“Kapitulo 58: Ang Unang mga Santos Mibiya sa Nauvoo: Septyembre 1845–Pebrero 1846,” Mga Istorya sa Pagtulun-an ug mga Pakigsaad (2002), 209–11
“Kapitulo 58,” Mga Istorya sa Pagtulun-an ug mga Pakigsaad, 209–11
Kapitulo 58
Ang Unang mga Santos Mibiya sa Nauvoo
(Septyembre 1845–Pebrero 1846)
Human mapatay si Joseph Smith ang mga manggugubot nga panon nagtuo nga ang Simbahan matapos. Sila wala masayud nga ang Ginoo mopili ug usa ka bag-o nga pangulo. Ang mga manggugubot nga panon buot nga gub-on ang Simbahan. Ang mga pamantalaan namakak mahitungod sa mga Santos. Sila nag-ingon nga ang katawhan gipamatay ug gipangawatan sa mga Santos.
Ang gobernador sa Estado dili motabang sa mga Santos. Siya nag-ingon nga ang mga manggugubot nga panon nagdumot kanila. Siya misulti sa mga Santos sa pagbalhin paingon sa Kasadpan. Si Brigham Young miingon nga ang mga Santos moadto gayud sa Kasadpan. Apan nagkinahanglan sila ug panahon aron sa pagpangandam. Nagkinahanglan sila ug salapi aron pagpalit ug mga pagkaon ug saput. Kinahanglan sila maghimo ug mga karomata ug mopalit ug mga baka. Kinahanglan ilang ibaligya ang ilang mga balay.
Ang manggugubot nga panon wala mohatag sa mga Santos ug igong panahon aron sa pagpangandam. Ang mga katawhan wala mopalit sa mga pinuy-anan sa mga Santos. Ang manggugubot nga panon miabug sa uban nga mga Santos sa pagbiya sa ilang mga pinuy-anay. Ilang gipangawat ang mga butang gikan sa mga kabalayan. Unya ilang gisunog ang mga kabalayan.
Ang mga Santos mitrabaho pag-ayo aron sa pagpangandam sa pagbiya sa Nauvoo. Sila namutol ug mga kahoy aron sa paghimo ug mga karomata. Sila namalit ug mga kahayupan. Sila nangandam ug pagkaon. Ang mga Santos buot nga mahuman ang templo sa dili pa sila mobiya.
Ang mga Santos mihatag ug kwarta aron itukod ug templo. Mitrabaho sila sa templo. Nahuman nila ang daghan nga mga lawak. Ilang gipahinungod ang matag lawak sa pagkahuman niini. Sila migamit ug usa ka lawak aron sa pagbunyag sa katawhan alang sa mga patay. Aduna silay usa ka komperensya sulod sa templo alang sa tanang sakop sa Simbahan.
Miabut ang panahon sa tingtugnaw. Kini tugnaw kaayo. Ang mga manggugubot nga panon miabug sa daghan nga mga Santos sa pagbiya sa ilang mga pinuy-anan. Gikarga sa mga Santos ang tanan nilang mga butang sa ilang mga karomata. Ilang gisakay ang mga karomata sa lapad nga mga barko. Nanabok sila sa suba sa Mississippi.
Hilabihan ang katugnaw nga ang suba nahimong yelo. Si Brigham Young ug pipila sa mga Santos nanakay sa ilang mga karomata sa pagtabok sa suba nga nahimong yelo.
Ang mga Santos namahulay sa daplin sa suba. Ang uban nga mga katawhan walay igo nga mga saput. Sila gipanugnaw kaayo. Ang uban kanila walay igo nga pagkaon. Ang mga Santos nga adunay igo nga pagkaon ug mga saput nakig-angay sa uban. Ang mga Santos namahulay sa daplin sa suba sulod sa pipila ka mga adlaw. Unya sila nanglakaw ug naghimo ug lain nga kampo. Si Brigham Young mipili ug mga pangulo. Ang mga pangulo nanabang sa mga katawhan sa pagpangandam aron sa pagbiyahe ngadto sa mga kabukiran sa Kasadpan.