Pasiuna

Sa Wala pa ang Pagtulun-an ug mga Pakigsaad

Kita nagpuyo didto sa langit sa wala pa kita moanhi sa yuta. Ang atong Langitnong Amahan naghatag kanato ug usa ka laraw sa kaluwasan. Ang Iaraw sa kaluwasan makatabang kanato sa pagpangandam sa pagpuyo didto sa langit pag-usab. Kon kita mosunod sa laraw, kita makapuyo uban sa Langitnong Amahan human kita mabanhaw.

Si Jesus nagpuyo uban kanato didto sa langit. Siya buot nga motuman sa laraw sa Langitnong Amahan. Si Jesus miingon nga siya moanhi sa yuta ug mahimo nga atong Manluluwas. Siya mohimo sa trabaho sa Langitnong Amahan.

Si Satanas nagpuyo usab uban kanato didto sa langit. Apan siya dautan. Siya dili buot nga mosunod sa laraw sa Langitnong Amahan. Gipapahawa sa Langitnong Amahan si Satanas sa langit. Si Satanas buot moguba sa laraw sa kaluwasan. Siya buot nga mopahunong sa trabaho sa Langitnong Amahan.

Si Jesus mihimo sa kalibutan. Ang mga anak sa Langitnong Amahan nagpuyo niini. Nagpadala si Jesus ug mga propeta aron sa pagtudlo kanila sa pagkamatarung. Ang uban sa mga katawhan misunod sa mga propeta.

Ang uban nga mga katawhan dinhi sa yuta wala maminaw sa mga propeta. Kini nga mga katawhan misunod ni Satanas. Sila nahimo nga mga dautan.

Ang Daang Tugon nagsaysay mahitungod sa mga tawo kinsa nagpuyo sa Palistina sa dugay nang panahon. Kadtong mga katawhan nasayud mahitungod ni Jesus. Ang mga matarung nga katawhan nakaangkon sa iyang ebanghelyo. Ang mga matarung nga katawhan nakaangkon sa gahum sa pagkapari. Ang mga propeta nagtudlo sa mga katawhan nga si Jesus moanhi sa yuta. Siya mahimo nga ilang Manluluwas.

Ang Basahon ni Mormon nagsaysay mahitungod sa mga tawo kinsa nagpuyo sa America sa dugay nang panahon. Sila nasayud mahitungod ni Jesus. Sila nakabaton sa iyang ebanghelyo. Ang matarung nga mga tawo nakaangkon sa gahum sa pagkapari. Ang mga propeta nagtudlo sa mga katawhan sa America nga si Jesus mahimo nga ilang Manluluwas. Siya moduaw kanila human siya mabanhaw.

Si Jesukristo mianhi sa yuta aron sa pagpuyo. Ang Bag-ong Tugon nagsaysay mahitungod sa iyang kinabuhi dinhi sa yuta. Si Jesus nagtudlo sa mga katawhan sa iyang ebanghelyo. Siya nagtudlo kanila sa pagsunod sa mga kasugoan sa Langitnong Amahan.

Si Jesus mipili ug napulo ug duha ka mga lalaki aron himoon nga mga Apostoles. Siya mihatag kanila sa gahum sa pagkapari. Siya misugod sa iyang simbahan. Daghang mga katawhan ang nahigugma kang Jesus. Sila mga matarung ug nagsunod sa iyang mga pagtulun-an.

Si Satanas dili buot nga ang mga katawhan mosunod kang Jesus. Si Satanas mitintal sa mga katawhan, ug sila nahimong mga dautan. Sila wala mosunod ni Jesus. Sila nasilag kang Jesus. Ilang gipatay siya.

Human sa tulo ka mga adlaw, si Jesus nabanhaw. Siya nakigsulti sa iyang mga Apostoles. Siya nagsugo kanila sa pagtudlo sa ebanghelyo ngadto sa tanang mga katawhan. Si Jesus usab miduaw sa mga matarung nga katawhan sa America. Unya siya miadto sa langit aron makig-uban sa iyang Amahan.

Ang mga Apostoles mao ang mga pangulo sa Simbahan ni Jesukristo. Sila miadto sa daghang mga kayutaan. Sila nagtudlo sa mga katawhan sa ebanghelyo. Daghan nga mga katawhan mituo kang Jesus ug nagpabunyag. Ang mga Apostoles naghatag sa mga matarung nga lalaki sa gahum sa pagkapari. Dihay daghan nga mga sakop sa tinuod nga Simbahan ni Jesukristo.

Si Satanas buot moguba sa Simbahan ni Jesukristo. Siya mitintal sa mga katawhan, ug sila misunod kaniya. Daghan nga mga katawhan mihunong sa pagtuo ni Jesus. Gipamatay sa mga dautan nga katawhan ang mga matarung nga sakop sa Simbahan. Ilang gipatay ang mga Apostoles. Wala nay mga pangulo ang Simbahan. Walay usa sa yuta nga makahatag sa gahum sa pagkapari ngadto sa mga kalalakin-an.

Ang uban sa mga katawhan miusab sa mga pagtulun-an sa Simbahan ni Jesukristo. Ilang giusab ang mga kasugoan sa Dios. Ang matuod nga simbahan nga gisugdan ni Jesus nawala. Ang mga katawhan nagsugod paghimo ug ilang kaugalingon nga mga simbahan. Apan wala sa mga simbahan ang matuod nga simbahan.

Gatusan ka mga tuig ang nanglabay. Dihay daghan nga nagkalainlain nga simbahan sa yuta. Apan wala kanila ang matuod nga Simbahan ni Jesukristo. Ang mga sakop sa mga simbahan nagtuo ni Jesukristo. Apan ang mga simbahan wala makaangkon sa tinuod nga ebanghelyo. Wala silay gahum sa pagkapari sa Dios. Wala silay mga propeta o mga Apostoles.

Si Jesus miingon nga siya mobalik sa yuta pag-usab. Siya miingon nga ang iyang tinuod nga simbahan kinahanglan anaa sa yuta sa dili pa siya mobalik pag-usab. Ang mga katawhan kinahanglan masayud sa iyang tinuod nga ebanghelyo. Ang mga kalalakin-an kinahanglan makaangkon sa gahum sa pagkapari. Kinahanglan nga adunay mga propeta ug mga Apostoles. Kinahanglan nga adunay mga pagpadayag.

Ang mga pagpadayag nagagikan kang Jesus. Ang mga pagpadayag nagsaysay kanato ug mga butang nga buot ni Jesus nga atong masayran. Kini nagtudlo unsay iyang buot ipabuhat kanato. Si Jesus naghatag ug mga pagpadayag ngadto sa iyang mga propeta. Ang mga pagpadayag alang sa iyang tinuod nga simbahan.

Ang Pagtulun-an ug mga Pakigsaad maoy usa ka basahon sa mga pagpadayag. Ang Pagtulun-an ug mga Pakigsaad nagsaysay mahitungod sa tinuod nga Simbahan ni Jesukristo. Kini nagsaysay mahitungod sa gahum sa pagkapari. Kini nagsaysay mahitungod sa mga propeta ug mga Apostoles. Ang Pagtulun-an ug mga Pakigsaad nagsaysay unsay atong kinahanglan nga buhaton aron maandam sa panahon nga si Jesus moanhi pag-usab.

Ang basahon nga imong gibasa mao ang mahitungod sa Pagtulun-an ug mga Pakigsaad. Kini nga basahon nagsaysay mahitungod sa pipila sa mga pagpadayag. Kini nagsaysay giunsa sa pagdaia pagbalik ang tinuod nga Simbahan ni Jesukristo sa yuta. Kini usab nagsaysay mahitungod sa pipila ka mga katawhan kinsa nagpuyo sa panahon nga ang Simbahan nasugdan.