Seksiyon 61
Pagpadayag nga gihatag ngadto kang Joseph Smith ang Propeta, sa daplin sa Suba sa Missouri, Likoanan sa McIlwaine, Agosto 12, 1831. Sa ilang pagbiyahe balik sa Kirtland, ang Propeta ug ang napulo ka elder mibiyahe paingon sa ubos sa Suba sa Missouri sakay sa mga bangka. Sa ikatulong adlaw sa ilang pagpanaw, daghang peligro ang ilang nasinati. Si Elder William W. Phelps, sa usa ka panan-awon sa adlawan, nakakita sa tiglaglag nga naglakaw nga gamhanan ibabaw sa katubigan.
1–12, Ang Ginoo nagpahayag og daghang kalaglagan diha sa katubigan; 13–22, Ang katubigan gitunglo ni Juan, ug ang tiglaglag naglakaw ibabaw niini; 23–29, Ang uban adunay gahom sa pagmando sa mga tubig; 30–35, Ang mga elder kinahanglan nga mopanaw nga magtinagurha ug magsangyaw sa ebanghelyo; 36–39, Sila kinahanglan nga mangandam alang sa pag-anhi sa Anak sa Tawo.
1 Tan-awa, ug patalinghogi ang tingog kaniya nga aduna sa tanang gahom, kinsa gikan sa walay kataposan ngadto sa walay kataposan, gani ang Alpha ug ang Omega, ang sinugdanan ug ang kataposan.
2 Tan-awa, sa pagkatinuod misulti ang Ginoo kaninyo, O kamo nga mga elder sa akong simbahan, nga nanagtigom niini nga dapit, kansang mga sala karon napasaylo na, kay ako, ang Ginoo, mopasaylo sa mga sala, ug maluluy-on ngadto niadtong mokompisal sa ilang mga sala uban sa mapainubsanon nga mga kasingkasing;
3 Apan sa pagkatinuod sultihan ko kamo, nga dili na kinahanglan nga kining tibuok nga pundok sa akong mga elder mopanaw sa paspas nga paagi sa katubigan, tingali unya og ang mga lumulupyo sa isigka daplin malaglag tungod sa pagkawalay pagtuo.
4 Bisan pa niana, mitugot ako nga kamo mopamatuod; tan-awa, adunay daghang katalagman diha sa katubigan, ug mas labaw na sa umaabot;
5 Kay ako, ang Ginoo, tungod sa akong kasuko nakatakda og daghang kalaglagan diha sa katubigan; oo, ug ilabi na dinhi niini nga katubigan.
6 Bisan pa niana, ang tanang tawo ania sa akong kamot, ug siya nga matinud-anon taliwala kaninyo dili malaglag diha sa katubigan.
7 Mao nga, angay nga ang akong sulugoon nga si Sidney Gilbert ug ang akong sulugoon nga si William W. Phelps magdali sa ilang buluhaton ug misyon.
8 Bisan pa niana, ako dili motugot nga mobiya kamo hangtod nga kamo mapanton sa inyong tanang sala, nga kamo mahimong usa, nga kamo dili malaglag diha sa pagkadaotan;
9 Apan karon, sa pagkatinuod mosulti ako, mahinungdanon alang kanako nga magbulag kamo. Mao nga tugoti nga ang akong mga sulugoon nga si Sidney Gilbert ug si William W. Phelps modala sa ilang nahauna nga pundok, ug tugoti nga sugdan nila ang ilang panaw sa madali aron makatuman sila sa ilang misyon, ug pinaagi sa pagtuo sila makabuntog;
10 Ug kon magmatinud-anon sila, panalipdan sila, ug ako, ang Ginoo, magauban kanila.
11 Ug tugoti nga ang nahibilin modala nianang gikinahanglan alang sa ilang panapot.
12 Tugoti nga ang akong sulugoon nga si Sidney Gilbert modala nianang wala niya kinahanglana, sigon sa inyong pag-uyon.
13 Ug karon, tan-awa, alang sa inyong kaayohan gihatagan ko kamo og usa ka sugo mahitungod niini nga mga butang; ug ako, ang Ginoo, mopasabot kaninyo sama sa mga tawo sa karaang mga adlaw.
14 Tan-awa, ako, ang Ginoo, sa sinugdanan mipanalangin sa mga katubigan; apan sa kataposang mga adlaw, pinaagi sa ba-ba sa akong sulugoon nga si Juan, akong gitunglo ang katubigan.
15 Mao nga, moabot ang adlaw nga walay tawo nga maluwas diha sa katubigan.
16 Ug mahisgotan kini sa moabot nga mga adlaw nga walay makaadto sa yuta sa Zion nga moagi sa katubigan, apan siya nga matarong og kasingkasing.
17 Ug, ako, ang Ginoo, sa sinugdanan mitunglo sa yuta, bisan pa man sa kataposang mga adlaw ako mopanalangin niini, sa tukmang panahon, aron magamit sa akong mga santos, aron makaambit sila sa kabuhong niini.
18 Ug karon hatagan ko kamo og usa ka sugo nga kon unsay akong isulti ngadto sa usa isulti ko sa tanan, nga kamo mopasidaan sa inyong kaigsoonan mahitungod niini nga katubigan, nga sila dili mopanaw diha niini, tingali unya og ang ilang pagtuo mapakyas ug mangabitik sa mga laang;
19 Ako, ang Ginoo, mipahayag, ug ang tiglaglag naglakaw sa ibabaw niini, ug ako dili mobakwi sa gipahayag.
20 Ako, ang Ginoo, nasuko kaninyo kagahapon, apan karon ang akong kasuko wala na.
21 Mao nga, tugoti nga kadtong nahitungdan sa akong gipamulong, kinahanglang magdali sa ilang panaw—sa makausa pa sultihan ko kamo, tugoti nga magdali sila sa ilang panaw.
22 Ug dili ko igsapayan, sa dili madugay, basta matuman nila ang ilang misyon, kon moagi man sila sa tubig o agi sa yuta; pasagdi lang kini tungod kay gipahibalo na kini ngadto kanila sumala sa ilang mga paghukom human niini.
23 Ug karon, mahitungod sa akong mga sulugoon, nga sila si Sidney Rigdon, Joseph Smith, Jun., ug Oliver Cowdery, tugoti nga dili sila moagi pag-usab sa katubigan, kondili pinaagi sa kanal, samtang magpanaw ngadto sa ilang mga panimalay; o sa laing pagkasulti dili sila moagi sa katubigan sa pagpanaw, kondili pinaagi sa kanal.
24 Tan-awa, ako, ang Ginoo, nagtudlo og agianan alang sa panaw sa akong mga santos; ug tan-awa, mao kini ang agianan—nga human sila mobiya sa kanal mopanaw sila agi sa yuta, tungod kay gisugo sila sa pagpanaw ug moadto sa yuta sa Zion;
25 Ug buhaton nila ang sama sa gibuhat sa mga anak ni Israel, nag-ugbok sa ilang mga tolda dapit sa agianan.
26 Ug, tan-awa, kini nga sugo inyong ihatag ngadto sa inyong tanang kaigsoonan.
27 Bisan pa niana, siya nga gihatagan og gahom sa pagmando sa katubigan, kaniya kini gihatag pinaagi sa Espiritu aron mahibalo sa iyang tanang pamaagi;
28 Mao nga, tugoti nga siya mobuhat sigon sa gisugo kaniya sa Espiritu sa buhi nga Dios, diha man sa yuta o sa katubigan, kay kini magpabilin ngari kanako nga buhaton sa umaabot.
29 Ug nganha kaninyo gihatag ang dalan alang sa mga santos, o ang agianan alang sa mga santos sa kampo sa Ginoo, sa pagpanaw.
30 Ug usab, sa pagkatinuod sultihan ko kamo, akong mga sulugoon, nga sila si Sidney Rigdon, Joseph Smith, Jun., ug Oliver Cowdery, dili mobuka sa ilang mga ba-ba diha sa kongregasyon sa mga daotan hangtod nga sila moabot sa Cincinnati;
31 Ug niana nga dapit ilang ipalanog ang ilang mga tingog ngadto sa Dios batok niana nga katawhan, oo, ngadto kaniya kansang kasuko napukaw batok sa ilang pagkadaotan, nga usa ka katawhan nga hapit na mahinog alang sa kalaglagan.
32 Ug gikan diha itugot nga mopanaw sila alang sa mga kongregasyon sa ilang kaigsoonan, kay ang ilang mga kahago bisan karon mas gikinahanglan kaayo taliwala kanila kay sa kongregasyon sa mga daotan.
33 Ug karon, mahitungod sa mga nahibilin, tugoti nga mopanaw sila ug mopahayag sa pulong taliwala sa kongregasyon sa mga daotan, kon kini gihatag;
34 Ug kon buhaton nila kini malimpyo ang ilang mga sapot, ug mahimo sila nga walay lama sa akong atubangan.
35 Ug himoa nga magkuyog sila sa pagpanaw, o magtinagurha, kon gihunahuna nila nga makaayo, tugoti lamang ang akong sulugoon nga si Reynolds Cahoon, ug ang akong sulugoon nga si Samuel H. Smith, nga akong gikahimuot kaayo, nga dili ibulag hangtod nga makabalik sila sa ilang mga panimalay, ug alang kini sa maalamon nga katuyoan ngari kanako.
36 Ug karon, sa pagkatinuod sultihan ko kamo, kon unsa ang akong isulti ngadto sa usa mao ang akong isulti ngadto sa tanan, pagmalipayon, gagmayg mga bata; kay anaa ako sa inyong taliwala, ug wala ako mobiya kaninyo;
37 Ug tungod kay nagpaubos kamo sa inyong mga kaugalingon sa akong atubangan, ang mga panalangin sa gingharian inyong mapanag-iya.
38 Baksi ang inyong mga bat-ang ug magmabinantayon ug magmaligdong, magpaabot sa pag-anhi sa Anak sa Tawo, kay siya moanhi sa takna nga wala sa inyong hunahuna.
39 Pag-ampo sa kanunay aron dili kamo masulod ngadto sa tentasyon, nga kamo magpabilin sa adlaw sa iyang pag-anhi, bisan sa kinabuhi o sa kamatayon. Ug mao gayod kana. Amen.