“Kapitulo 3: Ang Anghel Moroni ug ang Bulawan nga mga Palid: 1823–1827,” Mga Istorya sa Pagtulun-an ug mga Pakigsaad (2002), 13–16
“Kapitulo 3,” Mga Istorya sa Pagtulun-an ug mga Pakigsaad, 13–16
Kapitulo 3
Ang Anghel Moroni ug ang Bulawan nga mga Palid
(1823–1827)
Tulo ka mga tuig ang nanglabay human ang unang panan-awon ni Joseph. Siya may napulog pito ka tuig ang panuigon. Si Joseph naghunahuna unsa ang buot ipabuhat sa Dios kaniya. Usa ka gabii si Joseph nag-ampo. Siya adunay hugot nga pagtuo nga ang Dios mosulti kaniya unsa ang buhaton.
Si Joseph nakakita ug usa ka silaw nga kahayag sulod sa iyang lawak. Usa ka anghel nagtindog diha sa kahayag. Ang nawong sa anghel silaw kaayo. Siya nagsul-ob ug puti nga kapa.
Ang anghel miingon nga ang iyang ngalan mao si Moroni. Ang Dios nagpadala kaniya aron sa pakigsulti ni Joseph. Si Moroni miingon nga ang Dios adunay buhat nga ipabuhat kang Joseph.
Ang Anghel Moroni misulti kang Joseph mahitungod sa usa ka basahon. Ang basahon mahitungod sa mga katawhan sa America sa dugay na nga panahon. Si Jesukristo mianhi niining mga katawhan. Siya mitudlo kanila sa iyang ebanghelyo.
Si Moroni miingon nga ang basahon nahisulat sa bulawan nga mga pahina. Ang mga bulawan nga mga pahina gitawag ug mga palid. Ang basahon nahisulat sa usa ka pinulongan nga kita wala masayud. Ang Dios buot nga si Joseph mohubad sa basahon. Si Joseph mosulat niini sa pinulongan nga kita masayud.
Ang Anghel Moroni miingon nga ang mga palid gitipigan sa usa ka bungtod duol sa balay ni Joseph. Kini gilubong sa yuta. Si Moroni miingon nga duha ka mga bato gitipigan uban sa bulawan nga mga palid. Kining mga bato gitawag nga Urim ug Thummim. Ang mga bato motabang ni Joseph sa paghubad sa basahon.
Si Moroni misulti kang Joseph mahitungod ni Elijah. Si Elijah usa ka halangdon nga propeta kinsa nagpuyo sa dugay nang panahon. Si Elijah adunay gahum sa pagkapari. Ang istorya ni Elijah anaa sa Daang Tugon. Si Moroni miingon nga si Elijah mobalik nganhi sa yuta. Si Elijah mosulti sa mga katawhan sa pagkat-on mahitungod sa ilang mga katigulangan. Ang mga katigulangan mao ang mga sakop sa atong banay kinsa nagpuyo nga wala pa kita.
Si Moroni misulti kang Joseph Smith mahitungod sa pagkapari. Ang pagkapari mao ang gahum sa Dios. Si Moroni miingon nga si Elijah modala sa gahum sa pagkapari sa yuta. Ang gahum sa pagkapari motabang sa mga matarung nga banay. Sila mahimo nga mabugkos. Unya sila mag-uban sa pagpuyo sa kahangturan. Si Moroni mipalayo.
Ang Anghel Moroni mibalik ug kaduha nianang gabhiona. Siya misulti kang Joseph ug daghan nga mga butang matag higayon. Siya mibiya sa pagkabuntag. Si Joseph mibangon ug mitrabaho uban sa iyang amahan didto sa umahan.
Si Joseph hilabihan sa ka kapoy nga dili makatrabaho. Siya natumba. Samtang siya naghigda, si Moroni mibalik na usab. Si Joseph misulti sa iyang amahan sa mga butang nga gitudlo ni Moroni kaniya. Ang amahan ni Joseph mituo kaniya. Siya nasayud nga ang Dios mipadala kang Moroni. Siya misulti kang Joseph sa pagsunod ni Moroni.
Si Joseph milakaw aron sa pagpangita sa bulawan nga mga palid. Siya miadto sa usa ka bungtod duol sa iyang panimalay. Kini mao ang Bungtod sa Cumorah. Ang bulawan nga mga palid didto. Kini gilubong ilawon sa usa ka dako nga bato. Kini gisulod sa usa ka kahon nga bato. Ang Urim ug Thummim diha usab sa sulod sa kahon.
Ang Anghel Moroni miduol kang Joseph. Siya dili motugot ni Joseph nga dad-on ang bulawan nga mga palid sa panimalay. Siya misulti kang Joseph sa pag-anha sa bungtod sa samang adlaw sa matag tuig sulod sa upat ka mga tuig.
Si Joseph misunod ni Moroni. Siya miadto sa Bungtod sa Cumorah matag tuig. Si Moroni mitudlo kaniya didto. Si Moroni misulti kang Joseph mahitungod sa matuod nga Simbahan ni Jesukristo. Si Jesus mosugod pag-usab sa iyang simbahan sa yuta.
Sa 1827, gihatag ni Moroni ang bulawan nga mga palid ngadto ni Joseph. Si Joseph mihulat ug upat ka tuig aron sa pagkuha sa mga palid. Si Moroni misulti kang Joseph sa pag-amping sa mga palid.
Gidala ni Joseph ang bulawan nga mga palid sa panimalay. Siya buot nga moamping niini. Dautan nga mga tawo misulay pagkawat niini. Gitipigan ni Joseph ang bulawan nga mga palid diin ang mga dautan nga mga tawo dili makakita niini. Ang Dios mitabang ni Joseph sa pagtago sa bulawan nga mga palid.