Seksiyon 69
Pagpadayag nga gihatag pinaagi ni Joseph Smith ang Propeta, sa Hiram, Ohio, Nobiyembre 11, 1831. Ang koleksiyon sa mga pagpadayag nga giandam alang sa sayo nga pagmantala giuyonan sa espesyal nga komperensiya niadtong Nobiyembre 1–2. Pagka-Nobiyembre 3, ang pagpadayag nga makita nga seksiyon 133, nga sa wala madugay gitawag og Apendiks, gidugang. Si Oliver Cowdery gitudlo kaniadto nga modala sa manuskrito sa nakolekta nga mga pagpadayag ug mga sugo ngadto sa Independence, Missouri, alang sa pag-imprinta. Siya usab ang modala sa kwarta nga giamot alang sa pagtukod sa Simbahan sa Missouri. Kini nga pagpadayag nagsugo ni John Whitmer sa pagkuyog ni Oliver Cowdery ug nagsugo usab ni Whitmer nga mobiyahe ug mokolekta sa makasaysayanong mga materyal alang sa iyang calling isip tigsaysay ug tigrekord sa Simbahan.
1–2, Si John Whitmer mouban ni Oliver Cowdery ngadto sa Missouri; 3–8, Siya usab mosangyaw ug mokolekta, morekord, ug mosulat sa makasaysayanong datos.
1 Patalinghog kanako, miingon ang Ginoo nga imong Dios, alang sa kaayohan sa akong sulugoon nga si Oliver Cowdery. Dili angay ngari kanako nga siya saligan sa mga sugo ug sa mga kwarta nga iyang dad-on ngadto sa yuta sa Zion, gawas nga adunay usa nga mouban kaniya nga matinuoron ug matinud-anon.
2 Mao nga, ako, ang Ginoo, nagtinguha nga ang akong sulugoon, nga si John Whitmer, mouban sa akong sulugoon nga si Oliver Cowdery;
3 Ug usab nga siya mopadayon sa pagsulat ug paghimo og kasaysayan sa tanang importante nga butang nga iyang mapanid-an ug masayran mahitungod sa akong simbahan;
4 Ug usab nga siya modawat og tambag ug tabang gikan sa akong sulugoon nga si Oliver Cowdery ug sa uban.
5 Ug usab, ang akong mga sulugoon nga atua sa layo nga kayutaan kinahanglan mopadala sa mga pamahayag sa ilang mga pagkatinugyanan ngadto sa yuta sa Zion;
6 Kay ang yuta sa Zion mao ang mahimong sentro ug usa ka dapit sa pagdawat ug pagbuhat niining tanang butang.
7 Bisan pa niana, himoa nga ang akong sulugoon nga si John Whitmer mobiyahe sa daghang higayon gikan sa usa ka dapit ngadto sa laing dapit, ug gikan sa usa ka simbahan ngadto sa laing simbahan, aron mas sayon siyang makaangkon og kahibalo—
8 Magsangyaw ug magpasabot, magsulat, magkopya, magpili, ug magbaton sa tanang butang nga alang sa kaayohan sa simbahan, ug alang sa nagtubo nga mga henerasyon nga motubo sa yuta sa Zion, sa pag-angkon niini gikan sa usa ka henerasyon ngadto sa laing henerasyon, hangtod sa kahangtoran. Amen.