“Kapitulo 22: Ang Mga Santos sa Missouri: Hulyo–Agosto 1831,” Mga Istorya sa Pagtulun-an ug mga Pakigsaad (2002), 84–88
“Kapitulo 22,” Mga Istorya sa Pagtulun-an ug mga Pakigsaad, 84–88
Kapitulo 22
Ang Mga Santos sa Missouri
(Hulyo–Agosto 1831)
Ang Properta Joseph Smith, Sidney Rigdon, Edward Partridge, ug uban pa nangadto sa Missouri. Sila malipayon kaayo nga mangadto. Sila buot nga motukod sa siyudad sa Zion. Sila buot nga ang Ginoo mopakita kanila sa hustong dapit.
Sila mipanaw sa usa ka bahin sa agianan sakay sa bapor. Sa dihang miabut sila sa Missouri, si Joseph buot nga molakaw. Siya nasayud nga ang yuta sa Missouri sagrado. Siya buot nga motan-aw niini.
Si Joseph ug ang iyang mga higala milakaw ug 300 ka milya ngadto sa Jackson County. Kini init, apan wala sila manumbaling. Sila buot moadto ngadto aron sa pagtukod sa Zion.
Ang propeta ug ang iyang mga kahigalaan nangadto sa Jackson County, Missouri. Mga misyonaryo gikan sa Kirtland misugat kanila.
Human sa pipila ka mga adlaw ang mga Santos gikan sa New York nangadto usab sa Jackson County. Matag usa nagmalipayon didto.
Ang Propeta Joseph ug Bishop Edward Partridge misulti sa mga katawhan unsa ang buhaton. Ang uban kinahanglan mopalit ug yuta sa Missouri. Si Oliver Cowdery ug William W. Phelps kinahanglan magsugod ug mga eskuwelahan. Sila kinahanglan mosulat ug mga basahon nga mabasa sa mga gagmay nga kabataan.
Si Joseph buot masayud asa gayud itukod ang siyudad sa Zion. Siya miampo sa Langitnong Amahan. Ang iyang pag-ampo gitubag.
Ang Ginoo miingon nga ang Zion tukuron duol sa siyudad sa Independence sa Jackson County, Missouri. Ang Ginoo misulti kang Joseph asa itukod ang templo. Siya milngon nga ang Zion dili pa tukuron. Ang mga Santos aduna pay daghan nga mga kasamok. Apan sila makatukod sa Zion kon sila adunay igo nga hugot nga pagtuo.
Ang Ginoo misulti kang Joseph nga ang mga Santos kinahanglan mosunod sa balaod sa Missouri. Sila kinahanglan nga mosunod sa mga kasugoan sa Dios. Sila kinahanglan mohimo ug daghang mga butang nga dili na kinahanglan sultihan. Ang mga Santos kinahanglan maghinulsol sa ilang mga kasal-anan. Ang Ginoo dili mahinumdom sa mga kasal-anan kon ang mga katawhan maghinulsol.
Ang Ginoo miingon nga si Sidney Rigdon kinahanglan mopahinungod sa yuta. Si Sidney Rigdon nangutana sa mga Santos kon sila mapasalamaton ba sa yuta. Siya nangutana kon sila motuman ba sa tanan nga mga kasugoan sa Dios. Ang mga Santos miingon, “Oo.” Unya si Sidney Rigdon nag-ampo ug nagpahinungod sa yuta.
Sa sunod nga adlaw si Joseph Smith, Oliver Cowdery, Sidney Rigdon, ug pipila sa ilang mga higala may panagtigum. Sila nagkatigum sa usa ka talagsaon nga dapit sa Independence. Sila nagbasa sa mga kasulatan. Unya sila nag-ampo. Si Joseph Smith mipahinungod sa dapit nga tukuran ug templo.
Ang tanan nga mga Santos sa Missouri miadto sa komperensya. Sila napuno sa Espiritu Santo. Si Joseph misulti sa mga Santos nga ang Dios mopanalangin kanila kon sila motuman sa ilang mga saad.
Human sa pipila ka mga adlaw si Jesus mihatag kang Joseph ug lain nga pagpadayag. Siya miingon nga ang Domingo usa ka talagsaon nga adlaw. Ang Domingo mao ang adlaw nga kita mohimo ug mga butang aron pagtabang kanato sa paghinumdom ni Jesus. Kita kinahanglan dili motrabaho sa Domingo. Kita kinahanglan moadto sa Simbahan ug makig-ambit sa sakramento. Kita kinahanglan maghinulsol sa atong mga kasal-anan. Kita kinahanglan moduaw sa mga masakiton. Kita kinahanglan magpasalamat sa tanan natong mga panalangin. Kita kinahanglan kanunay nga mosunod sa mga kasugoan sa Dios.
Ang mga Santos kinsa mobuhat niining mga butanga makabaton sa tanang maayo nga mga butang nga ilang gikinahanglan. Sila adunay mga pagkaon, mga saput, mga balay, ug mga tanaman. Sila magmalipayon. Sila adunay kalinaw sa ilang kinabuhi. Sila adunay kinabuhing dayon.