Moroni nagpakita ngadto ni Joseph Smith

Gitawag Ako Niya pinaagi sa Akong Ngalan, ni Michael Malm

Enero11–17

Doktrina ug mga Pakigsaad 2; Joseph Smith—Kasaysayan 1:27–65

“Ang mga Kasingkasing sa mga Anak Mobati ngadto sa iIang mga Amahan”

Sugdi ang imong pagpangandam pinaagi sa pagbasa sa Doktrina ug mga Pakigsaad 2 ug Joseph Smith—Kasaysayan 1:27–65. Ang mga ideya dinhi sa outline makatabang kanimo sa pagtudlo sa mga kamatuoran sa niini nga mga tudling.

Irekord ang Imong mga Impresyon

pagpaambit nga icon

Dapita ang Pagpaambit

Makasugod ka sa klase pinaagi sa paghangyo sa mga bata sa pagpakigbahin unsa ang ilang nahibaloan mahitungod sa pagbisita ni anghel Moroni ngadto ni Joseph Smith.

pagtudlo nga icon

Itudlo ang Doktrina: Mas Gagmay nga mga Bata

Joseph Smith—Kasaysayan 1:27–54

Gitawag sa Langitnong Amahan si Joseph Smith aron sa pagtabang Kaniya sa pagbuhat sa Iyang buluhaton.

Ang pagpasalamat sa mga bata kang Propeta Joseph Smith magkalawom samtang sila nagkat-on mahitungod sa buluhaton nga gitawag sa Dios kaniya nga ipabuhat.

Posible nga mga Kalihokan

• Ipakita ang usa ka hulagway ni Moroni nga nagbisita ni Joseph Smith (tan-awa sa Libro sa mga Hulagway sa Ebanghelyo, nu. 91). Hangyoa ang mga bata sa pagsulti kon unsa ang ilang nakita diha sa hulagway. I-summarize ang istorya sa mga pagbisita ni Moroni ni Joseph. Kutob sa panginahanglan, tan-awa ang Joseph Smith—Kasaysayan 1:27–54 ug “Kapitulo 3: Ang Anghel Moroni ug ang Bulawan nga mga Palid” (Mga Istorya sa Doktrina ug mga Pakigsaad, 13–17). Dapita ang mga bata sa pagpakaaron ingnon nga si Joseph Smith diha sa nagkalainlaing bahin sa istorya pinaagi sa pagkyugpos sa ilang mga bukton sama nga sila nag-ampo, nagpakaaron ingnon nga nagsaka sa Bungtod Cumorah, ug uban pa.

• Basaha og kusog ang Joseph Smith—Kasaysayan 1:33, ug hangyoa ang mga bata sa pagbarug kon madungog nila ang hugpong sa mga pulong “Ang Dios adunay ipabuhat kanako.” Unsa ang gusto sa Dios nga ipabuhat ni Joseph? Unsay Iyang gusto nga ipabuhat kanato? Ipadrowing sa mga bata ang mga hulagway sa mga butang nga gusto sa Dios nga ilang buhaton, sama sa pag-ampo, pagserbisyo, o pagbasa sa mga kasulatan.

Doktrina ug mga Pakigsaad 2

Gihatagan ni Elijah si Joseph Smith og gahum sa pagbugkos sa mga pamilya.

Ang pagkat-on mahitungod sa gahum sa pagbugkos nga gipahiuli pinaagi ni Joseph Smith makatabang sa mga bata sa pagpasalamat sa mga panalangin sa mahangturon nga mga pamilya.

Posible nga mga Kalihokan

• Tabangi ang mga bata sa paglitok sa ngalan nga “Elijah” sa pipila ka mga higayon. Hangyoa sila sa pagpaminaw niini nga ngalan samtang ikaw nagbasa sa Doktrina ug mga Pakigsaad 2:1. Ipasabut nga kini mga pulong ni Moroni ngadto ni Joseph Smith, ug nagtudlo kini nga si Elijah moanhi aron sa pagpahiuli sa awtoridad sa pagkapari. Wala madugay si Elijah mipakita ngadto ni Joseph didto sa Templo sa Kirtland ug gihatag sa Propeta ang gahum sa pagbugkos sa mga pamilya.

• Dapita ang mga bata sa pagsulti sa klase kon unsa ang ilang nahigugmaan mahitungod sa ilang pamilya. Pagpakita og litrato sa usa ka pamilya tupad sa usa ka templo—imong kaugalingon nga pamilya, kon mahimo (o tan-awa sa Libro sa mga Hulagway sa Ebanghelyo, nu. 120). Ipamatuod nga gusto sa Langitnong Amahan nga mag-uban ang mga pamilya sa kahangturan, ug mao kini ang usa ka rason nga Siya naghatag kanato og mga templo.

• Kantaha og dungan ang “Mga Pamilya Mahimong Manag-uban sa Kahangturan” (Songbook sa mga Bata, 98). Unsa ang gisulti niini nga awit nga atong mabuhat aron mag-uban ang atong mga pamilya sa kahangturan?

Doktrina ug mga Pakigsaad 2

Ang pagkat-on mahitungod sa akong mga katigulangan makahatag kanako og hingpit nga kalipay.

Bisan ang gagmay nga mga bata maghinam-hinam ug mobati og hingpit nga kalipay sa family history.

Posible nga mga Kalihokan

• Dapita ang usa ka ginikanan sa usa sa mga bata nganha sa klase ug sa pagpakigbahin og usa ka istorya mahitungod sa katigulangan (ug pagpakita og litrato kon anaa). Pag-istorya mahitungod sa hingpit nga kalipay nga imong gibati sa dihang nahibaloan nimo ang mahitungod sa imong family history.

• Hatagi ang matag bata og kasingkasing nga papel. Tabangi sila sa pagsulat sa ilang ngalan ug sa “Ako nagsaad sa paghinumdom sa akong mga katigulangan” diha niini. Basaha ang Doktrina ug mga Pakigsaad 2:2, ug ipasabut nga si Elijah mianhi aron mobati ang atong mga kasingkasing sa atong mga katigulangan.

pagtudlo nga icon

Itudlo ang Doktrina: Mas Dagko nga mga Bata

Joseph Smith—Kasaysayan 1:28–29

Makaampo ako aron mapasaylo.

Ang mga bata nga imong gitudloan usahay mahimong mobati og “panghimaraut tungod sa [ilang] kahuyang ug mga kasaypanan” (Joseph Smith—Kasaysayan 1:29) sama ni Joseph Smith. Tabangi sila sa pagkat-on nga sila makadangop ngadto sa Langitnong Amahan alang sa kapasayloan.

Posible nga mga Kalihokan

• Basaha uban sa mga bata ang Joseph Smith—Kasaysayan 1:29. Unsay gibati ni Joseph Smith mahitungod sa iyang mga kasaypanan? Unsa iyang gibuhat mahitungod niini? Unsay atong makat-unan gikan sa ehemplo ni Joseph nga makatabang kanato kon makahimo kita og mga kasaypanan? Pangutan-a ang mga bata unsay ilang gibati nga nakahibalo nga si Joseph gitawag sa Dios bisan og siya dili hingpit.

• Nganong importante kini sa paghunahuna mahitungod sa atong “kahimtang sa atubangan sa [Dios]”? (Joseph Smith—Kasaysayan 1:29). Sultihi ang mga bata kon unsa ang imong buhaton kon naghunahuna ka mahitungod sa imong kahimtang uban sa Dios.

Joseph Smith—Kasaysayan 1:30–54

Gitawag si Joseph Smith sa Dios aron pabuhaton og importante nga buhat.

Ang pagtuon sa mensahe ni Moroni ngadto ni Joseph Smith makatabang sa mga bata sa paglig-on sa ilang mga pagpamatuod mahitungod sa sagrado nga calling ni Joseph.

Posible nga mga Kalihokan

• Dapita ang mga bata sa paglihok o sa pagdrowing og mga hulagway sa mga hitabo gikan sa Joseph Smith—Kasaysayan 1:30–54, sama sa pagpakita ni Moroni ngadto ni Joseph (mga bersikulo 30–47), Joseph nakigsulti ngadto sa iyang amahan (mga bersikulo 48–50), ug pagkakaplag ni Joseph sa mga palid (mga bersikulo 51–54). Unsa ang atong nakat-unan gikan niini nga istorya mahitungod sa buluhaton nga si Joseph gitawag sa pagpabuhat?

• Basaha uban sa mga bata ang Joseph Smith—Kasaysayan 1:33–35, ug hangyoa sila sa pagpaminaw sa unsay gusto ni Moroni nga mahibaloan ni Joseph mahitungod sa buluhaton nga si Joseph gitawag sa pagpabuhat. Sa unsa nga paagi kita napanalanginan tungod sa pagtuman ni Joseph Smith sa iyang buluhaton isip tighubad sa Basahon ni Mormon? Dapita ang mga bata sa pagbasa sa Basahon ni Mormon kanunay.

Doktrina ug mga Pakigsaad 2

Gusto sa Langitnong Amahan nga ang mga pamilya mabugkos diha sa templo.

Gisultihan ni Moroni si Joseph Smith nga si Elijah moanhi aron “mopadayag … sa Pagkapari” (bersikulo 1). Kini nagpasabut ngadto sa gahum sa pagkapari sa pagbugkos nga nagtugot sa mga pamilya nga mahiusa sa kahangturan ug naghimo kanato sa pagdawat sa mga ordinansa alang sa atong mga katigulangan diha sa templo.

Posible nga mga Kalihokan

• Hangyoa ang mga bata sa pagbasa sa panagna diha sa Doktrina ug mga Pakigsaad 2:1. Hangyoa sila sa pagpangita kon kinsa ang ipadala sa Ginoo sa katapusang mga adlaw ug unsa ang ipadayag niini nga tawo. Pagpakita og hulagway ni Elijah diha sa Templo sa Kirtland (tan-awa sa Libro sa mga Hulagway sa Ebanghelyo, nu. 95), ug pag-istorya mahitungod kon giunsa pagtuman niini nga panagna 13 ka tuig human sa pagbisita ni Moroni (tan-awa sa Doktrina ug mga Pakigsaad 110:13–15).

• Ipasabut nga gipahiuli ni Elijah ang mga yawe sa pagkapari nga nagtugot sa mga pamilya nga mabugkos sa kahangturan. Pagpakita og pipila ka mga butang nga makatabang sa mga bata sa pagsabut unsa ang kahulugan sa pagbugkos og usa ka butang, sama sa usa ka lata sa pagkaon o usa ka plastic pundohanan nga may zipper lock. Sa unsa nga paagi kini nga mga butang nagtabang kanato sa pagsabut kon unsa ang kahulugan sa usa ka pamilya nga pagabugkuson?

• Pagpakita og hulagway sa usa ka templo, ug tabangi ang mga bata sa paghingalan og pipila ka mga butang nga atong gibuhat sa mga templo. Ipasabut nga ang mga pagbunyag alang sa patay, mahangturong kaminyoon, ug pagbugkos sa mga pamilya diha sa templo tanan nahimo tungod sa mga yawe sa pagkapari nga gipahiuli ni Elijah.

• Dapita ang usa ka batan-ong babaye o batan-ong lalaki sa ward sa pagpakigbahin og kasinatian nga nakakaplag siya og ngalan sa katigulangan ug nagpabunyag alang niana nga katigulangan diha sa templo.

  Templo sa Palmyra New York

  Mga pamilya gibugkos diha sa templo pinaagi sa gahum nga gipahiuli pinaagi ni Elijah.

pagkat-on nga icon

Awhaga ang Pagkat-on diha sa Panimalay

Awhaga ang mga bata sa paghangyo sa ilang mga ginikanan sa pag-istorya kanila mahitungod sa usa sa ilang mga katigulangan o sa pagtabang kanila sa pag-andam sa paborito nga pagkaon sa katigulangan ug mangaon niini og dungan.

Pagpalambo sa Atong Pagtudlo

Tabangi ang gagmay nga mga bata nga makakat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, itutok sa usa ka bersikulo o bisan usa lamang ka importanting hugpong sa mga pulong. Mahimo nimong dapiton ang mga bata sa pagtindog o sa pagpataas sa ilang mga kamot kon madungog nila kana nga pulong o hugpong sa mga pulong. (Tan-awa sa Pagtudlo sumala sa Pamaagi sa Manluluwas, 21.)

pahina sa kalihokan: Makahimo ako sa akong family history