Pebrero 15–21

Doktrina ug mga Pakigsaad 14–17

“Barug isip usa ka Saksi”

Unsaon nimo pagtabang ang mga bata sa pagbarug isip mga saksi sa ebanghelyo? Ang mga kalihokan dinhi niini nga outline mahimo nga mohatag kanimo og mga ideya.

Irekord ang Imong mga Impresyon

Dapita ang Pagpaambit

Hunahunaa ang pagdapit og pipila ka mga bata sa pagpakigbahin og usa ka butang nga ilang nakat-unan niini nga semana, sa panimalay o sa Primary, nga sila mituo nga tinuod.

Itudlo ang Doktrina: Mas Gagmay nga mga Bata

Doktrina ug mga Pakigsaad 14:1–7

Makatabang ako sa Ginoo sa pagbuhat sa Iyang buluhaton.

Hunahunaa kon unsaon sa mga pulong sa Ginoo ngadto ni David Whitmer pagtabang sa mga bata sa pagsabut kon unsaon nila sa pag-apil diha sa buluhaton sa Dios.

Posible nga mga Kalihokan

• Sa daklit pakigbahin og pipila ka mga detalye mahitungod sa pamilya Whitmer (tan-awa sa Saints, 1:68–71 o outline niini nga semana sa Dali, Sunod Kanako—Alang sa mga Indibidwal ug sa mga Pamilya). Sama pananglit, ipakigbahin kinsa si David Whitmer ug giunsa niya ug sa iyang pamilya pagtabang si Joseph Smith samtang siya naghubad sa Basahon ni Mormon.

• Tabangi ang mga bata sa pagsabut sa mga pagtandi tali sa pagtrabaho diha sa umahan ug sa pag-apil diha sa usa ka “mahinungdanon ug katingalahan nga buhat” sa Dios (bersikulo 1). Sama pananglit, ang pag-ani makasimbolo sa pagdala og mga kalag ngadto ni Kristo. Makapakita ka og hulagway sa usa ka mag-uuma, pagdala og mga saput sa mag-uuma nga masukod sa mga bata, o paghisgot sa inadlaw nga mga buhat nga gihimo sa mga mag-uuma. Ipasabut nga si David Whitmer usa ka mag-uuma kinsa gusto nga makahibalo kon unsaon niya pagtabang ang Ginoo. Basaha ang Doktrina ug mga Pakigsaad 14:3–4 ngadto sa mga bata, ug tabangi sila sa pagdiskubre kon unsa ang gisulti sa Ginoo ni David Whitmer nga buhaton. Unsaon nato pagtabang diha sa buluhaton sa Ginoo?

• Paggamit og regalo sa pagtudlo sa mga bata mahitungod sa gasa sa Dios nga kinabuhing dayon. Sama pananglit, pagpakita sa mga bata og regalo nga adunay papel sa sulod nga mabasa og, “Kinabuhi nga Dayon” (Doktrina ug mga Pakigsaad 14:7). Ipaabli ang regalo ug ipabasa og kusog ang Doktrina ug mga Pakigsaad 14:7. Pakigbahin nga ang kinabuhing dayon nagkahulugan og pagpuyo sa hangtud uban sa Dios ug mahimong sama Kaniya. Pakigbahin sa imong pagpamatuod sa mga panalangin sa pagsunod sa mga sugo ug pagdawat sa kinabuhing dayon.

  

  Ang misyonaryong buhat maoy usa ka paagi nga kita makatabang sa Ginoo sa pagbuhat sa Iyang buluhaton.

Doktrina ug mga Pakigsaad 15:6; 16:6

Makatabang ako sa uban nga mas maduol kang Jesukristo.

Sila ni John Whitmer ug Peter Whitmer Jr. mga igsoong lalaki ni David Whitmer. Sama ni David, gusto sila nga makahibalo kon unsaon nga makatabang sila sa Ginoo. Mihangyo Siya kanila sa pagtabang og “dala og mga kalag ngadto” Kaniya.

Posible nga mga Kalihokan

• Hangyoa ang mga bata sa paghulagway og usa ka butang nga importante o bililhon ngadto kanila (sama sa dulaan, basahon, o dula). Basaha ang Doktrina ug mga Pakigsaad 15:6 o 16:6, ug hangyoa ang mga bata sa pagpataas sa ilang mga kamot kon makadungog sila kon unsa ang gisulti sa Ginoo nga “labing bililhon.”

• Uban sa mga bata, paghimo og lista sa mga paagi nga sila makatabang og usa ka tawo sa pagsunod ni Jesukristo, sama sa pakighigala sa uban, pakigbahin sa mga kasulatan ngadto sa usa ka higala, o sa pag-ampo alang sa usa ka tawo nga nanginahanglan. Aron sa paghatag sa mga bata og mga ideya, makapakita ka og pipila ka tukma nga mga hulagway gikan sa mga magasin sa Simbahan o sa Libro sa mga Hulagway sa Ebanghelyo. O ang mga bata makadrowing sa ilang kaugalingong mga hulagway. Dapita sila sa pagsulay og usa ka butang diha sa ilang lista sulod sa semana.

Doktrina ug mga Pakigsaad 17

Makasaksi ako sa mga butang nga nahimo sa Dios alang kanako.

Nahimo si David Whitmer nga usa sa Tulo ka mga Saksi sa Basahon ni Mormon, ug upat sa iyang mga igsoong lalaki Walo ka mga Saksi. Sama ni David ug sa iyang mga igsoong lalaki, ang matag usa kanato makahimo nga “mobarug ingon nga usa ka saksi” sa kamatuoran (Doktrina ug mga Pakigsaad 14:8).

Posible nga mga Kalihokan

• Sultihi ang mga bata mahitungod sa Tulo ug Walo ka mga Saksi (tan-awa sa “Kapitulo 7: Mga Saksi Nakakita sa Bulawan nga mga Palid” [Mga Istorya sa Doktrina ug mga Pakigsaad, 31–33], o ang katukma nga video sa ChurchofJesusChrist.org). Dapita ang mga bata sa pagdrowing og hulagway sa mga saksi nga nakakita sa mga palid.

• Dapita ang mga bata sa pagkolor sa pahina sa kalihokan niini nga semana, ug sa paggamit niini sa pag-istorya kabahin sa Tulo ka mga Saksi.

• Pagpataas og kopya sa Basahon ni Mormon, ug basaha ngadto sa mga bata ang katapusan nga linya sa Doktrina ug mga Pakigsaad 17:6: “Samtang ang imong Ginoo ug ang imong Dios buhi kini tinuod.” Isulti sa mga bata kon giunsa nimo pagkahibalo nga ang Basahon ni Mormon tinuod. Dapita ang mga bata nga mahimong mga saksi sa Basahon ni Mormon pinaagi sa pagbasa niini ug sa pag-ampo nga mahibalo kon kini tinuod ba ug dayon sa pagpakigbahin sa ilang pagpamatuod ngadto sa uban.

Itudlo ang Doktrina: Mas Dagko nga mga Bata

Doktrina ug mga Pakigsaad 14–16

Makatabang ako sa Ginoo sa pagbuhat sa Iyang buluhaton.

Samtang maghisgot ka sa mga pinadayag ngadto sa managsoong lalaki nga Whitmer, makahimo ka sa pagpakigbahin sa mga paagi ang Ginoo nagdapit sa matag usa kanato sa pagtabang Kaniya sa Iyang buluhaton.

Posible nga mga Kalihokan

• Pakigbahin og mga istorya mahitungod ni David Whitmer ug sa iyang pamilya nga gibati nimo nga makadasig ngadto sa mga bata (tan-awa sa Saints, 1:68–71). Giunsa paggamit sa Ginoo ang mga Whitmer sa pagtukod sa Iyang gingharian?

• Sa mga piraso nga papel, pagsulat og yano nga mga pangutana ug kalabut nga mga kapanguhaan sa kasulatan gikan sa Doktrina ug mga Pakigsaad 14–16. Sama pananglit: Sama sa unsa ang pulong sa Dios? (14:2). Unsa ang labing mahinungdanon nga gasa sa Dios? (14:7). Unsa ang gisulti sa Dios nga labing bililhon? (15:6; 16:6). Dapita ang mga bata sa pagpili og usa ka pangutana ug sa pagpangita sa mga tubag diha sa mga bersikulo.

• Pagsulat og duha ka ulohan diha sa pisara: Trabaho sa Umahan ug Ang Buluhaton sa Ginoo. Tabangi ang mga bata sa pagsiksik sa Doktrina ug mga Pakigsaad 14:3–4 alang sa mga hugpong sa mga pulong nga kalabut ngadto sa buhat sa umahan, ug isulat kini ubos sa unang ulohan. Unsa ang gitudlo kanato niini nga mga pulong mahitungod sa buluhaton sa Dios? Isulat ang mga tubag sa mga bata ubos sa ikaduhang ulohan. Unsaon nato pagtabang sa buluhaton sa Ginoo?

Doktrina ug mga Pakigsaad 17

Makasaksi ako sa mga butang nga nahimo sa Dios alang kanako.

Sa Doktrina ug mga Pakigsaad 17, ang Ginoo misulti kang Oliver Cowdery, David Whitmer, ug Martin Harris nga sila mao ang Tulo ka mga Saksi sa Basahon ni Mormon. Tabangi ang mga bata sa pagkat-on kon unsaon nila pagsaksi sa kamatuoran usab.

• Dapita ang usa ka bata sa pag-anha nga andam sa pagpakigbahin sa istorya sa Tulo ka mga Saksi (tan-awa sa “Kapitulo 7: Mga Saksi Nakakita sa Bulawan nga mga Palid” [Mga Istorya sa Doktrina ug mga Pakigsaad, 31–33], o ang katukma nga video sa ChurchofJesusChrist.org). Unsa ang atong makat-unan gikan niini nga istorya mahitungod kon unsaon nga mahimong maisug nga mga saksi? Mahimo usab nga imong ipasalida ang mga pinili gikan sa video “A Day for the Eternities” (ChurchofJesusChrist.org; ang bahin mahitungod sa Tulo ka mga Saksi magsugod sa mga 15:00).

• Pagbasa og dungan sa saad sa Ginoo diha sa Doktrina ug mga Pakigsaad 17:1–3, ug tabangi ang mga bata sa pagpangita sa katumanan niini sa “Ang Pagpamatuod sa Tulo ka mga Saksi” diha sa Basahon ni Mormon.

• Pagbasa og dungan sa Doktrina ug mga Pakigsaad 17:3–5 aron sa pagsuta kon unsay gisugo kang Oliver Cowdery, Martin Harris, ug David Whitmer nga ipabuhat human makakita sa bulawan nga mga palid. Unsa ang pipila ka mga kamatuoran kita makapamatuod? Isulti ang mahitungod sa giunsa nimo pagpakigbahin sa imong pagpamatuod ngadto sa uban, ug dapita ang mga bata sa pagpakigbahin og bisan unsa nga mga kasinatian nga sila aduna.

Awhaga ang Pagkat-on diha sa Panimalay

Dapita ang mga bata sa pagbarug ingon nga saksi sa usa ka butang nga ilang nakat-unan sa klase karong adlawa. Hangyoa sila sa pagpakigbahin kon giunsa nila kini pagbuhat sa sunod semana nga klase.

Pagpalambo sa Atong Pagtudlo

Tuguti ang mga bata nga mahimong aktibo. Mahimo nimong gamiton ang aktibo nga mga kinaiya sa mga bata pinaagi sa pagdapit kanila sa pagpakita og mga aksyon o paghimo og mga aksyon nga motukma ngadto sa usa ka awit o tudling sa kasulatan. (Tan-awa sa Pagtudlo sumala sa Pamaagi sa Manluluwas, 25–26.)