaon nato sa pagsuporta ang usag usa?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Daghan sa unang mga miyembro sa gipahiuli nga Simbahan ang nakabasa mahitungod sa espiritwal nga mga manipestasyon sa Espiritu Santo diha sa mga kasulatan (tan-awa sa Mga Buhat 2:1–4; 13:52; 1 Mga Taga-Corinto 12:4–11; 3 Nephi 19). Samtang ang mga sakop sa korum o klase nagtuon sa Doktrina ug mga Pakigsaad 46–48 niini nga semana, siguro nakat-unan nila nga ang Ginoo andam nga motudlo niining mga Santos mahitungod sa mga panalangin nga mahatag sa Espiritu Santo sa ilang mga kinabuhi. Unsa nga mga kasinatian ang nagtudlo kanimo kon giunsa ka pagpanalangin sa Espiritu Santo? Sa unsang paagi nga ang Espiritu Santo makatabang niadtong imong gitudloan sa tanang aspeto sa ilang mga kinabuhi?

Aron matabangan ka nga maandam sa pagdasig sa imong korum o klase sa pagtinguha sa impluwensya sa Espiritu Santo, mahimo nimong ribyuhon ang “Mga Tahas sa Espiritu Santo” diha sa Matinud-anon sa Tinuhoan ([2004], 31–32) ug ang mensahe ni Elder Gary E. Stevenson nga “Unsaon sa Espiritu Santo Pagtabang Kaninyo?” (Liahona, Mayo 2017, 117–20).

Ang Espiritu Santo makatabang kanato nga makasabut ug makatudlo sa mga kamatuoran sa ebanghelyo.

Pagkat-on og Dungan

Ang mga kasulatan naghatag og daghang ehemplo sa espirituhanong mga gasa. Sa unsang paagi nimo matabangan nga maugmad ang pagtuo sa mga sakop sa imong korum o klase nga kining mga gasa mahimong mapakita sa atong kinabuhi karon? Mahimo nimong sugdan pinaagi sa pagdapit kanila sa pagsulat diha sa pisara og usa ka espirituhanong gasa nga gihulagway diha sa Doktrina ug mga Pakigsaad 46:7–33 ug sa paghisgot kon sa unsang paagi nila kini nakita diha sa ilang mga kinabuhi o sa kinabuhi sa usa ka tawo nga ilang nailhan.

Agi og dugang sa mga gasa sa Espiritu, ang Espiritu Santo mipanalangin kanato sa daghan pang mga paagi. Mahimo nimong gamiton ang usa o dugang pa sa mga kalihokan nga anaa sa ubos aron pagtabang sa sakop sa korum o klase nga mas masabtan pa kini.

• Usahay naghunahuna kita nga nagkinahanglan kita sa Espiritu Santo alang lamang sa importante nga mga desisyon o mga panghitabo sa atong mga kinabuhi. Unsaon nimo pagtabang kadtong imong gitudloan nga mahibalo kon unsa pa kadaghan ang mahimo sa Espiritu Santo alang kanila? Mahimo nimong bahinon ang korum o klase sa ginagmay nga mga grupo ug hangyuon ang matag grupo sa pagbasa og usa o dugang pa nga mga kasulatan gikan sa “Suporta nga mga Kapanguhaan.” Usa ka tawo sa matag grupo mahimong mopaambit kon unsa ang ilang nakat-unan. Dayon dapita ang matag sakop sa korum o klase sa paghimo og lista sa mga paagi nga makapanalangin ang Espiritu Santo sa ilang inadlaw-adalw nga mga kinabuhi. Samtang mopaambit sila sa ilang mga lista, mahimo silang maghisgot mahitungod sa unsay ilang mabuhat aron makauban nila ang Espiritu Santo sa tibuok adlaw.

• Laing paagi sa pagtabang niadtong imong gitudloan aron makasabut kon sa unsang paagi makatabang ang Espiritu Santo kanila mao ang pagsulat sa mosunod nga mga pangutana diha sa pisara: Unsay atong nahibaloan mahitungod sa Espiritu Santo? Unsaon sa Espiritu Santo pagtabang kanato? Dayon ang mga sakop sa korum o klase mahimong mangita sa mga tubag diha sa mensahe ni Elder Gary E. Stevenson nga “Unsaon sa Espiritu Santo Pagtabang Kaninyo?” (Liahona, Nob. 2017, 117–20). Mahimo usab nilang makit-an ang mga tubag pinaagi sa pagribyu sa “Mga Tahas sa Espiritu Santo” diha sa Matinud-anon sa Tinuhoan (mga pahina 31–32). Kon angay, ipaambit ang imong mga kasinatian uban sa Espiritu Santo, ug dapita ang mga batan-on sa pagpaambit sa ilang mga kasinatian.

• Ang mga sakop sa korum o klase mahimo nga mobasa sa “Personal nga Pagpadayag [Personal Revelation]” o “Pagkat-on sa Pag-ila sa mga Pag-aghat [Promptings] sa Espiritu” diha sa kapitulo 4 sa Isangyaw ang Akong Ebanghelyo ([2019], 105–6, 113–15). Dayon mahimo silang magpakaaron-ingnon nga mga misyonaryo nga nagtudlo og usa ka tawo nga wala pa gayud makadungog kon sa unsang paagi makapanalangin ang Espiritu Santo sa atong mga kinabuhi. Unsay ilang isulti ngadto kanila?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Juan 14:16–27 (Ang Maghuhupay makatudlo kanato ug makapahinumdom kanato sa tanang butang)

• Juan 15:26; Doktrina ug mga Pakigsaad 42:17; Moises 1:24 (Ang Espiritu Santo nagpamatuod sa Amahan ug sa Anak)

• Mga Taga-Roma 8:16 ( “Ang Espiritu nagsaksi nga mga anak kita sa Dios)

• 2 Nephi 32:5; Doktrina ug mga Pakigsaad 18:18 (Ang Espiritu Santo mopakita kanato sa unsay kinahanglan natong buhaton)

• 3 Nephi 27:20 (Ang Espiritu Santo mobalaan kanato)

• Moroni 8:26 (Ang Espiritu Santo mopuno kanato og paglaum ug gugma)

• Moroni 10:5 (Ang Espiritu Santo motudlo kanato sa kamatuoran)

Pagtudlo sumala sa Pamaagi sa Manluluwas

Ang Manluluwas mipaambit og yano nga mga istorya, mga sambingay, ug tinuod nga mga ehemplo sa kinabuhi sa pagtudlo sa paagi nga masabtan sa Iyang mga disipulo. Unsa nga personal nga mga kasinatian ang imong mapaambit sa mga batan-on aron sa pagtabang kanila nga makasabut sa mga tahas sa Espiritu Santo ug mobati og tinguha sa pagpangita sa maong mga kasinatian? (Tana-awa sa Pagtudlo sumala sa Pamaagi sa Manluluwas [2016], 22.)