Seksiyon 12
Pagpadayag nga gihatag pinaagi ni Joseph Smith ang Propeta ngadto ni Joseph Knight Sr., sa Harmony, Pennsylvania, Mayo 1829. Si Joseph Knight mituo sa mga pamahayag ni Joseph Smith kalabot sa iyang paghupot sa mga palid sa Basahon ni Mormon ug sa buhat sa paghubad nga nianang higayona nagpadayon pa ug sa pipila ka higayon nakahatag og materyal nga hinabang ngadto kang Joseph Smith ug sa iyang tigsulat, nga nakapahimo nga makapadayon sila sa paghubad. Sa hangyo ni Joseph Knight, ang Propeta nagpakisayod sa Ginoo ug nakadawat sa pagpadayag.
1–6, Ang mga mamumuo sa ubasan makadawat og kaluwasan; 7–9, Tanan nga nagtinguha ug takos mahimo nga motabang sa buhat sa Ginoo.
1 Usa ka mahinungdanon ug katingalahan nga buhat hapit na moabot taliwala sa katawhan.
2 Tan-awa, ako ang Dios; paminaw sa akong pulong, nga buhi ug gamhanan, hait pa kaysa espada nga duhay suwab, ngadto sa pagbahin sa mga lutahan ug kauyokan; busa paminaw sa akong pulong.
3 Tan-awa, ang umahan puti na ug andam na aron anihon; busa, kadtong nagtinguha sa pag-ani, tugoti nga siya mohapos gamit ang iyang galab pinaagi sa iyang kusog, ug mag-ani samtang aduna pay panahon, aron siya makatipig alang sa iyang kalag og walay kataposan nga kaluwasan sa gingharian sa Dios.
4 Oo, kinsa kadtong mohapos gamit ang iyang galab ug moani, ang maong tawo gitawag sa Dios.
5 Busa, kon ikaw mangayo kanako ikaw makadawat; kon ikaw motuktok ikaw pagaablihan.
6 Karon, kay ikaw nangayo man, tan-awa, sultihan ko ikaw, sunda ang akong mga sugo, ug tinguhaa ang pagpatungha ug pagtukod sa kawsa sa Zion.
7 Tan-awa, sultihan ko ikaw, ug usab ang tanan nga adunay mga tinguha sa pagdala ug pagtukod niini nga buhat;
8 Ug walay tawo nga makatabang niini nga buhat gawas kon siya magmapainubsanon ug puno sa gugma, adunay pagtuo, paglaom, ug gugmang putli, mapinugnganon sa kaugalingon sa tanan nga butang, ngadto sa bisan unsa nga isalig kaniya.
9 Tan-awa, ako ang kahayag ug ang kinabuhi sa kalibotan, nga namulong niini nga mga pulong, busa paminaw kutob sa imong mahimo, ug unya ikaw pagatawgon. Amen.