1 Ug karon nahitabo nga human ako, si Nephi, mitapos sa akong pagpamulong ngadto sa akong mga igsoong lalaki, tan-awa miingon sila ngari kanako: Ikaw namahayag ngari kanamo og mga butang nga sakit, labaw kay sa among maantos.

2 Ug nahitabo nga miingon ako kanila nga ako nasayod nga ako namulong og mga butang nga sakit batok sa mga daotan, sumala sa kamatuoran; ug ang mga matarong akong gihatagan og kaangayan, ug mipamatuod nga sila pagabayawon sa kataposang adlaw; mao nga, ang mga nakasala maglisod sa pagdawat sa kamatuoran, kay kini motusok tumong gayod sa ilang kasingkasing.

3 Ug karon akong mga igsoong lalaki, kon kamo nagmatarong pa unta ug andam nga mosunod sa kamatuoran, ug mopatalinghog niini, aron kamo magalakaw nga matarong sa atubangan sa Dios, niana nga kahimtang dili kamo magbagulbol tungod sa kamatuoran ug moingon: Ikaw namulong og mga butang nga sakit batok kanamo.

4 Ug nahitabo nga ako, si Nephi, miawhag sa akong mga igsoong lalaki, uban sa tanang kakugi, sa pagtuman sa mga sugo sa Ginoo.

5 Ug nahitabo nga sila nagmapainubsanon sa atubangan sa Ginoo; hinungdan nga ako mibati og kalipay ug dakong paglaom kanila, nga sila mosubay sa mga dalan sa pagkamatarong.

6 Karon, kining tanan nga butang gisulti ug gihimo samtang ang akong amahan nagpuyo og tolda didto sa walog nga iyang gitawag og Lemuel.

7 Ug nahitabo nga ako, si Nephi, mikuha sa usa sa mga anak nga babaye ni Ishmael aron pangasaw-on; ug ang akong mga igsoong lalaki usab mikuha sa mga anak nga babaye ni Ishmael aron pangasaw-on; ug si Zoram usab mikuha sa kamagulangang anak nga babaye ni Ishmael aron pangasaw-on.

8 Ug sa ingon niana ang akong amahan mituman sa tanang sugo sa Ginoo nga gihatag ngadto kaniya. Ug usab, ako, si Nephi, napanalanginan sa Ginoo sa hilabihan.

9 Ug nahitabo nga ang tingog sa Ginoo namulong ngadto sa akong amahan pagkagabii, ug siya misugo kaniya nga pagkaugma kinahanglan siya nga mobiyahe ngadto sa kamingawan.

10 Ug nahitabo nga dihang ang akong amahan mibangon pagkabuntag, ug miadto sa pultahan sa tolda, sa iyang dako nga katingala nakakita siya diha sa yuta og usa ka lingin nga bola nga katingalahan ang pagkahimo; ug hinimo kini gikan sa puro nga tumbaga. Ug sa sulod sa bola adunay duha ka igpupunting; ug ang usa nagtudlo kon asa kami moagi paingon sa kamingawan.

11 Ug nahitabo nga among gipundok ang bisan unsang butang nga kinahanglan namong dad-on paingon sa kamingawan, ug tanan sa among nahibilin nga mga tagana nga gihatag sa Ginoo kanamo; ug nagdala kami og mga binhi sa tanang matang nga mahimo namong madala paingon sa kamingawan.

12 Ug nahitabo nga among gidala ang among mga tolda ug mibiya paingon sa kamingawan, tabok sa suba sa Laman.

13 Ug nahitabo nga mibiyahe kami sulod sa upat ka adlaw, duol sa habagatan-habagatang silangan nga padulnganan, ug gipabarog namo pag-usab ang among mga tolda; ug among gitawag ang maong dapit og Shazer.

14 Ug nahitabo nga gidala namo ang among mga gapasan ug ang among mga panâ, ug nangadto sa kamingawan aron makakuha og pagkaon alang sa among mga pamilya; ug human kami makakuha og pagkaon namalik kami pag-usab ngadto sa among mga pamilya sa kamingawan sa dapit sa Shazer. Ug mipadayon na usab kami sa pagpanglakaw ngadto sa kamingawan, nagsubay sa mao gihapon nga padulnganan, nga nagsubay sa labing mabungahon nga mga bahin sa kamingawan, diha sa mga utlanan duol sa Pulang Dagat.

15 Ug nahitabo nga mibiyahe kami sulod sa daghang adlaw, nga nakapanguha og pagkaon samtang nagbiyahe, gamit ang among mga gapasan ug mga panâ ug among mga bato ug among mga saplong.

16 Ug among gisunod ang padulnganan nga gitudlo sa bola, nga nagdala kanamo ngadto sa mas mabungahon nga mga bahin sa kamingawan.

17 Ug human kami nakabiyahe sulod sa daghan nga adlaw, gipabarog namo pag-usab ang among mga tolda sulod sa usa ka panahon, aron among ikapahulay pag-usab ang among kaugalingon ug makakuha og pagkaon alang sa among mga pamilya.

18 Ug nahitabo nga samtang ako, si Nephi, milakaw aron manguha og pagkaon, tan-awa, akong nabali ang akong gapasan, nga ginama sa puro nga asero; ug human nga akong nabali ang akong gapasan, tan-awa, ang akong mga igsoong lalaki nangasuko kanako tungod sa pagkawala sa akong gapasan, kay kami wala makakuha og pagkaon.

19 Ug nahitabo nga namauli kami nga walay pagkaon sa among mga pamilya, ug sa tumang kakapoy tungod sa ilang pagbiyahe, nag-antos sila sa hilabihan tungod sa panginahanglan og pagkaon.

20 Ug nahitabo nga si Laman ug Lemuel ug ang mga anak nga lalaki ni Ishmael misugod sa hilabihang pagbagulbol, tungod sa ilang mga pag-antos ug mga kasakit sa kamingawan; ug usab ang akong amahan misugod sa pagbagulbol batok sa Ginoo nga iyang Dios; oo, ug silang tanan nagsubo sa hilabihan, hangtod nga sila nagbagulbol batok sa Ginoo.

21 Karon nahitabo nga ako, si Nephi, kay gipasakitan sa akong mga igsoong lalaki tungod sa pagkaguba sa akong gapasan, ug ang mga gapasan nila dili na mainat, nagsugod ang hilabihang kalisod, oo, hangtod nga dili na kami makakuha og pagkaon.

22 Ug nahitabo nga ako, si Nephi, namulong og daghan ngadto sa akong mga igsoong lalaki, tungod kay mipatig-a sila sa ilang mga kasingkasing pag-usab, gani ngadto sa pagmulo batok sa Ginoo nga ilang Dios.

23 Ug nahitabo nga ako, si Nephi, mihimo og usa ka gapasan gikan sa kahoy, ug usa ka pana, gikan sa tul-id nga sanga; mao nga, akong nasangkapan ang akong kaugalingon og usa ka gapasan ug panâ, ug saplong ug mga bato. Ug miingon ako sa akong amahan: Asa ako moadto aron makakuha og pagkaon?

24 Ug nahitabo nga nangutana siya sa Ginoo, kay gipaubos nila ang ilang kaugalingon tungod sa akong mga pulong; kay ako misulti og daghan nga butang ngadto kanila kutob sa akong mahimo.

25 Ug nahitabo nga ang tingog sa Ginoo nadungog sa akong amahan; ug siya sa tinuod gipanton sa hilabihan tungod sa iyang pagbagulbol batok sa Ginoo, hangtod nga siya gidala ubos sa hilabihang kasubo.

26 Ug nahitabo nga ang tingog sa Ginoo miingon ngadto kaniya: Tan-awa diha sa bola, ug tan-awa ang mga butang nga nasulat.

27 Ug nahitabo nga dihang ang akong amahan nakakita sa mga butang nga nasulat diha sa bola, siya nahadlok ug nangurog sa hilabihan, ug usab ang akong mga igsoong lalaki ug ang mga anak nga lalaki ni Ishmael ug ang among mga asawa.

28 Ug nahitabo nga ako, si Nephi, nakakita sa mga igpupunting nga anaa sa bola, nga kini molihok sumala sa pagtuo ug kakugi ug pagpatalinghog nga among gipakita diha niini.

29 Ug usab adunay nasulat diha niini nga bag-ong sulat nga sayon rang basahon, nga naghatag kanamo og panabot mahitungod sa pamaagi sa Ginoo; ug kini masulat ug mausab sa matag karon ug unya sumala sa pagtuo ug kakugi nga among gipakita diha niini. Ug sa ingon niana among nakita nga pinaagi sa ginagmay nga mga paagi ang Ginoo makahimo og dagkong mga butang.

30 Ug nahitabo nga ako, si Nephi, mitungas ngadto sa ibabaw sa bukid, sumala sa mga panudlo nga gihatag sa bola.

31 Ug nahitabo nga nakapatay ako og ihalas nga mga mananap, hinungdan nga nakakuha ako og pagkaon alang sa among mga pamilya.

32 Ug nahitabo nga mibalik ako sa among mga tolda, nga nagdala sa mga mananap nga akong napatay; ug karon dihang ilang nakita nga ako nakakuha og pagkaon, dako kaayo ang ilang kamaya! Ug nahitabo nga mipaubos sila sa ilang kaugalingon sa atubangan sa Ginoo, ug mipasalamat ngadto kaniya.

33 Ug nahitabo nga mipadayon na usab kami sa among panaw, nga naglakaw sa hapit mao gihapon nga agianan sama sa sinugdanan; ug human kami makapanaw sulod sa daghan nga adlaw gipabarog namo pag-usab ang among mga tolda, aron kami makapuyo didto sulod sa usa ka panahon.

34 Ug nahitabo nga si Ishmael namatay, ug gilubong sa dapit nga gitawag og Nahom.

35 Ug nahitabo nga ang mga anak nga babaye ni Ishmael nagbangotan sa hilabihan, tungod sa pagkamatay sa ilang amahan ug tungod sa ilang mga kasakit sa kamingawan; ug nagbagulbol sila batok sa akong amahan, tungod kay siya midala kanila palayo sa yuta sa Jerusalem, nga nag-ingon: Ang among amahan patay na; oo, ug kami nahisalaag sa hilabihan sa kamingawan, ug nag-antos kami sa daghang kasakit, kagutom, kauhaw, ug kakapoy; ug human niining tanan nga pag-antos segurado nga mangamatay kami sa kamingawan tungod sa kagutom.

36 Ug sa ingon niana sila nagbagulbol batok sa akong amahan, ug usab batok kanako; ug nagtinguha sila nga mobalik sa Jerusalem.

37 Ug si Laman miingon ngadto ni Lemuel ug ngadto usab sa mga anak nga lalaki ni Ishmael: Tan-awa, atong patyon ang atong amahan ug usab ang atong igsoon nga si Nephi, kinsa mipahimutang sa iyang kaugalingon nga mamahimo natong tigmando ug atong magtutudlo, kinsa iyang mga magulang nga lalaki.

38 Karon, miingon siya nga ang Ginoo nakigsulti kaniya, ug usab ang mga anghel nangalagad kaniya. Apan tan-awa, nasayod kita nga siya namakak ngari kanato; ug misulti siya kanato niini nga mga butang ug naghimo siya og daghan nga butang pinaagi sa iyang panglingla, aron iyang mailad ang atong mga mata, naghunahuna, nga tingali, siya makadala kanato ngadto sa wala pa mahibaloi nga kamingawan; ug human nga siya modala kanato sa layo, naghunahuna siya nga himoon ang iyang kaugalingon nga hari ug tigmando kanato, aron iyang mabuhat ngari kanato unsay iyang kagustohan ug ikahimuot. Ug sa ingon niini nga paagi ang akong igsoong lalaki nga si Laman mihulhog sa ilang mga kasingkasing ngadto sa kasuko.

39 Ug nahitabo nga ang Ginoo nag-uban kanamo, oo, gani ang tingog sa Ginoo nadungog nga namulong og daghan nga pulong ngadto kanila, ug mipanton kanila sa hilabihan; ug human nga sila gipanton pinaagi sa tingog sa Ginoo gihunong nila ang ilang kasuko, ug naghinulsol sa ilang mga sala, hangtod nga ang Ginoo mipanalangin na usab kanamo og pagkaon nga kami wala mangamatay.