Modelo nga kopya sa orihinal nga panid sa Basahon ni Mormon.

Pebrero 1–7

Doktrina ug mga Pakigsaad 10–11

“Aron Ikaw Mahimong Magmadaugon”

Basaha sa mainampuong paagi ang Doktrina ug mga Pakigsaad 10–11, mamalandong kon sa unsa nga paagi ikaw makatabang sa mga bata sa pagsabut sa mga kamatuoran niini nga mga seksyon. Ang mga ideya niini nga outline—alang sa mas gagmay nga mga bata ug alang sa mas dagko nga mga bata—makatabang.

Irekord ang Imong mga Impresyon

Dapita ang Pagpaambit

Hangyoa ang mga bata sa pagpakigbahin kon unsa ang ilang nahinumduman gikan sa miaging leksyon mahitungod ni Martin Harris ug ang nawala nga hinubad nga mga panid sa Basahon ni Mormon. Pakigbahin og bisan unsa nga mga detalye nga wala nila mahinumdumi. Mahimo nimong tan-awon ngadto sa “Kapitulo 4: Martin Harris ug ang Nawala nga mga Panid” (Mga Istorya sa Doktrina ug mga Pakigsaad, 18–21).

Itudlo ang Doktrina: Mas Gagmay nga mga Bata

Doktrina ug mga Pakigsaad 10:5

Kon ako mag-ampo sa kanunay, ang Langitnong Amahan mopanalangin kanako.

Usahay ang mga bata naghunahuna nga sila makaampo lamang sa piho nga mga panahon ug mga dapit, ug kon sila nagluhod lamang o nagpiyong sa ilang mga mata. Unsaon nimo sa pagtabang kanila nga makakat-on unsaon “pag-ampo sa kanunay”?

Posible nga mga Kalihokan

• Pagpakita og mga hulagway sa mga butang nga atong gibuhat kanunay, sama sa nagkaon, natulog, o nagdula. Sa unsa nga paagi kining mga butanga nagtabang kanato? Pagpakita og hulagway sa usa ka bata nga nag-ampo samtang ikaw nagbasa ngadto sa mga bata gikan sa Doktrina ug mga Pakigsaad 10:5 sa mga pulong “pag-ampo sa kanunay.” Hangyoa ang mga bata sa pagbalik og sulti niini nga mga pulong sa makadaghan nga higayon. Sa unsa nga paagi ang pag-ampo sa kanunay nagtabang kanato?

• Gamita ang pahina sa kalihokan niini nga semana sa pagtabang sa mga bata sa paghunahuna sa daghan nga mga dapit ug mga panahon diin kita makaampo.

• Dapita ang mga bata sa pagdrowing og mga hulagway sa ilang mga kaugalingon o sa ilang mga pamilya nga nag-ampo sa nagkalainlaing mga panahon ug mga dapit sama sa simbahan, sa dili pa mo-eskwela, o sa pagkatulog. Ipasabut nga ang pag-ampo sa kanunay nangahulugan og pag-ampo sa kanunay sa tibuok adlaw. Unsaon nato sa pag-ampo bisan og kita kauban sa ubang mga tawo, sama diha sa eskwelahan o uban sa atong mga higala?

  

  Ang Ginoo motabang kanato kon kita mag-ampo.

Doktrina ug mga Pakigsaad 11:12–13

Ang Espiritu Santo naggiya kanako sa pagbuhat og maayo.

Bisan sa batan-ong edad, ang mga bata makasugod sa pag-ila kon ang Espiritu nagsulti ngadto kanila.

Posible nga mga Kalihokan

• Pagtago og bombilya o flashlight ug usa ka hulagway sa malipayon nga nawong bisan diin sa kwarto. Dapita ang mga bata sa pagpangita niini nga mga butang. Basaha ang Doktrina ug mga Pakigsaad 11:13, ug tabangi ang mga bata sa pag-ila sa mga pulong nga kalabut ngadto sa mga butang nga ilang napalgan. Unsa ang gitudlo niini nga mga pulong mahitungod kon sa unsa nga paagi ang Espiritu Santo nagtabang kanato?

• Hatagi ang mga bata og daghang mga sitwasyon diin sila nagkinahanglan nga mopili tali sa matarung ug sayop—sama sa pagpili sa pagsulti sa tinuod o sa pagpamakak, o sa pagpili sa pagkamaloloy-on o sa pagkadautan. Unsaon nato sa pagkahibalo hain nga pagpili ang matarung? Pagbasa og dungan sa Doktrina ug mga Pakigsaad 11:12, ug ipamatuod nga ang Espiritu Santo motabang kanato sa paghimo og matarung nga pagpili kon kita maminaw ngadto Kaniya.

• Pagkanta og usa ka awit mahitungod sa paggiya sa Espiritu Santo, sama sa “Listen, Listen” (Children’s Songbook, 107). Pangutan-a ang mga bata kon unsa ang gitudlo sa awit mahitungod sa giunsa pagtabang sa Espiritu Santo kanato.

Itudlo ang Doktrina: Mas Dagko nga mga Bata

Doktrina ug mga Pakigsaad 10:5

Kon ako mag-ampo sa kanunay, makabuntog ako sa mga tintasyon ni Satanas.

Makatabang ka sa mga bata sa pagsabut nga ang kanunay nga pag-ampo naghatag kanila og gahum sa pagbuntog sa tintasyon.

Posible nga mga Kalihokan

• Isulat ang pulong o mga hugpong sa mga pulong gikan sa Doktrina ug mga Pakigsaad 10:5 diha sa ginunting nga mga papel, ug hangyoa ang mga bata sa pagpahimutang niini sa husto nga pagkasunod-sunod. Awhaga sila sa pagpangita sa bersikulo kon nagkinahanglan sila og tabang. Sumala niini nga bersikulo, unsa nga mga panalangin ang moabut kon kita mag-ampo sa kanunay? Sa unsa nga paagi nga ang paghinumdom sa pag-ampo sa atong tibuok adlaw nagtabang kanato, ilabi na kon kita gitintal sa pagbuhat og sayop?

• Dapita ang mga bata sa paghimo og lista sa pipila ka mga panahon nga kita makaampo ug ang mga dapit diin kita makaampo. Alang sa dugang nga mga ideya, awhaga sila sa pagpangita diha sa Alma 34:17–27.

• Tabangi ang mga bata sa paghimo og gamay nga timaan o hulagway nga mopahinumdom kanila sa pag-ampo sa kanunay. Dapita sila sa pagbitay sa ilang mga timaan diha sa ilang mga panimalay diin ilang makita kini sa kanunay.

Doktrina ug mga Pakigsaad 11:12–13

Ang Espiritu Santo naggiya kanako sa pagbuhat og maayo.

Ang batan-ong mga tawo kasagaran naghunahuna kon sama sa unsa ang paggiya sa Espiritu Santo. Makagamit ka sa Doktrina ug mga Pakigsaad 11 sa pagtudlo sa mga bata kon unsaon sa pag-ila “niana nga Espiritu nga nagtultol sa pagbuhat og maayo” (bersikulo 12).

Posible nga mga Kalihokan

• Tabangi ang mga bata sa paghimo og lista sa mga tawo nga ilang adtoon kon sila nagkinahanglan og tabang o adunay pangutana. Nganong mosalig kita nga kini nga mga tawo motabang kanato? Dapita ang mga bata sa pagbasa sa Doktrina ug mga Pakigsaad 11:12 ug pangitaa unsay gisulti ngadto ni Hyrum nga saligan. Unsa ang atong makat-unan gikan niini nga bersikulo mahitungod kon ngano kita kinahanglan nga mosalig sa paggiya sa Espiritu Santo?

• Pangutan-a ang mga bata kon unsa ang ilang isulti ngadto sa usa ka higala kinsa nangutana kanila kon sama sa unsa ang ilang bation kon ang Espiritu Santo makigsulti ngadto kanila. Dapita ang mga bata sa pagbasa sa Doktrina ug mga Pakigsaad 11:12–13 aron sa pagpangita og posible nga mga tubag.

• Pakigbahin sa mga bata og pipila ka mga kasinatian nga ikaw aduna kaniadto uban sa Espiritu Santo nga naggiya kanimo sa pagbuhat og maayo nga mga butang. Dapita ang mga bata sa pagpamalandong kanus-a kaha sila dihay mga kasinatian sama niini ug dayon ipakigbahin ang ilang mga kasinatian kon bation nila nga komportable sila sa pagbuhat sa mao. Ipamatuod nga ang Langitnong Amahan gusto nga mogiya kanato pinaagi sa Espiritu Santo. Awhaga ang mga bata sa pagpamatikod sulod sa umaabut nga semana kon sila adunay mga pagbati sama niadtong gihulagway diha sa Doktrina ug mga Pakigsaad 11:12–13.

Doktrina ug mga Pakigsaad 11:21, 26

Kinahanglan nga mahibalo ako sa ebanghelyo aron makatabang ako sa uban sa pagpangita sa kamatuoran.

Ang mga bata nga imong gitudloan makabaton og daghang mga oportunidad sa pagpakigbahin sa ebanghelyo. Kini nga mga bersikulo makatabang kanila kon unsaon sa pagpangandam alang niini nga mga oportunidad.

Posible nga mga Kalihokan

• Dapita ang mga bata sa pag-role play kon unsaon nila sa pagsulti mahitungod sa ebanghelyo ngadto sa usa ka tawo kinsa wala makadungog niini kaniadto. Sama pananglit, unsaon nila pagtubag ang mga pangutana mahitungod sa Basahon ni Mormon? Unsaon nila sa pagpasabut kon kinsa si Jesukristo? Pagbasa uban sa mga bata sa Doktrina ug mga Pakigsaad 11:21, 26. Unsa ang gisulti sa Ginoo ni Hyrum Smith nga iyang gikinahanglan nga buhaton aron siya makatudlo sa ebanghelyo? Unsa ang kahulugan sa “pagbaton” sa pulong sa Dios, ug sa unsa nga paagi kita makabuhat niini? Unsaon nato sa “pagmahal”sa pulong sa Dios diha sa atong mga kasingkasing?

• Dapita ang mga bata sa pagpakigbahin og kasulatan nga ilang ganahan ug ipasabut nganong sila ganahan niini. Pasultiha sila kon giunsa sa mga kasulatan sa pagpanalangin sa ilang mga kinabuhi ug unsa ang ilang gibuhat sa pagtuon sa pulong sa Dios diha sa panimalay. Awhaga sila sa paghimo og mga tumong sa pagbasa pa sa kanunay sa pulong sa Dios.

• Panganta og dungan sa usa ka awit mahitungod sa pagpaambit sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90). Unsa ang gitudlo niini nga awit mahitungod kon sa unsa nga paagi kita mahimong mga misyonaryo sa matag adlaw?

• Pakigbahin og usa ka butang gikan sa “Hope of Israel” ni Presidente Russell M. Nelson ug Sister Wendy W. Nelson (tibuok kalibutan nga debosyonal alang sa mga kabatan-onan, Hunyo 3, 2018, ChurchofJesusChrist.org) aron sa pagdasig sa mga bata sa pagtabang og pundok sa mga anak sa Dios pinaagi sa pagpakigbahin sa ebanghelyo.

Awhaga ang Pagkat-on diha sa Panimalay

Dapita ang mga bata sa pakig-istoryahay sa usa ka sakop sa pamilya mahitungod sa usa ka butang nga ilang nakat-unan gikan sa Doktrina ug mga Pakigsaad 10 o 11 karon. Sama pananglit, makapaambit sila kon giunsa nila sa pagplano nga mag-ampo sa kanunay.

Pagpalambo sa Atong Pagtudlo

Pagtinguha og pagpadayag matag adlaw. Samtang ikaw nangandam sa pagtudlo, pag-ampo ug pamalandong sa mga kasulatan sa tibuok semana. Imong mahibaloan nga ang Espiritu “mohatag og kahayag sa imong hunahuna” (Doktrina ug mga Pakigsaad 11:13). Ang mga ideya ug mga panghunahuna mahitungod kon unsaon sa pagtudlo makaabut kanimo sa bisan kanus-a ug bisan asa—samtang nagbiyahe ka padulong sa trabaho, nagbuhat sa buluhaton sa panimalay, o nakigsultihanay sa uban.