“Pebrero 15–21. Doktrina ug mga Pakigsaad 14–17: ‘Mobarug ingon nga usa ka Saksi’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2021 (2020)
“Pebrero 15–21. Doktrina ug mga Pakigsaad 14–17,” Dali, Sunod Kanako—Alang sa mga Indibidwal ug sa mga Pamilya: 2021
Pebrero 15–21
Doktrina ug mga Pakigsaad 14–17
“Mobarug ingon nga usa ka Saksi”
Ang pamilya ni Joseph Smith ug mga higala usahay mihangyo kaniya sa pagpangayo og pagpadayag mahitungod sa unsay gusto sa Dios nga ilang buhaton. Samtang magbasa ka niining mga pagpadayag, hunahunaa unsa ang direksyon sa Dios alang kanimo.
Irekord ang Imong mga Impresyon
Bisan og ang buhat sa paghubad maayo nga mi-uswag, nianang pagka Mayo 1829 ang sitwasyon didto sa Harmony mas nagkalisud alang nilang Joseph, Emma, ug Oliver. Ang kabangis gikan sa mga kasilinganan nagkadako samtang ang abag nga nagagikan sa pamilya ni Emma nagkakunhod. Gibati nga ang Harmony dili na luwas, mikontak si Oliver sa usa ka higala kinsa mipahayag og kainteresado diha sa buhat ni Joseph: si David Whitmer. Si David nagpuyo uban sa iyang mga ginikanan ug mga igsoon didto sa Fayette, New York, mga 161 ka kilometro ang gilay-on. Iyang nahimamat si Oliver sa miaging usa ka tuig, ug si Oliver misulat kaniya og pipila ka mga sulat sukad niadto, mipaambit sa iyang mga kasinatian sa pagtrabaho uban sa Propeta. Walay usa sa pamilya ni David ang nakahimamat ni Joseph sukad. Apan sa dihang mihangyo si Oliver kon siya ug si Joseph mahimo bang makabalhin ngadto sa panimalay ni Whitmer aron sa pagtiwas sa paghubad sa Basahon ni Mormon, ang mga Whitmer andam nga miabi-abi kanila. Ug ang Ginoo mitagana og daghang mahinungdanong butang alang sa mga Whitmer kay sa pagpapuyo sa Propeta. Aduna Siyay piho nga panudlo alang kanila, makita diha sa Doktrina ug mga Pakigsaad 14–17, ug nianang higayuna sila kinahanglan mahimong usa ka sukaranan nga mga pamilya sa Simbahan ug mga saksi sa giasoy nga Pagpahiuli.
Alang sa dugang pa mahitungod sa pamilyang Whitmer, tan-awa sa Mga Santos, 1:75–79.
Mga Ideya alang sa Personal nga Pagtuon sa Kasulatan
Ako mahimong makasalmot diha sa buhat sa Dios nga “mahinungdanon ug kahibulongan nga buhat.”
Sa dihang nahimamat niya si Joseph Smith, si David Whitmer usa pa ka batan-on nga mapahinunguron sa iyang trabaho diha sa umahan sa pamilya. Apan ang Ginoo adunay gitagana nga trabaho alang kang David—bisan og sa pipila ka paagi maingon kini og dyutay sama sa pang-uma. Samtang magbasa ka sa Doktrina ug mga Pakigsaad 14:1–4, timan-i kon giunsa pagtandi sa Ginoo ang Iyang buhat ngadto sa matang sa buhat nga si David pamilyar. Unsay imong nakat-unan mahitungod sa buhat sa Ginoo gikan niining pagtandi?
Sa unsang paagi nga ikaw “mogalab sa [imong] sanggot”? (bersikulo 4). Timan-i ang mga saad nga nahatag sa tibuok niining seksyon niadtong kinsa “naningkamot sa pagdala ug pagtukod sa … Zion” (bersikulo 6).
Doktrina ug mga Pakigsaad 14:2
Ang pulong sa Dios “buhi ug makagagahum.”
Ang Ginoo mitandi sa Iyang pulong ngadto sa “duha ka suwab sa espada” (Doktrina ug mga Pakigsaad 14:2). Unsa ang gisugyot niining duha ka pagtandi para nimo mahitungod sa pulong sa Dios? Pananglitan, sa unsang paagi nga ang Iyang pulong buhi, gamhanan, ug mahait? Sa unsang paagi nga imong nasinati ang gahum sa Dios?
Hunahunaa ang laing mga paagi nga gihulagway sa Dios ang Iyang pulong. Pananglitan, unsay imong nakat-unan mahitungod sa pulong sa Dios gikan sa pagtandi sa mosunod nga mga tudling?
Ang Ginoo mitandi sa Iyang mga pulong ngadto sa usa ka espada.
Doktrina ug mga Pakigsaad 14:7
Ang kinabuhi nga dayon mao “ang labing mahinungdanon sa tanan nga mga gasa sa Dios.”
Samtang magbasa ka sa Doktrina ug mga Pakigsaad 14:7, pamalandungi kon nganong ang kinabuhing dayon mao “ang labing mahinungdanon sa tanan nga mga gasa sa Dios.” Kini nga pagtulun-an gikan ni Presidente Russell M. Nelson tingali makatabang: “Ubos sa dakong plano sa Dios sa kalipay, ang mga pamilya mabugkos diha sa mga templo ug maandam nga makabalik og puyo diha sa Iyang presensya sa kahangturan. Kana ang kinabuhing dayon!” (“Salamat sa Dios,” Liahona, Mayo 2012, 77).
Hunahunaa ang pagdugang og mga cross reference sa bersikulo 7 nga makatabang nimo nga mas masabtan ang kinabuhing dayon (tan-awa sa “Kinabuhi nga Dayon” diha sa Ang Giya ngadto sa mga Kasulatan, scriptures.ChurchofJesusChrist.org). Unsay imong nakat-unan nga makapadasig nimo sa pagpaningkamot alang sa kinabuhi nga dayon?
Doktrina ug mga Pakigsaad 15–16
Ang pagdala og mga kalag ngadto kang Kristo mao ang labing bililhon.
Si John ug si Peter Whitmer gustong masayud unsa ang “labing bililhon” sa ilang kinabuhi (Doktrina ug mga Pakigsaad 15:4; 16:4). Nakahunahuna ka ba mahitungod niini sukad alang sa imong kaugalingon? Samtang magbasa ka sa Doktrina ug mga Pakigsaad 15–16, pamalandungi kon nganong ang pagdala og mga kalag ngadto kang Kristo ingon man ka dako ang bili. Unsaon nimo nga makadapit og mga kalag ngadto kang Kristo?
Tan-awa usab sa Doktrina ug mga Pakigsaad 18:10–16.
Ang Ginoo mogamit og mga saksi aron sa paglig-on sa Iyang pulong.
Unsa man ang usa ka saksi? Nganong ang Ginoo mogamit og mga saksi diha sa Iyang buhat? (tan-awa sa 2 Mga Taga-Corinto 13:1). Pamalandungi kining mga pangutana samtang magbasa ka sa mga pulong sa Dios ngadto sa Tulo ka mga Saksi diha sa Doktrina ug mga Pakigsaad 17. Tingali makatabang usab ang pag-ribyu sa “Ang Pagpamatuod sa Tulo ka mga Saksi” sa Basahon ni Mormon. Sa unsang paagi ang mga saksi makatabang sa pagpatuman sa “matarung nga mga katuyoan” sa Dios? (bersikulo 4).
Nasayud ka ba nga si Mary Whitmer nakadawat usab og pagsaksi sa bulawan nga mga palid? Ang anghel nga si Moroni mipakita niini ngadto kaniya isip usa ka pagdawat sa mga sakripisyo nga iyang gihimo samtang si Joseph ug Emma, ug Oliver nagpuyo diha sa iyang panimalay (tan-awa sa Mga Santos, 1:77–79). Unsay imong nakat-unan gikan sa iyang kasinatian mahitungod sa pagdawat og usa ka pagsaksi?
Tan-awa usab sa Mga Santos, 1:81–84; Ulisses Soares, “Ang Pagtungha sa Basahon ni Mormon,” Liahona, Mayo 2020, 32–35.
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 14:1–4.Hunahunaa ang pagdapit sa imong pamilya sa pagpangita og mga hugpong sa mga pulong nga may kalabutan niining mga bersikulo. Ngano kaha nga ang Ginoo mitandi sa Iyang buhat ngadto sa usa ka pag-ani? Unsa ang atong mahimo aron makatabang diha sa Iyang buhat?
-
Doktrina ug mga Pakigsaad 14:2.Ang kalihokan alang niining bersikulo sa “Mga Ideya alang sa Personal nga Pagtuon sa Kasulatan” dunay lista sa daghang mga tudling sa kasulatan mahitungod sa pulong sa Dios. Tingali ang mga sakop sa pamilya makabasa niini ug mopaambit unsay ilang nakat-unan. Sa unsang paagi nga kining mga tudling sa kasulatan makadasig kanato sa “pagpatalinghug” sa pulong sa Dios?
-
Doktrina ug mga Pakigsaad 15:6; 16:6.Kini nga mga bersikulo makapadasig og usa ka panag-istoryahanay mahitungod sa mga butang nga bililhon kaayo sa imong pamilya (tan-awa usab sa Doktrina ug mga Pakigsaad 18:10).
-
Doktrina ug mga Pakigsaad 17.Ang imong pamilya tingali malingaw sa pagdrowing og mga hulagway sa matag usa sa mga butang nga nakita sa Tulo ka mga Saksi (tan-awa sa bersikulo 1). Samtang magbasa ka sa seksyon 17, pangitaa ang hugpong sa mga pulong nga nagtudlo mahitungod sa kaimportante sa Basahon ni Mormon. Sa unsang paagi nga kita mamahimong mga saksi sa Basahon ni Mormon? Ang imong pamilya mahimo usab nga motan-aw sa video nga “A Day for the Eternities” (ChurchofJesusChrist.org).
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “I’ll Go Where You Want Me to Go [Ako Moadto Asa Ikaw Buot Kanako nga Moadto],” Mga Himno, nu. 270.
Mga tingog sa Pagpahiuli
Si Lucy Mack Smith ug ang Tulo ug Walo ka mga Saksi
Ang anghel nga si Moroni mipakita sa bulawan nga mga palid ngadto nilang Joseph Smith, Oliver Cowdery, David Whitmer, ug Martin Harris diha sa kakahoyan duol sa panimalay sa Whitmer didto sa Fayette, New York. Ang mga ginikanan ni Joseph mibisita sa mga Whitmer nianang higayuna. Si Lucy Mack Smith, ang inahan ni Joseph, mihulagway sa epekto niining milagroso nga kasinatian diha sa mga saksi:
“Diha kadto sa mga alas tres ug alas kwatro. Sila si Gng. Whitmer ug Gn. Smith ug ako nanglingkod sa usa ka kwarto. Naglingkod ko daplin sa higdaanan. Sa dihang misulod si Joseph, mihigda siya sa akong kiliran. ‘Pa! Ma!’ miingon siya. ‘Wala mo masayud kon unsa ko ka malipayon. Ang Ginoo mitugot nga ang mga palid mapakita ngadto sa dugang tulo gawas nako, kinsa nakakita usab sa usa ka anghel ug kinahanglan mopamatuod sa kamatuoran sa unsay akong gisulti. Tungod kay sila nakahibalo mismo nga ako wala manglingla ngadto sa mga katawhan. Ug akong gibati nga daw nahaw-as sa bug-at kaayo nga palas-anon, nga hapit sobra ra kaayo nga maantus nako. Apan karon sila kinahanglan nang modala og usa ka bahin, ug kini nakapalipay sa akong kalag nga wala na gyud ko nag-inusara sa kalibutan.’ Dayon misulod si Martin Harris. Ingon og gibuntog siya sa naghingapin nga kalipay. Dayon mipamatuod siya sa unsay iyang nakita ug nadungog, sama sa gibuhat sa uban, ni Oliver ug ni David. Ang ilang pagpamatuod managsama og kahulugan sumala nianang gilangkuban sa Basahon ni Mormon. …
“Ilabi na ni Martin Harris daw hingpit nga walay pulong nga ikahulagway sa iyang gibati. Miingon siya, ‘karon nakakita na ako og usa ka anghel gikan sa Langit kinsa adunay kasiguroan sa kamatuoran sa tanan nga akong nadungog kalabut sa talaan, ug ang akong mga mata nakakita kaniya. Nakakita usab ako sa mga palid ug gitunol kini sa akong mga kamot ug makapamatuod og mao gihapon ngadto sa tibuok kalibutan. Apan ako nakadawat alang sa akong kaugalingon nga dili malitok sa mga pulong, nga walay dila nga makahulagway, ug akong gidayeg ang Dios diha sa kabug-os sa akong kalag nga siya mipili aron sa paghimo nako, gani ako, nga usa ka saksi sa kahalangdon sa iyang buhat ug plano alang sa kaayuhan [sa] mga anak sa tawo.’ Sila si Oliver ug David miapil usab kaniya diha sa balaan nga pagdayeg ngadto sa Dios tungod sa iyang kamaayo ug kalooy. Namauli kami [ngadto sa Palmyra, New York,] pagkasunod nga adlaw usa ka malipayon, nagmaya nga gamayng pundok.”1
Mga hulagway nilang Oliver Cowdery, David Whitmer, ug Martin Harris ni Lewis A. Ramsey
Si Lucy Mack Smith anaa usab sa dihang ang Walo ka mga Saksi mibalik gikan sa ilang kasinatian:
“Human niining mga saksi nakabalik ngadto sa balay, ang anghel mipakita pag-usab ngadto ni Joseph; diin nianang tungora gihatag ni Joseph ang mga palid ngadto sa iyang mga kamot. Nianang gabhiuna mipahigayon kami og usa ka panagtigum, diin ang tanang mga saksi mipamatuod sa pagkatinuod sa gipahayag sa ibabaw; ug ang tanan sa among pamilya, gani ngadto ni Don Carlos [Smith], kinsa 14 anyos pa lang ang pangidaron, mipamatuod sa kamatuoran sa dispensasyon sa ulahing mga adlaw—nga kini hingpit nang gisugdan.”2
Iskultura ni Joseph Smith ug sa Walo ka mga Saksi ni Gary Ernest Smith
Ang Anghel nga si Moroni Nagpakita sa Bulawan nga mga Palid ngadto nilang Joseph Smith, Oliver Cowdery, and David Whitmer, ni Gary B. Smith