“Kapitulo 51: Ang Kapunongan sa Maghuhupay: Marso 1842,” Mga Istorya sa Pagtulun-an ug mga Pakigsaad (2002), 186–89
“Kapitulo 51,” Mga Istorya sa Pagtulun-an ug mga Pakigsaad, 186–89
Kapitulo 51
Ang Kapunongan sa Maghuhupay
(Marso 1842)
Ang mga sakop sa Simbahan nagtukod sa templo sa Nauvoo. Ang mga saput sa mga kalalakin-an nangadugta na. Ang mga kababayen-an buot motabang kanila. Usa ka babaye miingon nga iyang himoan ug mga saput ang mga kaialakin-an. Apan siya walay salapi nga ikapalit ug panapton.
Si Sarah M. Kimball miingon nga iyang hatagan ang mga kababayen-an ug pipila ka mga panapton. Si Sister Kimball mihangyo sa ubang mga kababayen-an sa pagtabang. Ang mga kababayen-an naghimo ug usa kapanag tigum sa pinuy-anan ni Sister Kimball. Sila nakahukom nga magtukod ug usa ka kapunongan alang sa mga babaye sa Simbahan.
Ang mga kababayen-an mihangyo kang Eliza R. Snow sa pagsulat ug mga lagda alang sa kapunongan. Siya midala sa mga lagda ngadto kang Joseph Smith. Si Joseph Smith miingon nga maayo ang mga lagda. Apan miingon siya nga ang Ginoo adunay labaw pang maayo nga laraw alang sa mga kababayen-an.
Si Joseph Smith mihangyo sa mga kababayen-an sa pagtambong sa usa ka panagtigum niadtong 17 sa Marso 1842. Siya miingon nga ang mga pangulo sa pagkapari motabang sa mga kababayen-an sa ilang kapunongan. Dihay napulo ug walo ka mga babaye nga mitambong sa panagtigum. Si Emma Smith maoy napili nga pangulo sa mga kababayen-an. Sila mitawag sa ilang kapunongan ug Kapunongan sa Maghuhupay.
Si Joseph Smith misulti sa mga kababayen-an sa pagtabang sa katawhan nga mga masakiton ug mga kabus. Sila gayud motabang sa katawhan sa bisan unsang panabang nga ilang gikinahanglan. Ang bishop motabang sa mga kababayen-an sa pagkasayud unsay buhaton.
Ang mga kababayen-an naghimo ug mga panagtigum aron makakat-on sa mga butang angay nilang masayran. Sila nalipay kaayo nga makatabang sa mga sakop sa Simbahan.
Ang mga kababayen-an naghimo ug mga butang alang sa templo. Sila naghimo ug mga saput alang sa mga lalaki nga nagtukod sa templo.
Ang mga kababayen-an nagdala ug mga pagkaon sa mga katawhan nga nagkinahanglan niini. Sila nag-alima sa katawhan nga mga masakiton. Sila nagbuhat ug daghang mga butang sa pagtabang sa mga Santos.
Ang mga kababayen-an sa Simbahan makadangop ngadto sa Kapunongan sa Maghuhupay. Sila motabang sa katawhan. Sila makakat-on bahin sa ebanghelyo. Sila makakat-on bahin sa katawhan sa ubang kayutaan. Sila makakat-on bahin sa mga maayong basahon, musika ug arte. Sila makakat-on unsaon pagpatahum sa ilang mga pinuy-anan.