Enero 25–31

Doktrina ug mga Pakigsaad 6–9

“Kini Mao ang Espiritu sa Pagpadayag”

Pagsugod og pangandam sa pagtudlo pinaagi sa pagbasa sa Doktrina ug mga Pakigsaad 6–9. Dali, Sunod Kanako—Alang sa mga Indibidwal ug sa mga Pamilya ug kini nga outline makapakidlap og mga ideya mahitungod kon unsaon pagtudlo ang mga bata diha sa imong klase.

Irekord ang Imong mga Impresyon

Dapita ang Pagpaambit

Nakahibalo ba ang mga bata sa istorya ni Oliver Cowdery mahitungod sa pagdawat og tubag sa pag-ampo? (tan-awa sa Saints, 1:58–60). Tingali sila usab adunay kasinatian sa pag-ampo nga ilang ikapakigbahin.

Itudlo ang Doktrina: Mas Gagmay nga mga Bata

Doktrina ug mga Pakigsaad 6:5; 8:2; 9:7–9

Ang Langitnong Amahan makasulti kanato pinaagi sa Espiritu Santo.

Tabangi ang mga bata sa pagsabut nga sila adunay mahigugmaon nga Amahan sa Langit kinsa naminaw sa ilang mga pag-ampo ug nagtubag niini pinaagi sa Iyang Espiritu.

Posible nga mga Kalihokan

• Gamita ang “Kapitulo 5: Si Joseph Smith ug Oliver Cowdery” (Mga Istorya sa Doktrina ug mga Pakigsaad, 22–25, o ang katugma nga video sa ChurchofJesusChrist.org) aron sa pagsulti sa mga bata mahitungod ni Oliver Cowdery ug unsa ang iyang nakat-unan kon sa unsa nga paagi ang Langitnong Amahan nakigsulti kanato. Hangyoa ang mga bata sa pagsulti kanimo sa ilang paborito nga bahin sa istorya, ug papuli-puliha sila sa pagsulti kanimo mahitungod ni Oliver Cowdery.

• Sultihi ang mga bata nga si Oliver Cowdery misulay sa paghubad sa Basahon ni Mormon apan dili makahimo, busa nangutana si Joseph sa Ginoo kon ngano. Basaha ngadto sa mga bata ang tubag sa Ginoo: “Ikaw kinahanglan gayud nga magtuon niini diha sa imong hunahuna; unya ikaw kinahanglan nga mangutana kanako kon kini husto” (Doktrina ug mga Pakigsaad 9:8). Dapita sila nga magpakaaron-ingnon nga nagtuon ug nag-ampo. Tabangi ang mga bata sa pagsabut nga kini mao usab ang paagi nga kita makadawat og mga tubag gikan sa Ginoo—pinaagi sa pagtuon ug sa pagpangayo alang sa Iyang panabang.

  

  Oliver Cowdery, ni Lewis A. Ramsey

• Dapita ang mga bata sa paghikap sa ilang mga ulo ug sa ilang mga dughan samtang imong basahon ang mga pulong nga “hunahuna” ug “kasingkasing” diha sa Doktrina ug mga Pakigsaad 8:2. Tabangi sila sa pagsabut nga ang Langitnong Amahan nagsulti ngari kanato pinaagi sa Espiritu Santo, kinsa ang naghatag kanato og mga hunahuna ug mga pagbati. Panganta og dungan sa usa ka awit mahitungod sa Espiritu Santo, sama sa “Ang Espiritu Santo” (Songbook sa mga Bata, 56). Unsa ang gitudlo sa awit mahitungod kon sa unsa nga paagi ang Espiritu nagsulti kanato? Pakigbahin og kasinatian sa dihang imong gibati ang Espiritu Santo diha sa imong hunahuna ug kasingkasing.

Doktrina ug mga Pakigsaad 6:33–36

Uban sa panabang sa Manluluwas, dili ako kinahanglan nga mahadlok.

Si Joseph Smith ug si Oliver Cowdery adunay daghan nga katarungan nga mahadlok—pagpanggukod ug kakabus ang pipila lamang sa mga hagit nga ilang giatubang. Ang mensahe sa Ginoo ngadto ni Joseph ug Oliver makaawhag usab sa mga bata kon sila mobati og kahadlok.

Posible nga mga Kalihokan

• Hangyoa ang mga bata sa pagsulti og balik sa hugpong sa mga pulong “ayaw kahadlok, gagmay nga panon” (Doktrina ug mga Pakigsaad 6:34) sa makadaghan nga higayon. Ipasabut nga ang panon usa ka pundok sa mga hayop, sama sa karnero. Pagpakita og usa ka hulagway sa Manluluwas isip usa ka magbalantay sa karnero (tan-awa sa Libro sa mga Hulagway sa Ebanghelyo, nu. 64), ug pagpamatuod nga Siya nagbantay kanato sama sa usa ka magbalantay nga nagbantay sa Iyang mga karnero. Tungod kay Siya nahigugma kanato, kita dili kinahanglan nga mahadlok.

• Ingna ang mga bata nga magpakaaron-ingnon nga usa ka panon sa nahadlok nga mga karnero. Unsa kaha usahay ang kahadlokan sa mga karnero? Tuguti ang usa ka bata nga magpakaaron-ingnon nga mao ang magbalantay nagbantay sa mga karnero nga luwas. Unsa usahay ang atong kahadlokan? Pagpamatuod nga si Jesukristo sama sa atong magbalantay ug nga Siya makahupay sa atong mga kahadlok. Panganta og dungan sa usa ka awit mahitungod sa Manluluwas, sama sa “Little Lambs So White and Fair” (Children’s Songbook, 58).

• Basaha ang Doktrina ug mga Pakigsaad 6:36 ngadto sa mga bata, ug dapita sila sa pagbalik og sulti sa hugpong sa mga pulong “ayaw pagduha-duha, ayaw kahadlok.” Tabangi ang mga bata sa paghunahuna og mga paagi nga sila “makahunahuna ngari,” o makahinumdom, sa Manluluwas sulod sa umaabut nga semana (tan-awa usab ang pahina sa kalihokan niini nga semana).

Itudlo ang Doktrina: Mas Dagko nga mga Bata

Doktrina ug mga Pakigsaad 6:5, 15–16, 22–23; 8:2; 9:7–9

Ang Espiritu Santo nagsulti sa akong hunahuna ug sa akong kasingkasing.

Ang mga bata nga imong gitudloan mahimong nakadawat og gasa sa Espiritu Santo. Nakasabut ba sila kon unsaon sa pag-ila og personal nga pagpadayag gikan sa Espiritu?

Posible nga mga Kalihokan

• Pagdrowing diha sa pisara og usa ka ulo ug usa ka kasingkasing. Tabangi ang mga bata sa pagbasa sa mosunod nga mga bersikulo ug tinoa hain ang naghulagway sa Espiritu Santo nga nagsulti ngadto sa atong mga hunahuna, ngadto sa atong mga kasingkasing, o sa duha: Doktrina ug mga Pakigsaad 6:15, 23; 8:2; 9:8; 9:9. Sultihi ang mga bata, gikan sa imong mga kasinatian, unsa kini sama kon ang Espiritu Santo nagsulti nganha sa imong hunahuna ug kasingkasing.

• Pagbasa og dungan sa Doktrina ug mga Pakigsaad 6:5, ug dapita ang mga bata sa pagpakigbahin og mga kasinatian nga sila aduna sa pag-ampo ug sa pagdawat og mga tubag. Tabangi sila sa paghunahuna og mga ehemplo sa usa ka tawo diha sa mga kasulatan kinsa nag-ampo ug nakadawat og tubag sa usa ka pangutana (tan-awa sa 1 Nephi 2:16; Enos 1:1–6; Ether 2:18–3:6).

• Isulat diha sa pisara Sa unsa nga paagi ang Espiritu Santo nagsulti kanato? Dapita ang mga bata sa pagsiksik diha sa Doktrina ug mga Pakigsaad 6:15–16, 22–23; 8:2; 9:7–9 alang sa mga tubag sa pangutana. Pakigbahin og mga kasinatian diin imong gibati ang Espiritu Santo nga nagsulti nganha kanimo.

Doktrina ug mga Pakigsaad 6:33–37

“Ayaw kahadlok sa pagbuhat og maayo.”

Ang mga bata nga imong gitudloan mahimo nga usahay mobati og kahadlok sa pagbarug alang sa matarung. Ang Doktrina ug mga Pakigsaad 6:33–37 makadasig kanila nga magmaisugon, bisan pa sa malisud nga mga kahimtang.

Posible nga mga Kalihokan

• Pagbasa og dungan sa Doktrina ug mga Pakigsaad 6:33, ug paghisgot kon ngano nga ang usa ka tawo mahimong mahadlok sa pagbuhat og maayo (tan-awa usab sa mga bersikulo 28–29). Tabangi ang mga bata sa pagpangita og mga pulong o hugpong sa mga pulong diha sa mga bersikulo 33–37 nga nagtabang sa paghatag kanila og kaisug sa pagbuhat og maayo.

• Tabangi ang mga bata sa paghimo og mga drowing nga ilang ikapakita sa ilang mga panimalay aron sa pagpahinumdom kanila sa “paghunahuna ngari ni [Jesukristo] sa matag hunahuna” (bersikulo 36). Samtang sila naghimo sa ilang mga drowing, paghisgot kon unsa ang kahulugan sa paghunahuna ngadto sa Manluluwas ug sa unsa nga paagi kini naghimo kanila nga luwas.

• Panganta og dungan sa usa ka awit mahitungod sa kaisug, sama sa “Buhata Gayud ang Matarung” (Songbook sa mga Bata, 80) o “Let Us All Press On” (Hymns, nu. 243). Hangyoa ang mga bata sa pagpangita diha sa awit og pipila ka mga katarungan kon ngano nga kita kinahanglan nga “dili mahadlok” (bersikulo 36).

Doktrina ug mga Pakigsaad 8:10

Ako makapangayo diha sa hugot nga pagtuo.

Sa tibuok nga mga kasulatan, nagpahinumdom ang Ginoo kanato sa pagbaton og hugot nga pagtuo diha Kaniya. Sa unsa nga paagi ikaw makatabang sa mga bata nga imong gitudloan nga makabaton og mas dako nga hugot nga pagtuo diha ni Jesukristo?

Posible nga mga Kalihokan

• Isulat diha sa pisara Kon walay ikaw walay mahimo; busa pangayo diha sa . Dapita ang mga bata sa pagsulay sa paghunahuna og pulong nga mohaum sa duha ka mga blangko. Dayon pagbasa og dungan sa Doktrina ug mga Pakigsaad 8:10 aron makaplagan ang tubag. Unsa ang pipila ka mga butang nga kita makahimo kon kita adunay hugot nga pagtuo?

• Human sa pagdungan og basa sa Doktrina ug mga Pakigsaad 8:10, tabangi ang mga bata sa paghunahuna og mga butang nga sila makapangayo sa Ginoo aron sila matabangan. Dapita sila sa pagdrowing og usa ka hulagway nga nagrepresentar sa usa ka butang nga kinahanglan nilang pangayoon. Samtang ilang ipakita sa klase ang ilang mga hulagway, ipatagna sa ubang mga bata unsa ang girepresentar sa hulagway.

Awhaga ang Pagkat-on diha sa Panimalay

Tabangi ang mga bata sa pagpili og usa ka mubo nga hugpong sa mga pulong gikan sa Doktrina ug mga Pakigsaad 6–9 nga gusto nilang ipakigbahin ngadto sa usa ka tawo sa panimalay, sama sa “ayaw kahadlok sa pagbuhat og maayo” (6:33), “ayaw pagduha-duha, ayaw kahadlok” (6:36), o “kon wala ang hugot nga pagtuo ikaw walay mahimo” (8:10).

Pagpalambo sa Atong Pagtudlo

Paggamit og mga istorya. Ang mga istorya makatabang sa mga bata nga makasabut sa mga baruganan sa ebanghelyo tungod kay nagpakita kini kon giunsa sa uban sa pagsunod niadto nga mga baruganan. Samtang ikaw nagtudlo, pangita og mga paagi sa paglakip og mga istorya—gikan sa mga kasulatan, gikan sa kasaysayan sa Simbahan, o gikan sa imong kaugalingon nga kinabuhi—nga naghulagway sa mga baruganan diha sa mga kasulatan.