“Kapitulo 44: Ang Ikapulo: Hulyo 1838,” Mga Istorya sa Pagtulun-an ug mga Pakigsaad (2002), 165–66
“Kapitulo 44,” Mga Istorya sa Pagtulun-an ug mga Pakigsaad, 165–66
Kapitulo 44
Ang Ikapulo
(Hulyo 1838)
Ang mga Santos didto sa Far West, Missouri. Ang Ginoo nagsulti kang Joseph Smith nga ang iyang katawhan kinahanglan magbayad sa ikapulo. Miampo si Joseph sa Langitnong Amahan. Nangutana siya pila ang ibayad sa mga Santos alang sa ikapulo. Aduna siyay pagpadayag gikan sa Ginoo. Ang Ginoo miingon nga ang mga Santos kinahanglan mobayad sa ikapulo sa tanan nga ilang gipanag-iya.
Kon mokita sila ug napulo ka dako sila mohatag ug usa ka dako alang sa ikapulo. Kon sila mokita ug usa ka gatus ka dako sila mohatag ug napulo ka dako.
Ang mga Santos mahimo nga mobayad sa ikapulo sa lain nga mga paagi. Ang mga Santos mobayad sa ikapulo sa mga abut sa ilang pag-ani. Sila mohatag ug ikapulo sa ilang bugas ug kumpay. Sila mohatag sa ikapulo sa ilang mga manok ug uban pang mga kahayupan. Sila mobayad sa ikapulo sa gatas ug mga utanon.
Ang salapi nga gikan sa ikapulo gamiton alang sa hinabang sa mga sakop sa Simbahan. Ang ikapulo makatabang sa pagpalit sa pagkaon ug mga saput alang sa mga katawhan nga nagkinahanglan.
Ang ikapulo gamiton alang sa pagtukod ug mga templo ug sa pagtabang sa buluhaton nga misyonaryo. Kini usab gamiton aron sa pagtabang sa mga katawhan nga migahin sa tanan nilang panahon ug buluhaton alang sa Ginoo.
Mohatag kita sa atong ikapulo ngadto sa bishop. Ang bishop mohatag niini ngadto sa mga pangulo sa Simbahan. Sila ang magpahigayon unsaon paggamit ang ikapulo.
Ang Langitnong Amahan mohatag ug mga maanindot nga panalangin ngadto sa mga Santos nga nagbayad sa ikapulo. Ang mga Santos nga wala magbayad sa ikapulo dili makaangkon sa tanan niining mga panalangin. Ang Bibliya nag-ingon nga ang mga Santos nga dili mobayad sa ikapulo nangawat sa Dios.