“Kapitulo 63: Ang mga Santos sa Rocky Mountains: Hulyo 1847,” Mga Istorya sa Pagtulun-an ug mga Pakigsaad (2002), 230–33
“Kapitulo 63,” Mga Istorya sa Pagtulun-an ug mga Pakigsaad, 230–33
Kapitulo 63
Ang mga Santos sa Rocky Mountains
(Hulyo 1847)
Nagsugod sa pagtukod ug usa ka siyudad ang unang mga pumupuyo didto sa dakong Walog sa Salt Lake. Ilang ginganlan ang siyudad ug Salt Lake. Si Brigham Young mipili ug usa ka dapit nga tukoran sa templo.
Gibahin ni Brigham Young ang siyudad. Matag banay adunay yuta alang sa balay ug sa umahan. Ang unang mga pumupuyo nagtukod ug balay nga hinimo sa truso. Sila nananom ug mga lagutmon. Sila mitrabaho pag-ayo. Si Brigham Young mitudlo sa mga Santos nga kinahanglan motrabaho ang matag usa alang sa unsay iyang panginahanglan.
Gibahin ni Brigham Young ang siyudad ngadto sa lima ka mga wards. Mitukod dayon ug mga Simbahan ang katawhan. May dugang pang nangabut nga unang mga pumupuyo sa walog. Sa wala madugay diha nay napulo ug siyam ka mga wards.
Ang unang mga pumupuyo nagpasiugda ug usa ka eskwelahan. Ang mga klase ug mga tigum sa simbahan anha lamang sa maong eskwelahan. Sa wala madugay gisugdan ang Eskwelahan ma-Domingo.
Si Brigham Young mipadala ug mga misyonaryo sa ubang mga dapit tabok sa dakong lawod. Adunay mga dapit nga diyutay ra ang katawhan nga nagpasakop sa Simbahan.
Sa ubang mga dapit daghang katawhan ang mituo sa mga misyonaryo. Sila nagpasakop sa Simbahan. Daghan kanila ang buot mopuyo uban sa mga Santos sa Dakong Walog sa Salt Lake. Sila mitabok sa dakong lawod sakay sa bapor.
May mga tawo nga nakatabok sa kapatagan sakay sa mga karomata nga tinaptapan. Apan ang ubang mga katawhan walay salapi aron ipalit ug mga karomata. Sila mihimo ug mga kariton nga duhay Iigid. Ang unang mga pumupuyo mikarga sa ilang mga butang sa kariton. Ilang giguyod ug gihandos ang mga kariton tabok sa kapatagan. Malisud nga buluhaton ang pagduso sa kariton. Ang uban nga katawhan nangasakit ug nangamatay.
Si Brigham Young usa ka maalamon nga pangulo. Iyang gipadala ang mga kalalakin-an ug ang ilang mga banay sa laing mga dapit sa Kasadpan. Ang ubang mga Santos mitukod ug mga lungsod sa California. Ang ubang mga Santos mitukod ug mga lungsod didto sa Idaho, Arizona, ug Wyoming. Ang ubang katawhan nasubo nga mobiya sa ilang mga pinuy-anan. Apan sila misunod kang Brigham Young.
Ang mga Santos nahiagum sa daghang mga kasamok. Usahay ang ilang mga tanom dili motubo. Ibanlas sa lunop ang ilang mga umahan. Usahay kawaton sa mga Indian ang ilang mga butang o sila patyon.
Si Brigham Young misugo sa mga Santos nga ayuhon nila ug tagad ang mga Indian. Gihatagan sa mga Santos ang mga Indian ug pagkaon. Daghan sa mga Indian ang nahimong mga higala sa mga Santos.
Ang mga Santos misugod paghimo ug mga templo sa kasadpan. Niadtong 1853 ilang gisugdan pagtukod ang templo sa Siyudad sa Salt Lake. Sila mitrabaho sulod sa kap-atan ka mga tuig sa pagtukod sa templo. Ang mga Santos nakatukod pa ug laing tulo ka mga templo usa pa mahuman ang templo sa Salt Lake. Sila mitukod sa templo sa St. George, ang Templo sa Logan, ug ang Templo sa Manti.