Mayo 23

Sa Unsang Paagi nga Madawat Nako ang Gasa sa Espiritu Santo?

Doktrina ug mga Pakigsaad 51–57

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang atong mahimo aron sa pag-ugmad og panaghiusa diha sa korum o mga sakop sa klase? Unsa nga mga tumong ang atong gustong buhaton og dungan?

• Ang atong mga katungdanan o mga responsibilidad. Unsa ang atong gibuhat sa pagpaambit sa ebanghelyo? Unsa ang atong mga kasinatian sa paghimo og buhat sa templo ug family history?

• Ang atong mga kinabuhi. Giunsa nato pagsinati ang kamot sa Ginoo diha sa atong mga kinabuhi? Unsa ang nakapadasig kanato sa atong pagtuon sa kasulatan niini nga semana?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Human kita gibunyagan, ang mga naghupot sa pagkapari mipandong sa ilang mga kamot diha sa atong mga ulo aron pagtugyan sa gasa sa Espiritu Santo. Ang mga sakop sa korum o klase mahimong napahinumduman niini sa dihang nagtuon sila sa Doktrina ug mga Pakigsaad 51–57 niini nga semana. Hinoon, ang pagdawat sa Espiritu Santo nagkinahanglan og labaw pa niana. Aron makadawat sa Espiritu Santo isip atong kanunay nga kauban, kinahanglan gayud kitang magtinguha sa Iyang presensya, modapit Kaniya sa atong mga kinabuhi, ug matinud-anong motuman sa mga sugo. Unsa nga mga panalangin ang moabut sa mga kinabuhi niadtong imong gitudloan samtang magtinguha sila sa Iyang impluwensya?

Aron matabangan ka nga maandam sa pagtudlo, mahimo nimong ribyuhon ang “Ang Gasa sa Espiritu Santo” diha sa Matinud-anon sa Tinuhoan ([2004], 33–34) o ang mensahe ni Presidente Henry B. Eyring nga “Ang Iyang Espiritu Magauban Kaninyo” (Liahona, Mayo 2018, 86–89).

Aron makadawat og giya sa Espiritu Santo, kinahanglan kita nga magtinguha sa Iyang impluwensya adlaw-adlaw.

Pagkat-on og Dungan

Aron matabangan ang mga sakop sa korum o klase nga mas masabtan ang gasa sa Espiritu Santo, mahimo nimong sugdan pinaagi sa paghisgot kon giunsa pagtugyan ang gasa sa Espiritu Santo. Mahimo silang mobasa sa Doktrina ug mga Pakigsaad 52:10; 53:3; 55:1–3 ug hisgutan kon unsay ilang nakat-unan. Ipasabut og maayo nga ang naghupot sa pagkapari dili mohatag sa Espiritu Santo apan modapit sa miyembro nga modawat sa Espiritu Santo. Unsa man ang kalainan? Ang mga kalihokan nga anaa sa ubos makatabang niadtong imong gitudloan nga mas masabtan kon unsaon pagdawat niining talagsaong gasa.

• Unsay gibuhat ni Lehi ug sa iyang pamilya aron magiyahan sa Liahona susama ra sa unsay kinahanglan gayud natong buhaton aron makadawat sa makagiya nga impluwensya sa Espiritu Santo. Mahimo nimong ipakita ang hulagway ni Lehi ug sa Liahona (tan-awa sa Libro sa mga Hulagway sa Ebanghelyo, [2009], nu. 68), ug hangyoa ang mga sakop sa korum o klase nga ipaambit ang unsay ilang nakat-unan mahitungod sa Liahona. Dayon, mahimo nimong dapiton ang katunga nila sa pagbasa sa 1 Nephi 16:14–29 ug ang laing katunga sa pagbasa sa 1 Nephi 18:8–22, nga mangita og mga paagi nga ang Liahona susama sa Espiritu Santo. Unsay atong makat-unan gikan sa ehemplo sa pamilya ni Lehi nga makatabang kanato nga mas hingpit nga modawat sa Espiritu Santo?

• Ang matag seksyon sa Alang sa Kalig-on sa mga Kabatan-onan naglangkob og tambag mahitungod sa pagsunod sa mga sumbanan ug mga sugo sa Ginoo. Ang pagsunod niining mga sugo nagdapit sa gahum sa Espiritu Santo sa atong mga kinabuhi. Ikonsiderar ang pagdapit sa mga sakop sa korum o klase nga ang matag usa mopili og usa ka seksyon diha sa Alang sa Kalig-on sa mga Kabatan-onan, mobasa niini, ug momarka sa mga butang nga kinahanglan nilang buhaton o dili buhaton aron makatabang kanila sa pagdawat sa Espiritu Santo. Mahimo dayon silang mopaambit sa unsay ilang nakat-unan ngadto sa korum o klase. Dapita sila sa paghimo og tumong nga makatabang kanila nga mas hingpit nga modawat sa Espiritu Santo. Nganong gusto man nato nga ang Espiritu Santo magauban kanato? (tan-awa sa Juan 14:26–27; 15:26; 16:13; 2 Nephi 32:3).

• Sa iyang mensahe nga “Ang Iyang Espiritu Magauban Kaninyo” (Liahona, Mayo 2018, 86–89), si Presidente Henry B. Eyring miingon, “Ang akong panghinaut karon nga mapadak-an ang inyong tinguha ug inyong abilidad sa pagdawat sa Espiritu Santo” (pahina 86). Hangyoa ang mga sakop sa korum o klase sa pagbasa sa siyam ka parapo [paragraph] diha sa iyang mensahe nga magsugod sa “Ang mga kasinatian ni Propeta Joseph Smith” (pahina 88). Dapita sila sa pagpangita kon unsay gibuhat ni Joseph Smith aron makadawat sa impluwensya sa Espiritu Santo. Mahimo nilang ilista diha sa pisara kon unsay ilang makit-an. Kon angay, mahimo nimo silang dapiton sa pagpaambit sa ilang mga kasinatian sa pagdawat sa giya gikan sa Espiritu Santo. Unsa may ilang gibuhat atol niining mga kasinatian nga miresulta sa pagkadawat og giya gikan sa Espiritu Santo? Mahimo usab nga mopaambit ka og usa ka kasinatian.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Moroni 8:25–26; Doktrina ug mga Pakigsaad 20:77, 79; 121:45–46 (Unsaon pagdawat sa Espiritu Santo)

• David A. Bednar, “Dawata ang Espiritu Santo,” Liahona, Nob. 2010, 94–97

• Douglas D. Holmes, “Ang Gasa sa Espiritu Santo” (Debosyonal sa Pasko sa Unang Kapangulohan, Dis. 4, 2016), broadcasts.ChurchofJesusChrist.org

Pagtudlo sumala sa Pamaagi sa Manluluwas

Agi og pagpangandam alang sa Iyang yutan-ong pangalagad, ang Manluluwas “gigiyahan sa Espiritu ngadto sa kamingawan” aron sa pagpuasa, sa pag-ampo, ug “aron makig-uban sa Dios” (Hubad ni Joseph Smith, Mateo 4:1 [diha sa Giya ngadto sa mga Kasulatan]). Ang gamhanan nga pagtudlo sa ebanghelyo nagpasabut nga dili lang mag-andam og usa ka leksyon apan mag-andam sa atong mga kaugalingon. (Tan-awa sa Pagtudlo sumala sa Pamaagi sa Manluluwas [2016], 12.)