Suba sa Susquehanna

Pebrero 8–14

Doktrina ug mga Pakigsaad 12–13; Joseph Smith—Kasaysayan 1:66–75

“Diha Kaninyo nga Akong Kauban nga mga Sulugoon”

Si Joseph Smith ug si Oliver Cowdery nakadawat og dugang nga kahibalo samtang nag-ampo sila mahitungod sa mga kamatuoran nga ilang nakat-unan diha sa mga kasulatan (tan-awa sa Joseph Smith—Kasaysayan 1:68). Unsaon nimo sa pagsunod sa ilang ehemplo?

Irekord ang Imong mga Impresyon

Kadaghanan sa mga tawo nga naglibut sa kalibutan tingali wala gayud makadungog sa usa ka dapit nga gitawag og Harmony, Pennsylvania. Apan ang Ginoo kanunay nga mopili og dili klaro nga mga dapit alang sa labing mahinungdanon nga mga panghitabo sa Iyang gingharian. Diha dapit sa usa ka kakahoyan nga duol sa Harmony niadtong Mayo 15, 1829, si Juan Bautista mipakita isip nabanhaw nga nilalang ngadto nilang Joseph Smith ug ni Oliver Cowdery. Siya mipandong sa iyang mga kamot ngadto sa ilang mga ulo ug mihatag sa Aaronic nga Pagkapari diha kanila, mitawag kanila nga “Akong kauban nga mga sulugoon” (Doktrina ug mga Pakigsaad 13:1).

Aron maisip nga usa ka kauban nga sulugoon ni Juan Bautista, kinsa mibunyag sa Manluluwas ug miandam sa agianan alang sa Iyang pag-abut (tan-awa sa Mateo 3:1–6, 13–17), sigurado gyud ang pagbati og pagpaubos, tingali gani nakabuntog niining duha ka batan-ong lalaki sa ilang pangidaron nga baynte. Nianang panahona, si Joseph ug Oliver wala pa hiilhi, labaw pa sa Harmony. Apan ang pagserbisyo diha sa buhat sa Dios kanunay gayud mahitungod sa unsaon nato sa pagserbisyo, dili mahitungod kon kinsa ang makaila. Bisan unsa pa man ka gamay o dili makita ang imong tampo usahay, ikaw usa ka kauban nga sulugoon diha sa buhat sa Ginoo.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 12

Ang Ginoo gusto nga ako motabang sa paglig-on sa kawsa sa Zion.

Si Joseph Knight Sr. ug ang iyang asawa, si Polly, nahimamat ni Joseph Smith sa dihang, isip 20-anyos pa, misugod siya sa pagtrabaho sa ilang uma didto sa Colesville, New York. Si Joseph Knight mihulagway kaniya isip iyang kinamaayuhan nga trabahante sukad. Mituo siya nga ang pagpamatuod ni Joseph Smith mahitungod sa bulawan nga mga palid ug midala ni Polly sa pagbisita kang Joseph Smith samtang siya naghubad sa Basahon ni Mormon diha sa iyang panimalay sa Harmony, Pennsylvania. Mituo siya dayon. Sa tibuok nilang kinabuhi, si Joseph ug Polly nagpabilin nga matinud-anon sa gipahiuli nga ebanghelyo. Kapin sa 60 ka mga miyembro sa pamilyang Knight mipasakop ug mitabang sa pagpalig-on sa Simbahan didto sa New York, Ohio, Missouri, Nauvoo, ug sa katapusan sa Siyudad sa Salt Lake.

Si Joseph Knight gustong masayud kon sa unsang paagi siya makatabang sa buhat sa Ginoo. Ang Ginoo mitubag (nga karon anaa sa Doktrina ug mga Pakigsaad 12) magamit “sa tanan kinsa adunay mga tinguha sa pagdala ug pagtukod niini nga buhat” (bersikulo 7)—lakip kanimo. Unsa ang kahulugan niini nganha nimo “sa pagdala ug pagtukod sa kahimoan sa Zion”? (bersikulo 6). Sa unsang paagi ang mga baruganan ug mga hiyas diha sa mga bersikulo 7–9 makatabang nimo sa pagbuhat niini?

Tan-awa usab sa “The Knight and Whitmer Families,” Revelations in Context, 20–24.

Doktrina ug mga Pakigsaad 13

Ang Aaronic nga Pagkapari gipahiuli pinaagi ni Juan Bautista.

Sa usa lang ka kapahayag, si Juan Bautista mipadayag og daghang kamatuoran mahitungod sa Aaronic nga Pagkapari. Hunahunaa ang paglista sa tanan nimong makat-unan gikan niini nga seksyon (lakip sa ulohan nga seksyon). Tingali imong makita nga makatabang ang pagtuon og pipila ka mga hugpong sa mga pulong nga imong makit-an. Aniay pipila ka mga ehemplo aron ka makasugod:

• “Ang mga yawe sa pagpangalagad sa mga anghel”: 2 Nephi 32:2–3; Moroni 7:29–32; Jeffrey R. Holland, “Ang Pagpangalagad sa mga Anghel,” Liahona, Nob. 2008, 29–31; Giya ngadto sa mga Kasulatan, “Anghel, mga,” scriptures.ChurchofJesusChrist.org

• “Ang mga yawe … sa ebanghelyo sa paghinulsol”: 3 Nephi 27:16–22; Doktrina ug mga Pakigsaad 84:26–27; Dale G. Renlund, “Ang Pagkapari ug ang Matubsanong Gahum sa Manluluwas,” Liahona, Nob. 2017, 64–67

• “Ang anak nga mga lalaki ni Levi”: Mga Numeros 3:5–13; Doktrina ug mga Pakigsaad 84:31–34; Giya ngadto sa mga Kasulatan, “Aaronic nga Pagkapari,” “Levi,” scriptures.ChurchofJesusChrist.org

Unsa nga mga panalangin ang imong nadawat pinaagi sa mga ordinansa sa Aaronic nga pagkapari?

Si Joseph Smith nga nagbunyag ni Oliver Cowdery

Gibunyagan ni Joseph Smith si Cowdery, ni Del Parson

Joseph Smith—Kasaysayan 1:66–75

Ang mga ordinansa nakahatag nako og agianan ngadto sa gahum sa Dios.

Si Sister Carole M. Stephens, kanhi magtatambag sa Kinatibuk-ang Kapangulohan sa Relief Society, mitudlo: “ang mga ordinansa ug mga pakigsaad sa priesthood naghatag og agianan ngadto sa kahingpitan sa mga panalangin nga gisaad kanato sa Dios, nga nahimong posible pinaagi sa Pag-ula sa Manluluwas. Kini nagsangkap sa anak nga mga lalaki ug mga babaye sa Dios uban sa gahum, gahum sa Dios, ug naghatag kanato sa oportunidad sa pagdawat og kinabuhing dayon” (“Nahibalo Ba Kita Unsay Anaa Kanato?” Liahona, Nob. 2013, 12.

Samtang magbasa ka sa Joseph Smith—Kasaysayan 1:66–75, lakip sa mubo nga sulat sa katapusan sa bersikulo 71, ikonsiderar unsa ang nakadasig nilang Joseph ug Oliver sa pagpangutana mahitungod sa bunyag, ug timan-i ang mga panalangin nga miabut ngadto kanila human sa pag-apil diha sa mga ordinansa sa pagkapari. Hunahunaa ang pagbasa sa mga nasulat sa journal nga imong gisulat human sa pagdawat og mga ordinansa o sa pagsulat sa imong mga panumduman bahin niadtong mga panghitabo. Unsa nga mga panalangin ang imong nadawat pinaagi sa mga ordinansa sa pagkapari?

Tan-awa usab sa Doktrina ug mga Pakigsaad 84:20–22; Mga Santos, 1:65–68.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 12:8.Nganong ang mga kinaiya nga nalista dinhi niining bersikulo gikinahanglan kon kita maghimo sa buhat sa Ginoo?

Doktrina ug mga Pakigsaad 13.Unsa kaha ang nakapalig-on sa pagtuo sa imong pamilya diha sa pagpahiuli sa Aaronic nga Pagkapari? Ang buhat sa arte [artwork] nga kauban niining latid makatabang sa imong pamilya nga makita ang pagpahiuli sa Aaronic nga Pagkapari. Malingaw ba sila nga magdrowing og usa ka hulagway sa panghitabo, base sa unsay ilang mabasa diha sa Joseph Smith—Kasaysayan 1:68–74? Mahimo usab sila nga mopaambit sa ilang mga pagpamatuod mahitungod sa gahum sa pagkapari diha sa ilang kinabuhi.

Tan-awa usab sa “Priesthood Restoration Site” sa history.ChurchofJesusChrist.org.

Joseph Smith—Kasaysayan 1:68.Sa unsang paagi nga masunod nato ang ehemplo ni Joseph Smith ug ni Oliver Cowdery sa pagpangita og mga tubag sa atong mga pangutana? Tingali samtang magdungan kamo sa pagbasa, mahimo ninyong batasanon sa kanunay ang paghunong ug mangutana kon aduna bay mga pangutana mahitungod sa unsay ilang gibasa.

Joseph Smith—Kasaysayan 1:71, pahinumdom.Unsa ang nagustuhan sa mga sakop sa imong pamilya mahitungod sa mga pulong ni Oliver Cowdery? Unsa ang pipila sa mga “panahon nga dili gayud mahikalimtan” sa inyong pamilya?

Joseph Smith—Kasaysayan 1:73–74.Unsa ang epekto sa Espiritu Santo diha ni Joseph ug Oliver? Kanus-a nga ang Espiritu mitabang sa imong pamilya nga masabtan ang mga kasulatan ug nagmaya diha sa Ginoo?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ang Priesthood Gipahiuli,” Songbook sa mga Bata, 60.

Pagpalambo sa Atong Pagtudlo

Pagtuon sa usa ka hilisgutan. Isip usa ka pamilya, pagpili og usa ka hilisgutan nga gusto ninyong tun-an nga mas detalyado. Pananglitan, karong simanaha mahimo kamong mogamit sa Topical Guide o Giya ngadto sa mga Kasulatan (scriptures.ChurchofJesusChrist.org) aron makakita og mga kasulatan mahitungod sa Aaronic nga Pagkapari.

Si Juan Bautista nagtugyan sa Aaronic nga Pagkapari [Priesthood] diha ni Joseph Smith ug ni Oliver Cowdery

Diha Kaninyo nga Akong Kauban nga mga Sulugoon, ni Linda Curley Christensen