Seksiyon 91
Pagpadayag nga gihatag pinaagi ni Joseph Smith ang Propeta, didto sa Kirtland, Ohio, Marso 9, 1833. Ang Propeta niini nga higayon nag-atiman sa paghubad sa Daang Tugon. Sa pag-abot niya niana nga bahin sa karaang mga sinulat nga gitawag og Apokripa, nangutana siya sa Ginoo ug nakadawat niini nga instruksiyon.
1–3, Ang Apokripa sa kadaghanan husto ang pagkahubad apan naglakip sa daghang pagdugang sa mga kamot sa mga tawo nga dili tinuod; 4–6, Makahatag og kaayohan niadtong nakadawat og kahibalo pinaagi sa Espiritu.
1 Sa pagkatinuod, sa ingon niini misulti ang Ginoo kanimo mahitungod sa Apokripa—Adunay daghang butang nga nalakip niini nga tinuod, ug ang kadaghanan niini sakto ang pagkahubad;
2 Adunay daghang butang nga nalakip niini nga dili tinuod, nga mga pagdugang sa mga kamot sa mga tawo.
3 Sa pagkatinuod, sultihan ko kamo, nga dili na kinahanglan nga hubaron ang Apokripa.
4 Busa, kinsa kadtong mobasa niini, kinahanglan nga sabton niya, kay ang Espiritu mopadayag sa kamatuoran;
5 Ug kinsa kadtong makadawat og kahibalo pinaagi sa Espiritu makakuha og kaayohan gikan niini;
6 Ug kinsa kadtong dili modawat pinaagi sa Espiritu, dili mahatagan og kaayohan. Busa dili na kinahanglan nga hubaron kini. Amen.