Seksiyon 87
Pagpadayag ug panagna mahitungod sa gubat, gihatag pinaagi ni Joseph Smith ang Propeta duol sa Kirtland, Ohio, Disyembre 25, 1832. Niining panahona ang mga paglantugi sa Estados Unidos mahitungod sa pagkaulipon ug sa pagdumili sa Habagatang Carolina sa pagpangolekta og pederal nga taripa dayag kaayo. Ang kasaysayan ni Joseph Smith nag-ingon nga “ang mga kagubot tali sa mga nasod” “nagkaanam og kadayag” ngadto sa Propeta “kay sa kaniadto sukad nagsugod ang Simbahan nga mailhan sa kanasoran.”
1–4, Gubat gitagna tali sa Amihanan nga mga Estado ug sa Habagatan nga mga Estado; 5–8, Dako nga mga katalagman moabot sa tanang lumulupyo sa yuta.
1 Sa pagkatinuod, nagsulti ang Ginoo mahitungod sa mga gubat nga mahitabo sa dili madugay, magsugod sa rebelyon sa Habagatang Carolina, nga sa kataposan moresulta sa kamatayon ug pagkaalaot sa daghang kalag;
2 Ug ang panahon moabot nga ang gubat ibu-bo sa tanang nasod, sugod niining dapita.
3 Kay tan-awa, ang Habagatang mga Estado mabahin batok sa Amihanang mga Estado, ug ang Habagatang mga Estado motawag sa ubang nasod, bisan ang nasod sa Britanya, nga maoy tawag niini, ug sila usab motawag sa ubang nasod, sa pagpanalipod sa ilang mga kaugalingon batok sa ubang nasod; ug unya ang gubat ibu-bo ngadto sa tanang nasod.
4 Ug mahitabo, human sa daghang adlaw, ang mga ulipon moalsa batok sa ilang mga agalon, kinsa pagapundokon ug pagabansayon alang sa gubat.
5 Ug mahitabo usab nga ang mga salin nga nahibilin sa yuta mopundok sa ilang mga kaugalingon, ug masuko sa hilabihan, ug mosakit sa mga Hentil uban sa hilabihan nga kasakit.
6 Ug sa ingon niana, pinaagi sa espada ug sa pagpaagas sa dugo, ang mga lumulupyo sa yuta magbangotan; ug tungod sa kagutom, ug kasakit, ug sa linog, ug sa dugdog sa langit, ug sa mabangis ug masanag nga kilat usab, mabatyagan sa mga lumulupyo sa yuta ang kapungot, ug kasuko, ug ang mga kamot sa pagpanton gikan sa Makagagahom nga Dios, hangtod matapos sa hingpit ang gitakda nga kalaglagan sa tanang nasod;
7 Nga ang pangamuyo sa mga santos, ug ang dugo sa mga santos, mohunong sa pagsaka ngadto sa mga dunggan sa Ginoo nga Labing Gamhanan, gikan sa yuta, nga mapanimaslan ang ilang mga kaaway.
8 Mao nga, barog kamo sa balaang mga dapit, ug ayaw pagbalhin, hangtod ang adlaw sa Ginoo moabot; kay tan-awa, moabot kini sa labing madali, miingon ang Ginoo. Amen.