Seksiyon 130
Ang mga aytem sa mga instruksiyon nga gihatag ni Joseph Smith ang Propeta, sa Ramus, Illinois, Abril 2, 1843.
1–3, Ang Amahan ug ang Anak mahimong personal nga mopakita sa mga tawo; 4–7, Ang mga anghel nagpuyo sa celestial nga dapit; 8–9, Ang celestial nga yuta mahimong usa ka bantogan nga Urim ug Thummim; 10–11, Usa ka puti nga bato ihatag sa tanang mosulod sa celestial nga kalibotan; 12–17, Ang takna sa Ikaduhang Pag-anhi wala gibutyag ngadto sa Propeta; 18–19, Ang salabotan nga maangkon niini nga kinabuhi madala nato sa Pagkabanhaw; 20–21, Ang tanang panalangin moabot pinaagi sa pagsunod sa balaod; 22–23, Ang Amahan ug ang Anak adunay mga lawas nga unod ug mga bukog.
1 Sa higayon nga ang Manluluwas magpakita kita makakita kaniya ingon nga siya mao siya. Makita nato siya nga usa ka tawo sama sa atong kaugalingon.
2 Ug kanang sama nga pakigrelasyon ngadto sa uban nga atong gitagamtam dinhi magpadayon kanato didto, gawas nga kini ubanan sa mahangtorong himaya, himaya nga wala nato matagamtam karon.
3 Sa Juan 14:23—Ang pagpakita sa Amahan ug sa Anak, niana nga bersikulo, mao ang personal nga pagpakita; ug ang ideya nga ang Amahan ug ang Anak nagpuyo sulod sa kasingkasing sa tawo usa ka kinaraang hunahuna sa sekta, ug bakak kini.
4 Agi og tubag sa pangutana nga—dili ba ang kalkulasyon sa panahon sa Dios, sa panahon sa anghel, sa panahon sa propeta, ug sa panahon sa tawo, nag-agad sa planeta nga ilang gipuy-an?
5 Motubag ko og, Oo. Apan walay mga anghel kinsa mangalagad niini nga kalibotan apan kadtong sakop o nahisakop niini.
6 Ang mga anghel wala magpuyo sa usa ka planeta nga sama niini nga kalibotan;
7 Apan nagpuyo sila sa atubangan sa Dios, sa usa ka kalibotan sama sa usa ka dagat nga bildo ug kalayo, diin ang tanang butang alang sa ilang himaya gipakita, ang kaniadto, ang karon, ug ang umaabot, ug sa kanunay anaa sa atubangan sa Ginoo.
8 Ang dapit diin magpuyo ang Dios mao ang dako nga Urim ug Thummim.
9 Kini nga kalibotan, sa pagkabalaan ug pagka-imortal nga kahimtang niini, pagahimoon nga sama sa kristal ug mahimong usa ka Urim ug Thummim ngadto sa mga lumulupyo kinsa mopuyo niini, diin ang tanang butang nga may kalabotan sa mas ubos nga gingharian, o ang tanang gingharian sa mas ubos nga han-ay, ipakita niadtong mopuyo niini; ug kini nga kalibotan maiya ni Kristo.
10 Unya ang puti nga bato nga gisulti sa Pinadayag 2:17, mahimong usa ka Urim ug Thummim ngadto sa matag indibidwal nga makadawat niini, diin ang mga butang nga may kalabotan sa mas taas nga han-ay sa gingharian ipahibalo;
11 Ug usa ka puti nga bato ihatag sa matag usa niadtong kinsa moadto sa celestial nga gingharian, diin ang bag-o nga ngalan nahisulat, nga walay tawo nga nasayod gawas kaniya nga nakadawat niini. Ang bag-o nga ngalan mao ang sekreto nga pulong.
12 Ako managna, pinaagi sa ngalan sa Ginoong Dios, nga ang sinugdan sa mga kalisdanan nga maoy hinungdan sa pagbanaw sa daghang dugo sa dili pa moanhi ang Anak sa Tawo mahitabo sa Habagatang Carolina.
13 Mahitabo tingali kini pinaagi sa pangutana bahin sa pagkaulipon. Mao kini ang tingog nga gipahayag ngari kanako, samtang ako sinsero nga nag-ampo bahin sa hilisgotan, niadtong ika-25 sa Disyembre, 1832.
14 Sinsero akong nag-ampo aron masayod sa takna sa pag-anhi sa Anak sa Tawo, sa dihang nakadungog ko og tingog nga misubli sa pagsulti sa mosunod:
15 Joseph, akong anak, kon ikaw mabuhi hangtod sa kawaloan ug lima nga panuigon, ikaw makakita sa nawong sa Anak sa Tawo; busa himoa kini nga igo na, ug ayaw na ako samoka mahitungod niining butanga.
16 Gibiyaan ako sa ingon niini nga kahimtang, nga wala makahukom kon kini nga pag-anhi nagpasabot ba sa sinugdanan sa milenyo o sa ubang nangagi nga pagpakita, o kon ako kinahanglan bang mamatay ug sa ingon niana makakita sa iyang nawong.
17 Naghunahuna ko nga ang pag-anhi sa Anak sa Tawo dili mahimong mas masayo kay sa niana nga panahon.
18 Bisan unsa nga baroganan sa salabotan nga makab-ot nato niining kinabuhia, madala nato kini sa pagkabanhaw.
19 Ug kon ang usa ka tawo makaangkon og daghan pa nga kahibalo ug salabotan niini nga kinabuhi pinaagi sa iyang kakugi ug pagkamasulondon kay sa uban, siya adunay dako kaayong bintaha sa kalibotan nga moabot.
20 Adunay balaod, nga dili mausab nga gipahayag didto sa langit sa wala pa ang mga pundasyon niini nga kalibotan, diin ang tanang panalangin gipasikad—
21 Ug kon kita makadawat og bisan unsa nga panalangin gikan sa Dios, tungod kini sa pagsunod niana nga balaod diin kini gipasikad.
22 Ang Amahan adunay lawas nga unod ug mga bukog nga mahikap sama sa tawo, ang Anak usab, apan ang Espiritu Santo walay lawas nga unod ug mga bukog, apan usa ka personahe sa Espiritu. Kon dili pa tungod niini, ang Espiritu Santo dili makapuyo sulod kanato.
23 Ang tawo mahimong modawat sa Espiritu Santo, ug mahimo kining mokunsad diha kaniya ug dili magpabilin uban kaniya.