Seksiyon 115
Pagpadayag nga gihatag pinaagi ni Joseph Smith ang Propeta, sa Far West, Missouri, Abril 26, 1838, mipahibalo sa kabubut-on sa Dios mahitungod sa pagtukod niana nga dapit ug sa balay sa Ginoo. Kini nga pagpadayag gitumong ngadto sa tigdumalang mga opisyal ug sa mga miyembro sa Simbahan.
1–4, Ang Ginoo naghatag og ngalan sa Iyang simbahan Ang Simbahan ni Jesukristo sa mga Santos sa Ulahing mga Adlaw; 5–6, Ang Zion ug ang iyang mga stake mao ang mga dapit sa panalipod ug dangpanan alang sa mga Santos; 7–16, Ang mga Santos gisugo sa pagtukod og balay sa Ginoo didto sa Far West; 17–19, Si Joseph Smith naghupot sa mga yawe sa gingharian sa Dios dinhi sa yuta.
1 Sa pagkatinuod kini ang gisulti sa Ginoo kaninyo, akong sulugoon nga Joseph Smith, Jun., ug usab akong sulugoon nga Sidney Rigdon, ug usab akong sulugoon nga Hyrum Smith, ug sa inyong mga magtatambag nga gitudlo karon, ug itudlo human niini;
2 Ug usab kanimo, akong sulugoong Edward Partridge, ug sa iyang mga magtatambag;
3 Ug usab sa akong matinud-anong mga sulugoon kinsa anaa sa labaw nga konseho sa akong simbahan diha sa Zion, kay sa ingon niana kini pagatawgon, ug sa tanang elder ug katawhan sa akong Simbahan ni Jesukristo sa mga Santos sa Ulahing mga Adlaw, nga nagkatag sa layo nga mga dapit sa tibuok kalibotan;
4 Kay sa ingon niana ang akong simbahan pagatawgon sa kataposang mga adlaw, gani Ang Simbahan ni Jesukristo sa mga Santos sa Ulahing mga Adlaw.
5 Sa pagkatinuod sultihan ko kamong tanan: Barog ug pagmahimong ehemplo, aron ang inyong kahayag mahimong simbolo alang sa mga nasod;
6 Ug nga ang panagpundok nganha sa yuta sa Zion, ug sa iyang mga stake, alang sa usa ka panalipod, ug alang sa usa ka dangpanan gikan sa unos, ug gikan sa kaligutgot sa higayon nga ibu-bo kini nga walay pagpugong diha sa tibuok yuta.
7 Tugoti ang siyudad, sa Far West, nga mahimong balaan ug gipahinungod nga yuta ngari kanako; ug kini pagatawgon nga labing balaan, kay ang yuta nga inyong gitindogan balaan.
8 Busa, mosugo ako kaninyo sa pagtukod og balay ngari kanako, alang sa pagpundok sa akong mga santos, aron mosimba sila kanako.
9 Ug kinahanglan nga adunay pagsugod niini nga buhat, ug usa ka pundasyon, ug pasiuna nga trabaho niining sunod nga ting-init;
10 Ug kinahanglan nga adunay pagsugod nga mahimo sa umaabot nga ikaupat nga adlaw sa Hulyo; ug gikan niana nga higayon patrabahoa nga makugihon ang akong katawhan aron sa pagtukod og balay sa akong ngalan;
11 Ug sulod sa usa ka tuig gikan niining adlawa kinahanglan nga sugdan nila pag-usab ang pagpahimutang sa pundasyon sa akong balay.
12 Sa ingon niana patrabahoa sila nga makugihon gikan nianang higayona hangtod nga mahuman kini, gikan sa tukoran nga bato niini ngadto sa labing ibabaw niana, hangtod nga walay bisan unsa nga butang nga mahibilin nga wala mahuman.
13 Sa pagkatinuod sultihan ko kamo, ayaw itugot nga makautang pa ang akong sulugoon nga si Joseph, ni ang akong sulugoon nga si Sidney, ni ang akong sulugoon nga si Hyrum, tungod sa pagtukod og balay alang sa akong ngalan;
14 Apan pagtukod og balay alang sa akong ngalan sumala sa sumbanan nga akong ipakita kanila.
15 Ug kon ang akong katawhan motukod niini nga dili subay sa sumbanan nga akong ipakita sa ilang kapangulohan, dili nako kini dawaton gikan sa ilang mga kamot.
16 Apan kon ang akong katawhan motukod niini sumala sa sundanan nga akong ipakita sa ilang kapangulohan, gani ang akong sulugoon nga si Joseph ug ang iyang mga magtatambag, nan dawaton nako kini gikan sa mga kamot sa akong katawhan.
17 Ug usab, sa pagkatinuod sultihan ko kamo, mao kini ang akong kabubut-on nga ang siyudad sa Far West kinahanglan tukoron sa daling panahon pinaagi sa pagpundok sa akong mga santos;
18 Ug may lain pang mga dapit usab nga kinahanglan itagana alang sa mga stake diha sa mga rehiyon sa palibot, sama sa ipakita ngadto sa akong sulugoon nga si Joseph, matag karon ug unya.
19 Kay tan-awa, ako mag-uban kaniya, ug siya akong balaanon sa atubangan sa katawhan; kay ngadto kaniya akong gihatag ang mga yawe niini nga gingharian ug sa pagpangalagad. Mao gayod kana. Amen.