Seksiyon 90
Pagpadayag ngadto ni Joseph Smith ang Propeta, gihatag didto sa Kirtland, Ohio, Marso 8, 1833. Kini nga pagpadayag mao ang nagpadayon nga lakang sa pag-organisar sa Unang Kapangulohan (tan-awa sa ulohan sa seksiyon 81); ug isip sangpotanan niini, ang mga magtatambag nga gihisgotan gi-orden pagka Marso 18, 1833.
1–5, Ang mga yawe sa gingharian gitugyan ngadto ni Joseph Smith ug pinaagi kaniya ngadto sa Simbahan; 6–7, Si Sidney Rigdon ug Frederick G. Williams mangalagad sa Unang Kapangulohan; 8–11, Ang ebanghelyo isangyaw ngadto sa mga nasod sa Israel, sa mga Hentil, ug sa mga Judeo, matag tawo makadungog pinaagi sa iyang kaugalingong sinultihan; 12–18, Si Joseph Smith ug ang iyang mga magtatambag mohan-ay sa Simbahan; 19–37, Nagkalain-laing mga tawo gitambagan sa Ginoo sa paglakaw nga matarong ug pag-alagad sa Iyang gingharian.
1 Sa ingon niini miingon ang Ginoo, sa pagkatinuod, sa pagkatinuod sultihan ko ikaw akong anak, ang imong mga sala gipasaylo na, sumala sa imong hangyo, kay ang imong mga pag-ampo ug ang mga pag-ampo sa imong kaigsoonan miabot sa akong mga dunggan.
2 Busa, bulahan ikaw gikan karon nga naghupot sa mga yawe sa gingharian nga gihatag kanimo; kansang gingharian matukod sa kataposan nga higayon.
3 Sa pagkatinuod sultihan ko ikaw, ang mga yawe niini nga gingharian dili na gayod kuhaon gikan kanimo, samtang ikaw anaa sa kalibotan, ni sa kalibotan nga moabot;
4 Hinuon, pinaagi kanimo ang buhing mga pulong mahatag ngadto sa uban, oo, gani ngadto sa simbahan.
5 Ug tanan sila nga modawat sa buhing mga pulong sa Dios, pamatngona sila kon giunsa nila kini sa pagdawat basin pa unya og isipon nila kini nga usa ka butang nga dili kaayo mahinungdanon, ug dad-on ubos sa panghimaraot tungod niana, ug mapandol ug madagma kon ang mga bagyo moabot, ug ang mga hangin mohuros, ug ang mga ulan mobundak, ug mohampak sa ilang balay.
6 Ug usab, sa pagkatinuod sultihan ko ang imong kaigsoonan, si Sidney Rigdon ug Frederick G. Williams, nga gipasaylo usab sila sa ilang mga sala, ug pagaisipon sila nga sama kanimo og katungod sa paghupot sa mga yawe niining kataposan nga gingharian;
7 Dugang pa pinaagi sa imong pagdumala sa mga yawe sa tulunghaan sa mga propeta, nga akong gisugo nga pagatukoron;
8 Nga pinaagi niini mahingpit sila sa ilang pagpangalagad alang sa kaluwasan sa Zion, ug sa mga nasod sa Israel, ug sa mga Hentil, kutob sa motuo;
9 Nga pinaagi sa imong pagdumala madawat nila ang pulong, ug pinaagi sa ilang pagdumala ang pulong modangat ngadto sa mga kinatumyan sa yuta, una ngadto sa mga Hentil, ug unya, tan-awa, ug sud-onga, mamalik sila ngadto sa mga Judeo.
10 Ug unya moabot ang adlaw nga ang bukton sa Ginoo mapadayag pinaagi sa gahom sa pag-agni sa mga nasod, sa pagano nga mga nasod, sa balay ni Jose, sa ebanghelyo sa ilang kaluwasan.
11 Kay mahitabo niana nga adlaw, nga ang matag tawo maminaw sa kahingpitan sa ebanghelyo sa iyang kaugalingong sinultihan, ug sa iyang kaugalingong pinulongan, pinaagi niadtong giordinahan niini nga gahom, pinaagi sa pagdumala sa Maghuhupay, nga gibu-bo diha kanila aron mapadayag si Jesukristo.
12 Ug karon, sa pagkatinuod sultihan ko kamo, hatagan ko kamo og sugo nga magpadayon kamo sa pagpangalangad ug sa kapangulohan.
13 Ug kon mahuman na ninyo sa paghubad ang basahon sa mga propeta, sukad niana kamo ang modumala sa mga kalihokan sa simbahan ug sa tulunghaan;
14 Ug sa matag karon ug unya, sumala sa ipadayag sa Maghuhupay, makadawat og mga pagpadayag sa pagbutyag sa mga misteryo sa gingharian;
15 Ug mopahiluna sa mga simbahan, ug magtuon ug magkat-on, ug mosinati sa tanan nga maayong mga basahon, ug sa mga pinulongan, mga sinultihan, ug katawhan.
16 Ug mao kini ang inyong buluhaton ug misyon sa inyong tibuok nga kinabuhi, sa pagpangulo sa konseho, ug pagpahiluna sa tanang kalihokan niini nga simbahan ug gingharian.
17 Ayaw kaulaw, ni pagkalibog; apan pagmatngon sa inyong tanang mapahitas-on nga panghunahuna ug garbo, kay magdala kini og lit-ag diha sa inyong mga kalag.
18 Ipahimutang sa kahusay ang inyong mga balay; ipahilayo gikan kaninyo ang pagkatapolan ug pagkahugawan.
19 Karon, sa pagkatinuod sultihan ko ikaw, pag-andam og dapit, sa labing madali, alang sa pamilya sa imong magtatambag ug tigsulat, gani si Frederick G. Williams.
20 Ug tugoti nga ang akong edaran nga sulugoon, si Joseph Smith, Sen., magpadayon uban sa iyang pamilya sa dapit diin siya karon nagpuyo; ug ayaw kini ipabaligya hangtod ang ba-ba sa Ginoo mosugo.
21 Ug isugyot nga ang akong magtatambag, gani si Sidney Rigdon, magpabilin diin siya karon nagpuyo hangtod ang ba-ba sa Ginoo ang mosugo.
22 Ug papangitaa ang bishop nga makugihon aron makakaplag og tinugyanan, ug ipapangita ang usa ka tawo nga adunay daghang tinipigan nga bahandi—usa ka tawo sa Dios, ug lig-on ang pagtuo—
23 Nga pinaagi niana makabayad siya sa matag utang; aron ang balay tipiganan sa Ginoo dili mapakaulawan sa mga mata sa katawhan.
24 Pangita nga makugihon, pag-ampo sa kanunay, ug pagmatuohon, ug ang tanang butang maghiusa sa pagtabang alang sa inyong kaayohan, kon maglakaw kamo nga matarong ug mahinumdom sa pakigsaad diin kamo nagpakigsaad sa usag usa.
25 Himoa nga ang inyong mga pamilya gamay lang, ilabi na sa akong edaran nga sulugoon nga si Joseph Smith, Sen., kalabot niadtong dili sakop sa inyong mga pamilya;
26 Nga kadtong mga butang nga giandam alang kaninyo, sa pagpahitabo sa akong buluhaton, dili kuhaon gikan kaninyo ug ihatag ngadto sa mga dili takos—
27 Ug tungod niana mapugngan kamo sa pagtuman nianang mga butang nga akong gisugo kaninyo.
28 Ug usab, sa pagkatinuod sultihan ko kamo, akong kabubut-on nga ang akong sulugoong babaye nga si Vienna Jaques kinahanglan makadawat og kwarta alang sa iyang galastohan, ug moadto sa yuta sa Zion;
29 Ug ang mahibilin sa kwarta mahimo nga ipahinungod ngari kanako, ug pagagantihan siya sa akong kaugalingong tukma nga panahon.
30 Sa pagkatinuod sultihan ko kamo, nga sakto sa akong panan-aw nga moadto siya sa yuta sa Zion, ug modawat sa kabilin gikan sa kamot sa bishop;
31 Nga mapahiluna siya sa kalinaw kon matinud-anon siya, ug dili magtinapolan sa iyang mga adlaw gikan karon.
32 Ug tan-awa, sa pagkatinuod sultihan ko kamo, nga inyong isulat kini nga sugo, ug moingon ngadto sa inyong kaigsoonan sa Zion, pinaagi sa mahigugmaong katahoran, nga gitawag ko usab kamo sa pagdumala sa Zion sa akong kaugalingong tukma nga panahon.
33 Busa, pahunonga sila sa pagsamok kanako mahitungod niining butanga.
34 Tan-awa, sultihan ko kamo nga ang inyong kaigsoonan sa Zion nagsugod sa paghinulsol, ug ang mga anghel malipayon mahitungod kanila.
35 Bisan pa niana, wala ako mahimuot sa daghang butang; ug wala ako mahimuot sa akong sulugoon nga si William E. McLellin, ni sa akong sulugoon nga si Sidney Gilbert; ug sa bishop usab, ug ang uban adunay daghang butang nga angay nga hinulsolan.
36 Apan sa pagkatinuod sultihan ko kamo, nga ako, ang Ginoo, makiglantogi sa Zion, ug mohangyo sa iyang mga pangulo, ug mopanton kaniya hangtod nga siya makabuntog ug limpyo sa akong atubangan.
37 Kay dili siya papahawaon gikan sa iyang dapit. Ako, ang Ginoo, namulong niini. Amen.